Matiyu 6

Kuneke n kuneꞋe

1Yesu u lyaꞋi kelime n kuyotsongusu le, ɗa u danai, “Ka̱ta̱ i zuka! I yaꞋan baci ili i singai ka̱ta̱ i yaꞋan i ɗa adama a na uma e ene ili i na i yaꞋin ka̱ta̱ a cikpa ɗa̱ ba. I yaꞋan baci nannai, yi a̱ kuciya̱ katsupu a̱ ubuta̱ we Esheku a̱ ɗa̱ a na i gaɗi ba.

2“I neke baci aza a unambi ili, ka̱ta̱ i yaꞋan tsa aza a kapalaka̱shi ba. A̱ tsu lika̱ ta̱ avana a̱ unu a avasa, ka̱ta̱ a sala a uye adama a na uma e ene ulinga u singai u le ka̱ta̱ a cikpa le. N dana ɗa̱ mayun, aza a kapalaka̱shi a nan lo a isa ta̱ ɗe katsupu ke le ra̱ka̱. 3Adama a nannai, yi baci e kuneke aza a unambi kuneꞋe, yaꞋin ku ɗa usokongi ka̱ta̱ kukiye ku ugula̱ ku ɗa̱ ku yeve ili i na kukiye ku usingai ki a kuyaꞋan ba. 4YaꞋan kuneꞋe ku nu usokongi, a̱yi Esheku a̱ nu, a na e yevei i na yi usokongi ra̱ka̱, wi ta̱ a kutsupa wu.”

KuyaꞋan ka avasa

(Luk. 11:2-4)

5Yesu u lyaꞋi kelime n kudana, “Yi baci a kuyaꞋan kavasa, ka̱ta̱ i yaꞋan tsa aza a kapalaka̱shi ba! A ci ciga ta̱ kushamgba a̱ unu a avasa koɓolo n nsanji mu uye ka̱ta̱ a yaꞋan kavasa, adama a na uma e ene le. N dana ɗa̱ mayun, a isa ta̱ de katsupu ke le ra̱ka̱. 6Vi baci a kuyaꞋan kavasa, uwa a̱ kunu ku nu usokongi ka̱ta̱ vu ɓa̱ya̱ngu utsutsu. Vi yaꞋan kavasa a kubana we Eshevu. A̱yi Eshevu, a na e ce ene ili i na a yaꞋin usokongi, wi ta̱ a kutsupa wu.

7“Vi baci kpamu a kuyaꞋan kavasa, ka̱ta̱ vi yaꞋan tsa aza a na a̱ tsu kpa̱ɗa̱ kuyeve Ka̱shile ba. O ci yongo ta̱ a kuyaꞋan ka̱vura̱ tsu ketepu. A tsu dana ta̱ Ka̱shile ki ta̱ a kupanaka le adama a kadanshi ka̱ a̱bunda̱i ke le. 8Ka̱ta̱ yo okpo ci le ba. Esheku a̱ ɗa̱ e yeve ta̱ ɗe ili i na yi a kuciga kafu i folono yi.

9Adama a nannai yi baci a kuyaꞋan kavasa i yaꞋan kaꞋa nahannai:

‘Esheku a̱ tsu a na i gaɗi,†

yaꞋan ci cikpa kula ku nu.

10Zuwa tsugono tsu nu tsu ta̱wa̱ na a aduniyan.

Zuwa uma a yaꞋanka wu ili i na vi cigai a yaꞋanka wu a aduniyan

uteku u na yi ɗe gaɗi.

11Neke tsu ilikulyaꞋa i na ci a kuciga anana.

12Cinukpaka tsu unushi u tsu,

uteku u na ci ci cinukpaka aza a na a nusakai tsu.

13Ka̱ta̱ vu banka tsu a̱ ubuta̱ u kukondo ba,

amma vi isa tsu a̱ ubuta̱ u vuza gbani-gbani.’#6:13 Atagarda a̱ kuku o yoku a katagarda ka nam pa a zuwa ta̱ udani “Adama a na tsugono tsu nu tsu ɗa n utsura n tsugbayin tsu nu tsu ɗa ko wanai. Ta nannai.”

14“Mayun, i cinukpaka baci uma unushi u le, Esheku a̱ ɗa̱ a na i gaɗi i ta̱ feu a kucinukpaka ɗa̱ unushi u ɗa̱. 15Amma i cinukpaka baci uma unushi u le ba, Esheku a̱ ɗa̱ a na i gaɗi feu u kucinukpaka ɗa̱ unushi u ɗa̱ ba.”

Kuka̱na̱ ku una̱

16Yesu u lyaꞋi kelime ɗa u danai, “Yi baci a̱ kuka̱na̱ una̱, ka̱ta̱ i na̱mgba̱ ka̱tsuma̱ tsa aza a kapalaka̱shi ba. O ci yotsongu ta̱ uma adama a na uma e yeve a na a̱ ka̱na̱i una̱. N dana ɗa̱ ta̱ mayun, aza a kapalaka̱shi a nan lo a isa ta̱ ɗe katsupu ke le. 17Amma vi baci a̱ kuka̱na̱ una̱, za̱ɗukpa̱ ka̱nji ka̱ nu ka̱ta̱ vu saꞋa a̱shi a̱ nu. 18Tsu nan lo vuza wi e kuyeve a na vi a̱ kuka̱na̱ una̱ ba, sai Eshevu. Adama a na u yeve ta̱ kpamu ili i na yi usokongi dem, wi ta̱ ta na a kutsupa wu.”

Uciyi u gaɗi

(Luk. 12:33-34)

19Yesu u lyaꞋi kelime ɗa u danai, “Ka̱ta̱ i zuwaka ka̱ci ka̱ ɗa̱ uciyi punu a aduniyan ba! KayaꞋan m matsafu i ta̱ a̱ kula̱nga̱sa̱ u ɗa. Oboki kpamu i ta̱ a kufuɗa a̱ ta̱sa̱ ka̱ta̱ a uwa o boko u ɗa. 20Adama a nannai zuwakai ka̱ci ka̱ ɗa̱ uciyi gaɗi a̱ ubuta̱ u na kayaꞋan m matsafu a kulyaꞋa, ko oboki a̱ ta̱sa̱ ka̱ta̱ a uwa o boko u ɗa ba. 21A̱ɗu a̱ ɗa̱ i ta̱ o kuyongo a̱ ubuta̱ u na uciyi u ɗa̱ wi ayin tutu.

Kutashi ki ikyamba

(Luk. 11:34-36)

22“A̱shi i ta̱ tsu kutashi ki ikyamba. A̱shi a̱ nu a gaꞋan baci, ikyamba i nu ra̱ka̱ yi ta̱ a kushana n kutashi. 23Amma a̱shi a̱ nu a̱ na̱mgba̱ baci, ikyamba i nu ra̱ka̱ yi ta̱ a kushana n ka̱yimbi. Vi baci a̱ ka̱yimbi amma ɗa vi sheshei vi ta̱ n kutashi, mayun vi ta̱ a̱ ka̱yimbi kpaɓam.

Ka̱shile n uciyi

(Luk. 16:13)

24“Vuza wi a kufuɗa wa yaꞋanka azagbagbaꞋin e re tsugbashi ayin e te ba. Vi ta̱ a kuꞋiwan vuzagbayin vi te, ka̱ta̱ vi ciga vuza te. Ko vu tono vuza te, ka̱ta̱ vi iwan kutono vuza te. Ya kufuɗa yo tono Ka̱shile ka̱ta̱ i tono uciyi feu ba.”

Ka̱ta̱ yo oꞋuso ka̱ci ka̱ ɗa̱ ba

(Luk. 12:22-31)

25Yesu u lyaꞋi kelime, “N dana ɗa̱ ta̱, ka̱ta̱ yo oꞋuso ka̱ci ka̱ ɗa̱ adama a kulyaꞋa n kusoꞋo ku ɗa̱ ba. Ka̱ta̱ yo oꞋuso ka̱ci ka̱ ɗa̱ kpamu adama o ntogu n na i kuꞋuka ikyamba i ɗa̱ ba. Wuma u laꞋa ta̱ tsuwaꞋa, ikyamba kpamu i laꞋa ta̱ ntogu. 26Indanai biꞋi nnu n na mi a ciꞋimkpi gaɗi. A̱ ci ca̱Ꞌa̱ ba, ko a kyaꞋa. O tsu ɓolongu ilikulyaꞋa ka̱ta̱ o zoku o mpon ba. Ko n nannai Esheku a̱ ɗa̱ a na i gaɗi a̱ tsu la̱na̱ le ta̱. I yeve ta̱ ta na a̱ɗa̱ i laꞋa ta̱ nnu. 27Ko yo oꞋuso ka̱ci ka̱ ɗa̱, yi a kufuɗa yo doku ka̱ci ka̱ ɗa̱ wuma ba, ko kenu.

28“Yi ɗa̱i i zuwai ɗa yi o koꞋuso ka̱ci ka̱ ɗa̱ adama o ntogu? Indanai biꞋi uteku u na a̱pa̱lu a na i a kakamba o tsu gbonguro. A ci yaꞋan ulinga adama a na a yaꞋanka ka̱ci ke le ntogu ba. 29Amma yaꞋan n dana ɗa̱, ko Mogono Sulemanu n uciyi u ni dem u fuɗa u kala ka̱ci ka̱ ni ka̱u tsa̱ a̱pa̱lu a nam pa ba. 30Ka̱shile ka̱ tsu la̱na̱ baci mita̱ ma na mi n wuma anana, amma mkpaꞋa a kana ka̱ta̱ a vakangu maꞋa a akina, ai, u yotso ta̱ i yeve a na Ka̱shile feu ke kuneke ɗa̱ ta̱ ntogu. Ka̱ta̱ uneki u ka̱ɗu u ɗa̱ u yaꞋan kenu ba! 31Ka̱ta̱ yo oꞋuso ka̱ci ka̱ ɗa̱ i dana, ‘Yi ɗa̱i tsu kulyaꞋa?’ ko ‘Yi ɗa̱i tsu kusoꞋo?’ ko ‘Yi ɗa̱i tsu kuꞋuka?’ 32Aza a na e yevei Ka̱shile ba, ele ɗa o ci yongo o kusoꞋo ka̱ci ke le adama ili i nam pa ayin tutu. Esheku a̱ ɗa̱ a na i gaɗi e yeve ta̱ a na i cigai ili nam pa ya ra̱ka̱. 33Ili i na i kulaꞋa n kuciga cau i ɗaɗa tsugono tsu Ka̱shile n kuyaꞋan ili i na Ka̱shile ka cigai. I yaꞋan baci nannai, Ka̱shile ke kuneke ɗa̱ ta̱ ili i na i buwai dem. 34Adama a nannai ka̱ta̱ yo oꞋuso ka̱ci ka̱ ɗa̱ adama a ili yi mkpaꞋa ba, mkpaꞋa feu wi ta̱ n kadama ka̱ ni kau. Adama a nannai kadama ka anana ka yawa ta̱ biꞋi.”

Attualmente Selezionati:

Matiyu 6: asgNT

Evidenziazioni

Copia