Mateo 9
9
Inpamapteng Jesus I Dahin Nat Mahakiykiy
(Mark 2:1-12; Luke 5:17-26)
1Et iyankeb-ong ma ires Jesus cha bangka et bima-sil iren on-olid siyodad to. 2Idi mimothok, gwariy mansekit a eg mahakiykiy a intolod na toon man-oolig cha kamen. Idi iyamtaan Jesus i banay i pamati red si-katho, kigwan tod ma mansekit i “Anak ko, pekedsang moy nemnem mo. Epakawanan i basol mo.”
3Gwara ngo iriy echom a mamaistoro na dinteg chiwan. Idi inki-ngelan chiy kigwan Jesus, gwared nemnem cha i “Towan iinges i angel tod Afo Chiyos.”
4Nem si Jesus, amta thoy gwared nemnem cha et kigwan to i “Niyana jowan nemnemiy ngaaw? 5Konen jo emo i mas inam-ay i kekegwan to i ‘Epakawanan i basol mo’ iy ‘Bangon ka et pan-ahad ka.’ 6Nem konen ko ma edigat say amtaen jo i si-kak a Anak na Too, gwariy karebengan kod dobong a memekawan na basol.” Et kigwan to wed ma mansekit i “Bangon ka, alam itha kamen mo, et betik ka.” 7Et sema wen mansekit, bimangon et bimetik. 8Et sema chakel a too, idi sini-neng cha man, ketinahot ira tan chijaw ches Afo Chiyos a engi-kan cha too na karebengan a inges to man.
Pinispis Jesus Si Matthew A Iyanngaran Ngo Na Levi
(Mark 2:13-17; Luke 5:27-32)
9Idi iyakcheng a imekal mes Jesus chiwan, gwariy mita thon dahin iyanngaran na Matthew a mantoktokkong chiwed opisina thon naeningilan to na binis. Kigwan Jesus i “Gwalid jay, kay-olop ked si-kak.” Et imakgwat mes Matthew a ekiolop.
10Idi eng-engkay a mankakakan ires Jesus cha baliy Matthew, chakel ali chiy toon para singil na binis tan sema iren mabesol konon kimowan alin mekidihob. 11Sema iren echom a Pharisees, idi mita ren ekidihob si Jesus ired ma tothoo, kigwan ched disipolos to i “Niyana naekidihob i maistoro yod ma toon para singil na binis tan sema iren mabesol?”
12Idi inki-ngelan Jesus i kigwan cha, insongbat ton engiarig i “Sema mahasafol na doktor, nat sema iren mahedsang, no diket sema iren mansekit. 13Jo achal i koston a-seden niwa iyaysolat cha esel Afo Chiyos a kigwan to i ‘Say piyan ko, mahaasi kayo, nat sema pengitangdal jod si-kak.’ Tep ekak ali kimowan say mena-gwayak na maronong a too, no diket sema iren mabesol.”
Sema Maypangkep Na Ayonar
(Mark 2:18-20; Luke 5:33-35)
14Sema iren disipolos John a Naemonjag, kimowan ali ched kad-an Jesus, et kigwan cha i “Si-kawi tan sema iren Pharisees, naiyan-ayonar kawi, nem apay nga sema disipolos mo ket, eg ira naiyan-ayonar?”
15Simongbat si Jesus cha si-karen engiarig iren ma disipolos tod tothoon mekikasal. Kigwan to i “Sema iren toon mekikasal, on-engos ira aya iy gwara pay cha si-kara ma dahin engimbaliy? Enchi. Nem onmothok aliy timpo no si-kak a inges to ma dahin engimbaliy, a-kalen chaak ired ma disipolos ko, et si-katho diy timpon pan-ayonar cha.”
Sema Maypangkep Na Badon Intoron Jesus
(Mark 2:21-22; Luke 5:36-39)
16Engiarig mowan si Jesus a kigwan to i “Nagwariy mengitahap na badon dofot cha bakjot. Tep no maosal i badon dofot, onkesen, et sema bakjot a iyaytahapan to, mema-men mebi-nik. 17Tan nagwara ngo met pay i mengi-jan na tafiy cha chaan a kathat a ejanan. #9:17 Sema ejanan na Hodjos na tafiy, kathat na kanching. Tep no a-magen to man, ma-tengan iwa tafiy et onpekis iwa ejanan to. Et maybo-jak iwa tafiy tan mechechal ngo ma ejanan to. Sema tafiy, may-ejan chiwa badon kathat a ejanan say onbayag a chegwa.”
Sema Anak Jairus Tan Sema Biin Mansekit
(Mark 5:21-43; Luke 8:40-56)
18Idi maramen mantetebal pay si Jesus cha si-kara, gwariy sa-kin afon mimothok a iyantalimohod cha sangoanan Jesus et kigwan to i “Ahay ketiy na anak min bii. Pangpangaasim, kowan ka din isagpat moy diwam cha si-katho say manbiyag.” 19Et iyonod men Jesus et ekiolop pay iriy disipolos to.
20Gwara ngoy sa-kin biin manbobolos i chala tho na oneg na sawal na chegwen tawen. Kimowan chiwa benekan Jesus et kiyapkap toy kilig na baro tho. 21Tep gwared nemnem to i “Basta kapkafen koy baro tho, onmaptengak.” 22Gwimingis Jesus et idi mita tho ma bii, kigwan to i “Anak ko, pekedsang moy nemnem mo. Mimapteng ka wa kagol na pamatim cha si-kak.” Et mimapteng men chakos iwa bii.
23Idi mimothok ires Jesus cha baliy niwa afo, mita tho iriy manmomosiko tan chakel a toon esi-nop chiwan a manoteng. 24Kigwan to i “Tahejod man. Nat etiy iwa nga-nga, manjo-jo-kow bengat.” Nem ngini-ngi-ngian cha. 25Idi inpaawas cha wen emiin ira ma tothoo, simekep si Jesus cha kad-an na nga-nga niwa afo, et iyagchian Jesus i diwen ma nga-nga, et bimangon ma. 26Sema epasamak, iyaygwanggwanggwang cha intiron sahop.
Ingkal Jesus I Korab Na Chegwen Daleki
27Idi imekal si Jesus chiwan, gwariy chegwen dahin ekorab a imonod cha si-kathon mankelkeljaw iren kigwan cha i “Polin David! Pangaasim, kaasii mo kawi!” #9:27 Sema Polin David i sa-kin ngaran niwa onkowan alin Messiah. Isonga, idi ngiyaranan iren ma ekorab si Jesus na Polin David, sema piyan ton a-seden, napiyati ra i si Jesus iwa Messiah, isonga napiyati ra pay i mebedin a pemapteng to ira. 28Intoloy Jesus a iyan-ahad ingkathod mimothok chiwa baliy a konan to. Nonta simekep, simekep ngo di ira ma chegwen ekorab, et inbagen Jesus cha si-kara i “Patien jo i mahaekal koy korab jo?”
Insongbat cha i “Ahow, Afo.”
29Et inkapkap men Jesus i diwa thod matha ren kigwan to i “Metongpal i kechow jon inges toy pemati yo.” 30Et iya-kal men chakos i korab cha. Et tiyengteng ma iren Jesus i “Enog i ingwanggwanggwang iyay cha echom.” 31Nem iyamtik ira ma daleki et ingwanggwanggwang cha ngorechan chiwa intiron sahop iwa imag Jesus cha si-kara.
Inpa-sel Jesus I Toon Aomel
32Idi manbebetik ira ma chegwen sigod a ekorab, gwariy dahin intolod ched kad-an Jesus a aomel tep iya-janan na dimonyo. 33Idi chiyagchag men Jesus iwa dimonyo, mahaesel ma iwa dahi. Iyasdaaw a pasiya iriy toon kigwan cha i “Angken nonta bayag da ingkathod niman, nagwariy inges niyay a epasamak chiya Israel.” 34Nem sema iren Pharisees, kigwan cha i “Sema afo na dimonyos i naengi-kan na panakabalin ton menagchag na dimonyos.”
Kiyaasian Jesus I Tothoo
35Et iyangwasgwasgwas mes Jesus chiwa emiin a siyodad, banay tan otik, a iyantoro-toro ired synagog a iyankaskasaba na mapteng a chamag maypangkep na pantorayan Afo Chiyos. Engipamapmapteng ngo na mansekit a gwariy ekila-kilasin sahit cha tan digat na angel cha. 36Idi miten Jesus i chakel a too, kiyaasian to ira tep mandigat ira et nagwariy menolong cha si-karen inges toy kalniron nagwariy naiyanbantay cha si-kara. 37Isonga, kigwan Jesus cha disipolos ton engiarig i “Seja chakel a too ket, inges toy tanem a esaganen ma-ni, nem kolang iriy man-ani. 38Isonga, pankararag kayod Afo Chiyos a mahapayow i mengito-no di pay na echom a mekiani.”
Valið núna:
Mateo 9: KAR
Áherslumerki
Deildu
Afrita
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.