I Versetti Biblici più popolari da Mateu 5

Condividi

Katupono ti yt uwe i ariãty hapyke hawyi ipag yrysakag ywytꞌokpy pe neꞌi. Maꞌato heiam sese pe. Wãtym mote miitꞌin topag ariãty ywaiti heiam sese pe yn waku aiũpe getap moẽtyhot hamo. Miꞌi hawyi yne raꞌyn getap wiaria waku puo iꞌatuewyry e. Pyno ti aikotã ariãty hẽtyhot kahato hap ewy eipe uimohey haria miitꞌin puꞌap Tupana kapiat moẽtyhot hamo eweikupteꞌen e. Atikyꞌesat yne eiminug wakuap koꞌi heremo wuatꞌi akasa hamo iꞌewyte Aiꞌywot Tupana atipy piat motypot hamuat atikyꞌesat e Iesui temiitꞌin me yityꞌok tote.

Eiperia wyti ariãty ewy miitꞌin me muap Tupana kapiat moherep hamo. Miꞌi pote mekewat tawa yityꞌok totiat minug heremo pya kahato.

Miꞌi hawyi toꞌe i -Pyno uwe uwe toineꞌen ipyꞌa hãpyk kahato miꞌiria wyti tupana kapiat akasa haria wo tukupteꞌen.

Miꞌi hawyi toꞌe i -Pyno uwe uwe ipotpap Tupana mikyꞌesat nug hap ete tesyꞌat wywo teꞌytui wywo miꞌi haria ti aru meiũran Tupana mimowepiit wo tukupteꞌen.

Maꞌato Uito ti areꞌe ehepe Mio tã are -Eweiꞌatukyꞌe ro ehewanikaptia are. Waku ahatyꞌi hatyꞌi haria upi wahẽtup Tupana kape

Mio tã toꞌe -Uhekatuwyria uwe uwe Tupana pe toꞌe -Uruto iꞌatuhakyꞌeꞌi rakaria wo pote urutukupteꞌen katupono yt uruikuap i ti En urumikyꞌesat oktan iꞌatuꞌe. Mio tã e haria ti uimipoity wo teꞌeropyhuꞌat. Iwepiit rakaria sese teꞌeropyhuꞌat.

Miꞌi hawyi poꞌog Iesui henoi itotiaria pe -Pyno uwe uwe ipotpap woꞌowese hap wywo yn miꞌiria ti Tupana iꞌatueropat kahato aikotã tomepytꞌin sese eropat hap ewy.

Miꞌi hawyi Iesui toꞌe i -Uiwyriaꞌin e uwe uwe tuwak topyꞌa pe iraniaꞌin satek pote hoꞌopot turan miꞌi haria pe ti Tupana toꞌe -Uito aru worohoꞌomowepiit aru ehatek turan e.

Miꞌi hawyi Iesui toꞌe i -Pyno uwe uwe hoꞌopot kahato tepiat niatpo hap Tupana mikyꞌesat nug turan miꞌi haria pe ti aru tutum toieineꞌen hap.

Miꞌi hawyi poꞌog Iesui henoi -Iꞌewyte uwe uwe ihakyꞌeꞌi rakaria piat hegyiꞌat rakaria pe ti aru Tupana egyiꞌat hap tuut iꞌatuewowi.

Iꞌewyte karãpe ehepe teꞌerehay mikyryꞌi kat iꞌatuꞌe kat iꞌatuꞌe ehepe karãpe eweiwat uhepiat pote. Miꞌi tã pote ti aru uimipoityro wo eweikupteꞌen. Maꞌato miꞌi pykai waku eiweipiit eiwehum yn naꞌyn katupono Tupana kai iwato kahato imiium ehepiatnuat atipy pe. Katupono saꞌawyꞌi wuaria Tupana ehay moherep haria ti eiꞌewyte hoꞌopot haria tukupteꞌen.

Miꞌi hawyi Iesui toꞌe i -Pyno eiperia ti taꞌi paa e haria eweikupteꞌen pote ti aru putꞌok e Tupana miium ehepiat aipoityro hap.

Pyno eiperia wyti ukyt ewy eweikupteꞌen miitꞌin muꞌe hamo maꞌato ukyt yt hẽꞌẽ rakat i pote yt kat hamo i waku. Maꞌato waku mipun wo toineꞌen hawyi miitꞌin miꞌakit akit wo topyhuꞌat.

Pyno waku eweipyhuꞌat hãpyk kahato rakaria wo aikotã Eiꞌywot atipy piat waku kahato rakat ewy ewetunug etopotmuꞌeria yityꞌok tote.

Pyno waku atunug aru eweiꞌe hawyi waku pywo pe eweiꞌe. Maꞌato yt ewetunug neran i kat koꞌi kat koꞌi eiꞌe hap pote -Atunug aru yt eweiꞌe i. Waku pywuat sehay yn tuwẽtem eiwẽ pyi are. Maꞌato yt pywo piat i eweiꞌe pote sehay saꞌag upiat myhuꞌat haria wo eweipyhuꞌat e Iesui topotmuꞌeria pe toꞌapypueri haria pe.

Taꞌi eweikuap kahato ti aikotã saꞌawyꞌi nagnia ainapin hap koꞌi. Mio tã iꞌatuꞌe miwan me -Karãpe wẽtup ok eha apok eꞌahyk hawe miꞌi pote waku erepyk eweihoꞌopok eha apok saꞌup mo e. Iꞌewyte karãpe wẽtup ok eiãi pik eiꞌahyk hawe miꞌi pote iꞌewyte waku eiwepyk ewehãipik miꞌi hat iꞌatuꞌe saꞌawyꞌi nagnia ahepe ainapin hap e. Maꞌato Uito areꞌe karãpe wẽtup ok tunug saꞌag ehetiat turan o yt eweꞌapyk teiꞌo are. Iꞌewyte karãpe wẽtup ok ewapetek pote o waku kokai uiporan kai uiꞌahyk mehin waku eweiꞌe.

Miꞌi tupono etunug yt naku i hap eha sese wo pote waku etihep eha hawyi waku etipun pya ekai katupono poꞌog waku etihep kokawiat eha wywo yn ereke kuap atipy pe. Maꞌato torannia eha wywo pote ti ereto kuap aria kape e. Iꞌewyte epo kokawiat wo etunug yt naku i hap miꞌi pote waku etitek epo kokawiat miꞌi hawyi waku etipun pya ekai katupono waku kokawiat ipo rakat wo yn ereineꞌen pote ereke kuap aikope Tupana toineꞌen hap tote maꞌato torannia epo wywo ereto kuap aria wato kape aikope miitꞌin hoꞌopot kahato hap kape.