JENESIS 8
8
Ka bakut jong ka jingshlei um
1Bad U Blei u la kynmaw ïa u Noah, bad ïa kiei kiei ki kynja ba-im baroh, bad ïa ki jingri baroh katba la don lem bad u ha kata ka ïinglieng: U Blei ruh u la pynmih ïa ka lyer ban beh halor ka khyndew, te kita ki um ki la jem jai; 2bad ïa kita ki um mihpohliew jong kaba jylliew bad ïa ki jingkhang ki bneng la set noh ruh, bad ïa u slap na bneng la khang noh; 3bad kita ki um ki la ïa nang kynran mian pa mian nalor ka khyndew: bad ynda la kut kita ki shispah sanphew sngi, kita ki um ki la duna shibun. 4Bad kata ka ïinglieng ka la shong sah ha u bahynñiew bnai, ha ka bakhathynñiew sngi jong uta u bnai, halor ki lum jong ka ri Ararat. 5Bad kita ki um ki la ïa nang duna nang duna haduh u bashiphew bnai: ha uta u bashiphew bnai, ha ka sngi nyngkong ha uta u bnai, la ïohi ïa ki kliar ki lum.
6Ka la jia ruh ha ka bakut sawphew sngi, ba u Noah u la plie ïa ka pongshai jong kata ka ïinglieng ïa kaba u la lah thaw: 7bad u la pyllait khnang ïa ka tyngab kawei, kaba la leit noh ruh da kaba ïaleit bad ïawan phai pat ha ban da la rngad noh kita ki um nalor ka khyndew. 8U la pyllait noh ruh ïa ka paro na u, ban khmih lada kita ki um ki la ïarngad noh ne em nalor ka khyndew; 9hynrei, kata ka paro, naba kam shym la shem ïa ka jingjahthait ïa la ka poh'jat, ka la wan phai pat sha u shapoh kata ka ïinglieng, naba kita ki um ki ïadang sah halor ka khmat ka khyndew baroh: u te, da kaba kner ïa la ka kti, u da shim ïa ka, bad u la pynwan ïa ka sha lade shapoh kata ka ïinglieng. 10U la ap pat sa kiwei pat hynñiew sngi; bad u la pyllait noh sa shi sien pat ïa kata ka paro na kata ka ïinglieng; 11bad kata ka paro ka la wan pat sha u, ha kaba la janmiet; bad, ha khmih, ka don ka sla u dieng Olib ba la kheit ha la ka shyntur: kumta, u Noah u la ithuh ba kita ki um ki la rngad noh nalor ka khyndew. 12Bad u la ap sa kiwei pat hynñiew sngi, bad u la pyllait noh pat ïa kata ka paro; te kam shym la wan phai pat shuh sha u.
13Ka la long ruh ha ka bahynriewspah iwei snem, ha u bnai u banyngkong, bad ha ka sngi ka banyngkong ha uta u bnai, ba kita ki um ki la rngad noh nalor ka khyndew: te u Noah u la law noh ïa ka jingtap ka ïinglieng bad u la khmih; bad ha khmih, ka khmat ka khyndew ka la nang rkhiang. 14Bad ha ka ba-arphew hynñiew sngi, ha u bnai u ba-ar, ka khyndew ka la rkhiang. 15Bad U Blei u la kren ha u Noah, u da ong, 16“To mih noh na ka ïinglieng: ma me bad ka tnga jong me, bad ki khun shynrang jong me, bad ki tnga ki khun shynrang jong me lem bad me. 17Ïa kiei kiei ki kynja ba-im baroh ba don lem bad me, na ka doh baroh, ïa u sim, bad ïa ki jingri, bad ïa u kynja bapar baroh bapar halor ka khyndew, to da pynmih noh lem bad me; bad to ai kin kha bun ha ka khyndew, bad kin ïaman bun, bad kin ïaroi halor ka khyndew.” 18Te u Noah u la mih noh bad ki khun shynrang jong u bad ka tnga jong u bad ki tnga ki khun jong u ryngkat bad u. 19U mrad baroh, u kynja bapar baroh, bad ki kynja baher baroh, bad kaei kaei baroh bapar halor ka khyndew, ha la ka jaid ka jaid ki la ïamih noh na kata ka ïinglieng.
20Bad u Noah u la tei ïa ka duwan ha U Trai; bad u la shim na ki mrad bakhuid baroh, bad na ki kynja sim bakhuid baroh, bad u la ainguh da ki jingainguh thang halor kata ka duwan. 21Te U Trai u la iw ïa ka jingiw baiwbih; bad U Trai u la ong ha la ka dohnud, “Ngan ym tim shuh ïa ka khyndew pat na ka bynta u briew; la ka jingpyrkhat ka dohnud u briew ka basniew naduh myndanglong samla jong u; bad ngan ym shoh ïap pat shuh ïa ki kynja ba-im baroh, kumba nga la leh. 22Katba dang sah kane ka pyrthei, ka aïom bet bad ka ba-ot, ka bakhriat bad ka bashit, bad ka lyiur bad ka tlang, bad ka sngi bad ka miet, kin ym pep shuh.”
Attualmente Selezionati:
JENESIS 8: KHB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Bible Society of India
