Matoosa 2
2
Mina tabiyaankko oɂemeeteran barraajja ok'ok'k'oraraan
1Wono Herodoosa reede kakkogire geesii; Yesuusa tabeteleemi katamaayi kayihuuda ulii kakkoɂalatare goorata barraajja ok'ok'k'orareen mina tabiyaankko Iyyerusaalemi tos emetengureen, 2Kayihuuda wono liin kaɂalatera yiittiti haggee gira? Mina tabiyaaninne bakkaala deennegunne usuun sagadin emeennenna ameen hoosaten.#Erm. 23:5; Zak. 9:9; To. 24:17.
3Wono Herodoosa hikka ayees kakkomaalare goorata nee. Usumaleenna kaɂiyyerusaalemi ibaaddo dubba nee. 4Usu katuuk'aamol woyichchaalnna seera kaɂayihuudi oɂagaalssisaran dubba kukkuyisere Kiristoosa haggee alayinaro hoosate.
5Isona, «Kayihuuda ulii tagitto tabeteleemi katamaayiya;» kahegerooyi haa amame s'aafamera;
6« ‹Ul kayihudaayi tagitta ati Beteleemi!
Kakkalee tayihuuda katamaalkko duuddo lakkoyeraatatto,
Gosakkee Isiraɂeel kafoofinara mootii kukko binnara ameen.› »#Mik. 5:2.
7Esekkona Herodoosa barraajja ok'ok'k'orareen golise uumsegure ayeesisaa bakkaala kakkomutero likkiikki goorata hoosate maale. 8Barraajja ok'ok'k'orareenna Beteleemi tos faregure «Seeyenguddeen yiittiti malaa doota, aninna adi seeyigure usuun goggosagadiroon usu goggoheltteeni in tos abbaabayiddeen eetii giro iin segaa» ame.
9Barraajja ok'ok'k'orareenna wono kaɂamero maaleen abbaabatengureen sesseettan horeddeen. Hikkina mina tabiyaaninne kaddeeraan bakkaala raa k'ajeelisaa yiittiti mankkogiro banɂe geere aallee. 10Bakkaalana kakkodiyaaren goorata aaloo geggelaaten. 11Min orro kakkotabareen goorata yiittitina Aayetteessa Mayiraamene wota kagiro deen, gilbbisengureen sagadeen. Saat'inekisonna banatengureen work'k'ii, it'aanane, urit taɂidan kaɂabo k'ibaati siseen.
12Isona Herodoosa tos goggoɂabbaabanonkko Waa hisillooyi ataayise isoon mankkosegeero maraan raa iggilissateen ulkkisoo tos abbaabateen.
Gibs's'i tos bak'atano
13Barraajja ok'ok'k'orareen seeteen kakkobuwaaren goorata erggichcha kawaa Yoosefaan mutegure ki ati takkoɂabbaabatto arri ani kuun taa segiroon yiittiti Aayetteessane wota aati Gibs's'i tos bak'agudde esee giri. «Herodoosa yiittiti lagadin dootara» ame. 14Haanssun usuna keegure yiittitina Aayetteessana aategure hemeen Gibs's'i tos seete. 15Eseenna Herodoosa taaggooroo adallaate. Hikkaniinna «Erekkeena ul kagibs's'ikko uumaye» amaa Goottaa kahegerookotti hiɂii kaɂayeesera haafura feloo haye.#Hos. 11:1.
16Herodoosa barraajja ok'ok'k'orareen usu sobano addeesegure aaloo amaraate, barraajja ok'ok'k'orareen barraajja kakkomutero goorata goggosegeerankki malee gees lamana esekko hegelbbaan kalleero Beteleeminna usu gobobii kagiro maamanjolkokki babbaar yiis dubba kukkuyisere fare lagadisise. 17Hassu goorata kahegeroo Ermaasaa haa amame kasegaamera feloo haye.
18Kaɂoottaneenna kaɂatii iyyakkotti yaaye Ramaayi malssantte.
«Raheelinna Yiiskkisee maraan ootte,
Goggoɂinna yelayin lakkodaanddeete, aalanttina Yiiskkise mankkogoye maraanya.»#Erm. 31:15.
Gibs's'ikko Naazireti tos abbaabatano
19Goyi kaherodoosakko abbaabatere kagootta erggichcha Yoosefaan hisillooyi mutegure, 20«Kingudde yiittitina Aayetteessa aatigudde ul kaɂisiraɂeel abbaaba, yiittiti lagadin odootareen goyeeran» ame. 21Yoosefana keegure yiittitina Aayetteessa aategure ul kaɂisraɂeel tos abbaabate. 22Ayesuun goɂameen Arkkiloosa Aabbokkeessa Herodoosakkotti banɂee ul kayihudaa wono lee reedano kakkomaalare goorata Yoosefa eserraa seeyin abssate. Hisillooyi usuun kakkosegaamare goorata tagaliila awuraajjaa tos seete. 23Naazireti taɂamamatto katamaa tos seetegure hamas's'ee. Hikkaniinna kahegerooli, «Kanaazireti amaminnara» amameen osegaameraan hegero felooyi hayeen.#Isa. 11:1; Mar. 1:24; Luk'. 2:39; Yan. 1:45.
Valið núna:
Matoosa 2: BayNT
Áherslumerki
Deildu
Afrita
Want to have your highlights saved across all your devices? Sign up or sign in
The Word for the World Northern Africa