Bambata Pai 3
3
Pa tigo aboro
1Were ga wo birĩ nasusi gu nga ga anya nvuo dunduko nga agu ra Yekova Mbori amangi ra. U ki ya fu de, “Ati Mbori ay a, ‘Ka oni ri nga agu angua du ati yo dunduko ya’?” 2De ki ya fu wo, “Gu zuzu angua du ati yo ka ani ri he ari; 3ono zuzu gu ngua du bebere ati yo, Mbori aya, ‘Ka oni rí nga zuzuhe ya, ka oni zádi nga ha wa sa ya, oni ka kpi.’ ” 4Wo ki ya fu de, “Oni akpi nga wa sa te. 5Bambiko Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.” 6Ho de abi he ni ya gu ngua re wene riahe du, si wenengaĩ bangirise, nyemuhe ti boro si rengbe ka sa ni ni iratatamana, ri ki kati zuzuhe ki ri he; ri ki fu he fu kumbari nadu na ri, ko ki ri he a. 7Bangiriyo ki za a wa i adu ue, i ki ini he ya i ni kundiri yo; i ki rũ kpe vurumo ni agbaya tipa yo.
8I ki gi fugo Yekova Mbori ko nita ati yo ho rago nizere ni, kumba na diako i ki gbu ati yo dagba angua be bangiri Yekova Mbori. 9Yekova Mbori ki yambu kumba, ki ya fu ko, “Wari du mo ni?” 10Ko ki ya, “Mi nigi fugoro agia ati yo, mi ki gunde agunde, bambiko mi nidu kundiri; mi ki oko tire.” 11Mbori ki ya, “Da niya foro mo ni kundiri ro? Mo niri gu ngua ari mi aya foro ka mo ri nga ha ya?” 12Kumba ki ya, “Gu de mo afu ri fere ani du na ri, kina ri nifu zuzuhe fere, mi ki ri he.” 13Yekova Mbori ki ya fu de, “Gini pai nga gi mangi mo ho re?” De ki ya, “Wo ninangi re, mi ki ri he.” 14Yekova Mbori ki ya fu wo,
“Wa mangi mo gere,
mo ni tiwatiwa ro susi ngbatunga zogozogo anya dunduko,
susi anya nvuo dunduko a;
mo ki nigbe tiro ni kpoto vuro,
ki niri nvutu
ho du mo ni ni ungaro.
15Mi amáa sogote
dagba roni na de, dagba atitaro na atitari a;
ko ki mburu riro,
mo ki mburu gidako.”
16Ko ki ya fu de.
“Mi angéesa ga rungo na ga du na mobara a;
mo abátika agude ni kina rungo,
ga nyemuhe adu tipa kumbamo, ono ko nikadu ni bairaro.”
17Ko ki ya fu Adama,
“Wa mo nigi sangba diaro,
ki ri gu ngua
nga gu mi arugu ro ya, ‘Ka mo rí nga ha ya,’
i tiwa kpotosende mbiko ga pai;
mo ari riahe rogo ho ni kina mbugo ho du mo ni ni ungaro;
18si avúnga akiwe foro na asakokoso;
mo ki niri gu kurukuru ahe du ati yo.
19Mo arí riahe mbiko
kina gu randimo nikakura kpakpuro yo
daho mo ka karaga tiro ni ku sende yo,
bambiko mi adi ro kina rogo ho;
mbiko mo nga kina nvutu,
kina ku nvutu yo mo ka karága tiro ku ho ni.”
20Kumba ki yambu rimo diako nga Awa, bambiko ri nangia na agu aboro dunduko du ni ungayo. 21Yekova Mbori ki mangi abaukadi fu Adama na diako rogo kpoto anya, ki ukadi yo na ni.
22Yekova Mbori ki ya, “Oni ngére, kumba ye ka du wa gu ni sa dagba rani ki ini wenepai na gbegberẽpai; awere, ko ka ndu ka taa beko ki di he rogo ngua Unga a ki ri he, ki nye ni ungako kindi”. 23Si du Yekova Mbori akusi ko ti ni ku zegi yo ati Edene yo, ko nisopo gu sende nga gu i adi ko rogo. 24Si du ko ado kumba ti ni ku zegi yo; ko ki moi akeruba ati Edene yo ku uroyo, na basape wa mirã we si nisaki tihe asaka rogo arago dunduko kirikiri ka banda gene ngua unga.
Attualmente Selezionati:
Bambata Pai 3: ZB1978
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La Sainte Bible en Zande © Alliance Biblique Universelle, 1978.
