Machyu 11
11
Jan di Baptis sen fi kweschan Jeezas
(Look 7:18-35)
1Afta Jeezas don tel ih twelv disaipl dehn weh fi du, ih gaan ahn staat tu teech ahn preech da di tong dehn.
2-3Jan di Baptis mi deh eena jayl wen ih yehr bowt aala di ting dehn weh Jeezas mi-di du. Soh Jan sen som a ih disaipl dehn fi goh aks Jeezas seh, “Yoo da di Wan weh fi kohn, er wi fi luk owt fi sohnbadi els?”
4Jeezas ansa dehn seh, “Goh tel Jan aal weh unu si ahn aal weh unu yehr: 5Blain peepl geh bak dehn sait, dehn wan weh mi kripl ku waak agen, peepl weh mi ga leprosi#11:5 leprosi: Eena dehn dayz deh dehn doz yooz dis werd fi difrent kaina bad skin dizeez. geh heel, ahn def peepl ku yehr agen. Ded peepl kohn bak tu laif, ahn di poa geh di Gud Nyooz preech tu dehn. 6Tel ahn tu dat Gaad bles enibadi weh noh rijek mi sayka weh aal Ai di du.”
7Wen Jan disaipl dehn mi-di lef, Jeezas ton tu di krowd ahn staat tu taak tu dehn bowt Jan. Ih seh, “Da wat egzakli unu mi gaan owt eena di dezert fi si? Wahn lang pees a graas weh di sway eena di breez? 8Bot tel mi, weh unu gaahn fi si? Wahn man jres op eena fansi kloaz? If unu waahn fain peepl weh jres op eena fansi kloaz, goh luk eena palis. 9Den weh unu gaahn fi si? Wahn prafit? Yes, unu gaahn fi si wahn prafit fi chroo, bot Ah tel unu, Jan da moch moa dahn jos wahn aadineri prafit. 10Hihn da di sayhn wan weh di Skripcha mi-di taak bowt wen ih seh,
‘Luk, Ah wahn sen mi mesinja heda yu.
Hihn wahn mek shoar evriting redi fi yu.’#Malakai 3:1.
11Ah di tel unu di chroot, owta aala di pikni weh uman eva baan, non noh deh weh grayta dan Jan; bot in spait a dat, di lees impoatant persn weh da paat a di kingdom a hevn now, ga moa privilij dan Jan.#11:11 Gaad mi sen Jan fi tel di werl dat di Mesaiya mi wahn kohn, bot hihn kudn a mi andastan evriting bowt Jeezas laik di peepl dehn weh da paat a Gaad kingdom now. 12Fahn Jan di Baptis dayz til now, di kingdom a hevn di moov faawod schrang-wan, ahn peepl di chrai haad fi foas dehn way eena it. 13Aala weh mi hapm op tu Jan taim rait dong eena Moaziz Laa ahn eena aala di buk dehn weh di prafit dehn rait.#11:13 Moaziz Laa ahn eena aala di buk dehn weh di prafit dehn rait: da weh wee noa az di Oal Testiment. 14Ahn if unu wilin fi bileev weh dehn seh, den unu wahn noa seh dat Jan da Ilaija di prafit weh unu di wayt pan. 15Eni a unu weh ga ayz fi yehr, unu lisn gud!
16“Da weh Ah ku tel unu dis jenarayshan stan laik? Dehn da jos laik sohn pikni weh di sidong eena wahn poblik maakit skwyaa di hala tu wan anada seh,
17‘Wi play floot fi unu
ahn unu neva daans.
Wi sing ded sang
ahn unu neva baal.’
18Wen Jan di Baptis kohn, hihn neva doz jrink ahn ih mi aalwayz di faas, ahn dehn seh, ‘Hihn mosi ga deeman.’ 19Now di Son a Man#11:19 Son a Man da-mi wahn naym weh Jeezas kaal ihself, ahn dat meen dat hihn da Gaad weh ton wahn man. kohn di eet ahn jrink, ahn unu seh, ‘Luk how ih kraybm ahn ih da wahn jronkad, ahn ih fren op wid di taks kalekta dehn ahn ada peepl wid bad repyutayshan.’ Bot dehn wan weh fala Gaad wizdom wahn proov fi bee rait eena di langa ron.”
Di wikid tong dehn weh neva bileev
(Look 10:13-15)
20Eena di tong dehn weh Jeezas mi du moas a ih mirakl dehn, di peepl dehn neva waahn ton fahn dehn sin dehn ahn ton tu Gaad. Soh Jeezas geh beks wid dehn ahn seh, 21“Aiy, unu peepl da Korazin ahn Betsayda,#11:21 Korazin ahn Betsayda da-mi too tong kloas Gyalilee Lagoon weh Jeezas doz preech. unu een fi big chrobl. Kaa if dehn wikid peepl da Taiya ahn Saidan#11:21 Taiya ahn Saidan da-mi too tong eena Lebanon weh wikid peepl mi liv. kuda mi si di mirakl dehn weh Ai mi du eena fi unu tong, dehn mi wahn ton fahn dehn sin dehn lang taim. Dehn wuda mi put aan krokos bag ahn sidong eena ashiz fi shoa how sari dehn sari. 22Soh Ah tel unu, ih wahn beta fi dehn wan da Taiya ahn Saidan dan fi unu pahn Jojment Day. 23Ahn unu peepl da Kapernyam,#11:23 Kapernyam: (Luk pahn di noat eena 11:21.) unu tink seh Gaad wahn kehr unu da hevn? No, sa! Unu gwehn schrayt da hel! If di peepl dehn da Sadam#11:23 Sadam: (Luk pahn di noat eena 10:15.) mi si di mirakl dehn weh unu si, dehn siti mi wahn stil deh ya til tudeh day. 24Soh ih wahn beta fi dehn da Sadam dan fi unu pahn Jojment Day.”
Kohn ya kohn res
(Look 10:21-22)
25Sayhn taim Jeezas seh, “Faada, yoo weh da di Laad a hevn ahn ert, Ah prayz yu kaa yu neva mek dehn wan weh ejukaytid ahn tink dehn soh smaat andastan aala dehn ting weh Ah jos tel mi disaipl dehn. Insteda dat, yu shoa it tu dehn wan weh hombl jos laik lee pikni. 26Yes Faada, ih mek yu hapi fi du it soh.”
27Den ih tel ih disaipl dehn seh, “Mai Faada don gi mi atariti oava evriting. Nobadi noh reeli noa di Son eksep di Faada, ahn nobadi reeli noa di Faada eksep di Son, ahn enibadi els weh di Son waahn shoa ih Faada tu.
28“Aala unu weh taiyad a kehr unu hevi load, kohn da mee an Ah wahn mek unu res. 29Jos laik how dehn kow tek dehn wud yoak#11:29 Yoak da wahn hevi baar weh mek owta wud ahn ih fit oava di nek a wahn kow soh dat ih ku pul wahn kyaat er wahn plow. pahn dehn shoalda, tek mai yoak pahn fi yoo wan. Aksep weh Ah teech yu, ahn laan fahn mee kaa Ai payshent ahn jentl, ahn yu wahn fain res fi yu soal. 30Di yoak weh Ah gi yu noh haad fi bak, ahn di load weh Ah gi yu noh hevi ataal.”#11:30 Er: Weh Ai teech eezi fi laan, ahn weh Ai tel yu fi du eezi fi du.
Valið núna:
Machyu 11: bzj
Áherslumerki
Deildu
Afrita
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.