1 Пачаби 7
7
1Кириат-Еарималдаса чагӀи рачӀана ва гьез босун ана БЕТӀЕРГЬАНАСУЛ гъамас. Гьез гьеб гохӀдаса Авинадавил рокъобе щвезабуна, ва гьесул вас Элеазар тӀаса вищана БЕТӀЕРГЬАНАСУЛ гъамас цӀунулев чилъун тезе.
ГӀизраилал БетӀергьанасде руссин ва Мицпаялда гьез пилистимал къезари
2ГӀемераб заманаялъ, ай, къого соналъ, гьеб гъамас Кириат-Еарималда букӀана. Цинги ГӀизраилалъул халкъ тӀун магӀугун БЕТӀЕРГЬАНАСДЕ гьардана. 3Хадуб Шамуил кӀалъана тӀолабго ГӀизраилалъул жамагӀаталда:
«Нуж ракӀ-ракӀалъго БЕТӀЕРГЬАНАСДЕ руссунел ратани, тӀагӀинаре чияр аллагьзаби ва Ашторатил#7:3 Ашторат (Астарта) – ханааниязул аллагь, рокьул ва гьарзаяб бачӀиналъул аллагь ва аллагь-рагъухъан. хӀубал, БЕТӀЕРГЬАНАСЕ гӀоло гӀумру биче ва цохӀо гьесие гьабе как-дин. Цинги пилистимазул зулмуялдаса Гьес нужги хвасар гьарила», – абун.
4Гьебмехалъ гӀизраилаз нахъе рана БагӀалил#7:4 БагӀал – ханааниязул бетӀерав аллагь. ва Ашторатил цӀул-ганчӀил гьарурал статуяби ва цохӀо БЕТӀЕРГЬАНАСЕ как-диналде руссана.
5Шамуилица абуна: «ТӀолабго ГӀизраил Мицпаялде бакӀаре. Гьениб дица БЕТӀЕРГЬАНАСДА гьаризе буго нужер рахъалъ».
6Гьел Мицпаялде ракӀарана. Лъадалги цӀун, гьеб лъим БЕТӀЕРГЬАНАСДА цебе гӀодобе тӀолеб букӀана гьез#7:6 Лъадал кидаго кӀудияб къимат букӀана ГӀизраилалда, ва гӀумруялъул чӀаголъиго гьелда бараб букӀана. РекӀекълъи ва БетӀергьанасе мутӀигӀлъи загьир гьабураб ва жибго гӀумруялдасаги Мун хӀажат вугин абураб магӀна буго гьелъул.. «Ниж мунагьалъукье ккана БЕТӀЕРГЬАНАСДА цере», – янги абун, гьеб къоялъ кӀалккуна гьез. (ГӀизраилалъе нухмалъи гьабулаан Шамуилица Мицпаялда.)
7Пилистимазда лъана гӀизраилал Мицпаялде ракӀарун рукӀин, ва жидерго аскаралгун ГӀизраилалда данде рагъизе рахъана пилистимазул церехъаби. Гьеб хабар рагӀидал, гӀизраилал цӀакъ хӀинкъана. 8Гьез Шамуилида гьарана: «Пилистимаздаса ниж хвасар гьареян чӀечӀого ахӀи бай нижер рахъалъ нилъер БЕТӀЕРГЬАН Аллагьасде!» – ян.
9Цинги Шамуилица бачана цо хахулеб кьегӀер, ва БЕТӀЕРГЬАНАСЕ тӀубан бухӀулеб къурбаналъе гьебги хъун, ГӀизраилалъул рахъалъ БЕТӀЕРГЬАНАСДЕ гьари бана. БЕТӀЕРГЬАНАС къабул гьабуна гьесул гьари.
10Шамуил къурбан хъолев вукӀаго, пилистимал гӀагардегӀан щун, гӀизраилазда тӀаде гьужум гьабизе къачӀан рукӀана. Амма гьаб нухалъ БЕТӀЕРГЬАНАС гӀасияб гъугъадиялъул гьаракь бахъинабуна пилистимазда тӀад, ва гьел кутакалда хӀинкъана. Цинги гӀизраилаз гьел гъурун рана. 11Мицпаялдаса бахъараб Бет-Караялъул ракьазде щвезегӀан тӀуризаруна пилистимал ГӀизраилалъул рагъухъабаз ва нухда гьезул гӀемерав чиги чӀвана. 12Шамуилица босун цо гамачӀ эхетана Мицпаялдаги Шеналдаги гьоркьоб, ва гьаб бакӀалде щвезегӀан гьабунин БЕТӀЕРГЬАНАС нилъее кумекиланги абун, гьелда цӀар Эвен-Эзер лъуна.
13Гьедин пилистимал къезаруна ва гьез тӀокӀаб гӀизраилазул ракьазул гӀорхъи бахинчӀо. Шамуил чӀаго вугебгӀан мехалъ БЕТӀЕРГЬАНАС пилистимаздаса цӀунана гӀизраилал. 14Экроналадаса Гаталде щвезегӀан тӀолалго пилистимаз цереккун ГӀизраилалъухъа рахъарал шагьарал тӀадруссинаруна гӀизраилаз. Гьел шагьаразда сверун ругел ракьалги нахъе рахъана гьез. ГӀизраилалда ва амориязда гьоркьоб рекъел букӀана.
15ГӀумруялъго ГӀизраилалъе нухмалъи гьабуна Шамуилица. 16ЛъагӀалидаса лъагӀалиде Бет-Элалде, Гилгалалде, Мицпаялде унаан гьев ва киса-кибего гӀизраилазе гӀакъилаб нухмалъи гьабулаан. 17Амма киве щваниги, кидаго Рамаялде жиндирго рокъове тӀадвуссунаан гьев ва гьенирги гӀизраилал нухда рачунаан. Гьениб гьес БЕТӀЕРГЬАНАСЕ къурбан хъолеб бакӀги бана.
Valið núna:
1 Пачаби 7: АварАК
Áherslumerki
Deildu
Afrita
Want to have your highlights saved across all your devices? Sign up or sign in
© Институт перевода Библии, 2005-2023