Logo YouVersion
Icona Cerca

Luke 3

3
Zaa Batise -bhulɛ Lagɔ 'na weli
(Matie 3.1-12; Malke 1.1-8; Zaa 1.19-28)
1-Sɔɔdɛku 'Kamalenyɔ Tibɛle Sezale me 'awɔ 'ŋlu 'na 'ylobɛ kogbɔ 'umgbu nɛ -wɛ "me, Pɔse Pilate 'kamalea Zude -glɔ. Elode Atipa 'kamalea Galile-glɔ 'ɔ "nɔwli Filipo 'kamalea Itule "ne Tlakonitide, Lizaniase 'kamalea Abilɛne. 2Aane "ne Kayifo 'waa- -noɔ 'awɔ -lɔ bɔbɔnya "yitia 'waa. Lɔbhɔ -wɛ 'ye Zaa Zakali yowli 'nole- -lɔ Lagɔ 'na bhulɛweli 'kɔsɛku "me. 3Zaa -me Zludɛbɔ yɔko. 'Ɔ bhulɛle 'nyakpa nɛɛ: «'A 'bhelia- 'anyɛɛ kosɛ -nyɛnye -wɛ kɔ. 'A yle batɛme -se Lagɔ "kɛ 'anyɛɛ 'nyinyonoli 'na gbo 'yi 'tale-.» 4"Ne -ye "guɔkwɔmenyɔ Ezayi kɛle- 'ɔnɛɛ "bɔgo "me -wɛ yi -lɔ 'yli 'wlole. 'Ɔ nɛɛ:
'Nyɔkpɔ -bholo "kpale 'kɔsɛku "me, 'ɔ nɛɛ:
«'A -sɛ Anyinɛnyɔ 'na -gwe,
-se 'a 'jeɛ -kɛ 'wli gbii.» 5'Sɔkɔ 'klekle yi kɔlɔ-,
Tlo 'klekle yi bhuluɔ-,
'A 'jea- -gwe -ɛ ciceɔ- "me -wɛ 'wli,
'A 'bhlɛ- -gwe.
6 -Se -glɔnya 'klekle 'cɛ 'ylime 'ye
-Gbɔ Lagɔ yua 'fuɔ.
7Sɛne Zaa -bhulɛle lɛ Zakpɛ 'na -ɛ yilu lo -wɛ, "ne 'ɔ 'nyoa batɛme -wɛ, 'ɔ nɛɛ: «"Ŋwetɛbhea 'na -zakpɛ -lɛ, -ɔ -sloa bhɔ 'anye -see 'a "kɛ Lagɔ 'na 'kɛle -ɛ yi -wɛ nu 'bha- 'a? 8'A 'tlo- bhi, -se 'wa "kɛ 'sɛ yibhlele- -gbɔ 'a 'bheliɔ- kɔ. -Mɔ, 'a te -kɛ no -gbɔ nɛɛ: -Anye, Ablame 'na yua 'na yua 'ye -a -noɔ. Sɛne 'ye 'e bhulɛle lɛ 'anye nɛɛ: 'Tiyi ne, -ye 'a 'wolo dɛne "ku ne, Lagɔ 'yi Ablame 'na yua 'na yua "zoa-! 9-Dɛme ne, "gbupɛ 'pe- su -kpulu 'wɔ yɔko -se 'ɛ 'cɛ glu -sɛ. Zaa, su 'na -ɛ "ne tlo bhi 'na -bhi -wɛ yi 'ce 'kɔlɔ-, "ne 'ɛ yi 'ce -kosu "me 'pɔ-.» 10"Ne 'nyakpa 'na -zakpɛ yu -lɔ lo yɔbhɔ nɛɛ: -See -a 'na "zo bhɔ -tia 'a? 11Zaa nɛɛ: -Ɔ kɛ 'koti "sɔ -kɛ, 'ɔ 'nyɛ -ɔ "ne -kɛ -wɛ -bholo. -Ɔ -kɛ lilibɛɛ -kɛ, 'ɔ 'nyɛ me -wa "ne -kɛ -wɛ. 12-Lɛposanya -yi -me -se, Zaa "koa batɛme 'nyɛme. 'Wa 'yɔbhɔ Zaa lo, sloanyɔ, -see -a -na "zo bhɔ? 13Zaa nɛɛ: 'A te -lɛpo keyi pɔ, 'a 'libhi -ye 'wa ga -wɛ "ku cuu. 14"Slojanya 'yɔbhɔ me Zaa lo nɛɛ: -Anye "naa-, -ye -a -na no bhɔ? 'Ɔ nɛɛ: 'A te 'nyɔkpɔ 'dlasi kɔ -sɛ kpokposɛ. 'A te 'nyɔkpɔ gbo 'wlime gbli. 'A 'libhi -anyɛɛ peɛloɛ 'ɛyi kɔ "ku.
Zaa Batise -bhulɛ -ɔ "kɛ yi 'na weli
(Matie 3.11-12; Malke 1.7-8; Zaa 1.19-28)
15'Nyakpa -wa -kɛle 'dleku -wɛ 'yɔbhɔ -lɔ lo nɛɛ: «Zaa "ne bhɔ "ɛ 'Fuɔnyɔ ne, yɔ?» 16"Ne Zaa yi -lɔ no nɛɛ: «-Ame, 'ŋu "me 'e 'nyɛle -lɔ 'anye batɛme.» -Mɔ, 'nyɔkpɔ -bholo 'bhale -ame 'beme. 'Ɔ 'kpɔ- -kakaka "ne 'ɔ -zi -ame "ku. 'E "ne 'bhɛle- "ne 'e "kɛ 'ɔnɛɛ -kpɔklo 'na 'lu vulu-. 'Ɔyi, Zuzu Wlewle -nyɛ -kosu "bhaa "me 'ɔ "kɛ -lɔ 'anye batɛme 'nyɛle. 17'Ɔ -su -kɛ -bitɛ, 'ɔ "kɛ "me fo. -Ɛ 'nɛne -wɛ, 'ɔ 'cɛ wlo "me "zo -se 'ɔ "kɛ -didi -kosu 'na -ɛ -ka "ku nyimɔ -wɛ "me siɛle-. 18Zaa Batise "zo 'awɔ soɔ "ɛ 'nyakpa -wɛ 'de "me, "ne 'ɔ sɛloa 'awɔ -lɔ 'Denaade.
Elode 'pɔ- Zaa Batise -jiɛ "me
(Matie 14.3-4; Malke 6.17-18)
19Zaa Batise -bhle 'awɔ Elode weli 'klo. "Naa-, 'ɔ "nɔwli Filiipo 'na 'ŋɔnɔ Elodiade 'ye 'ɔ -kwɔ 'awɔ -lɔ zɛ. Li "nyɛnye 'klekle -ye Elode -no -wɛ, 'ɔ -sɔbhɔle. 20Elode 'bha- lɛ "ɛ doɔ ne, Zaa Batise 'ɔ 'pɔ- -lɔ -jiɛ "me, "naa-, 'ɔnɛɛ li "nyɛnye 'klekle -ye 'ɔ -no -wɛ, 'ɔ -sɛ -lɔ zɔ zɛ.
Zezu 'na batɛme
(Matie 3.13-17; Malke 1.9-11)
21'Nyakpa 'klekle -yle batɛme, Zezu 'nabhɛ -yle -me. 'Ɔ -ko bhubhɔ dɛku "ne "nɔgɔ yi -lɔ nuɔ 'diɔ. 22"Ne Zuzu Wlewle yi -lɔ Zezu 'wli 'kwile- sɛgbɛɛ -kobhlele, "ne weli yi -lɔ "nɔgɔ "me 'bhale-, 'ɛ nɛɛ: «'Neɛ -wawayu 'ye -e -noɔ -lɔ. -Eyi 'ye 'e -sɛ -lɔ 'ŋwɛnɛsɛ "ku lɔbhɔ.#3.22 Bhlɛgɔgɔbɔgo 'na -bedia nɛɛ: "Mɔ 'gwɛle -lɔ -eyi -zeka 'na zle ne "me. 'Mɔɔ -gwɛle -lɔ -zeka 'na zle "ne "me -eyi.»
Zezu 'ɔ 'to 'ɔ 'to 'wɔ
(Matie 1.1-17)
23Zezu -kɛ 'ylobɛ -glo -bholo 'ylobɛ kogbɔ "ne 'ɔ yi -lɔ 'ɔnɛɛ libhɔ "ku ci. 'Wa pɔ nɛ 'dle -gbɔ Zozɛfo 'na yu 'ye 'ɔ -noɔ nɛ. 'Ɔ 'to 'wa 'tɔ ne lɛ: Zozɛfo, 'ɔ 'to 'pa- Eli. 24Eli, 'ɔ 'to 'pa- Mata. Mata, 'ɔ 'to 'pa- Levi. Levi 'ɔ 'to 'pa- Meleci. Meleci, 'ɔ 'to 'pa- Zanayi. Zanayi, 'ɔ 'to 'pa- Zozɛfo. 25Zozɛfo, 'ɔ 'to 'pa- Matatiase. Matatiase, 'ɔ 'to 'pa- Amɔse. Amɔse, 'ɔ 'to 'pa- Naume. Naume, 'ɔ 'to 'pa- Eseli. Eseli, 'ɔ 'to 'pa- Nagayi. 26Nagayi, 'ɔ 'to 'pa- Maate. Maate, 'ɔ 'to 'pa- Matatiase. Matatiase, 'ɔ 'to 'pa- Semeyine. Semeyine, 'ɔ 'to 'pa- Zosɛke. Zosɛke, 'ɔ 'to 'pa- Zoda. 27Zoda 'ɔ 'to 'pa- Yoanane. Yoanane 'ɔ 'to 'pa- Ylesa. Ylesa 'ɔ 'to 'pa- Zolobabɛle. Zolobabɛle 'ɔ 'to 'pa- Salatiɛle. Salatiele 'ɔ 'to 'pa- Neli. 28Neli 'ɔ 'to 'pa- Meleci. Meleci 'ɔ 'to 'pa- Adi. Adi 'ɔ 'to 'pa- Kozame. Kozame 'ɔ 'to 'pa- Elemadame. Elemadame 'ɔ 'to 'pa- Ele. 29Ele 'ɔ 'to 'pa- Zezu. Zezu 'ɔ 'to 'pa- Eliezele. Eliezele 'ɔ 'to 'pa- Zolime. Zolime 'ɔ 'to 'pa- Mata. Mata 'ɔ 'to 'pa- Levi.
30Levi 'ɔ 'to 'pa- Simeɔ. Simeɔ 'ɔ 'to 'pa- Zuda. Zuda 'ɔ 'to 'pa- Zozɛfo. Zozɛfo 'ɔ 'to 'pa- Zoname. Zoname 'ɔ 'to 'pa- Eliacime. 31Eliacime 'ɔ 'to 'pa- Melea. Melea 'ɔ 'to 'pa- Mena. Mena 'ɔ 'tɔ 'pa- Matata. Matata 'ɔ 'to 'pa- Nata. Nata 'ɔ 'to 'pa- Davide. 32Davide 'ɔ 'to 'pa- Jese. Jese 'ɔ 'to 'pa- Obɛde. Obɛde 'ɔ 'to 'pa- Booze. Booze 'ɔ 'to 'pa- Sala. Sala 'ɔ 'to 'pa- Nasɔne. 33Nasɔne 'ɔ 'to 'pa- Aminadabo. Aminadabo 'ɔ 'to 'pa- Ademine. Ademine 'ɔ 'to 'pa- Alni. Alni 'ɔ 'to 'pa- Eselɔne. Eselɔne 'ɔ 'to 'pa- Falɛse. Falɛse 'ɔ 'to 'pa- Zuda. 34Zuda 'ɔ 'to 'pa- Zakɔbo. Zakɔbo 'ɔ 'to 'pa- Izaake. Izake 'ɔ 'to 'pa- Ablame. Ablame 'ɔ 'to 'pa- Tela. Tela 'ɔ 'to 'pa- Naɔle. 35Nakɔle 'ɔ 'to 'pa- Selouge. Selouge 'ɔ 'to 'pa- Yleu. Yleu 'ɔ 'to 'pa- Pelɛge. Pelɛge 'ɔ 'to 'pa- Ebɛle. Ebɛle 'ɔ 'to 'pa- Sela. 36Cela 'ɔ 'to 'pa- Kenane. Kenane 'ɔ 'to 'pa- Alepazade. Alepazade 'ɔ 'to 'pa- Sɛme. Sɛme 'ɔ 'to 'pa- Nowe. Nowe 'ɔ 'to 'pa- Lemɛke. 37Lemɛke 'ɔ 'to 'pa- Matuzalɛme. Matuzalɛme 'ɔ 'to 'pa- Enɔke. Enɔke 'ɔ 'to 'pa- Yelɛde. Yelɛde 'ɔ 'to 'pa- Malaleɛle. Malaleɛle 'ɔ 'to 'pa- Kenane. 38Kenane 'ɔ 'to 'pa- Enɔse. Enɔse 'ɔ 'to 'pa- Sɛte. Sɛte 'ɔ 'to 'pa- Ada. Ada 'ɔ 'to 'pa- Lagɔ.

Attualmente Selezionati:

Luke 3: btg

Evidenziazioni

Condividi

Copia

None

Vuoi avere le tue evidenziazioni salvate su tutti i tuoi dispositivi?Iscriviti o accedi