Matius 2
2
It ap huru mo il daga wandigama en wagagwa wene
1Ap Herodes inis ombok hegek, Yesus o Propinsi Yudea o kota Mbelekem-at endaklagagi. Endaklagagirikmu, it ap enendawi werek dadiwap yenaga wugu lagagwa menda en o mo il daga wandigama akoma en o Yerusalem wagu lagagwarik, avakwa hemerinipu dugwit, 2“Ap Yakuri enasin inis ombok endaklaga akom eyave nggoma agarik? Endaklagya lagama, mo il daga wandigama en At edadiwap wulu wagya ninil hugu lagurik, inis adup ogaruguluk amusek wendagwi o.”
3Yiluk, hemerinipu lagagwama, ap ombok Herodes ako, aruk hunggu lagagirik, at inim, it avakwa O Yerusalem welagagwa menda inim, enalon wisane agagwa. 4At Herodes alon agya dugwit, it ap imam-imam enasini inim, it ap Ala wene vagago welagagwa menda inim, ovok erogo homakbugu lagagirik, “At Ala en enogo mondok okbagagi Mesias ako, o nggoma endaklarisogon yiluk dirup warek helagwi o?” yiluk, hemerinipigi. 5Hemerinipu lagagimu, iren yugu dugwit, “At Mesias ako, o Mbelekem Propinsi Yudea akoma-at endaklarisogon,” yiluk, yugu lagagwarik, “Andi yerogo, navi ambien dirup watya dugwit yerogo yagagi:
6 #
Mikha 5:2, 4 yokhanes. ‘Hit avakwa Yakura menda o kota Mbelekem agipik yi wai!
Hit vaga en An naburi avakwa Iserali menda des erogo vagenombogo dogopwak yiluk, ap inis ombok ambi mendek yisogon atma,
o Yakura kota nin ininis werek hegek, hit o Mbelekem adigat hininis dek ombasagwi andi, hivis anderogo ombarusogombuk o,’
yiluk, yagagi dirup warek ako helagwi,” yiluk, yagagwa.
7Yugu lagagwama, at Herodes akoen it ap enendawi werek dadiwap yenaga wugu lagagwa menda ako mbauk erogo yanggup yugirigya lagagimu, wagu lagagwama, yugirigya dugwit, “Omera dadiwap sigam agya hagagup? Des erogo yukneres,” yiluk, hemerinipu lagagirik, 8o Mbelekem lakbugu dugwit, “Hit avyak ako hinil des erogo belalilales. Eke, At eyave avuk agu dugwit halok, an ogo, inis siyaba warigiluk, yuknirimano,” yiluk, yugeragagi.
9Ap inis ombok Herodes en yugeragagi ako enaruk hobaluk, suvaga lagu dugwit, “Wi! Dadiwap mo il wulu wandigama andoma en higyo ako, landiga yi hinil okhanes o,” yiluk, yugusigik dadiwap ako endak lagya lagagirik, avyak endago amor-amot akonam-at mbup yi lagagi. 10Eke, iren dadiwap ogagya ako inil hugu lagagwarik, enendawi adenggen eve iya erogo embetek lagagwa. 11Lagu lagagwarik, umwa nunggugu lagagwarik, avyak ako isa Maria iperen inugu lagagwarik, eneyave seve yiluk, avyak ako inis siyabagagwa. Inis siyabagu dugwit, enangge-enangge onggo ombok sek menda mbusi emas inim, yivi-nggami inim, yo mur amburup inim, hudilogo wogogogwa. 12Wogugu lagagwarik nogo yugusim At Ala en, “Ap Herodes werekma sup heneyami vaga labuk,” yiluk, enabi vaga hurimbis yugirigya lagagimu, it ako sup hunogoma enamwa lagagwa.
Avyak ako wolok hoda o Mesir lagagwa wene
13It ap huru ako enamwa lagusigik, o hup at Yusup abi vaga malaikat Ala yonggo lakbisa wandiga menda ambien at adema wagya lagagirik, yugugu dugwit, “At Herodes en avyak yi warogo bagiluk belalit warisogon atma, mendek yiluk, avyak yi isa iperen woginiviluk o Mesir andoma hoda elales. Andoma lamundikmu, an ao yukhera wagetek neyalok, o andenam-at dogop o,” yiluk, yugugu hagagi.
14Abi vaga yugugu lagagimu, at Yusup ako o hup mendek iri lagagirik, avyak ako isa iperen woginiviluk o Mesir lagagi. 15#Hosea 11:1 yokhanes. Woginiviluk lagya lagagirik, at Herodes ako ao hambegetek hegek, andoma aoat welagagwa. Andi ogagagwa ako, Ala en o endak navi ambi yugugu hegek yugirigya dugwit, “Nabut o Mesir andoma en wulu warupwak yiluk, yanggup yugogogis o,” yagagi, yiluk, yugeragagi ako, atma-at des yupwak yiluk, ogagagwa.
Avyak maridugi initugwa wene
16At Herodes ako it ap dadiwap yenaga welagwi menda ako enabyam welagagi ovara, eneyave dek agu lagagwama, “A! An nambukmu anggao,” yiluk, aninis ane yagagi. Aninis ane iri dugwit, at aori en o Mbelekem avilis-ambot akoma avyak mariduk swi endago inim, dua tahun ogarek ako inim, ovok erogo enarit lapwak yiluk lakbogogi. Andi, it ap dadiwap yenaga welagwi menda en, “Dadiwap o andi hudi vaga-at sigam agya higyo,” yiluk, des erogo yugogogwa ako ndatak, avyak anderogo endago ovok erogo enarit lapwak yiluk lakbogogi. 17Andi ogagagi ako, At Ala yugugu hegek yugeraliga menda navi Yeremia akoen iri dugwit:
18 #
Yeremia 31:15 yokhanes. “O Rama andoma endawi mondok burup iri dugwit, yup yagya,
ane ombok vaga ai-au iris,
ogagya ako hunggup andi,
hwa Rahel eyagi eneyave dek agarikmu atma,
‘An yup yonggoneraup mondok nanggon o,’ imbita dugwit, enayup yasiga andi aro,”
yiluk, yugeragagi wene ako, o andi vaga-at atma des yagagi.
O Mesir en eneyami vaga wagagwa wene
19At Yusup ako ao o Mesir andoma werekma, ap Herodes ako hambigya lagagimu, ndugwis ambi vaga Yusup abi higya dugwit, malaikat Ala yonggo lakbisa wandiga menda ambien at adema wagya lagagirik, yugugu dugwit, 20“It ap avyak warup yiluk, belalit lagao ako ovok erogo hambit lagarukmu, hat mendek iri dogomindik avyak ako isa iperen woginiviluk it avakwa Iserali werekma elak.” 21Abi vaga yugugu lagagimu, mendek yiluk, avyak ako isa iperen woginiviluk it Iserali menda werekma wagagi.
22Eke, “At Arikilaus asin Herodes avoloma o Yudea ap inis ombogat mondok yagas o,” yiluk, yugu lagagwama, at Yusup aruk hunggu lagagirik, andoma laup alon imbityaim, Ala en, “O Yudea andoma labuk,” yiluk, hurimbis abi vaga yugugu lagagimu, o Galilea andoma-at lagagi. 23Lagya lagagirik, o kota ambi inis Nasaret-at mbup yilagagi. Nasaret lagagi ako andi, it navi-navi en, “At ap Nasaret menda-at yugugu dogosogom o,” yiluk, yagagwa ako, atma-at agagi.
Valið núna:
Matius 2: nbq2013
Áherslumerki
Deildu
Afrita
Want to have your highlights saved across all your devices? Sign up or sign in