Logo YouVersion
Icona Cerca

Mark 4

4
1Ka Mâ‐a yalě pě iyokudě baka na etima; ka ebumbu eněně ya yolaně o Mâ‐a jadi, ka Mâ‐a vama o elende, ka Mâ‐a diya o etima: ebumbu yěhěpi e diyakindi piěle na etima o uhěkě. 2Ka Mâ‐a yokudě bâ belombo beitě na mekanakâdi, ka Mâ‐a vâ na bâ o iyokwanidi viaju, 3na, Yokolakiděni, uliyi u kěki ka liya ibângâ: 4E diyakindi, o mâ‐a mwanjakidi, jaka i kwakindi o pěpěkě ja njeya, ka lonâni la oba la viya ka sâsâ jâ. 5Ka jâkâ ja kwa o beěngě, o ha diyaki na mahě maitě; elěngiaha tepě ka jâ‐ja puma, ’kabojana ju diyaka na ndiba ya mahě. 6O joba i pumidi ka jâ‐ja bâmbâlâniya; o jâ i ha diyakidi na metamba, i vivilanakiyendi. 7Ka jâkâ ja kwa o mekanda, o mekanda me tombuwedi ka meâ mea ha jâ kâlu, i yěkěme bebuma. 8Ka jâkâ ja kwa o mahě mayamu, ka jâ‐ja yěkěmě bebuma, i ka tombwaka, i ka vuhaka, ka jâ‐ja yěkěmě bebuma beitě, jâkâ mabo malalo, jâkâ mabo utoba, jâkâ kama. 9Ka Mâ‐a vâ na bâ, na, A di na matâ ma yokakě, a yokake.
10O Mâ‐a diyaki dipâ, ba diyaki na Ju na jomu na bebale, ba uwaki Mâ ukanakâdi tě. 11Ka Mâ‐a vâ na bâ, na, Inyěni nd‘ o didini věwěngo iyowě ja mahâwě ma ipangiya ja Anyambě: ndi o ba ha ’bě vemengo belombo těkabe beěhěpi be hakwě na mekanakâdi: 12Boyěněkě ba ka yěněte, ndi ba yowe; boyokaka, ba ka yokate, ndi ba bweyidě; o banga ba ’luwa egombe t‘ egombe, na mabe mabu ma ’yidwě bâ. 13Ka Mâ‐a vâ na bâ, na, Wa ’wěni ukanakâdi těkamu? nd‘ o ka yowě li mekanakâdi meěhěpi na e? 14Uliyi a liyakandi ndaga. 15Ekaba ndi ba pěpěkě ya njeya o ndaga i liyakwě, o bâ‐ba běkě yokango, na Setan a viya ka nângâ ndaga i liyakudwě o melema meabu. 16Ekaba tepě ba liyakwě o beěngě, ba běkě ndaga yokango, na bâ‐ba hungana o pahiya yâ na mbya: 17ndi bâ mětě ba diye na metamba, ovaně nd‘ o bâ‐ba diyakě o ’gombe; kwěi o betuniya na njuke be ka pâyě o nyanga ya ndaga, elěngiaha na bâ‐ba kâbâ. 18Ekaba ndi ba liyakwě o mekanda; ba běkě ba yoka ndaga, 19manaka ma eměnâ těkae, n‘ iyabana ja boněně, n‘ ivaha ja belombo bepâkwě, o beâ be ka ngiyě, vâkâna be weyakandi ndaga, na yâ‐ya bě ekomba. 20Ekaba ndi ba liyakwě o mahě mayamu: ba běkě ndaga yokango, na bâ‐ba pahiya yâ, na bâ‐ba ka yěkěměkě bebuma, bâkâ mabo malalo, bâkâ mab‘ utoba, bâkâ kama.
21Ka Mâ‐a vâ na bâ, na, Vitwa vi vanakwěndi ka vamwě o ibongalo ja kwe, na b‘ ibongalo j‘ ikondo? ipě ka tědwě o uhângâ? 22O ibě na ’lombo e di kutamango e ka měndě e yowaně, tombe na e jadi ilimbo vâkâna e ka pâdwěte o bwe. 23A di na matâ ma yokakě, a yokake. 24Ka Mâ‐a vâ na bâ, na, Bandamakidi nyang‘ ’anyu e yokakě: nyanga ’anyu e ka yějěně, yâ tepě e ka yějwěně inyěni; ba ka yokě inyěni o jadi, te ba ka věwě wa. 25A janidi mâ t‘ a ka věwě, a ha ’bě ně a ka nângânwěndi tombe na eaju e duwakě.
26Ka Mâ‐a vâ, na, Ipangiya ja Anyambě i ndi kakana, bwěsě ona moto a mwanjaka ibângâ o he; 27na mâ‐a ka yaka, a ’mwaka bulu ma mwehe, na ibângâ ja pumě na jâ‐ja tombuwa, a yowě ka yâ e jadi. 28Ikabojana he e pumakěte bebuma beaju mětě; o bohoboho nd‘ utondo, nandi běngě molo u pâke, kwě běngě mihâ mětě ma pumake o molo. 29Nd‘ o ebuma e běkě yâdângo, elěngiaha vâkâna a lomakandi ubenji, ’kabojana juma i pândi.
30Ka Mâ‐a vâ, na, Ipangiya ja Anyambě ho ka kwanidě lě jâ na nja ’lombo ě? na ka yějě lě jâ na nja ukanakâdi? 31E t‘ ona utonga mua ’buma ya mustard, e jadi, o yâ e liyakwě o he, bohâlě wa na bebuma bepâkwě be jadi o he: 32nd‘ o yâ e běkě liwěngo na yâ‐ya tombuwa, na yâ‐ya bě eněně wa na bele bepâkwě behâlě, na yâ e ka hambakidě melabe meněně, ovaně nd‘ o lonâni la oba lo diyakě o edingiha ya yâ.
33A kalaki na bâ ndaga na mekanakâdi těkame meitě, nyanga ’abu e diyaki na ngudi e yokakě. 34Nd‘ Au kalaka na bâ kabo na ukanakâdi; o Mâ‐a diyaki na beyokwedi beaju dipâ, ka Mâ‐a pěhě bâ belombo beěhěpi.
35Bâ buhwa tě, o yâ e diyaki kolo, ka Mâ‐a vâ na ba, na, Ho jabwakeni o mwidi ’pâkwě. 36O bâ‐ba běkidi ebumbu ’a bato timběngo, ka bâ‐ba nângâ Mâ ka Mâ‐a diyakidi o elende; belende bepâkwě be diyaki tepě na Mâ. 37Ka ekudikudi ya upupě ya vunga; mekeba me bweyaka elende; e ka ’mbaka o hinga. 38A diyakindi o mahina bya o epondoma; ka bâ‐ba ’mudě Mâ, ka bâ‐ba vâ na Ju, na, Uyokwidi, wa yěněk‘ isâlâ, na o banga hwa? 39Ka Mâ‐a ’muwa, ka Mâ‐a kandidě upupě, ka Mâ‐a vâ na etima, na, Běmbělě, hwěměkiyě. Ka upupě mu‐a wa, mu‐a bě uděmbě uněně. 40Ka Mâ‐a vâ na bâ, na, e lě nde ya Jângâ tě iněně ekadi? E lě nd‘ eanyu e ha ’bě n‘ ikamidě? 41Ka bâ‐ba banga jângâ iněně, ba ka himaka bâ mětě na bâ mětě, na, Ekaně moto a lě nja jângâ ě, tombe upupě na etima bea yokiyate Mâ.

Attualmente Selezionati:

Mark 4: BNG1895

Evidenziazioni

Condividi

Copia

None

Vuoi avere le tue evidenziazioni salvate su tutti i tuoi dispositivi?Iscriviti o accedi