မဿဲ 2
2
အရှိပြည်က ပညာဟိရို့
1ဟေရုဒ်မင်းလက်ထက်ခါ ယုဒပြည်နယ် ဗက်လင်မြို့မာ အသျှင်ယေရှု မွီးဖွားလီရေ။ ယင်းချိန်ခါ အရှိပြည်က ပညာဟိ လိုင်းကေယောက် ယေရုရှလင်မြို့တို့ လာရို့ မီးကတ်လီရေ၊ 2“ယုဒလူမျိုးရို့မာ အသစ် မွီးဖွားစာ မင်း ဇာမာလည်း? အကြောင်းကား အရှိပြည် ဂေါင်းခင်မာ သူ၏ ကြယ်ကို မြင်ရို့ အကျွန်ရို့ သူ့ကို ရှိခိုးပူဇော်ဖို့အတွက် လာကတ်စာ ဖြစ်ပါရေ။”
3သူရို့ စကားကို ကြားရေခါ ဟေရုဒ်မင်းန ယေရုရှလင်မြို့မာ နီထိုင်ကတ်စာ အခြားလူရို့ အားကုံးသူ စိတ်ပူကတ်လီရေ။ 4ယင်းခါ ဟေရုဒ်မင်းစာ ဟိသမျ ယဇ်ပုရောဟိတ်အကြီးရို့န ကျမ်းဆရာရို့ကို ခေါ်ရို့ မီးလီရေ၊ “ခရစ်တော် ဇာမာ မွီးဖွားဖို့စာလည်း?” 5သူရို့စာ အဖြေပီးကတ်လီရေ၊ “သူစာ ယုဒပြည်နယ် ဗက်လင်မြို့မာ မွီးဖွားပါဖို့၊ အကြောင်းကား ဘုရားသတင်းပို့သူ ဒေပိုင် ရွီးခလီပါရေ၊
6‘အိုး၊ ယုဒပြည်နယ် ဗက်လင်မြို့၊
နင်စာ ယုဒပြည်နယ် အုပ်ချုပ်သူရို့ မျက်စိမာ
အရေးကြီးစာ မြို့တစ်မြို့ ဖြစ်တေ၊
အကြောင်းကား နင့်အထဲက အုပ်ချုပ်သူတစ်ပါး ဖြစ်ပေါ်လာလိမည်၊
သူစာ ငါ့ ဣသရေလလူမျိုးကို အုပ်ချုပ်လိမည်။’”
7ယင်းခါ ဟေရုဒ်မင်းစာ ထိုပညာဟိရို့ကို အထဲမာအထဲ ခေါ်ရို့ ကြယ်ကို အတိကျ ဇာအချိန်မာ မြင်လီရေလည်း ဆိုပြီးကေ မီးကြည့်လီရေ။ 8ယင်းနောက် သူစာ ထိုပညာဟိရို့ကို ဒေပိုင် ပြောရို့ ဗက်လင်မြို့တို့ ရွှတ်လိုက်လီရေ၊ “ကိုယ်ဘင်ရို့ လားရို့ ယင်းအသျှေကို အလှပ ရှာကြည့်ခီကတ်။ ယင်းနောက် အသျှေကို ရှာရို့ တွိရေခါ ငါ့ကို ပြောခလိုက်ကတ်။ ငါလည်းသောက် ယင်းအသျှေကို ရှိခိုးပူဇော်ချင်ရေ။”
9ယင်းခါ ထိုပညာဟိရို့စာ ဟေရုဒ်မင်း စကားအတိုင်း လားခကတ်လီရေ။ အရှိပြည် ဂေါင်းခင်မာ သူရို့ မြင်လီကတ်စာ ကြယ်စာ သူရို့ ရှိက ရှိက လားလီရေ အရာ ယင်းကြယ်စာ အသျှေဟိစာ အိမ်တတည့် တန့်လီရေ။ 10ပညာဟိရို့စာ ယင်းကြယ်ကို မြင်ရို့ ကောင်းကောင်း ပျော်ပြီးကေ အိမ်ထဲတို့ ဝင်ကတ်လီရေ။ 11အရာ သူရို့စာ ယင်းအသျှေကို သူ့အမိ မာရိရင်ခွင်မာ မြင်ရကတ်လီရေ။ ယင်းခါ သူရို့စာ ဒူးထောက်ရို့ ယင်းအသျှေကို ရှိခိုးကတ်လီရေ အရာ ကိုယ်ရို့မာ ပါလတ်စာ တိုက်တာကို ဖွင့်ရို့ ရွှေ၊ တန်ဖိုးဟိစာ လောဗန်ဆီ အရာ ရီမွှီးဆီကို လက်ဆောင် ပီးကတ်လီရေ။ 12ယင်းနောက် ဟေရုဒ်မင်းတို့ ပြန်ရို့ မလားဖို့အတွက် ထာဝရဘုရားစာ သူရို့ကို အိပ်မက်မာ သတိပီးလီရေ။ ယင်းခါ သူရို့စာ အခြားတစ်လမ်းက လှည့်ရို့ ကိုယ်ရို့ ပြည်တို့ ပြန်လားခကတ်လီရေ။
အီဂျစ်ပြည်တို့ ထွက်ဗြီးခြင်း
13ထိုပညာဟိရို့ ပြန်လားခပြီးရေနောက် အသျှင်၏ ဂေါင်းခင်နတ်သားစာ ယောသပ်ကို အိပ်မက်မာ လာရို့ ပြောလီရေ၊ “ယောသပ် ထ! အသျှေန မယားကို ယူရို့ အီဂျစ်ပြည်တို့ ထွက်ဗြီးလီ အရာ ငါ မပြောသကြားကို ယင်းမာ နီလီ၊ အကြောင်းကား ယင်းအသျှေကို အသီသတ်ဖို့အတွက် ဟေရုဒ်မင်း ရှာလိမည်။” 14ယင်းခါ ယောသပ်စာ ထရို့ အသျှေန မယားကို ယူပြီးကေ ယင်းနိ ညဉ့်ချင်း အီဂျစ်ပြည်တို့ ထွက်ဗြီးလားခလီရေ။ 15အရာ သူစာ ဟေရုဒ်မင်း မသီသကြား ယင်းပြည်မာ နီလီရေ။ ဘုရားသတင်းပို့သူရို့ကနီရို့ အသျှင် ဟောပြောလီစာ စကားတိ ပြည့်စုံဖို့အတွက် ဒေပိုင် ဖြစ်ပျက်လာလီရေ။ အသျှင်စာ ပြောလီရေ၊
“ငါစာ ကိုယ့်သားကို အီဂျစ်ပြည်က ခေါ်ယူခလီရေ။”
သားယောက်ျားသျှေရို့ကို အသီသတ်ခြင်း
16ဟေရုဒ်မင်းစာ ထိုပညာဟိရို့ လိမ်ဘိုက်ခစာကို သိရေခါ ကောင်းကောင်း မန်ပါလီရေ။ အရာ သူစာ ထိုပညာဟိရို့က သိထားလိုက်စာ အချိန်ကို ကိုက်ရို့ ဗက်လင်မြို့န ယင်းအပါးနိန်းဝန်းကျင်မာ ဟိကတ်စာ နှစ်နှစ်သားသျှေရို့န ယင်းထက်သျှေစာ သားသျှေရို့ကို အသီသတ်ဖို့ အာဏာချလီရေ။ 17ယင်းအတွက်န ဘုရားသတင်းပို့သူ ယေရမိကနီရို့ ဟောပြောခစာ ထာဝရဘုရား၏ စကားတိ ပြည့်စုံလီရေ။ ထာဝရဘုရားစာ ပြောလီရေ၊
18“ရာမအရပ်မာ ကောင်းကောင်း ဝမ်းနည်းရို့ ငိုသံကို ကြားရရေ၊
ရာခေလစာ ကိုယ့်သားသမီးရို့အတွက် ငိုနီရေ။
သူစာ တစ်ခုပိုင်လည်း စိတ်မပျော်နိုင်၊
အကြောင်းကား သူ့မာ သားသမီး
တစ်ယောက်လည်း အရှင် မဟိဗျာ။”
အီဂျစ်ပြည်က ပြန်လာခြင်း
19ဟေရုဒ်မင်း သီလားခပြီးရေနောက် အသျှင်၏ ဂေါင်းခင်နတ်သားစာ အီဂျစ်ပြည်တို့ လာရို့ ယောသပ်ကို အိပ်မက်မာ ပြောလီရေ၊ 20“ယောသပ် ထ! နင့် အသျှေန မယားကို ယူရို့ ဣသရေလပြည်တို့ ပြန်လားလီဖိ။ ဒေ အသျှေကို အသီသတ်ဖို့ ကြည့်လီသူရို့ သီလားခကတ်ပျာ။” 21ယင်းခါ ယောသပ်စာ ထရို့ အသျှေန မယားကို ယူပြီးကေ ဣသရေလပြည်တို့ ပြန်လာလီရေ။ 22ယေကေလည်း ကိုယ့်အဖ ဟေရုဒ်တက်စား မင်းအဖြစ် သားအာခေလစာ ယုဒပြည်နယ်ကို အုပ်စိုးနီရေဆိုစာကို ယောသပ်စာ ကြားရို့ ယုဒပြည်နယ်တို့ လားဖို့ ကြောက်လီရေ။ ယင်းနောက် သူစာ အိပ်မက်မာ ထာဝရဘုရားက အာဏာရရေအတိုင်း ဂါလိလဲပြည်နယ်တို့ လားခလီရေ၊ 23အရာ သူရို့စာ နာဇရက်နာမည်န မြို့သျှေတစ်မြို့မာ နီထိုင်ကတ်လီရေ။ ကျမ်းစာမာ၊ “လူရို့ သူ့ကို နာဇရက်မြို့သျှေသား ဟို့ ခေါ်ကတ်လိမည်” ဆိုပြီးကေ ယေရှု အကြောင်းကို ဘုရားသတင်းပို့သူရို့ ပြောခကတ်စာ စကားစာ ပြည့်စုံလာလီရေ။
Valið núna:
မဿဲ 2: RMZ
Áherslumerki
Deildu
Afrita
Want to have your highlights saved across all your devices? Sign up or sign in
©2023 Wycliffe Bible Translators, Inc.