Rut 3
3
Koi Rut e chaulia chikai nina toha kolu
1E chikai na tahu bukena, koi Naomi e kori vania koi Rut, “Inau ba ku daia ke chikai nimu toha kolu hoe, mo ko ni tamani valemu tovosi. 2Ko padaa hoe na tinoni nia, ia Boas, ia nina daki ago nira to agoago kolura hoe. Ia na kamana kodada toha kolu kohita. Ba, ko vavalinge talana hoe. Ngeni ba ke au ia, me ke kutu ia na dudusia na piu ni bali nira tana vunguna tana malenga ni malesi bali. 3Ko dia leso hoe mo ko vuaivuai, mo ko sahelia na chadamu odo kalavata. Mo ko dia na meana te agoago ia, mo ko mui hoe laba lenga inge diadia me ke kode chana ia hahani ma na inu. 4Ko morosia hoe vei te jaro sivo ia, mi bukena te biku ia, ko dia hoe mo ko katea na kokopi hana tuhu tana tuana ia, mo ko jaro sivo inge. Ia ba ke kori vaniho hoe na hua to ko agosia hoe.”
5Me kori vahai koi Rut de, “Nau ba ku taonia visa na omea to koria hoe.”
6Me dia koi Rut tana malenga ni malesi bali nia, me agosi taonia ia na omea nira te kori vania na vungona.
7Tahuna te kode ia Boas na hahani ma na inu, me vajangia ia te odo na kokorana. Me dia ia tana meana te toha na chupu ni bali nira, me jaro me biku. Me kekena dia koi Rut, me katea na kokopi me jaro sivo lilihi ni tuana ia Boas. 8Tana puti te rerei ia Boas, me leleo me taora te morosia chikai na daki te jajaro tana lilihi ni tuana ia. 9Me gesuaa ia Boas, “?Isei hoe?”
Me kori visu na daki nia, “Nigu taovia, inau ia, koi Rut. Ma na nimu ago hoe, ko morosi taoniu nau, ko taha kikiu nau, matengana hoe na kamana varasoha nigu toha kolu nau.”
10Me kori vahai ia Boas de, “Ia Yawe ke sangaho, nigu daki. Hoe o tihisia na omea leho solehana, ma na hua to agosia hoe tana tahu de, e liungisia na hua to agosi vania hoe na vungomu. Hoe tihilamu ko dia mo ko haea ke chikai na mane borau, te tamani se teha tamani, ma ia to teha hoe. 11Mi tahuna de, nigu daki, ko mui hoe na toba sahata. Nau ba ku agosia visa na omea to nongia hoe. Ira na tinoni kode tana vera de, ara hanaa ihoe e chikai na daki talana solehana. 12E mana solehana, inau nomu na kamana varasoha na taumu hoe, ma na nigu ago nomu nau na morosi taonikohamu kohamu. Me toha lakamu de chikai na tinoni, na kamana varasoha kalavata na taumu hoe te liungisiu nau. 13Ko toha hoe tana putina de. Ba, tana mohomoho ba ku daia ia, mu ku chaulia tina ke tala ia na morosi taonikohamu. Tina ke ba vahai nia, me talana solehana. Tina ke ba teha ia, mu vacha nau tana asana ia Yawe te mauri, nau ba ku morosi taonikohamu. Baia, ko biku hoe de me ke chau tana mohomoho.”
14Ma koi Rut e jaro sivo tana lilihi ni tuana ia Boas. Mi tana mohomoho putiputi, tahuna te teha vata na dani talana, me rerei luhi noha, matengana ia Boas e teha ngavina siki tinoni ke hanaa kovahai koi Rut e vota mai tana nina malenga ni malesi bali ia Boas.
15Tu ia Boas me kori vania koi Rut de, “Chuaa na pupulimu mo ko nabasi maia de.” Me goni taonia koi Rut, me tu ia Boas me karu vania maravina ke rukapatu kilo na bali, me sangaa na chaku kaeana tana kokovena. Me tahaa koi Rut me visu tana valena na vungona.
16Tahuna te chau ia valena, me tu na vungona me gesuaa, “?Vahai vei na omea to dia matena hoe?” Me tu koi Rut me kori vania koi Naomi visa na omea te tu ia Boas me goni vania ia. 17Me tu koi Rut me kori lakaa, “Me kori lakamua ia Boas, nau ku mui na visu volo tatana na vungogu, me sau vaniu na bali danga nira de.” 18Me tu koi Naomi me kori vania koi Rut, “Ko pitu rapo hoe, diadia mo ko morosia hoe ba ke vahai vei. Ia Boas ba ke teha na mango ngeni de, diadia me ke livu hotosia ia na omea nira de.”
Valið núna:
Rut 3: mln
Áherslumerki
Deildu
Afrita
Want to have your highlights saved across all your devices? Sign up or sign in
© 2024 (active), Wycliffe Bible Translators, Inc. All rights reserved