Mata 7

Ka ta mum à bakal a gà mìsle ŋgiɗ tsa

Luka 6:37-38,41-42

1«Ka ta mum à bakal a gà mìsle ŋgiɗ tsa, na dite Mbulum tekeɗe, a ta me a kurum a à bakal tsiye mbaŋa. 2Aɗaba na kàa mum à bakal a gà mìsle ŋgiɗ ka, Mbulum a ta me a kurum a dər aɗəm kataya mbaŋa. Dukw ana kàa gwim a gà mìsle ŋgiɗ a ka, Mbulum tekeɗe, à me a kurum a dər aɗəm ka, kamala taŋa ya mbaŋa. 3Aàmala la na a sàsak meŋgeteha ka, a pərats ana kwizikw i are damər yak a, tsaatsa i yak ŋa ana iɗəm diŋgwizl dùrgùrəzl ka, kàa sər ahər tsiye? 4Dite meme na ki gweɗe a damər yak ka, aha i zlekere a pərats ata i are yak a, na tsaatsa i yak ŋa ana iɗəm ka, diŋgwizl a? 5A kər mala mimbèhè are ata, lah mazlàra diŋgwizl aaha i are yak ŋa ya dzekwiŋ, dite ndzihndzih ki ŋget a a vatwa lele, ìndits ki zlere a pərats a kwizikw ŋa ata i are damər yak a kuɗa.

6Ama ka ta vəlum ŋgwal dukw kurum ana tsəɗaŋŋa lele ya, a gà na ti ne kamala gà kəra ya tsa. Aɗaba i dəba ŋa ya ka, ta mbiɗere a gər a dəba aka kurum ŋa ya, ə̀vaŋ ti dze a kurum ŋa. Ka vəlum gà kur kurum ana tsakala ŋa hinne, à sìkim a ba tsiye, a gà na ti ne kamala wèdèlìŋ a ɓav tsa, tsəka, tipikw tipikw ti ta ɓele a kurum aaka a nda sik.»

Hamum a Mbulum, a vile a kurum ŋa

Luka 6:31; 11:5-13

7I dəba ŋa ya, a gwaɗa a tar asa: «Wizwim, Mbulum a vile a kurum ŋa. Yahum, ki ŋgetwimiŋa. Lakum a dukw mahə̀ndə̀kà ga, dite à hìndìk a kurum a i ga ya. 8Aɗaba ku weke na aka wiz a ka, a vileriŋa. Wur ana aka yaha ya ka, a ŋgetiŋa. Dite wur ana aka lak a dukw mahə̀ndə̀kà ga ya ka, tùwaŋ à hìndìker a iɗəm a mbaŋa. 9Na wura ilik ika magər kurum tsir gà ɓəza, na bəla kəla ŋgar ata aka wiz ahər ɗaf ana, a viler a kur a? 10Kige tsa na aka wiz ahər kilif ana, a viler a mesiwiɗ a? 11Na kurum ana gà ŋgwal ŋa tsiye ka, ka sərum məvəla gà ŋgwal gà dukw a gà ɓəza kurum seyiŋ ana, sakwàn Tsir kurum ana i gər ŋa ya ivaɗ a. A vile a gà ŋgwal gà dukw a gà na ta wiz ahər a ya ana, à zè a taŋa tsiye?

12Aɗaba taŋa, dukw ana a sàs a kurum zləmana gà mburma ta ge a kurum ŋgwal ŋa ya ka, kurum tekeɗe ibam, gwim a tar kataya mbaŋa. Taŋa na dukw ana i wakita məpala ahəm Musa nda biy gà ɓəzla məma à guma Mbulum a tsik tserdze ya.»

Biye hərmaga ana hinne tsiye

Luka 13:24

13«Dum ndaka biye hərmaga ana hinne tsiye. Aɗaba biye hərmaga ana zlàbàta ŋa ya ka, a de a à mburma ka, a təv medzeye. Vatwa mada a fata ka, tùwwa mawùràba ŋa tsa, gà mburma hinne na ti de a nda təv ata ya. 14Ama biye hərmaga ana hinne tsiye ka, a de a à mburma ka, a təv mesife ana à ndìv a tsiye. Vatwa ŋa ka, rèhhe masakəŋa, mawùràba ŋa hinne. Ama gà mburma ti de a nda təv ata ka, ndaw tsa.»

Gà dizl ɗaf ti sir a aba ka, i mewe tar a

Luka 6:43-45

15I dəba ŋa ya, Yesuw a gwaɗa a tar asa: «Kaslum ba kurum i təv gà ɓəzla məma à guma Mbulum ana nda pàrsa ya. Ti dere a a təv kurum a ka, zukum zukum kamala gà təmaŋ a. Tsaatsa i huɗ ba tar ka, ti ndzikiɗ ba gà də̀var ana ta pèpìɗ a mburma ya. 16Ki sirwim a dər iba ya ka, i megemir tar ana ta ge a ya. Aɗaba dizl ɗaf ana adak ihər a ana, a we a hàndaza ya? Kige tsa ki ŋgəlwim a mawà gùrùv aà tsitsìv a ya? 17Dizl ɗaf ana ŋgwal ŋa, dukw məməta ihər tsiye ka, a we a gà ɓəza ka, ŋgwal ŋa mbaŋa. Dite dizl ɗaf ana ŋgwal ŋa tsa, ba a dzəmar tsiye tekeɗe, a we a gà ɓəza ka, à tsehin a lele tsa mbaŋa. 18Kige tsa dizl ɗaf ana ŋgwal ŋa ya ka, a we a kəla tekeɗe, magàha a bəɗ ŋa tsa. Dite bəla dizl ɗaf ana ba a dzəmar tsiye ka, a sle a aà mawà kəla nawat nawat ɓav tsa asa. 19Ama dizl ɗaf ana a we a ŋgwal ŋa tsiye ka, ti sese a iɗəm a, ta wene a nda akwa. 20Kamala mawà gà dukw ata ya mbaŋa, na ki sirwim a ikaba à gà ɓəzla məma à guma Mbulum ana nda pàrsa ya.»

Yesuw a ta gweɗe a a gà na ti zezem a ŋgat nda pàrsa ya:

«I sər kurum tsa»

Luka 6:46; 13:26-27

21Yesuw a gwaɗa a tar asa: «Aɗaba gà na ti zeliŋ a nda bazlam ɗekɗek masakəŋa vìrìɗìɗɗe, ta gweɗe a <Batsah mər ŋa, Batsah mər ŋa> ya ka, ti sle a aà mede a *mekwere Mbulum tsa. Say gà na ta ge a dukw ana a sàs a Mbulum Tsir gà ana i gər ŋa ya dzekwiŋ, na ti de a ya. 22A pat seriye mba ka, gà mìsle ŋgiɗ hinne ta gweɗiŋ a: <Batsah mər ŋa, Batsah mər ŋa, mər ana, maa mà à guma Mbulum a mburma nda zləm yak tsiye? Maa dalawa gà sitene aà mburma ya nda zləm yak tsiye? Dite maa ge gà dukw mene aà mburma ŋgiɗ pampam hinne nda zləm yak asa mbaŋa tsiye?> 23Ama ku mege kataya tekeɗe, i gweɗe a ter aaka a ka: <I sər kurum tsidze. Dum i təv ga ya, aɗaba kurum ka, gà ɓəzla mene are a Mbulum, kà niwwim mege dukw ana Mbulum a waya ya.> «*fa*

Gà ɓəzla mazlazla ga ana ŋgwal ŋa ya, ndəna ŋgwala tsiye

Luka 6:47-49

24Aɗaba taŋa, Yesuw a gwaɗa a tar: «Ku weke na aka tsaraka bazlam gà ana i tsik a ya, aka ge megemir ŋa lele ka, a ndzikiɗ ba wele ana metsehe ŋgar a riŋ lele, à dzèhe a ga ya. A dzèhe a ga ka, a le a biye, à zlèzlere a iɗəm nda kur a lele, na dite a mbezle a tsiye. 25Aləka na bəla yam à dze a, a dere a nda himbiɗ a hinne, mbùhhwa a zlele a nda təv ga ata ka, a mbezle a tsa, aɗaba ana ɓərɓər mazlàzlàŋara i biye ya nda kur a. 26Ama ku weke na aka tsaraka bazlam gà ana i tsik a ya, aka ge megemir ŋa tsəka, a ndzikiɗ ba ka, wele ana metsehe ŋgar a riŋ tsa, a dza ba aà madzàha ga aka ahəɗ kataya masakəŋa ya. 27Aləka i təv ana yam ata mbùhhwa a dere a nda himbiɗ a hinne, a zlele a nda təv ga ata, tsam ka, bìrìm a mbezle a fit tsara. Taŋa ka, labara batsah ŋa hinne.»

Ndzəɗa Yesuw

28Aləka i təv ana Yesuw a ndəv à mifefile ŋgar ata ya ka, a ge aà gà mburma ana tar riŋ i təv ŋgar i fata tserdze ya, kamala dukw mene aà mburma ya. Guma ŋgar ata a tsik a ka, arəv a da dər aà tar a. 29Aɗaba bazlam ata a tsik a tar a ka, kamala biy gà ɓəzla medzeŋge məpala ahəm Mbulum ana ti tsikewa a tar a tsa. Ama ka, nda ndzəɗa hinne, kamala ana ŋgat Əbay a, na a tsik a tar a.

Attualmente Selezionati:

Mata 7: gnd

Evidenziazioni

Copia