Mataayo 13

Ɨkɨhwananitso kya ndahambeju

(Maliko 4:1-9; Luuka 8:4-8)

1Pa kɨgono kɨɨkyo, ʉYɨɨsʉ akahʉma mu nyumba jɨlya, akalʉta akataama kʉ lʉkanzimbale kʉ nyanza jya Galilaya. 2Ɨkɨpʉga ɨkɨvaha kya vaanu kɨkiitsa nʉ kʉlʉndamana ʉpwʉ aale ʉYɨɨsʉ, pwʉ ʉmwene akatoga mu waato nʉ kʉtaama ʉmwa. Avaanu valya vakatsiga vɨmile mu lʉkanzimbale lwa nyanza. 3ɄYɨɨsʉ akavavʉʉla isiinu syongosu kʉ nzɨla jya sihwananitso akata, “Aalekwo ʉndahambeju mpamato ʉvɨ aalʉtile kuvyala ɨmbeju jya mwene mu kɨlɨmɨla. 4Wʉ ivyala, ɨmbeju ɨjyɨnge jɨkagwa mu nzɨla, isidege sikiitsa sikahola sikamala. 5Ɨmbeju ɨjyɨnge jɨkagwa pakyanya pa lʉnalaawe ʉlʉtsila mmanga mwongosu. Ɨmbeju ɨjyo jɨkamela ngʼaningʼaani ʉlwakʉva ʉmmanga gwale idebe. 6Ɨlitsʉva wʉ livala, ɨmbeju ɨjyo jɨkajogotoka nʉ kwʉma ʉlwakʉva ɨmilela gya jyene nagyɨtoteke paasi siitso. 7Ɨmbeju ɨjyɨnge jɨkagwa mu mitwinyo. Wʉ ɨmitwinyo ɨgyo gɨkʉlile, gɨkahologotetsa ɨmbeju ɨjyo. 8Ɨmbeju ɨjyɨnge jɨkagwa mu mmanga ʉnnonu, jɨkamela nʉ kʉkʉla vʉnonu. Wʉ jɨdʉlwike, ɨjyɨnge jɨkava ni seke ʉndeevʉlʉ mpamato (100), ɨjyɨnge jɨkava ni seke isitsigo ntanato (60), ikange ɨjyɨnge jɨkava ni seke isitsigo sidatu (30). 9Ʉmuunu ʉvaveetsaga ʉvɨ ipʉlɨka, vɨ apʉlɨkage!”

Ʉvʉsumbe wa Yɨɨsʉ wa kʉtsovela mu sihwananitso

(Maliko 4:10-12; Luuka 8:9-10)

10Avakongi va Yɨɨsʉ vakahegelela, vakambʉʉtsa vakata, “Kɨki wʉ witsova na vaanu vutsovela mu sihwananitso?” 11Akavaanda akata, “ɄNgʉlʉve avapye ʉnyie ʉkʉgamanya agalɨ kʉvʉtiitu pa kulongwi tsa Lʉdeeva lwa mwene, lɨno avaanu avo navapeevilwi ʉkʉgamanya gooni ago, 12manya ʉmuunu ʉvaveetsaga ʉvɨ atsimanyile ikulongwi tsa Lʉdeeva lwa Kʉkyanya, ʉNgʉlʉve jiikʉmpa ʉkʉlʉmanya nʉ kʉlʉtɨɨlɨla. Ʉmuunu ʉvaveetsaga ʉvɨ nalʉmanyili, ʉNgʉlʉve ihetsa nakwene ʉkʉlʉmanya kwa mwene ʉkʉdebe ʉkwʉ alɨ nakwo. 13Ɨlɨ lyʉ lɨmmelye ʉne ndɨtsovelage mu sihwananitso wʉ nditsova na veene, manya vilola itsʉ ndivomba, lɨno navikʉtsitʉga, vipʉlɨka itsʉ nditsova, lɨno navikʉtsimanya. 14Aga givombeka kʉ veene pakʉta gakwɨle ʉgwʉ ʉnyamalago ʉYesaya aavɨgile akata,

‘Jɨlweli ʉkʉpʉlɨka mulapʉlɨkaga, lɨno namulatsimanyage.

Jɨlweli ʉkʉlola mulalolaga, lɨno namulatʉgage.

15Lola, inumbula tsa vaanu ava tsikiliitye,

imbʉlʉkʉtʉ tsa veene natsipʉlɨka,

amiiho ga veene vagabungile,

pakʉta galeke ʉkʉlola,

imbʉlʉkʉtʉ tsa veene tsileke ʉkʉpʉlɨka,

ikange inumbula tsa veene tsileke ʉkʉlʉmanya,

vagela vikwandʉka pakʉta ndɨvapoke.’#Yesaya 6:9-10

16“Lɨno mulɨ vagatalʉsu ʉnyie, ʉlwakʉva amiiho giinyo gilola ikange imbʉlʉkʉtʉ tsiinyo tsipʉlɨka. 17Jɨlweli ndikʉvavʉʉla ʉkʉta vaalekwo avanyamalago vongosu na vavalatse ʉwʉ gwanogaga ʉkʉtsivona itsʉ mukʉtsivona ʉnyie, lɨno navaatsivone. Gwanogaga ʉkʉpʉlɨka itsʉ mupʉlɨka ʉnyie, lɨno navaatsipʉlɨke.

ɄYɨɨsʉ ilʉvʉla ikulongwi tsa kɨhwananitso kya ndahambeju

(Maliko 4:13-20; Luuka 8:11-15)

18“Lɨno ʉnyie pʉlɨhɨtsi ɨkitsowa mu kɨhwananitso ɨkyo ɨkya ndahambeju. 19Ʉmuunu ʉvaveetsaga ʉvɨ ipʉlɨka ɨlimenyu lya Ngʉlʉve lɨno nikʉlɨmanya, ʉSetano ikwitsa nʉ kʉlɨhetsa ɨlimenyu ɨlyo ɨlyʉ ʉNgʉlʉve avyalile mu numbula jya mwene. Ʉmuunu ʉjwa ihwananitswa nɨ mbeju ɨjyʉ jyague mu nzɨla. 20Ɨmbeju ɨjyague pakyanya pa lʉnalaawe ʉlʉtsila mmanga mwongosu, jihwananitswa nʉ muunu ʉvɨ ipʉlɨka ɨlimenyu lya Ngʉlʉve, ikʉlyʉpɨlɨla baaho kʉ lʉhekelo. 21Lɨno ʉlwakʉva ɨlimenyu ɨlyo liiva lɨtsila milela gya kwɨtoteka mu nʼgati mu mwene, liivemwo kʉ nsɨkɨ nsupi vʉvʉle. Ɨngave ʉvʉkʉvɨlwa evo ʉvʉpala vukʉmwitsila pa kulongwi jya limenyu lya Ngʉlʉve, baaho ikʉlɨleka. 22Ɨmbeju ɨjyague pa mitwinyo, jihwananitswa nʉ muunu ʉvɨ ipʉlɨka ɨlimenyu lya Ngʉlʉve. Lɨno pa kulongwi jya lʉtʉngʉtsiimo lwa siinu sya wʉʉmi ʉvʉ, ʉkʉsyowa nʉ vʉnogwe wa vʉmosu, gooni ago gihologotetsa ɨlimenyu pakʉta lɨlemwe ʉkʉhʉʉpa iseke. 23Ɨmbeju jɨlya ɨjyague pa mmanga ʉnnonu, jihwananitswa na vaanu avipʉlɨka ɨlimenyu lya Ngʉlʉve nʉ kʉlɨmanya. Ʉmuunu ʉjyʉnge ihʉʉpa iseke ʉndeevʉlʉ mpamato (100), ʉjyʉnge isitsigo ntanato (60), ʉjyʉnge isitsigo sidatu (30).”

Ɨkɨhwananitso kya maanu nɨ ngano

24ɄYɨɨsʉ akavavʉʉla ɨkɨhwananitso ɨkɨnge akata, “ɄLʉdeeva lwa Kʉkyanya lʉhwaniine nʉ muunu ʉvɨ aavyalile ɨmbeju ɨnonu mu kɨlɨmɨla kya mwene. 25Lɨno wʉ avaanu vooni vagoneelye, ʉndʉgʉ va mwene akiitsa akavyala amaanu mu kɨlɨmɨla ɨkyo, akalʉta. 26Wʉ ɨngano ɨjyo jɨmelile nʉ kʉtengʉla ʉkʉhʉʉpa iseke, amaanu ago nageene gakamela. 27Avavombi va mwenekɨlɨmɨla vakiitsa kukʉmbʉʉtsa vakata, ‘Gwe ntwa, tʉlʉmanyile ʉkʉta ʉkavyalile ɨmbeju ɨnonu mu kɨlɨmɨla kyako, pwʉ lɨno amaanu ago gahʉmile ndaku?’ 28Akavaanda akata, ‘Ʉndʉgʉ vɨ mwene avombile itsi.’ Avavombi va mwene vakambʉʉtsa vakata, ‘Ndeeti vunogwa tʉlʉte tʉkanyape?’ 29Ʉmwene akata, ‘Baako, muleke ʉkʉnyapa ʉlwakʉva mungave mwinyapa amaanu ago, muweesa ʉkʉnyapa paninie nɨ ngano. 30Sileki syoni sikʉlage paninie ʉkʉsika pa nsɨkɨ gwa kʉbena. Pa nsɨkɨ ʉgwa, ndɨlavavʉʉla avabeni ʉkʉta valʉndamanie taasi amaanu ago nʉ kʉkʉnga mu sikosa sikosa pakʉta ganyianywe. Apeene ɨngano valʉndamanie nʉ kʉhwanga mu kɨbaana kyango.’ ”

Ɨkɨhwananitso kya mbeju jya libɨkɨ ɨlilongoti

(Maliko 4:30-32; Luuka 13:18-19)

31ɄYɨɨsʉ akavavʉʉla ɨkɨhwananitso ɨkɨnge akata, “ɄLʉdeeva lwa Kʉkyanya lʉhwaniine nɨ mbeju ɨjya libɨkɨ ɨlilongoti#13:31 Mbeju ɨjya libɨkɨ ɨlilongoti Mu Kɨyunaani lɨvɨgilwe mbeju jya haladali. Ɨmbeju ɨjɨ jyʉ jyamanyikiike na Vayahudi ʉkʉta jyʉ mbeju ɨndebe siitso kʉ mbeju tsyoni. Kwawe ɨmbeju ɨjɨ jɨhwaniine nɨ mbeju jya lilongoti. ɨjyʉ ʉmuunu aavyalile mu kɨlɨmɨla kya mwene. 32Ɨmbeju ɨjɨ ndebe siitso ʉkʉlʉtɨɨlɨla imbeju itsinge tsyoni, apeene wʉ jɨvyalilwe, jimela nʉ kʉkʉla nʉ kʉva libɨkɨ livaha ʉkʉlʉtɨɨlɨla gooni mu kɨlɨmɨla. Ɨmbeju ɨjyo jiiva mʼbɨkɨ ʉmbaha ʉgwʉ isidege sikwitsa nʉ kʉtsenga ʉwaaswa mu magɨka tsa gwene.”

Ɨkɨhwananitso kya kɨlʉve

(Luuka 13:20-21)

33ɄYɨɨsʉ akavavʉʉla ɨkɨhwananitso ɨkɨnge akata, “ɄLʉdeeva lwa Kʉkyanya lʉhwaniine nɨ kɨlʉve ɨkyʉ ʉnʼdala mpamato aatoolile, akasyogela mu nkate gwa madebwe gadatu ga vʉhevete. Wʉ asyogye, ɨkɨlʉve kɨlya kɨkatotsa ʉnkate gwoni.”

Ʉvʉsumbe wa Yɨɨsʉ wa kʉtsovela mu sihwananitso

(Maliko 4:33-34)

34ɄYɨɨsʉ aakɨvʉʉlaga ɨkɨpʉga kya vaanu ago gooni kʉ nzɨla jya sihwananitso. Naatsovage ɨkɨveetsaga kʉ veene kɨtsila kʉtsovela mu kɨhwananitso. 35Ago gaavombiike pakʉta ɨlimenyu lɨlya ɨlyʉ aatsovile ʉnyamalago lɨvombeke ʉkʉta,

Ndɨlatsovaga na vaanu kʉ nzɨla jya sihwananitso.

Ndɨlavavʉʉla ʉgwʉ gasihamiike ʉkʉhʉma ʉpwʉ ʉNgʉlʉve aapelile ɨkɨlʉnga.#Zabuli 78:2

ɄYɨɨsʉ ilʉvʉla ɨkɨhwananitso kya maanu nɨ ngano ɨjikʉla

36Pwʉ ʉYɨɨsʉ akɨlaga kʉ kɨpʉga kya vaanu ɨkyo, akiingila mu nyumba. Avakongi va mwene vakiitsa, vakatsova vakata, “Tʉlʉvʉlɨle ɨkitsowa mu kɨhwananitso kɨlya ɨkya maanu agaale paninie nɨ ngano mu kɨlɨmɨla.”

37ɄYɨɨsʉ akavaanda akata, “Ʉmuunu ʉlya ʉvɨ aavyalile ɨmbeju ɨnonu ihwananitswa nʉ Mwana va Muunu. 38Ɨkɨlɨmɨla kɨlya kihwananitswa nɨ kɨlʉnga, ɨmbeju ɨnonu jɨlya jihwananitswa na vaanu va Lʉdeeva lwa Ngʉlʉve, amaanu galya gihwananitswa na vaanu va ntavangwa ʉlya. 39Ʉndʉgʉ ʉvɨ iitsile kuvyala amaanu, ihwananitswa nʉ Setano. Ʉkʉbena kuhwananitswa nɨ kɨgono kya vʉsililo, ɨkya vʉhɨgi wa kɨlʉnga. Avabeni vihwananitswa na vasuungʼwa va Ngʉlʉve. 40Ndʉwʉ avavombi avalɨ mu kɨlɨmɨla vinyapa nʉ kʉnyianya amaanu mu mwoto, wʉ jɨlaava pa kɨgono kya vʉsililo, ɨkya vʉhɨgi wa kɨlʉnga. 41ɄMwana va Muunu alavasuungʼa avasuungʼwa va mwene pakʉta vavalʉndamanie ʉkʉhʉma mu Lʉdeeva lwa mwene avaanu vooni ʉwʉ vikʉvajatsa avajyavo pakʉta vavombage imbiivi, paninie na vatulanongwa vooni. 42Avasuungʼwa avo valavataaga avaanu vooni avo mu mwoto gwa sikutsooni ʉmwʉ valalɨlaga nʉ kʉgadʉtsa amiino kʉ nongwa jya lʉvavo ʉlʉlʉti. 43Pwʉ avaanu vooni ʉwʉ vanogye pamiiho ga Ngʉlʉve, valangʼaalaga ʉta litsʉva mu Lʉdeeva lwa mwene. Ʉmuunu ʉvaveetsaga ʉvɨ ipʉlɨka, vɨ apʉlɨkage!

Isihwananitso sya kʉtwela ɨkɨɨnu ɨkɨlʉti

44“ɄLʉdeeva lwa Kʉkyanya luhwananitswa nɨ kɨɨnu ɨkɨlʉti siitso ɨkyʉ kyasihilwe mu kɨlɨmɨla. Wʉ ʉmuunu mpamato akɨtwelile mulya, akasiha vʉnonu. Pwʉ kʉ lʉhekelo, akabɨha akagʉtsa isiinu syoni isyʉ aale nasyo, akagʉla ɨkɨlɨmɨla ɨkyo.

45“Ikange, ʉLʉdeeva lwa Kʉkyanya luhwananitswa nʉ muunu ʉntsuluusi ʉvɨ aalʉtile kulonda ɨliganga ɨligʉtsiwa kʉ ndalama nyongosu siitso. 46Wʉ alɨweene, akabɨha kugʉtsa ɨkyʉma kyoni ɨkyʉ aale nakyo, akiitsa akagʉla ɨliganga ɨlyo.

Ɨkɨhwananitso kya nsʉngʉlʉ

47“Ikange, ʉLʉdeeva lwa Kʉkyanya luhwananitswa nʉ nsʉngʉlʉ ʉgwʉ avalovasomba vaalahile mu nyanza. Wʉ valahile, ʉnsʉngʉlʉ ʉgwa gʉkakʉka isiinu syongosu. 48Wʉ ʉnsʉngʉlʉ ʉgwa gʉdɨgile, avalovasomba vakagʉkwegela kʉ lʉkanzimbale lwa nyanza. Pwʉ vakataama paasi nʉ kʉlʉndamania isomba inonu mu sitʉndʉ, nʉ kʉtaaga syoni isyʉ nasinogiili. 49Wʉ jɨlaava ewo pa kɨgono kya vʉsililo, ɨkya vʉhɨgi wa kɨlʉnga. Avasuungʼwa va Ngʉlʉve valiitsa nʉ kʉvalekengʼania avaanu avatulanongwa kʉ valya avanogye pamiiho ga Ngʉlʉve. 50Avasuungʼwa avo valavataaga avatulanongwa mu mwoto gwa sikutsooni ʉmwʉ valalɨlaga nʉ kʉgadʉtsa amiino kʉ nongwa jya lʉvavo ʉlʉlʉti.”

ɄYɨɨsʉ imanyiisa ikulongwi tsa manyiiso iimya ni ndaala

51ɄYɨɨsʉ akavavʉʉtsa avakongi va mwene akata, “Ndeeti, mukʉtsimanya tsyoni itsi itsʉ ndɨvavʉʉlile?” Aveene vakamwanda vakata, “Tukʉtsimanya.” 52Pwʉ ʉmwene akavavʉʉla akata, “Lɨno ʉmmanyisi va ndagɨlo tsa Moose ʉvaveetsaga ʉvɨ iiva nkongi mu Lʉdeeva lwa Kʉkyanya, ihwananitswa nʉ mwenenyumba ʉvɨ ihʉmya mu kɨbaana kya mwene isiinu isipya ni silaala.”

ɄYɨɨsʉ vikʉmʼbeela kʉ myave

(Maliko 6:1-6; Luuka 4:16-30)

53ɄYɨɨsʉ wʉ amalile ʉkʉtsova isihwananitso isyo, akahega, alɨkʉlʉta kʉ myavaavo. 54Wʉ asiike mu vʉtsenge wa kʉ myave, akatengʉla ʉkʉvamanyiisa avaanu mu masinagogi ga veene. Avaanu avo vakadega nʉ kʉvʉʉtsania valɨkʉta, “Ʉmuunu ʉjʉ alʉweene ndaku ʉlʉhala ʉlʉ nʉ vʉtavʉlɨlwa wa kʉvomba isidego isi? 55Ʉjʉ navɨ nswambe va selemala? Ndeeti, ɨlitaawa lya vanyina nalyʉ lɨlya ɨlyʉ tukʉtambʉla twita Maliyamu? Ndeeti, avanunaave nawʉ valya ʉYakobo, ʉYusufu, ʉSimoni nʉ Yuuda? 56Ndeeti, avahaatsave nawʉ valya ʉwʉ tutaama paninie navo? Pwʉ lɨno akavile ndaku gooni aga?” 57Pwʉ vakabeela ʉkʉmwɨdɨka. Ʉmwene ʉYɨɨsʉ akavavʉʉla akata, “Ʉnyamalago ikwɨmɨkiwa na vaanu kwoni ʉkʉveetsaga, peene nikwɨmɨkiwa na vaanu va mu vʉtsenge wa mwene na valɨ mu nyumba jya mwene.” 58ɄYɨɨsʉ wʉ aweene navikʉmwɨdɨka, naavombe isidego syongosu ʉkʉ.

Attualmente Selezionati:

Mataayo 13: zga

Evidenziazioni

Copia