KEJADIAN 4
4
Kaen ma Habel
1Basa boema, Adam sungu no Hawa fo saoinan-na, de inak ndia nailu. Ana bongin-na ni'iana touanak esa, boema nafa'da nae, “No Manetualain tutulu-fafalin, de au hapu ni'iana touanak esa so.” Boema, ana foi ni'iana ndia na'de Kaen. 2Boema Hawa bongin-na, ni'iana touanak esa seluk, na'de Habel. Habel da'di manafoo bi'ilopo, tehu Kaen da'di hataholi manatao tina-osi. 3Faik de'u bee makabuin-na boema, Kaen ho'i-na tina-osin buna-boan seli, de ana tunu-hotu fen neu Manetualain. 4#Ibr. 11:4Habel boeo, ho'un-na bi'ilopon esa ana ulun-na, de ana do'don, boema ana ho'i-na paa neulauk-kala, de ana tunu-hotu fen neu Manetualain. Boema Manetualain namahoko nanseli neu Habel no tutunu-hohotun, 5tehu Ana ta sipok Kaen no tutunu-hohotun fa. Kaen namanasa nanseli, de mata panan makei. 6Boema Manetualain nafa'da Kaen nae, “Tao le'e de, o mamanasa? Tao le'e de, o mata-panam makei? 7Metema, o tao malole soona, tao leo bee-o, o hika-hume; tehu metema, o tao tatao-nono'imangalauk, soona sala-singok nahani, fo ana masok leo o dalem dale neu. Sala-singok sanga koasan-na o aoinam-ma, tehu o muse sengin.”
8 #
Mat. 23:35; Luk. 11:51; 1Yoh. 3:12 Boema Kaen nafa'da fa'din Habel nae, “Mai fo, ata teu leo tina teu.” Lelek ala losa tina boema, Kaen sapun-na fa'din Habel, de ana taonisan.
9 Manetualain natane Kaen nae, “O fa'dim Habel nai bee?”
Kaen nataa nae, “Au ta bubuluk fa. Au muse anea au fa'ding-nga do?”
10 #
Ibr. 12:24
Boema, Manetualain nae, “Tao le'e de, o tao tatao-nono'ik fo maneni bibii-namata'uk ndia? O fa'dim-ma, daan-na naloo bou-bou neu Au, neme dae lain mai, sama leo halak esa noke balas. 11O nanasoo-supak, de nalosa o ta bisa foi-fala seluk dae-a so'on. Dae ndia, musi-na o fa'dim-ma daan-na, nono'kabai, napook bafan-na, fo ana ko'do-na, o fa'dim-ma daan ndia, nai lelek o taomisan-nana. 12Metema o tao tina-osi soona, neukose dae-a ta fe buna-boak hata esa boen; neukose o da'di maleu-malaak, fo ta nanuu mamana leleok nai daebafak-ka fa.”
13Boema, Kaen nafa'da Manetualain nae, “Huhukuk ndia, bela-na seli, de au ta hapu lu'a-lepa abe'i fan. 14O usi heni au eme dae ia mai, de au dook-ka neme O matam-ma mai. Neukose, au da'di maleu-malaak, fo au ta anuu mamana leleok nai daebafak-ka fa, de su'di see natongon-no au soona, ana taonisa au.”
15Tehu Manetualain nae, “Ta. Metema, hataholi taonisa o soona, hataholi manataonisa o ndia, ana hapu babalak diku la'i hitu.” Basa boema, Manetualain tao ta'du-tana neu Kaen, fo ela su'di see natongon-no n soona, boso taonisan. 16Boema Kaen la'o neme Manetualain matan-na mai, de ana leo nai dae fo mana'de “Maleu-malaak” nai Eden boboan dulu.
Kaen tititi-nonosin
17Kaen no saoinan-na bongi anatouk esa, de ala foin na'de Hanok. Basa boema, Kaen napadedeik na kota esa, de ana foi kota ndia na'den-na, tunga anan ndia na'den-na. 18Irad aman nde Hanok. Mehuyael aman nde Irad. Metusael aman nde Mehuyael, ma Lamek aman nde Metusael. 19Lamek saoinan dua, fo nde Ada ma Zila. 20Ada bongi Yabal, de Yabal tititi-nonosin-nala nde leoina fo, manamaka boboi bana-manu, ma ala leo nai lalaa temak-kala dalek. 21Fa'din-na na'de Yubal, de Yubal tititi-nonosin-nala nde been-na, manamakaminak sasanu ma kinuk. 22Zila bongi Tubal-Kaen, de tititi-nonosin-nala tao taka-besi mata-matak lala'en-na, neme liti ma besi. Tubal-Kaen fa'di inaanan-na, na'de Naama.
23Lamek nafa'da saoinan duas nae,
“Ada ma Zila, mamanene dei!
Au taoisa touana muli-soluk esa, nanahu ana tao nakahina au so.
24Nana, metema hataholi manataonisa Kaen-na,
muse ana hapu babalan-na diku la'i hitu, soona hataholi manataonisa Lamek-ka, muse ana hapu babalan-na diku la'i hituhulu hitu.”
Set ma Enos
25Adam no saoinan-na, bongi anatouk esa seluk. Boema Hawa nae, “Manetualain fe basa au, ana touk nggati Habel, fo Kaen taonisan so.” Hu ndia de, Hawa foi ni'iana ndia na'de Set. 26Set bongin-na anatouk esa, de ana foin na'de Enos. Nai tepo-lelek ndia, nde hataholi-a mulai seseik Manetualain na'den-na, metema ala sene-do'ok neu Manetualain.
Attualmente Selezionati:
KEJADIAN 4: twu
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
