OKHUCHIAKA 4

Kaini nende Abili

1Adamu naba nende Hawa omukhasiwe, ma Hawa nabelekha, niyebula omwana omusiani ma naboola mbu, “Nyooye omwana wes'saatsa khulwobukhonyi bwo MWAMI.” Namukulikha eliiralie Kaini. 2Olunyuma khandi yebula omwana undi omusiani owayakulikha Abili. Abili yakhula naba omwayi wamakondi ne Kaini naba omulimi. 3Inyuma weinyinga nalebe Kaini yaleer'ra OMWAMI khubiamo biom'mukunda singa esihanwa. 4Abili naye naleera sil'la khubimeme biokhuranga ebiamakondike, niyeera ma nahaana esitonye sieinyama indubukhu singa esihanwa. OMWAMI yayanzisibwa nende Abili khulwe esihanwa sisie,#Heb. 11:4 5nebutswa siyayanzisibwa na Kaini nende esihanwa sisie tawe. Oburima nibuhamba Kaini okhusila ma nakhuunyia m'moni. 6OMWAMI nareeba Kaini mbu, “Busina osinyikhile? Khandi busina okhunyisie m'moni? 7Olaba nokhol'le bulahi khane uyanzile. Nebutswa norakhakhola obulahi, imbi ikhwekonekheye hamuliango, yenyanga ekhwamihe, nebutswa okwan'ne okhuchileka.”

8Kaini nabool'la omwana wabwe Abili mbu, “Chenda khutsie m'mukunda.” Ne olwa bali nibool'le m'mukunda, Kaini yasukhana omwana wabwe, ma namwira.#Mat. 23:35; Lk. 11:51; 1 Yoh. 3:12

9OMWAMI nareeba Kaini mbu, “Omwana wenywe Abili ali hena?”

Naye nakalusia mbu, “Simanyile tawe. Nise omulindi womwana wefwe noho?” 10OMWAMI naboola mbu, “Nisina esiokhol'le yisi? Amayoosi kamatsahi komwana wenywe kandakayilanga okhurula khwiloba.#Heb. 12:24 11Khe lunondi umal'le okhulaamwa okhurula khwiloba eliasamisie omunwa kwalio okhubukula amatsahi komwana wenywe okhurula m'makhono kaako. 12Olwa nolimenje khwiloba sinalikhuhelesinjie ebiraakwa bihela tawe, nobetsenje omuboyaboyi notimatima khusibala.”

13Kaini nabool'la OMWAMI mbu, “Omunyakhano yiku nomukali okhusila, sindi onyala okhwetuukha tawe. 14Undabinjia okhurula khwiloba khandi okhurula mumoni mumwo. Nambetsenje butswa omuboyaboyi owokhutimatima khusibala, oliinyoola wosi yakhanzire.”

15OMWAMI namubool'la mbu, “Tawe. Omundu wosi naba niyakhakhwira, yakhamal'lwakhwo es'sialia hali khane nakhataru.” Ma OMWAMI nara khu Kaini esilolelo khe omundu wosi omulola alekhe okhumwira. 16Ma Kaini narula imbeli wo MWAMI, namenya musibala sia “Nodi”#4:16 Nodi Esifune sieliira yili ni obutimatimi. esili ebukwe wa Edeni.

Tsinzibulo tsia Kaini

17Kaini naba nende omukhasiwe, naye nabelekha ma niyebula omwana omusiani nibamukulikha Enoka. Kaini niyombokha litookho ma nalikulikha eliira liomwanawe Enoka. 18Enoka naye yali samwana Iradi, ne Iradi naba samwana Mehuyaeli, ne Mehuyaeli naba samwana Metsushaeli, ne Metsushaeli naba samwana Lameki. 19Lameki yaleera abakhasi babili, mulala yalangwa Ada ne oundi Sila. 20Ada yebula Yabali, owali kukanyene yabo abamenyanga mumaheema nibaruka emiruko. 21Omusiani wabwe yalangwa Yubali, kukanyene abakhupi bobukhana nende lilele. 22Sila naye niyebula Tubali Kaini owali omuruli webindu ebiomukasa nende ebibia. Omukhaana wanga Tubali Kaini yalangwa Naama.

23Lameki nabool'la abakhasi baabe mbu,

“Ada nende Sila, hul'le akanyenya okhuboola:

Nzir're omwana omuyaaye sichila yaali okhukhupaka.

24Nikakhaba wosi owakheera Kaini yakhamal'lwakhwo

es'sialia hali khane nakhataru,

nase wosi naba niyanzira, es'sialia siakhamal'lwakhwo

hali amakhumi kane nakataru nende khane nakhataru.”#Mat. 18:22

Setsi nende Enoshi

25Adamu nende omukhasiwe banyoola omwana undi omusiani. Bamukulikha eliiralie Setsi. Mukha Adamu naboola mbu, “Nyasaye umbeye omwana omusiani owokhukalukha musilenje sia Abili owa Kaini yali okhwira.” 26Setsi naye yamala niyebula omwana omusiani namukulikha Enoshi. Olwene yilwo nilwo olwabandu bachiaka okhwekayakaya muliira lio MWAMI litsienukhu.

Attualmente Selezionati:

OKHUCHIAKA 4: EBAIBO

Evidenziazioni

Copia