Mataafa Uumata 2
2
1Piita isho moonta ka wa oppa ca piisa pora asse pahonne uumamen.
2Waaqa ete kodaadi piisa dikkisheeyye, kuyyaata a tappattati oori, inessade. #Ip 4:4, 10 #sooka 20:11 3Waaqa qoota kodaadi a uumata a kode kela kuyyaata tappattati nessade malla, kuyyaaseti'i sake ka xawwi' reexxe. 4Yaahiwwe Waaqa pora asse pahonne piita ka moonta uume. A Yaahiwwe piita ka moonta uumeeyye, 5Qoota Yaahiwwe Waaqa roopa piita qara in roopnin, nama piitoose qara koda koono ka in kinnin malla, wa ilaawa piita qara'e, in dehne, umma we takkan nefo piita qara in ujjine. 6Ma xoori pisha piita kara paadini ka piita piisa ikinni.
Attaami ka Hewaani
7Yaahiwwe Waaqa ka piitoppa piita qeede ka nama kode. Ka nessa caatta soonaappan ishi uffe nama ka oori a napseeta caatta qapto qapo kodde. #Qoro 1ta 15:45
8Yaahiwwe Waaqa eenna Kenneti kidamma'e qinda piirtotati Edeni kara' harmishe. Ka namase a uume ka kode oppa' xaaye. 9Yaahiwwe Waaqa qora ilda turaayye nama satinna ka luukkata a me'aawnitto dalla piisa piitoppaayye deheshe ka otanta eenna kara'e, qoyra daltaadi oto dammaaneeyye wa neeqa ka a paxaara upnanno ka qoyra caatta daanno deheshe. #kele 2:7; 22:2; 14
10Kirra dula Edeni ikinno ka Edeni kara urqini. Ka oto Edeni kara sooknooyye, oppa qootammi ka kirra afuri koddini. 11Kirra a paayyota Fisooni kidammi ka piita Hawiila, piita oppa warqeeta kitto kapa tiitanni. 12Piitosetiiyyi, warqeeta paxaara ka karpeeta a alaawnitto ka daka heraan kokkoka ca. 13Kirra a lammatta, Kiyooni kidammi ka piita Toobbiya kapa tiitanni. 14Kirra a sessatta, Tikose kidammi ka qinda piirtotatin katama Asoori kapan xata urqini. Kirra a afratta Efraatisi kidammi.
15Se kammaayye, Yaahiwwe Waaqa akkima eenna Edeni kara koda kodo ka qara tooyo'e, eenna Edeni kara nama xaaye. 16Yaahiwwe Waaqa nama ajaje ka kide, “Luukkata a qora eenna Edeni kara ca piisa dama i''ettanissa. 17Ma xoori, qoyrase wa neeqa ka a paxaara oli kela upnanno, in daman. Oton dalta qoyroseti' damtaayye, ittoota.”
18Yaahiwwe Waaqa ka oori dikade ka kide, “Xawwaatiiyyi kallaatta nama'e in paxaaraneeyy, qaarqaarsampayteeta a ishi ettanton ishi' koda.”
19Yaahiwwe Waaqa pinaana kappina ka xampira moonta piisa piitoppaayye kode ka maxxada atta paha akkima ishootta kodo tooya'e, Attaami kapoopan de'e. Maxxada a Attaami uumata a caatta qapo kode ka maxxadaasso' kodden. 20Attaami, horeeta ka pinaana kappina ka xampira moonta piisa'e maxxa kode. Ma xoori qaarqaarsampayteeta a Attaami ettanto in kitto.
21Semmalla Yaahiwwe Waaqa ka mukitta kutta Attaami qara' kate. Ka ete mukeeyye, qiniyyaadi oppa takka qeede ka porose oppa so'a immake. 22Yaahiwwe Waaqa qinittase a Attaami qeede ka harmishe ka iskatteeta' kode ka Attaami kapopan aane. 23Attaami ka oori kide, “Tin, isheetta lafta a lafaayyoppa qeedamte, so'a a so'ayyoppa qeedame. Ishetta diirta karaayye qeedamteey, a iskatteeta kidamto.”
24Semmalla diirta aappaaysho ka aayyaasso' diisha ka iskatteetaadi qudupa kida ka lamatti ollin dakinta takka koddan. #Maati 19:5; Maari 10:7-8; Qoro 1ta 6:16; Efe 5:31
25Attaami ka iskatteetaadi piisantiiyyi, lulleeti caan ma oli fokkisanni in caan.
Valið núna:
Mataafa Uumata 2: MaQu
Áherslumerki
Deildu
Afrita
Want to have your highlights saved across all your devices? Sign up or sign in