Masmur 22
22
Sya Amisy, mbeanimaibe irati winakirive inai?
1Masmur Daud po ratoe. Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Rusa seo no awatan ngkov.’’
2Sya Amisy, sya Amisy, mbeanimaibe irati winakirive inai?#22:2 Mat. 27:46; Mrk. 15:34
Syanonae syo winawain, weramu winggwaravainyo rinai rave kobe,
muno Nyo rinapaya irati ana nsosobe rai ramu.
3Sya Amisy, arono masyot syo winawain,
weramu Winyo rinaranivi vayave.
Muno arono naman syo winanajoa marudi,
weti inanuga so ntanamanine jewen.
4Weramu tugae mamo Winyirati Akari Titi ndandinit,
mamaisyo Israel ukangkamambe Nai.
5Winyirati reama aneno sinane mansanaveano namen,
mansanaveano namen, muno Winyo mapaya irati siuri rai.
6Winyirati wo nanonae, weti Nyo mapaya irati awa marova mai,
Winyirati mansanaveano namen, muno usamane jewen weye winaneme mpaya mai ramu.
7Weramu risyamo maisyare kurume we, muno inaura vatan be ramu,
vatano wanuije wo inaura tantunawi muno wo inaura tatugadi.
8Vatan tenambe wo inaene nawamo wo inakekebe,
mawakea vivibe muno makari rangkiki rinai.#22:8 Mat. 27:39,43; Mrk. 15:29; Luk. 23:35
9Wo inakekebe, ware: ‘‘Ranivara nanaveano AMISY obo amen,
mbe animaibe Po napaya kakai rai jewen?
Ranivara AMISY anuga no nai,
wea mbe animaibe Po napaya rai ramu?’’
10Weramu sya Amisy, Winyirati Nyo inauguje no sya ingkoa ranobon,
muno Nyo inaveti ino mariraave no ingkoa ama ukame rai.
11Arono rinano aje kobe we ndea naiso, rino no winanem uga rai.
Arono ta ino no ingkoa ranobone we ndea naiso, Winyirati sya Amisy Nyo rinayaranande.
12Vemo nggwaravainyo rinai jinya,
weye sya marova wo ana nsosobe raugav ndea mangkepano rinai to,
muno arepi indati po sopambe rinai?
13Marova wanui wo inakijaniri, maisyare sapi anya wanui wemaisy.
Wo inawariki, maisyare maero banten usivuiny dave una no munijo Basan#22:13 munijo Basan ntami no mana Yordan ama ranijo wanamuram. Basan ama maero banten onawamo usivuiny dave. wemaisy.
14Sya marova usivuiny dave, weti ware wo inaubaisy,
maisyare singa karirimbe, awa rayak ti pare po maere arisyi wemaisy.
15Sya vambunine meweno inai, maisyare mana ngkanene wemaisy.
Muno risiuri rave, maisyare sya pae mare mpapaya ama kabume rai wemaisy.
Inanuga so mandamisyi rave, maisyare inunijo nsooyandi wemaisy.
16Sya vambunine meweno rinai, maisyare kavinonamo nturi ti ngkupi wemaisy,
inaunane ngkanen ti nseo noka inatumam ate rai.
Amisy, Winyo inapaya ti ritami no kopa rai maisyare vatano kakai to wemaisy.
17Maisyare make sivuinye wo inakijaniri wemaisy,
vatano mamune wo inawariki,
wo inajo muno inaneme ratukam ti nsukir.#22:17 inajo muno inaneme ratukam: Yoh. 19:37, 20:20,25,27
18Inanasine so ndupan ti eranande sya pae bo raen,
muno sya marova mansami ntami tawano rinai rave kobe.
19Wo aikarae rapatino sya ansune rai,
indamu arepi apa ura ansune umaso rai.#22:19 Mat. 27:35; Mrk. 15:24; Luk. 23:34; Yoh. 19:23-24
20Weramu AMISY, syare vemo nggwaravainyo rinai jinya!
Nyavave ra nde Nyo sopambe rinai, weye Winyirati sya vambunine nsawa Nai.
21Syare Nyo inapaya irati sya marova awa anaiyu rai.
Onawamo maisyare make sivuinye amaisy,
weti syare Nyo sya kove so rapaya irati awa vambunine rai.
22Syare Nyo inapaya marova awa vambunine rai, maisyare ripaya singa mansawa rai wemaisy,
muno maisyare ripaya bantene awa korodowai rai wemaisy.
23Amisy, Nya ana ndave mamo indati syo rariri sya arakovo Israel mai,
rikangkamambe Nai no anugane ama yasyin.#22:23 Ibr. 2:12
24Inya, vatano wapo AMISY asyanive weap, wapo ararimbe!
Inya, Yakop apa susye weap, wapo aijaseo titive!
Muno kawasae Israel weap, watarurandi no Amisy Amun muno wabeaje Ai!
25Weye vatano matawanto ti una siuri rai nawamo,
Amisy Po mave tatugadi ramu muno Po mansamumuibe ramu.
Muno Opamo akirive mai ramu,
yara Po mansaraniv arono wo anonae.
26No anugan akoe awa yasyin, Winyirati rikangkamambe Nai,
no vatano wo Amisye winasyanive mansamun, syo maere rameseo Nai mamaisyo sya urairi idaokae nande Nai to rai.
27Vatano manuga mpayaje nawamo indati wo maere umaso inta raisya uman dave,
vatano ubeker ware ude mararai AMISY Ai onawamo indati wo ararimbe.
Syare kovo ana mawese ntamijo wasaija ntoa nuge nuganui!
28Vatan tenambe una no mine so, indati wo AMISY atantona akato,
muno usakinav wakare irati Ai.
Muno susye kotare ude wo vukane ranteter,
indamu ubeaje no Amun.
29Weye AMISY Obo Pirati Akari Titi,
be akarive susye kotare mai vintabo.
30Tugae, vatan tenambe taune mararin no mine so nawamo indati ude beaje Ai,
vatan tenambe nanawirati indati wakasya no kopa nawamo awa vukane ranteter ti ubeaje Ai.
31Susyo indati wakasea akato nao, ukangkamambe Akoe Ai,
muno wo ariri akato irati susyo merere nto mai.
32Amisye Apa moyare mamo indati wo raririjo susyo mansavaki akato mansai,
ware Amisy Opirati Po Apa kawasae mapaya irati kakai rai to.
Valið núna:
Masmur 22: yva
Áherslumerki
Deildu
Afrita
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)