Awˬ hkuiˉ puiˍ ve li‸ 20
20
Aˍbraˍhanˍ leh Aˍbiˆmaˍlehˆ
1Aˍbraˍhanˍ lehˬ, Maˍreˍ lo tu leh Hkaˍnanˍ mvuhˇmiˬ awˬ hawˉ hpawˇ teˇ tawn lo kʼai ve yoˬ. Yawˇ lehˬ Kaˍdeˍshaˆ leh Shuˇraˆ venˇ awˬ kaˍ lo cawˬ ve Geˍraˆ venˇ hkʼaw ca chehˇ la ve yoˬ. 2Yawˇ lehˬ, yawˇ ve awˬ miˇ ma Saˍraˇ hta‸ yawˇ ve awˬ nyi ma teh‸ kʼoˆ ve yoˬ. Oˇ htaˇ, Geˍraˆ jawˇmawˇ Aˍbiˆmaˍlehˆ lehˬ yawˇ ve chaw hta‸ hpehˇ leh Saˍraˇ hta‸ ca shiˍ tcuh ve yoˬ. 3Oˇ ve teˇ haˉ Aˍbiˆmaˍlehˆ zuh‸ muiˉ kʼa chehˇ ve teˇ yanˇ, Gʼuiˬsha yawˇ geh laˬ leh, Nawˬ lehˬ yaˇ miˇ chi hta‸ heuˆ ve pa taw gʼa suh tuˬ yoˬ. Yawˇ lehˬ awˬ hpawˇ cawˬ ve yoˬ, teh‸ kʼoˆ piˇ ve yoˬ.
4Hkʼe te leh, Aˍbiˆmaˍlehˆ lehˬ yaˇ miˇ chi awˬ paˇ lo kʼai maˇ haˆ leh kʼoˆ ve, Gʼuiˬsha-oˬ, ngaˬ lehˬ te‸ chiˉ ya‸ kuiˬ maˇ cawˬ. Ngaˬ leh ngaˬ ve chaw teˇ hpaˍ hta‸ nawˬ te luˬ laˇ tuˬ ve laˇ. 5Aˍbraˍhanˍ awˬ to ka‸, yaˇ miˇ chi lehˬ yawˇ ve awˬ nyi ma yoˬ, teh‸ kʼoˆ leh yaˇ miˇ chi htawˇ oˇ ve hkʼa shuˍ kʼoˆ ve yoˬ. Ngaˬ chi hkʼe gʼa te taˍ ve lehˬ te‸ chiˉ ya‸ kuiˬ maˇ cawˬ, teh‸ kʼoˆ piˇ ve yoˬ.
6Gʼuiˬsha yawˇ hta‸ zuh‸ maˆ ve hkʼaw kʼaw‸ kʼoˆ piˇ ve, Yoˬ, nawˬ kanˉ chi hta‸ te htaˇ, nawˬ te‸ chiˉ ya‸ kuiˬ maˇ cawˬ ve hta‸ ngaˬ shiˍ ve yoˬ. Ya‸ hkʼaˇ, nawˬ ngaˬ mehˆ gʼuˇ suhˍ lo venˇbaˆ maˇ gʼa te tuˬ, nawˬ hta‸ tawˍ taˍ laˇ ve yoˬ. Chi hta‸ pa taw, yawˇ hta‸ ngaˬ maˇ htawˇ tcuh laˇ ve yoˬ. 7Chi beu‸ yaˇ miˇ chi yawˇ ve awˬ hpawˇ hta‸ kʼaw‸ hkʼaw‸ piˇ-oˆ. Yawˇ lehˬ Gʼuiˬsha ve tcuh kaˍ paˍ teˇ gʼaˇ hpeh‸ ve yoˬ. Yawˇ nawˬ awˬ pon bon lawˬ laˇ leh, nawˬ a sha‸ gʼa te‸ chehˇ tuˬ yoˬ. Ya‸ hkʼaˇ, nawˬ lehˬ yawˇ hta‸ maˇ kʼaw‸ hkʼaw‸ piˇ ve kʼo, nawˬ leh nawˬ ve chaw hkʼa peu-eˬ gʼa suh tuˬ yoˬ, teh‸ kʼoˆ piˇ ve yoˬ.
8Oˇ htaˇ, Aˍbiˆmaˍlehˆ teˇ na‸ tu leh yawˇ ve a ma‸ lonˉ hkʼa peu-eˬ hta‸ kuˬ yuˬ peuˬ hkʼaw‸ nawˉ, hpeh‸ la peuˬ ve awˬ lawn chi hkʼa peu-eˬ kʼaw‸ hto maˍ piˇ ve yoˬ. Yawˇ hui hkʼa peu-eˬ kawˆ jaˇ ve yoˬ. 9Oˇ ve hkʼaw‸ nawˉ, Aˍbiˆmaˍlehˆ lehˬ Aˍbraˍhanˍ hta‸ kuˬ yuˬ leh, Aˬ hto‸ ma pa taw nawˬ ngaˬ hui hta‸ chi hkʼe te laˇ ve le. Ngaˬ leh ngaˬ ve mvuhˇmiˬ awˬ hkʼoˆ lo luˬ ve sheˆ ve awˬ ceuˬ gaˬ la piˇ tuˬ, ngaˬ nawˬ hta‸ aˬ hto‸ ma te ya‸ kuiˬ cawˬ le. 10Nawˬ lehˬ ngaˬ hta‸ maˇ te keunˍ maˇ te cawˇ ve awˬ ceuˬ te laˇ ve yoˬ. Aˬ hto‸ ma pa taw nawˬ chi hkʼe te ve le, teh‸ yawˇ hta‸ kʼoˆ piˇ ve yoˬ.
11Aˍbraˍhanˍ kʼaw‸ yaw hkʼaw‸ leh kʼoˆ ve, Mvuhˇmiˬ chi teˇ tawn hkʼaw chehˇ ve chaw teˇ hpaˍ Gʼuiˬsha hta‸ kawˆ ve chaw teˇ gʼaˇ ka‸ maˇ cawˬ ve pa taw, ngaˬ hta‸ tiˇ pehˍ leh ngaˬ miˇ ma hta‸ yuˬ kʼai la puiˉ-aˆ, teh‸ dawˇ ve pa taw chi hkʼe gʼa te taˍ ve yoˬ. 12Awˬ tehˬ awˬ na kʼoˆ ve kʼo, yawˇ lehˬ ngaˬ ve awˬ nyi ma ka‸ hpeh‸ tehˬ ve yoˬ. Yawˇ lehˬ ngaˬ e caˉ yaˇ miˇ hpeh‸ leh, chi beu‸ ngaˬ heuˆ taˍ ve yoˬ. 13Gʼuiˬsha ngaˬ hta‸ ngaˬ pa ve yehˬ hkʼaw tawˆ-e tcuh laˇ leh, mvuhˇ hkʼoˆ miˬ hkʼoˆ ca te toˇ chehˇ tcuh laˇ ve awˬ yanˇ chi hkʼaw, ngaˬ yawˇ hta‸ chi hkʼe kʼoˆ piˇ taˍ ve yoˬ. Nawˬ lehˬ ka ti‸ yeˬ ve hkʼaw ngaˬ awˬ pon te laˇ tuˬ ve kanˉ teˇ maˬ cawˬ ve yoˬ. Ngaˬ hui hkʼaˬ lo kʼai htawˇ, ngaˬ lehˬ nawˬ ve awˬ viˉ paˍ hpeh‸ ve yoˬ, teh‸ ceh tiˉ nawˬ gʼa kʼoˆ ve yoˬ, teh‸ yawˇ hta‸ kʼoˆ piˇ taˍ ve yoˬ.
14Oˇ htaˇ Aˍbiˆmaˍlehˆ lehˬ, Aˍbraˍhanˍ hta‸ yawˬ, nuˇ leh awˬ ceˬ maˇ maˇ piˇ ve yoˬ. Yawˇ ve awˬ miˇ ma Saˍraˇ hta‸ htawˇ yawˇ hta‸ kʼaw‸ hkʼaw‸ piˇ ve yoˬ. 15Peuˬ leh yawˇ Aˍbraˍhanˍ hta‸ kʼoˆ piˇ ve, Chi ve lehˬ ngaˬ ve mvuhˇmiˬ hpeh‸ ve yoˬ. Nawˬ chehˇ gaˇ kuiˬ lo ca chehˇ loˬ, teh‸ kʼoˆ piˇ ve yoˬ. 16Saˍraˇ hta‸ htawˇ yawˇ kʼoˆ piˇ ve, Nawˬ hta‸ mehˆ hpfuhˇ tsuhˇ laˇ ve hkʼaw, nawˬ ve awˬ viˉ paˍ hta‸ ngaˬ hpu teˇ hinˉ piˇ taˍ peuˬ. Nawˬ lehˬ te‸ chiˉ venˇbaˆ taˍ kuiˬ maˇ cawˬ ve chaw hpeh‸ ve yoˬ, teh‸ kʼoˆ piˇ ve yoˬ.
17Oˇ ve hkʼaw‸ nawˉ, Aˍbraˍhanˍ Gʼuiˬsha geh bon lawˬ leh, Gʼuiˬsha lehˬ Aˍbiˆmaˍlehˆ ve awˬ miˇ ma leh awˬ ceˬ ma teˇ hpaˍ hta‸ gu na-e piˇ ve pa taw, yawˇ hui yaˇ ehˉ kʼaw‸ cawˬ la ve yoˬ. 18Awˬ lawn kʼo, Gʼuiˬsha lehˬ Aˍbraˍhanˍ miˇ ma Saˍraˇ hta‸ pa taw, Aˍbiˆmaˍlehˆ hta‸ caˉ da‸ ve yaˇ miˇ teˇ gʼaˇ le le hta‸ chaw meh ma hpeh‸ la piˇ lawˬ ve yoˬ.
Valið núna:
Awˬ hkuiˉ puiˍ ve li‸ 20: LHBE
Áherslumerki
Deildu
Afrita
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.