Mataayo 14

ɄYohana ʉMwotsi ibudwa

(Maliko 6:14-29; Luuka 9:7-9)

1Mu nsɨkɨ ʉgwa ʉnkʉlʉdeeva ʉHelode#14:1 Ʉnkʉlʉdeeva ʉHelode Ʉjʉ aatambʉlwagwa Helode Antipa. Aale nswambe va Helode ʉMbaha. Ʉjʉ vɨ aalondile ʉkʉmʼbuda ʉYɨɨsʉ wʉ nʼdebe. ɄAntipa aale nkʉlʉdeeva mu vʉtwa wa Valooma. Aalongwitse ʉlʉvasu ʉlwa kʉ Galilaya na kʉ Peleya ʉkʉhʉma mu mwaka ʉgwa nni Wanaholilwi ʉYɨɨsʉ Kɨlɨsiti ʉkʉsikila mu mwaka ʉgwa sitsigo sidatu na budikakʉpamato (39) Waholilwe ʉYɨɨsʉ Kɨlɨsiti. akapʉlɨka itsʉ ʉYɨɨsʉ aavombaga. 2Pwʉ akavavʉʉla avavombi va mwene akata, “Ʉjwa vɨ Yohana ʉMwotsi ʉvɨ aabudilwe, atsʉʉkile ʉkʉhʉma kʉ vaswe. Ɨlɨ lyʉ lɨmpelye ave na maka ga kʉvomba isidego ndiisi.”

3ɄHelode aatsovile ewo ʉlwakʉva pa vʉtengʉlɨlo aamalile ʉkʉmwibata ʉYohana, akankʉnga nʉ kʉmwingitsa mu kɨkʉngwa. Aankʉngile pa kulongwi jya Helodiya ʉvɨ pa vʉtengʉlɨlo aale nʼdala va nnunaave ʉFilipo, 4manya ʉYohana alɨkʉmbʉʉla ʉHelode alɨkʉta, “Mwiko pamiiho ga Ngʉlʉve ʉkʉntoola ʉnʼdala ʉjʉ.”#Valawi 18:16; 20:21 5Pwʉ ʉHelode alɨkʉlonda ɨnzɨla jya kʉmʼbuda ʉYohana, lɨno alɨkʉdwada avaanu pakʉva vaamwɨdɨkaga ʉYohana ʉMwotsi ʉkʉta nyamalago.

6Wʉ kɨsiike ɨkɨgono kya kʉkʉmbʉka ʉkʉholwa kwa nkʉlʉdeeva ʉHelode, ʉmwalɨve va Helodiya akanema pavʉlongolo pa vahenza. 7Wʉ anemile, ʉHelode akahovoka siitso nʉ kwɨjyɨga ʉkʉmpa ɨkɨveetsaga ɨkyʉ ʉmwalɨve ʉjwa jiikʉnʼdoova. 8Lɨno, kʉ nongwa jya kʉsongwa nʉ vanyina, ʉmwalɨve ʉjwa akambʉʉla ʉHelode akata, “Ndidoova ʉʉme apa mu libeseni ʉntwe gwa Yohana ʉMwotsi.” 9Ʉnkʉlʉdeeva akasʉsʉvala siitso. Napeene, kʉ nongwa jya lwɨjyɨgo ʉlwʉ aalʉtsovile pavʉlongolo pa vahenza valya, akalagɨla ʉkʉta ʉmwalɨve ʉjwa apeewe ɨkyadoovile. 10Pwʉ ʉHelode akansuungʼa ʉmuunu mpamato alʉte nʉ kʉdumula ʉntwe gwa Yohana mu kɨkʉngwa. 11Ʉmuunu ʉlya akiitsa nʉ ntwe gwa Yohana mu libeseni nʉ kʉmpa ʉmmɨnza ʉjwa, namwene akampa ʉvanyina. 12Kʉ vʉmalɨlo, avakongi va Yohana vakalʉta kutoola ʉnsimba nʉ kʉsɨɨla. Pwʉ vakalʉta kukʉmbʉʉla ʉYɨɨsʉ tsyoni itsʉ tsyavombiike.

ɄYɨɨsʉ iliisa avaanu avaelufu vahaano

(Maliko 6:30-44; Luuka 9:10-17; Yohana 6:1-14)

13ɄYɨɨsʉ wʉ apʉliike tsyoni itso, akahega palya nʉ waato akabɨha apoonu apatsila vaanu, pakʉta ɨjyekele. Napeene, avaanu wʉ vapʉliike, vakagenda lwa silʉnde ʉkʉhʉma mu vʉtsenge ʉvʉ nʉʉvʉ, vakakonga ʉkwʉ aale ʉYɨɨsʉ. 14Wʉ ikile mu waato, akakɨvona ɨkɨpʉga ɨkɨvaha kya vaanu, akavakolela ɨkɨsa nʉ kʉvaponia isitamu sya veene.

15Wʉ vʉhue, avakongi va Yɨɨsʉ vakiitsa vakambʉʉla vakata, “Apoonu apa ʉpwʉ tʉlɨpwo lʉkɨnga, ɨkɨlo jɨhegelye. Lʉnonu ʉvatavʉle avaanu ava pakʉta valʉte vakɨgʉlɨle isyakʉlya kʉ matsumbe.” 16ɄYɨɨsʉ akavaanda akata, “Napanogiili valʉte. Muvape ʉnyie ɨkyakʉlya.” 17Aveene vakamwanda vakata, “Tʉlɨ nɨ mikate gɨhaano vʉvʉle ni somba ivɨlɨ.” 18ɄYɨɨsʉ akavavʉʉla akata, “Mwitse nasyo kwane.” 19Pwʉ akavalagɨla avaanu valya ʉkʉta vataame pa lʉhamba. Akatoola ɨmikate ɨgyo gɨhaano ni somba itso ivɨlɨ, akalola kʉkyanya, akasaana kwa Ngʉlʉve. Akamenyulania, akavapa avakongi va mwene. Pwʉ aveene avakongi vakavagavɨla avaanu. 20Avaanu vooni vakalya, vakiiguta. Kʉmbele, avakongi va mwene vakalʉndamania amasigalɨlo nʉ kʉdɨtsa isitʉndʉ kɨtsigo na sivɨlɨ (12). 21Avaanu avaalie ɨkyakʉlya ɨkyo, vaale avagoosi avaelufu vahaano (5,000) kɨtsila kʉvalɨla avadala na vaana.

ɄYɨɨsʉ igenda pakyanya pa nyanza

(Maliko 6:45-52; Yohana 6:15-21)

22Baaho ʉYɨɨsʉ akavalagɨla avakongi va mwene ʉkʉta viingile mu waato, valongole ʉkʉbɨha kʉ mwambo jya nyanza jya Galilaya wʉ ʉmwene ikɨlaga kʉ kɨpʉga kya vaanu. 23Wʉ amalile ʉkwɨlaga, ʉYɨɨsʉ akatoga mwene kʉ kɨdugala akave apoonu pa kwɨjyekela pakʉta ɨsaje kwa Ngʉlʉve. Wʉ vʉhue, akava apitsiige alɨ kʉ kɨdugala mwene. 24Ʉnsɨkɨ ʉgwa, ʉwaato ʉmwʉ vaale avakongi va mwene vʉkava vʉsiike pagati pa nyanza. Amajɨga galɨkʉvʉtova siitso ʉlwakʉva ʉnkuluguuto ʉnkali gwakuluguutaga, gʉlɨkʉvasiga aveene. 25Ʉnsɨkɨ wʉ tsivɨka ingʼʉkʉ, ʉYɨɨsʉ akiitsa ʉpwʉ avakongi va mwene vaale, kʉnʉ igenda pakyanya pa nyanza. 26Avakongi avo wʉ vambwene igenda pakyanya pa nyanza, vakadwada siitso nʉ kwoveela vakata, “Ɨlisyʉka!” 27Baaho ʉYɨɨsʉ akavavʉʉla akata, “Mwɨkangatse inumbula, neene. Muleke ʉkʉdwada.” 28ɄPetulo akamwanda akata, “Gwe Ntwa, ʉngave veeve jɨlweli, innavʉle ʉne ndɨgende pakyanya pa magasi ndiitse kwave.” 29ɄYɨɨsʉ akamwanda akata, “Itsaga.” Pwʉ ʉPetulo akiika mu waato ʉwa, akatengʉla ʉkʉgenda pakyanya pa magasi wʉ ibɨha kwa Yɨɨsʉ. 30Lɨno ʉnkuluguuto ʉnkali wʉ gukʉnkuluga, ʉPetulo akadwada siitso. Akatengʉla ʉkʉdwiviila mu magasi, akakoola akata, “Gwe Ntwa, immoke!”

31Baaho, ʉYɨɨsʉ akagolosa ɨkɨvoko, akamwibata, akambʉʉla akata, “Gwe vɨnya lwɨdɨko lʉdebe ʉve, kɨki vusinaana?” 32ɄYɨɨsʉ nʉ Petulo wʉ vingye mu waato, ʉnkuluguuto ʉgwa gʉkalitama. 33Pwʉ avakongi avaale mu waato, vakasugama paasi vakata, “Tsa jɨlweli, ʉve veeve Mwana va Ngʉlʉve!”

ɄYɨɨsʉ ikʉvaponia avatamu kʉ Genesaleti

(Maliko 6:53-56)

34ɄYɨɨsʉ na vakongi va mwene wʉ valowiike ɨnyanza jya Galilaya, vakasika mu kɨlʉnga kya Genesaleti. 35Avaanu va mu kɨlʉnga ɨkyo wʉ valʉmanyile ʉkʉta vɨ Yɨɨsʉ, vakavasuungʼa avaanu kupʉlɨsa ikulongwi tsa mwene imbasu tsyoni. Pwʉ avaanu vakiitsa navo avatamu vooni kʉ mwene. 36Vakanʼdoova ʉkʉta avatavʉle avatamu ʉkwabaasa kwene ʉvʉsivilo wa misabwa gya mwene. Lola, avatamu vooni avaabaasiitse, vaaponile.

Attualmente Selezionati:

Mataayo 14: zga

Evidenziazioni

Copia