Mark 10
10
1Ka Mâ‐a ’muwa oviya ovaně, ka Mâ‐a pâ o betěbě bea Judia baka na mwidi ’pâkwě mua Jordan: ka bebimba bea yolaně pě o Mâ‐a jadi, ka Mâ‐a yokudě pě bâ ka mběmbě.
2Ka Farisi ja viya o Mâ‐a jadi, ka bâ‐ba uwa Mâ, na, E te hohonganěngo na momo a valakidě mwad‘ ’aju? boyějěkiyě Mâ. 3A yavwanakindi, ka Mâ‐a vâ na bâ, na, Mosěs a sombiyakidě lě inyěni na? 4Ka bâba vâ, na, Mosěs a bâbâkindi na ho lěnděke ejanganangobo ya ivěngidě, na mâ‐a valudwě. 5Ka Jisus a yavwana, ka Mâ‐a vâ na bâ, na, Melema meanyu mekolo meâ ndi meaju me lěnděněkidi ’nyěni ndaga těkaně: 6Ndi, oviya jali ja ivelwě, Anyambě a velaki bâ momo na mwajo. 7Yâ tina těkaně ndi ya moto e ka dikě hangwě na nyangwě, na mâ‐a ka kangalanakě na mwad‘ ’aju; 8na bâ babale ba ka diyaka uhoni umbâkâ; ovaně vâkâna ba ’bě pě babale kabo uhoni umbâkâ. 9Moto a palwakidě pě ya Anyambě e di latěngo ta. 10O ndabo ka beyokwedi beaju ba uwa pě Mâ upako těmuně. 11Ka Mâ‐a vâ na bâ, na, A ka validě mwad‘ ’aju na mâ‐a ba upâkwě, a handi ’honde opěl‘ aju. 12Oningě mwajo a validě momi ’aju, na mâ‐a ba upâkwě, vâkâna a handi ’honde.
13Ka bâ‐ba vana ba nděmbě o Mâ‐a jadi nana A kupanakě bâ; ka beyokwedi bea kandidě ba ma vanaka bâ. 14Ndi Jisus, o Mâ‐a yěni nonaně, a numbaki nangudi, ka Mâ‐a vâ na bâ, na, Dikakani ba‐nděmbě, o kandakidi bâ ni ba vake o ’Mba‐mbi jadi, ’kabojana jâ jângâ tědině ndi ja ipangiya ja Anyambě. 15Pâkwěpâkwě Mbi vâki n‘ inyěni, na, A ka měndě a věhělidě ipangiya ja Anyambě ona mwa nděmbě a ngiye omě na vilolombo. 16Ka Mâ‐a nângâ bâ na benâ beaju, ka Mâ‐a kahidě bâ makadu maju, ka Mâ‐a vambiya bâ ibâtâ.
17O Mâ‐a diyakidi a vala o njeya, k‘ umbâkâ a viya umbila, ka mâ‐a balamiya Mâ, ka mâ‐a uwa Mâ, na, Uyokwidi uyamu, mbi ka ha lě nja ’lombo ě eamě e ka jiganě eměnâ ya ’gombe yěhěpi? 18Ka Jisus a vâ na mâ, na, E lě nde ’âvě e tubakě ’Mba, na, Uyamu? O ’bě na uyamu kabo ’mbâkâ, mâ ndi Anyambě. 19O te yowěngo belekanako, O diyake n‘ ihonde, O weyake moto, O ibake, O langwanakiye evela, O balanake, Hekakidě hângwě na nyângwě. 20A yavwanakindi, ka mâ vâ na Ju, na, Uyokwidi, mbi tatite ekabe beěhěpi oviya nděmbě ’amě. 21Jâ ndi ja Jisus ja hilě mâ, A tândâkâ mâ, ka Mâ‐a vâ na mâ, na, Ndi o na elombo yâkâ eâvě e di dikanango; kěkě, wa ’la ka hambidě ibeâvě be janidi, wa vě beâ mekuge, vâkâna wa bi na hika o Hěvěn; na nâvě wa viya ka nângâ krâs, o ka vitakě ’Mba. 22A yěněkindi ndaga tědině njuke, ka mâ‐a vala na ngěbě: ’kabojana a diyakindi na jumba iněně.
23Ka Jisus a tamuwa kěběngě kěběngě, ka Mâ‐a vâ na beyokwedi beaju, na, e ndi Bokolo boitě ba di na hika eitě, ba ngakiya o ipangiya ja Anyambě! 24Ka beyokwedi bea mamana ndaga jaju. Ndi ka Jisus a yavwana pě, ka Mâ‐a vâ na bâ, na, Bana, bokolo mětě boa ba pitakidě hika, ba ngakiya o ipangiya ja Anyambě! 25E ndi bobâbu na kaměl e pudunganaka ubana mua tombo wa na moto a di kenango a ngakiya o ipangiya ja Hěvěn. 26Ka bâ‐ba mama nangudi, ba ka vâkâ bâ mětě na bâ mětě, na, Ndi nja ka yâlě o yonga? 27Ka Jisus a tamuwa bâ, ka Mâ‐a vâ, na, Na bato e ’bě na ngudi e hamake, ndi hanga na Anyambě, ’kabojana belombo beěhěpi be ka haniyate na Anyambě. 28Jâ ndi ja Pitě ja yalě o vâ na Ju, na, Ho senji beěhěpi na vitě Âvě. 29Jisus a yavwanakindi, ka Mâ‐a vâ, na, Pâkwěpâkwě, Mbi vâki n‘ inyěni, na, O ’bě na moto a di senjango ndabo, tombe bana ba nyangwě, tombe maluku, tombe hangwě, tombe nyangwě, tombe mwajo, tombe bana, tombe ’hiki o nyang‘ ’amě na sango’yamu, 30ndi a ka pahiyandi kama ya njo kya těkaně okava, mandabo, na bana ba nyangwě, na maluku, na nyangwě, na bana, na ’hiki, na ingongoludwě ta; nd‘ o ’hiki e vakě eměnâ ya ’gombe yěhěpi. 31Ndi, baitě ba jadi ba bohoboho ba ka di pě o mbuhwa; na ba mbuhwa ba ka diyi pě o bohoboho.
32Ba diyakind‘ o njeya ba betaka nala Jěrusalěm; ka Jisus a vala o boho; ka bâ‐ba mama; ba ma bangakandi o bâ‐ba vitanakidě Mâ. Ka Mâ‐a nângâ pě jomu na babale, ka Mâ‐a yalě bâ ilanguwa ja be ka hamě o Mâ‐a jadi, 33na, Umbwakiyate, ho betakandi o Jěrusalěm; Mwana moto a ka kândudwěndi o prist ja meolo na Balěndi ba jadi, na bâ‐ba ka kwehi Mâ na A wake, na bâ‐ba bweyidě Mâ Jěntail; 34ba ka věhi Mâ, na bâ‐ba ka bomaka Mâ, ba ka tuwakiya Mâ malě, na bâ‐ba weya Mâ; o buhwa boa ilalo na Mâ‐a pumbuwa pě.
35Ndi Jems na Jân bana ba Zěbědi ba kěkindi o Mâ‐a jadi, na, Uyokwidi, ho vahakand‘ Âvě‐o haka hwě elombo ’ahu e ka yombuwa. 36Ka Mâ‐a vâ na bâ, na, O vahaka li ’Mba ni, Mbi hak‘ inyěni nja ’lombo ě? 37Ka bâ‐ba vâ na Ju, na, Věkě hwě nana ho diyake, ’mbâkâ o ’nâ ’âvě eyomi, ’mbâkâ o en‘ ’âvě ya ’měngwě o ivenda jâvě. 38Ndi ka Jisus a vâ na bâ, na, Wa ’wěni eanyu e uwakě, o t‘ o yâlâkěni o mâtâni sěngě ’amě e mâtânâkě? na o baptaiswě na baptisma ’amě e ka baptaiswě? 39Ka bâba vâ na Ju, na, Ho ka yâlěte. Ka Jisus a va na bâ, na, O ka mâtateni sěngě ’amě e mâtâkě mbambaye, na baptisma eamě e ka baptaiswě yâ tepě eanyu e ka baptaiswě: 40ndi, o diya o ’nâ ’amě eyomi, na o ’nâ ’amě ya ’měngwě, e ’bě ’amě e věkě; nd‘ e ka věwi bâ‐ba di yâ kenjwěngo. 41Nd‘ o jom‘ i yoki yâ, ka bâ‐ba yalě inumba iitě na Jems na Jân. 42Ka Jisus a ndiya bâ, ka Mâ‐a vâ na bâ, na, O yowuděteni na ba těkudwě mepolo mea Jěntail ba pangakiyi bâ; na baněně ibabu ba pangakiya bâ na ngudi. 43Nd‘ e diyake nonaně n‘ inyěni; ndi uěhěpi a ka vahě o diya uněně o inyěni o jadi, t‘ a ka diyě udili muanyu: 44ndi uanyu uěhěpi a ka vahě o diya o molo, t‘ a ka diyě uhayi mua běhěpi. 45Pě lě Mwana moto a vaka ka hadwě ndi ka hana, na ka vě eměnâ ’aju ivango ja baitě.
46Ka ba pâ o Jěriko; o Mâ‐a diyakidi a věngěmě o Jěriko na beyokwedi beaju na ebimba eněně, pâgu Bartimeus, mwana ua Timeus, a diyaki diya o pěpěkě ya njeya a jombanaka. 47O mâ‐a yoki na A Jisus ya Nazarěth, ka mâ‐a yalě o yama, na, Jisus, Mwana Devid, yokakiya ’mba ngěbě. 48Ka bato baitě ba kandidě mâ nana a diyake dâ, ndi ka mâ‐a yama pě nangudi, na, Mwana Devid, yokakiya ’mba ngěbě. 49Ka Jisus a těmě de, ka Mâ‐a vâ na a ndakudwě; ka bâ‐ba ndiya pâgu tě, bâ, na, Yěněkě mbya, umwaka; A ndakiyand‘ âvě. 50Ka mâ‐a ’hwa ngâi ’aju, ka mâ‐a ’muwa nala Jisus a jadi. 51Jisus a yavwanakindi ka Mâ‐a vâ, na, O vahaka lě na Mbi hake âvě nja ’lombo ě? Ka pâgu ya vâ na ju, na, Paia o, mbi pahakiye iyěně. 52Ka Jisus a vâ na ju, na, Kěkě, ikamidě jâvě i yongiděnd‘ âvě. Elengiaha tepě ka mâ‐a pahiya iyěně, ka mâ‐a vitaně Jisus o njeya.
Attualmente Selezionati:
Mark 10: BNG1895
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1895.
