Luke 2

Zezu 'na 'gwɛlezle

(Matie 1.18-25)

1'Ɛ dɛ -wɛ "ku, 'ye 'kamalenyɔ Ojute 'pɔ- 'awɔ -lɔ "bɔgo -gbɔ 'wa "zo 'ɔnɛɛ -glɔ "me 'na 'konya 'klekle "bɔgo "me. 2-Sɔɔdɛku Kilinise -noɔ 'awɔ Sili 'na 'kamalenyɔ yɔ -wɛ, 'ɛ dɛ -wɛ "ku 'wa zo 'awɔ -lɔ "ɛ -glɔnya -wɛ "bɔgo "me tɛkɛsɛ. 3'Nyakpa 'klekle me 'awɔ 'wayi "bɔgo "me "zo ka. "Ne -ɔkɔkokɔko me 'awɔ -lɔ 'ɔnɛɛ 'du 'na -mee 'wa -gwɛlelo -wɛ. 4Sɔbhɔ 'ye Zozɛfo 'bha- 'awɔ -lɔ Nazalɛte, Galile -glɔ "me, "ne 'ɔ yi -lɔ Zude -glɔ "me, Davide 'na zoku Beteleɛme me, "naa- Davide 'na -gligbɛ "ku 'na 'nyɔkpɔ yɔ -lɔ zɛ. 5"Ne Zozɛfo yi -lɔ 'ɔnɛɛ 'tɔ kɛle ka "mɔme 'ɔ -nyɛ 'ɔ "nɔŋɔ Mali -ɔ -kɛ go -wɛ "bhaa. 6'Wa -ko "ɛ Beteleɛme "ne Mali 'na sɔbhɔ -bha -dɛku yi -lɔ ylɛ. 7"Ne Mali yi -lɔ 'ɔnɛɛ tɛtɛ 'widiyu gwɛle-, "ne 'ɔ yu -lɔ lokwi bhubhɔ-, "ne 'ɔ yu -lɔ "gɔdegbɛ#2.7 Gɔdegbɛ: 'Baa 'na -mee 'wa "zo 'nɛmea 'na lilɛ "ne 'wa li -wɛ yɛ -lɔ. "me -mee 'nɛmea lili -wɛ 'piɛ. "Naa-, -bhudu -cibhɛ -ye 'wa -sɛ lɔbhɔ lowlinya za -wɛ, 'ɛ 'yiɛ- zaa, 'wa "ne "bhle 'pedɛ -ylele.

"Nɔgɔzilɔ -sɛle 'Denaade wliagɛlenya

8"Ɛ -glɔ -bhele -wɛ "ku, wliagɛlenya -ko 'awɔ "bhle, 'wa -ko 'awɔ 'lɛɛ "me 'wanɛɛ wlia yɔko. 9"Ne "nɔgɔzilɔ yua -lɔ 'yliku sibhɔ, "ne 'ɔnɛɛ 'bhɛloɛ yua -lɔ 'suɛle-, "ne zle yua -lɔ "ku 'le, "ne 'wa yi -lɔ 'gu. 10-Mɔ "ɛ "nɔgɔzilɔ -bhulɛloa nɛɛ: «'A te 'gu, -mɔ 'ŋwanade 'ye 'e -yi -lɔ 'anye -sɛle -ka, -ɛ "kɛ lɛ 'nyakpa 'klekle 'na 'ŋwɛnɛ "yitɛ "zo ne. 11'Wa -gwɛle -zeka 'na zle ne "me, Davide 'ɔ 'luku, Fuɔnyɔ -ɔ -noɔ lɛ "Bhenyɔ Klise yɔ ne. 12"Ne -see 'a "kɔ yibhlele- ne lɛ: 'Wa -bubɔ yu lele lokwi "ne 'wa 'piɔ- gbɛɛ "me -mee nemea lili -wɛ.» 13"Ɛ doɔ cuu, "nɔgɔzilɔ "ne "nɔgɔ "me 'na -zakpɛ "yitɛ 'wa 'bhle, 'wa 'kwa Lagɔ 'ŋlu nɛɛ:

14Lagɔ me "nɔgɔ "me 'ŋlu

-se dodo ne "ku 'na konya -ye 'ɔ -wa -wɛ 'wa yle "kuwɛtɛ.

Wliagɛlenya -me Beteleɛme

15"Ne -sɔɔdɛku "nɔgɔzilia 'bhoa- yɔko "ne 'wa 'gblɛ- "nɔgɔ "me -wɛ, wliagɛlenya nɛɛ: -A -me Beteleɛme, -se -a "kɛ -ɛ -ylɛle "bhle -wɛ 'ylime 'ye. -Ye "Bhenyɔ 'tua- -anye 'ylime -wɛ. 16'Wa sikɔ "ne 'wa yi -lɔ me, 'wa -ylele Mali, Zozɛfo "ne yu lele 'ɔ pe- "gɔdegbɛ "me. 17'Wa 'yo- lɛ 'ylime "bhuɔ ne, "ne 'wa yi -lɔ "ɛ 'de -ye "nɔgɔzilɔ -sɛloa "ɛ yu za -wɛ -sɛ. 18"Ne 'nyakpa 'klekle -wa 'no- -ye "ɛ wliagɛlenya bhulɛloa nɛ "me -wɛ, 'ɛ -nyɔa nɛ. 19Mali kulɛle 'awɔ "ɛ weli -wɛ 'klekle 'dlezɔ, "ne 'ɔ 'tɛle 'awɔ -lɔ 'ɛnɛɛ zɔsɛsɛ 'siɛ. 20"Ɛ wliagɛlenya -sɔbhɔ 'wli, 'wa bhubhɔ Lagɔ "ne 'wa -kwɔ 'ŋlu, -ye 'wa 'no- "me "ne -ye 'wa 'ye- 'ylime -wɛ za. 'Ɛ -nyɛ -ye 'wa sɛloa -wɛ "bhaa.

Zezu 'na "kudi 'yli.

21'Yli gbɔɔta "kɛ 'ple "bhuɔ ne, "ne yu 'na "kudi 'yli yi -lɔ ylɛ. "Ne 'wa yu -lɔ Zezu ziɛle-. -Sɔɔdɛku, 'ɔ "nɔ -na nɛ 'go -ye 'na 'tɔ -ye "nɔgɔzilɔ -ga -wɛ yɛ -lɔ.

Mali "ne Zozɛfo 'wa -kɔme Zezu 'na 'yunɔ "mebɔbɔlebhudu "me Lagɔ 'ylime tua -ka

22'Gbɛɛ -ye Moyize 'pɔ-, 'na 'yli ylɛ lɛ, 'ɔ 'to -nyɛ 'ɔ "nɔ "bhaa 'wa yu -lɔ Zeluzalɛme "Bhenyɔ 'ylime tua -ka me. 23"Bhenyɔ 'na -Lɔ "me sɛne 'ye 'ɛ kɛleɔ- -lɔ: Tɛkɛ -widiyu, "Bhenyɔ nɔ yɔ -lɔ. 24"Ne 'wa -gbaa "kɛ bɔbɔ -ka me, sɛne 'ye 'ɛ kɛleɔ- -lɔ "Bhenyɔ 'na -Lɔ "me, 'wa slu- -kobhlelea "sɔ, 'ŋɔnɔ nɔ "ne 'widi nɔ, "ɛ "mɔ 'wayi -wɛ 'waa ne, 'wa slu- -kpakoa "sɔ -se 'wa "kɔ "ku 'di. 25"Ne "ɛ Zeluzalɛme -wɛ 'nyɔkpɔ -bholo -ko 'awɔ "bhle, 'ɔ 'pa- Simeɔ. "Ɛ 'nyɔkpɔ -wɛ -ko 'awɔ Lagɔ 'yliku -kpee, 'ɔ -wo 'awɔ Izlayɛle 'na galuylisɛɛ, "ne Zuzu Wlewle -ko 'awɔ "ku. 26Zuzu Wlewle -bhulɛle 'awɔ -gbɔ: 'Ɔ "mɔ -na "Bhenyɔ Klise 'ylime 'ye ne, 'ɔ -ka "ku. 27Zuzu -kɔmo "Mebɔbɔlebhudu "me, "ne Zezu 'ɔ 'to -nyɛ 'ɔ "nɔ "bhaa 'wa -nɛme yu, -see -Lɔ no -gbɔ 'wa no -wɛ, 'wa 'cɛ no. 28"Ne 'ɔ yu -lɔ "ku 'libhi "ne 'ɔ yi -lɔ Lagɔ bhɛle-. 29-Dɛme 'na dɛku, "Bhenyɔ -neɛ' weli 'wlole- 'yli -e yi -la -neɛ' "kulɔbhɔnyɔ 'yi 'tale- "ne 'ɔ yi me "kuwɛtɛ "me. 30Sɛko -wɛ ne, 'neɛ 'yli 'ye- 'fuenyɔ 'ylime. 31-Ye -e -sɛ lɔbhɔ 'nyakpa 'klekle za -wɛ. 32'Ɛnɛɛ 'zle -wɛ "kɛ -lɔ gbɔ "ne 'nyakpa 'na -wa "ne Lagɔ -yi -wɛ "kɔ -lɔ yibhlele-, "ne Izlayɛleyua "kɛ -lɔ 'ŋlu "me.

Simeɔ -bhulɛle Lagɔ 'na 'tɔ "me

33'Ɔ 'to -nyɛ 'ɔ "nɔ "bhaa, -ye 'wa -bhulɛ yu za -wɛ -nyoa. 34Simeɔ -poa 'ŋu. "Ne 'ɔ yi -lɔ 'ɔ "nɔ Mali bhulɛle- nɛɛ: Yu -ɔ -ko dɛne -wɛ, 'wa yu 'ce gbelia -zejilɛ la, "ne 'ɔ yi 'ce Izlayɛleyua 'be 'na "yitɛ 'ylime 'tuɔ.

Aane -bhulɛle Lagɔ 'na 'tɔ "me

35"Ne, -eyi 'nabhɛ, -neɛ' 'wugɔŋo yi 'ce li sɔbhɔ-, "ne -ɛ zizɔ- "ku 'dlezɔ -wɛ yi 'ce "ku 'wale -sɔɔ gbɛklɛklɛ. 36"Guɔkwɔŋɔnɔ -bholo -ko -me 'awɔ lɔbhɔ 'ɔ 'pa- Aane, 'ɔ 'to 'pa- Penuɛle, Azɛle 'na -gligbɛ "ku 'na 'ŋuyu yɔ 'awɔ -lɔ. 'Ɔ -gɔ 'awɔ. 'Ɔ -sɛ 'awɔ 'widi 'ylobɛ -gbɔsɔ yɔko. 37'Kwiziŋɔnɔ yɔ 'awɔ -lɔ, 'ɔ -kɛ 'awɔ 'ylobɛ 'na glomɔɔnɔ 'ylobɛ mɔɔnɔ. 'Ɔ "ne 'ylile 'awɔ "Mebɔbɔlebhudu 'guɔ, 'ɔ bɔbɔ 'awɔ zle o -zle, nuɛteɛ "me, "ne bhubhɔ bhubhɛ "me. 38"Ɛ doɔ cuu, 'ɔ bɔbɔ Lagɔ "ne 'ɔ yi -lɔ "ɛ yu 'na "kukoweli 'nyakpa 'klekle 'na -wa -wo 'awɔ Zeluzalɛme 'na galuylisɛɛ -wɛ -sɛle.

Zozɛfo -nyɛ Mali "bhaa -zi Nazalɛte 'wlizɔ

39Zezu 'ɔ 'to -nyɛ 'ɔ "nɔ "bhaa 'wa -no lɛ "Bhenyɔ 'na -Lɔ "me 'na -ye 'wa no -gbɔ 'wa no -wɛ "bhuɔ ne, 'wa -zi 'awɔ Galile -glɔ "me 'wlizɔ, 'wa "luku Nazalɛte. 40Yu 'kpɔmale "ne 'ɔ "tamale 'kwɛme, "ne 'ɔ 'yamale 'ylime "ne Lagɔ 'na 'yli -ko "ku.

Zezu -kɛ 'ylobɛ -kogbɔ "sɔ, 'ɔ -ko "Mebɔbɔlebhudu "me

41Zezu 'ɔ 'to -nyɛ 'ɔ "nɔ "bhaa -se 'ylobɛ yi -wɛ sɔbhɔ 'wa me -lɔ paake 'na -jajo 'gwlɛle -ka Zeluzalɛme. 42'Ɔ -yle lɛ 'ylobɛ kogbɔ "sɔ, 'wa me -jajo "ku -see 'wa sɛ 'kle 'wanɛɛ gbagbɛ "me -wɛ. 43"Ɛ -jajo 'na 'yli bhiɛ- lɛ ne, Zezu -to Zeluzalɛme, 'ɔ 'to -nyɛ 'ɔ "nɔ "bhaa "ne 'awɔ 'sɛ yibhlele-. 44'Wa -ta -gbɔ 'ɔlua "bhaa "ne 'wa 'nɔŋo- nɛ 'gɔme za 'wa -bhli -gwe 'yli -bholo 'na dɛ "ne 'wa yi -la -lɔ 'ɔnɛɛ 'siɛ -tɛle -ku 'ci 'ɔnɛɛ -gligbɛnya -nyɛ yibhlelenya "bhaa 'glɛme.

45'Wa "no -la -yle ne, "ne 'wa yi -lɔ Zeluzalɛme 'wlizɔ zi 'ɔnɛɛ 'siɛtɛleɛ "me. 46'Yli 'na ta -zle -wɛ "me, 'ye 'wa 'yelo- -lɔ "Mebɔbɔlebhudu "me 'ylime, 'ɔ 'gli- nɛ -Lɔsloanya 'na jijɛ "ku, 'ɔ 'foa nɛ 'yukwli "ne 'ɔ 'yɔbhɔa nɛ -lɔ lo. 47'Nyakpa 'klekle -wa -fo nɛ 'yukwli -wɛ, 'ɔnɛɛ 'ylimeyamalesɛ "ne 'ɔnɛɛ weli 'na keyi -sɛsɛ 'nyoa 'awɔ. 48'Wa 'yo- lɛ 'ylime ne, 'ɛ -soa geji "ku. 'Ɔ "nɔ nɛɛ: "Na yu, sɔɔbɛɛza, -e 'sa- bhɔ -anye "ɛ soɔ 'a? "Ɛ -see -e "zo- -wɛ 'nɛne bha? -E 'gɛyli, -e to "bhaa 'dlebhɛ lɔbhɔ -anye -ye -a 'tɛle -eyi siɛ za. 49'Ɔ nɛɛ: Sɔɔbɛɛza 'a 'tɛle bhɔ -ame 'siɛ 'a? 'A "ne sɛ -yi -gbɔ 'a 'to 'na -bhudu "me 'ye 'e "kɛ ko? 50-Mɔ, 'wa "ne 'ɛ -ye 'ɔ -bhulɛ -wɛ "me 'no- 'tee. 51'Ɔ "zoa- 'plome "ne 'ɔyi 'wɔ "bhaa 'wa yi -lɔ Nazalɛte me, "ne 'ɔ "nɔ kulɛle nɛ -lɔ -ɛ ple 'awɔ -wɛ 'klekle 'dlezɔ. 52Zezu bhoɔ 'awɔ, 'ɔ 'yamale 'awɔ 'ylime, Lagɔ 'na 'yli -ko "ku "ne 'nyakpa nɛ -ko mo "ku.

Attualmente Selezionati:

Luke 2: btg

Evidenziazioni

Copia