Matius 14

Herodes nluan tomwatar ma rfen Yohanes mangadiris

14:1-12

(Mrk. 6:14-29; Luk. 9:7-9)

1Na noak a ne rai Herodes nfarete na propinsi Galilea. Ma i ndengar safe-safe ma Yesus nose ne lo. 2Mpa i nfalak ber ni mangkaryayar, “Yakw kdwaun feti Yesus ye Yohanes mangadiris ma nmorip a nbali ne lo. Iane nwayat ma ni kuase ma nose kabain mpasalnar.” 3-4Herodes nfalak farane fali radu nir ngrie. Ngrie ne farye: Herodes nafsau nor Herodias, safo Herodias ye Filipus sawany. Ma Filipus ye Herodes wainy. Mpa lain yadin e Yohanes ndotar Herodes feti i to bise ma nafsau nor wainy sawany. Iane nwayat ma Herodes nluan ma tomwatar romat Yohanes ma rkete i betno rnau i a na sel.#Mrk. 6:17-18; Luk. 3:19-20; Im. 18:16; 20:21 5Ni botuan e Herodes nmpeang ma nfen Yohanes nempa namtaut tomwat ngayadin fali sir rfalak feti Yohanes ye nabi i.

6Na ler sa e Herodes ni ulang tahun ma nose festa. Ne Herodias anaky bate nmenari na Herodes ma olyar monuk a ne sonirlury. Ma nose ma Herodes dalamy a nsenang resi. 7Mpa Herodes nsompe ma nfalak ber batdare ne feti safe-safe motak ma i ntak a ne keta nal ber i. 8Ne batdare ne nlarat safe ma enany nfalak ber i, mpa nti nfalak ber Herodes, “Maken, yakw kmpweang ma lere ye nbal muftoran Yohanes mangadiris uluny na baki.” 9Noak ma rai Herodes ndengar farane dalamy suse desar. Nempa i nyoding na ni olyar a ne sonirlury lo, mpa i nfarete ma rose rlarat safe ma batdare ne ntak. 10Mpe i nluan tomwatar ma rti sel ma rtetak Yohanes uluny. 11Ne rnau Yohanes uluny na baki ma ronr ber batdare ne. Ma batdare ne nonry Yohanes uluny ber enany. 12Lama Yohanes ni manglartar rdengar farane, sir rma ma ral Yohanes tenany ma rafonak i. Ne rbali sir ma rti rafbotin ber Yesus.

Yesus nfane tomwate ribun lim

14:13-21

(Mrk. 6:30-44; Luk. 9:10-17; Yoh. 6:1-13)

13Lama Yesus ndengar feti Yohanes nmat e, I nti a ntate ain a ne ma nfangat kumal, ma nti ain tatutkwar sa nema nkese I a na iano. Nempa tomwat ngayadin rdengar feti Yesus nti lo, mpa rti a rtate nir kotar ma rmpan rof da ma rlarat Yesus. 14Noak ma Yesus nait da ma I nsalan tomwat ngayadin a ne. I nlompang resi sir, ne nafngamone tomwatar ma rafanas.

15Noak ma lere ketla nfufw e, Yesus Ni manglartar rma ma rfalak, “Maken, makrokap ye lo ma ain ye nkese i. Ni ngafele e mlwuan tomwatar ye ma rti pnuar nema bise ma rselir tnyamar.” 16Nempa Yesus nfalak ber sir, “Kete. Myinrang ma ramin ye motak! Ma ka mfyane sir.” 17Ne sir rfalak, “Lan mamy rotyar lim ma inar du.” 18Ne Yesus nfalak ber sir ma ronr rotyar ma inar a ne ber I. 19Ne Yesus nluan ma tomwat ngayadin a ne ramtoran urwar. Mpe Yesus nal rotyar lim ma inar du a ne, ma nmetngade far langit, ma nose alang ber Ratu. Betno napuse rotyar a ne ma nal ber Ni manglartar ma rasaman ber tomwat ngayadin a ne. 20Sir monuk a ne rtame terik ma rabotan. Ne Yesus Ni manglartar rabutin rotyar ma inar ma nres a ne na boti buti resin du ma rfen. 21Nof tomwatar monuk ma rtame ne farlan tfayaki merwanar motak e fafa ribun lim iane to rtafal batar ma kangkir a fuky.

Yesus nmpan a na weye das

14:22-33

(Mrk. 6:45-52; Yoh. 6:16-21)

22Mpene Yesus nluan Ni manglartar ma rfangat kumal ma rbalun far twemul Galilea balisya. Ne I nluan tomwat ngayadin a ne ma rbali sir. 23Lama tomwat ngayadin rbali sir e Yesus nti lenran ma koko I a nsampayang. Ma noak a ne nronram lo. 24Ma kumal ma manglartar rfangat a ne namin twemul let lo. Ma sir rsangal mnaur nwayat ma nerar rtef nir kumal a ne mpa nlik far dol far da. 25Ma noak a ne fafa jam tiga bobolisin makrokap, ne Yesus nmpan a na weye das ma nti nakmat sir. 26Noak ma sir rsalan ma I nmpan a na weye das e, sir rmetryat ma ramtaut mpa rafwayak, “Do! Smwangat ma nma ye lo!” 27Nempa Yesus nfalak ber sir, “Kete mimtaut! Mifkoran dalmir! Fali Yakw ye Yesus!” 28Ne Petrus nfalak, “Tuangguru, farlan botuan feti iane Ko e mfwalak ma kmpwan a na weye ye ma ktwi kukmat Ko.” 29Ne Yesus nfalak, “Mwa ye!” Ne Petrus ntompur nof kumal ma nmpan a na weye ma nti nakmat Yesus. 30Nempa noak ma nsalan mnaur mengarat na twemul a ne i namtaut ma ketla nlonrur. Mpa nafwayak, “Tuangguru! Mtwulung yakw.” 31Ne Yesus nasnyalik ma nomat limany ma nrabut i. Ne nfalak ber Petrus, “Hei, safema mulele Yakw mor dalam tubun?” 32Ne Yesus radu Petrus rfangat kumal a ne, ma mnaur nater desar. 33Mpe manglartar ma ramin kumal a ne rsatngur ber Yesus ma rfalak, “Tuangguru, botuan feti Ko ye Ratu Anaky.”

Yesus nafngamone mangafansar na Genesaret

14:34-36

(Mrk. 6:53-56)

34Yesus nor Ni manglartar rait twemul balisya na nus Genesaret. 35Lama tomwatar na iano rafai feti Yesus nma, sir rafbotin ber tomwatar monuk na nuse ne ni kateman. Iane nwayat ma sir ror mangafansar monuk ber I. 36Ma sir rtak Yesus nema ninrang ma rasyol Ni rabit melawas suin motak. Mpe tomwatar monuk ma rasyol Ni rabit melawas suin a ne, rangamon desar.

Attualmente Selezionati:

Matius 14: YMD

Evidenziazioni

Copia