Masmur 7
7
Amisye anajo indamu Po patimu moyare raugaje
1Daud apa ransyerano weotor, kinyo raijo AMISY Ai, weye Kus vatano susyo Benyamin po awatan.
2AMISY, Winyirati sya Amisy, Winyirati inamamavube Nai;
syare Nyo inapaya irati kakai rai,
muno vatan tenambe nanawirati wo rinawatane mai.
3Vemo naneme mpaya rinai jinya, indamu vemo sya marova wo rinarisyi nora,
maisyare make sivuiny#7:3 make sivuiny ranigwano ‘‘singa’’ rai. aroyaro rinai, po rinararambe ti to, yara vatane inta wo rinapaya ramu.
4-5AMISY, Winyirati sya Amisy, ranivara syo ana inta raveti ngkakaija ava,
ranivara syo ana inta raveti ngkakaijo sya arakova aija ava!
Indako ranivara rinaroyaro sya marova aijo ana mamaisye jewene raija ava!
Weti ranivara sya ana dave ngkakai tugae tai somaisy,
6weamo sya marova wo rinawatan kai indamu wo rinaijar,
muno wo rinatakare, wo rinauvabe no kopa,
muno wo rinaubaisy ti wo sya koke ramauta ntami vayave no kopa von.
7Sya AMISY, syare nseo naugananave Nya pari rautan,
syare mbeseo ra naroyaro vatano upari ti umarovave rinai mai.
Sya AMISY, syare mbeseo ra Nyo inasopan,
weye Winyirati Nyo patimu mamaisye raude vatane mai.
8Amisy, syare koveamo susye kotare wangkuire tenambe ra una nakijani,
muno wintuna no Manunggara indamu mbe akarive mansai vintabo.
9AMISY, syare Nyo patimu raugaje susye kotare mai tenambe mamaisyo awa ana udave rarijati.
Sya AMISY, syare Nyo patimu moyare raugaje rinai weye ana mamaisye mi syo rave,
muno ana ngkakai ma syo inta rave ramu.
10Sya Amisy, Winyirati moyar,
syare vatano mamune awa ana udave ti mamune mamo Nyo ransopi,
yara vatano ubeta Naije nawamo Nyo mavera usayae tindimuve tawan,
weye Winyirati Nyo vatane awa ana udatantona muno manuga rayasir tenambe.
11Amisye Opirati sya vakano no rinaora,
Wepirati Po vatano manuga nsarokire mapaya marova aneme rai.
12Amisye Opirati akari Po patimu moyare raugaje,
masyote anteteramo pari mangkebe vatano mamune mai.
13Tugae, ranivara vatane usakinavo awa ana udave rai jewen,
weamo Amisye Po Apa omake rawan ti nsansinao dave,
Po Apa apae raivit Po atoe rantiki rai.
14Po anaiyu mo wene raugavere ratayao,
muno Po Apa ato mbadurur dave ratayao.
15Tugae rave, vatano mamune man dave irati ana ratantona ngkakaije rautan,
opamo po ana ngkakaije raugavo vatane mai muno po maponae tutir.
16Po ateme rawae vatano kaije mai
weramu taune pirati pakato temasyo rai.
17Ana ngkakai panatantonave raijo vatano kaije mai omamo makare ti mo taune anepat,
muno ivuinyo bekero rai omamo makare ti mo taune aron.
18Yara risyamo syo kove raura seo AMISY Ai,
weye Opamo moyar.
Muno rikinyo ransyeran kangkamane rai,
syo AMISY Titi Rave Apa tame rararimbe.
Valið núna:
Masmur 7: yva
Áherslumerki
Deildu
Afrita
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)