Kananet 9

Olom ci Ta̱mu̱ta̱dde̱no̱ ki Nowa

1U̱mu̱yu̱k zin Ta̱mu̱ta̱dde̱n Nowa ki logoz ciginnek a̱nne̱k ne, “I̱ti̱rre̱t kar otorta e̱le̱tti̱ kar ibbizitanit lo̱o̱c. 2O̱ngo̱o̱li̱nnu̱ng atin elegje ki iballi ki u̱lu̱g nyatapare ci a̱ddi̱ki̱re̱ veelek. Aballu atin nogo do̱o̱k. 3Ka̱a̱nyu̱ng kaal cik aruge ko̱ do̱o̱k kizeto da̱i̱ne̱t cuggo̱k. Ki baling ka̱a̱nyu̱ng keen ki kaal do̱o̱k ke̱.

4“Ma̱i̱je̱ ngatu, ma adakku i̱di̱ng ci ngen anyak bi̱ye̱. 5Imma bi̱ye̱te̱ cuggo̱k ngen aruge ko̱, kokko atin anna ke̱de̱zi̱ e̱e̱t icima e̱le̱gi̱t ci a̱ru̱k e̱e̱t ci diiri ka̱da̱k.

6“Ming oowa e̱e̱ti̱ bi̱ye̱ cik e̱e̱t ci diiri,

oowa atin e̱e̱ti̱ imma bu̱k bi̱ye̱ ciginnek;

eci Ta̱mu̱ta̱dde̱n eenyca e̱e̱t ci diiri

ku̱tu̱gu̱ ki enne.

7Ma̱i̱je̱ zin i̱yo̱ko̱ niga, i̱ti̱rre̱t ibbizitanit lo̱o̱c do̱o̱k.”

8Iizek zin bo̱do̱k Ta̱mu̱ta̱dde̱n Nowa ki logoz ciginnek ne, 9“Kadimani i̱yo̱ko̱ anna olom cinanni ki i̱ge̱t ki dooli cik dooli cuggo̱k, 10ki bo̱do̱k kaal cik aruge do̱o̱k iballi, ki elegje balik iyowanu i̱ba̱ bu̱k ke̱. 11Kidimana olom cinanni ki i̱ge̱ta̱, iróng atin bo̱do̱k kaala ne̱k lo̱o̱ta̱ ko̱ addude tawana, iróng bo̱do̱k kanyik tawan imma kegerzan lo̱o̱c udut.”

12Kar zin Ta̱mu̱ta̱dde̱n kize ne, “Icu baayenit ci kogonni anna ki i̱ge̱ta̱ ki kaal cik aruge arume ki i̱ge̱t ko̱ do̱o̱k, olom ci arum bu̱u̱llo̱k ki bu̱u̱llo̱k ne̱k a̱vvu̱ ke̱ do̱o̱k: 13Karike anna mauli#9:13 Mauli: Een zara uggak bu̱k ne lokilokilok. di̱i̱za̱, aave atin kize baayenit ci een olom cinanni ki lo̱o̱c. 14Ming gon kanyaha anna di̱i̱zzo̱k ki̱ri̱mte̱ lo̱o̱ta̱ kar zin mauli ki̱ye̱la̱i̱ di̱i̱zo̱i̱, 15ka̱a̱da̱ zin atin anna olom cinanni ki i̱ge̱t ki kaal cik aruge lo̱o̱ta̱ ko̱ do̱o̱k. Iróng zin atin bo̱do̱k tawani ngen oonge lo̱o̱c kar kegerzan kaal cik aruge do̱o̱k. 16Ming gon okko mauli i̱ye̱la̱i̱ di̱i̱zo̱i̱, kacinni atin anna niko kar zin ka̱a̱da̱ olom ci aave udut bali u̱tu̱gu̱ Ta̱mu̱ta̱dde̱n ki kaal cik aruge do̱o̱k lo̱o̱ta̱.”

17Iizek zin Ta̱mu̱ta̱dde̱n Nowa ne, “Een necu baayenit ci olom ci kidimana anna ki kaal cik aruge lo̱o̱ta̱ do̱o̱k.”

Nowa ki logoz waginnek e̱e̱ggi̱n i̱i̱yo̱

18E̱e̱ggi̱n logoz wak Nowa bali iyowa i̱bo̱wa̱ ke̱ ciko: Shem ki Ham ki Japheth. (Een zin Hami be̱e̱ti̱ Kanaani.) 19E̱e̱ggi̱n ba̱li̱ye̱ logoz ne̱k Nowa ke̱ i̱i̱yo̱, kar ngatinne̱ng ki̱ti̱rtta̱i̱ ol ne̱k azanonnik lo̱o̱c ko̱ do̱o̱k.

20Een bali Nowa e̱e̱t ci e̱e̱vi̱nto̱, arir da̱ enne keen cik vi̱no̱ ma̱ne̱ cinne. 21Imma baling uud enne merte ci een vi̱no̱ bali eeva enne ma̱ne̱ cinne ko̱, ibahe zin enne kar ka̱ta̱ngu̱ nga̱dhi̱ri̱r ti̱te̱ cinne. 22Baling icin Hami be̱e̱ti̱ Kanaani baatinne ming oong nga̱dhi̱ri̱r, kar zin ku̱du̱wa̱k gotonoggi wak een ram aavtte reena ke̱. 23Idimtta zin Shem ki Japheth ru̱u̱m kar ki̱ri̱mte̱k i̱nya̱tti̱ kar zin ki̱tto̱zzo̱ ti̱ti̱ bali oonge be̱e̱ti̱nne̱ng ke̱ eci vu̱rrto̱, kar ku̱bu̱nge̱t be̱e̱ti̱nne̱ng bali oong nga̱dhi̱ri̱r ke̱. Owo nege eci vu̱rrto̱ eci gerza ming acin be̱e̱ti̱nne̱ng baling oong nga̱dhi̱ri̱r ke̱.

24Baling itinga Nowa ungnyahe azane merte cinne, kar zin kumuda zoz ci ogonik ngerinne wa dici ko̱ nonno, 25Kar zin kize ne,

“Kuduca Kanaan gotonogginne!

Een atin enne du̱ca̱i̱t

ci gotonogginnu do̱o̱k.”

26Kar zin bo̱do̱k kize ne,

“Anyik Manyi Ta̱mu̱ta̱dde̱n ci Shemi ka̱mu̱yu̱we̱!

Anyik bai Kanaan kize du̱ca̱i̱t ci Shemi.

27Anyik bai Ta̱mu̱ta̱dde̱n kotor ce̱e̱z ci Japheth kize a̱ppwa̱;

anyik Japheth kabak o̱rge̱ ci Shemi,

anyik Kanaan kize du̱ca̱i̱t cinne.”

28Imma baling ibil tawani, abak Nowa e̱rki̱to̱k obet i̱i̱yo̱ ki moten tu̱r (350), 29kar zin Nowa ka̱da̱k ngati abahe enne izeto e̱rki̱nya̱ obet torkoc ki moten tu̱r (950).

Attualmente Selezionati:

Kananet 9: tex

Evidenziazioni

Copia