Matiyu 4

Naa ɓɔɔ Sheetang gãsɛ Yeesɔ ɓɛɛ

(Mar 1:12-13; Luk 4:1-13)

1A Suru Laa túu Yeesɔ daa nɔng ka waala nɛɛ tɔ̀ɔ, Sheetang wu daa gãsɛ wu. 2Yeesɔ seng nyaalaa tɔ ka waala diki laa ziti, a nyɔkɔ naa nyɔ wu kati. 3A Sheetang arɛ naa gãsɛ wu tɔɔ, “Mɔkɔ nɛɛ Jaa Kpanti Laa, risi tari keɓe ta, ri rì borodi.”

4A Yeesɔ kasɛ wu nyaa tɔɔ, “Ruu Kpanti Laa kɔɔyi tɔɔ, wu vuu shaanang kɔ lusu shɔnzang yuu gbete kpang, ɓi yee piti ɓɔɔ nwang nɛɛ nyaa Kpanti Laa ɓɛɛ kɔ lusu zang yuu.”

5A Sheetang túu Yeesɔ daa nɛɛ wu ka Urushalima, a daa shing wu ka sɔ̃ngsɔ̃ng yuu Gãa Laa. 6A kɔɔ wu tɔɔ, “Mɔkɔ nɛɛ Jaa Kpanti Laa, shɛ̃ɛ ta ka tipi, ka ruu ɓɔɔ, ruu Kpanti Laa kɔɔyi tɔɔ,

“Laa kɔɔ zang nyaa shonang ɓiɓɛ

ɓɔɔ ka lapa ruu ka yuu ɓaaɓɛ,

ri naa ta mɔɔ ka naa ɓarɛ ka gbalang,

ka ruu ɓɔɔ, mɔɔ nɛɛ nyɔ doo ɓaaɓɛ ka tari ɓɛɛ.”

7A Yeesɔ ti kasɛ Sheetang nyaa tɔkn tɔɔ, “Ruu Kpanti Laa ti kɔɔyi tɔɔ, ‘Zang wu gãsɛ Laa ɓɔɔ wukɔ Kpanti zang ɓɛɛ kpang.’ ”

8A Sheetang tuu wu tɔkn daa nɛɛ wu ka yuu kɔpɔ ɓɔɔ beebang ɓɛɛ, a tusu wu koolaa ɓɔɔ ka bm bm nandon, nɛɛ vuu tɔ̃ɔ ɓɔɔ kagn piti. 9A kɔɔ Yeesɔ tɔɔ, “Naa mɔɔ tang nɛɛ gutu ka tĩng mɛɛ, mɔɔ dɔɔ m, n a mɔɔ veɓe katɔ nandon.” 10A Yeesɔ kasɛ wu nyaa tɔɔ, “Daa nɛɛ kaaɓa, mɔ́ɔ yàa m bii Sheetang. Ruu Kpanti Laa kɔɔyi tɔɔ, ‘Shɔnzang wu dɔɔ Kpanti Laa ɓiɓɛ kɔ shɛ̃ɛning, nɛɛ wu ti bang wukɔ gbete.’ ”

11A Sheetang daayi, yaa Yeesɔ kati. Zang nyaa shonang Kpanti Laa ɓɔɔ ka lapa ri arɛ, ri naa a wu vuu ɓɔɔ wu kasɛ ɓɛɛ.

Yeesɔ gaayu shonang ɓiɓɛ ka Galili

(Mar 1:14-15; Luk 4:14-15)

12Yeesɔ naa tãa nyaa tɔɔ, zang loo Yɔhana tɔ ka sãa a naa yupaa daa ka Galili. 13Yaa Nazara, a daa nwang ka Kafanahu ɓɔɔ ka nyaa mii waapo ɓɔɔ ka tipi Zebuluna nɛɛ Nafitali ɓɛɛ. 14Vuu keɓe, nwang ka naa ɓɔɔ Kpanti Laa kɔɔ nɛɛ nyaa zang nyaa shonang ɓiɓɛ Ishaya ka tĩng tɛ̃ɛ tɛ̃ɛ ɓɛɛ. Ishaya kɔɔyi tɔɔ,

15“Zang tipi Zebuluna nɛɛ tipi Nafitali

ɓɔɔ ka gbalang mii waapo ɓɔɔ zang ta rang Urudung ka dang ɓɛɛ,

a ɓɔɔ zang tipi Galili,

ɓɔɔ ri zang Isirela kpang ɓɛɛ.

16Zang keɓe piti ri nwang ka nɔng ɓɔɔ tɔ̀ɔ katɔ, a

ri zi nɔng yakɛnang ɓɔɔ bang tɔ.

A zang ɓɔɔ ri kaa vɔrɔ, vɔrɔ diki diki,

nɔng yakɛnang nwang nyaa tɔ ka ri.”

17A Yeesɔ gaa tɔɔsung yee Laa rannang ka diki kaɓa kɔ. Kɔɔyi tɔɔ, “Nɔɔ yaa vuu shi kpang manɛ ta, nɔ́ɔ kɔ̃sɔ yeti manɛ, ka ruu ɓɔɔ, diki ɓɔɔ Laa roo kpanti kagn a naabm tɔ ɓɛɛ.”

Zang jaazĩi yinang dɛ̃ɛti ɓɔɔ Yeesɔ ɓaa ri nyaa ɓɛɛ

(Mar 1:16-20; Luk 5:1-11)

18Yeesɔ rakɛ kana ka nyaa mii waapo Galili, a zi zang ziti, Siman ɓɔɔ zang ɓaa nɛɛ Bituru ɓɛɛ nɛɛ jaa niiɓɛ Anduru. Ri yi jaazĩi nɛɛ jang ka mii waapo, ka ruu ɓɔɔ, ri ɓarɛ zang jaazĩi yinang ɓɛɛ. 19A Yeesɔ ɓaa ri nyaa kɔɔ ri tɔɔ, “Nɔɔ dũng m ta, ń tusu nɔɔ naa ɓɔɔ nɔɔ ɓaa m zang nyaa ɓɛɛ.” 20A ri yaa jang jaazĩi ɓarɛ tantɛnang, ri dũng wu.

21Nɛɛ tɔɔ wu daa ka tĩng tɔkɔlɔng, ti zi zang ɓɔɔgn ziti tɔkn nɛɛ daa ɓarɛ. Yakub nɛɛ jaa niiɓɛ Yɔhana, a ɓɔɔ daa ɓarɛ Zebedi ka yeti tonsi, ri palɛ jang jaazĩi ɓarɛ. A Yeesɔ ɓaa Yakubu nɛɛ Yɔhana nyaa. 22A ri tantɛ tonsi nɛɛ daa ɓarɛ yaanang ri dũng wu.

Zang dɔɔli ɓɔɔ Yeesɔ masɛ ɓɛɛ

(Luk 6:17-19)

23Yeesɔ ra ka tipi Galili nandon, tùsú zang vuu ka gãa zɔɔ kpalɛnang zang Yahudi. Ti rang zang yee ka yuu ruu ɓɔɔ, Laa tùsú zang nɛɛ wukɔ kpanti ɓɛɛ. A ti masɛ zang ɓɔɔ kɔnang yiki ri ka zɔ̃ng zɔ̃ng nandon. 24Ka ruu nɔngkɔ, nyaa Yeesɔ baa nɔng ka tipi Siriya nandon. A zang atɛ wu zang kɔnang ka zɔ̃ng zɔ̃ng, nɛɛ zang ɓɔɔ kɔnang ɓarɛ dang ri jĩng dɔɔli ɓɛɛ, nɛɛ zang ɓɔɔ suru shi kpang ka bii ɓarɛ, nɛɛ zang ɓɔɔ ri mã katɔ ɓɛɛ, a ɓɔɔ zang ɓɔɔ ri kàa katɔ ɓɛɛ. A Yeesɔ masɛ ri kaa nandon. 25Zang dɔɔli ri a ka bii Yeesɔ nɛɛ Galili, nɛɛ Dekapoli, nɛɛ Urushalima, nɛɛ Yahudi, a ri dũuru Yeesɔ ka knti nɛɛ zang nyaa rang Urudung ɓɔɔ dang ɓɛɛ nandon.

Attualmente Selezionati:

Matiyu 4: mzmNT

Evidenziazioni

Copia