مادتھا 8
8
دزیناد یودکھانجیک پھانچوگا زادس۔
1حضرت عیسیٰ مسیح رینے یوگا بابستے سکیود زانے، میتشوگس چھینموجیک کھونگی ستینگرانگنے یونگس۔ 2دزینادچانّی میجیک مسیحا لدُونلا یونگس یانگ پِیکدونگ ژُوگستے زیرس، ”مسیح لے، نیرانگ تھوگستھادنا نگا گیالچوگستے ژانگما زاد نیانّانوگ۔“
3حضرت عیسیٰ سی چھاگ کیانگستے کھوا تھوگ چوگّا زادتے مولس، ”نگا کھیرانگ گیال چوگتے ژانگما چوا تھادّاراگ“ تینّامالّا دزینادپو میدکھان سونگ۔ 4تینے حضرت عیسیٰ سی تے میبوا مولس، ”سوانگ ماشاد، اِین نانگ سونگتے رانگی زوگسپو بُو اِمام ستون یانگ پیغمبر حضرت مُوسیٰؔ سی کا سالکھان نانگجین خُدا چھودپا پھول، تیبو میگونلا کھیرانگ ژانگما چھاکھانّی گوا این۔“
ماگیے سپونبوے ایمان۔
5حضرت عیسیٰ مسیح کفرنحُوم مّی ڈونگکھیرّی نانّگا چاب لیبّاچیگ، رومی ماگیے سپونبوجیک کھونگی لدُونلا یونگستے روگس زادچیسلا جْوس ، 6”مسیح لے، نگے یوگپوا زاپھوگتے کھانگپا زُومو ثانٹے یونگین یود۔“
7حضرت عیسیٰ سی مولس، ”نگا یونگستے کھو پھانچوگین۔“
8ماگیے سپونبوے زیرس، ”مسیح لے، نیرانگ نگے کھانگپا سکیودچیسّی اوسپا نگا مان۔ اِین نانگ نیرانگیکا سالنا نگے یوگپو پھانین۔ 9وانگچھے یوگا نگانگ دوگّاد یانگ نگے وانگچھے یوگا ماگمیگون یود۔ نگے چیگّا سونگ زیرنا چھانوگ یانگ چیگّا یونگ زیرنا یونّگانوگ، یانگ نگے یوگپوا ای لاسپو چوس زیرنا چوانوگ۔“
10حضرت عیسیٰ سی تیبو سانّاچیگ ہالاستے کھونّگا ڈانگستے یونگکھانّی میگونلا مولس، ”نگے کھیوجا لدینبا زیرّاد، بنی اِسرائیلی نانّگا نگا یتسوگسّی ایمان چانجیک مانے ماتھوب۔ 11نگے کھیوجا زیرّاد، یہُودی مانکھان مانگپو شار تانگ نوبنے یونگستے، نامکھے گیالثیدّی نانّگا دونتانگی پھیا نگاتانگی اتا اپو حضرت اِبراہیم، حضرت اِضحاقؔ تانگ، حضرت یعقُوبؔ نیامپو رانگی ناسّیکا دوگین۔ 12اِین نانگ بنی اِسرائیل پا کاگونّی پھیا نامکھے گیالثیدپو ڈالڈیگ چوا زادتے اِنپین کھونگون پھیلوگا مونڈیگی نانّگا پھانّگا زادِین، تیرو ناگس ثانٹے جاستے نگوچیس تانگ سو ثیگچیس یونگین۔“
13تینے حضرت عیسیٰ سی ماگیے سپونبوا مولّا زادس، ”سونگ، کھیرانگی ایمان چوکھان نانگجین کھیرانگی یوگپو گیالین۔“ حضرت عیسیٰ سی مولکھانّی تینّا توستش اوت پویکا یوگپوے زُومو گیالس۔
حضرت عیسیٰ سی می مانگپو پھانچوگا زادس۔
14حضرت عیسیٰ مسیح حضرت پطرؔس سی کھانگپا سکیودّاچیگ، کھونگی حضرت پطرؔس سی نامے اما تشاد یونگستے مالتسے نانّگا دُوگستے زِیگس۔ 15حضرت عیسیٰ سی کھوے لاگپا چھاگتھوگّا زاد پاسانگ تشادپو میدکھان سونگ، کھو لانگستے کھونّگا جابستوگ جْوس ۔
16تینّا پھیتوگ میگونّی ردود جوگسکھان مانگپو کھونگ یودسا ٹھیدتے کھیونگس، کھونگی ”بینگ“ مولتے کا سال پاسانگ ردودگون بینگس یانگ زُومو یودکھان تشانگما پھانچوگا زادس۔ 17مسیح سکورلا پیغمبر یسعیاہ پیغمبری ڈِیا زادکھانبو ڈانڈا ڈوبچیسلا حضرت عیسیٰ سی تیگون زادس۔ حضرت یسعیاہ پیغمبری ڈِیا زادکھانبو نی،
”کھونگی نگاتانگ نادنے سکیوبّا زادس،
یانگ زومونے پھانچوگا زادس۔“
حضرت عیسیٰ سی ڈانگشیس لامو مان۔
18حضرت عیسیٰ سی مسیح، کھونّگا سکورکھانّی میتشوگسپو زیگسّاچیگ، کھونگرانگی لوبٹوگس گونلا تشوے پھارکا چھاچیسلا کا سالّا زادس۔ 19شریعتی عالِم جیک یونگستے زیرس، ”لوبپونلے، نیرانگ کارُو سکیودنانگ نگا نیرانّگا ڈانگستے یونگین۔“
20حضرت عیسیٰ سی لانسالس، ”واتسیی واتشانگس تانگ، نامکھے چا چاتشانگس یودتے اینوگ، اِین نانگ نگا اِبنِ آدم گو بورتے آرام چوچیسی ناسّانگ مید۔“
21جان لوبٹوگس جیکّی زیرس، ”مسیح لے، سنگونلا نگا کھانگپا سونگتے نگارانگی ابا شیتے سوبچیسّی پھیا ڈالڈیگ چوچیسلا گونگسپا سال۔“
22حضرت عیسیٰ سی مولس، ”نگے ستینگرانگنے ڈونگس، یانگ رُوحانی تھوگنے شیکھانگونلا کھورانگونّی شیکھانگون سوبچوگ۔“
حضرت عیسیٰ سی لونگراگ میدکھان زادس۔
23تینے حضرت عیسیٰ مسیح ٹُھوزینگی نانّگا ژونّا زادس یانگ لوبٹوگسگون کھونگ نیامپو سونگ۔ 24ہونمیدلا نامتشوبستے تشوے نانّگا لونگراگ ٹاگپو یونگچیسپوے چھولباگ ٹُھوزینگی نانّگا لیبنانگ، حضرت عیسیٰ سی نالزیمستے یودپین۔ 25لوبٹوگسگون سونگتے حضرت عیسیٰ سی نیدتشادّا زادتے زیرس، ”مسیح لے، مسیح لے، نگاجا گُون چھوی نانّگا نوبتے شیچیس دوگ۔ کھوم چُوگانگ۔“
26حضرت عیسیٰ سی لانسالس، ”ایمان چھونگونچان، چیا جیگسّاد؟“ کھونگ جانگستے، لونگراگ تانگ چھولباگ گُونلا کھاسکییا زادپا تینّامالّا تیگون میدکھان سونگتے تشوے نانّگا پاد جیدے چونگ۔
27کھونگون ہالاستے زیرس، ”کھونگ کازوگ میجیک این ہے؟ لونگسپو تانگ چھولباگ گونّیانگ کھونگی کھا نیاندوگ۔“
ردود جوگسکھان نیس پھانچوگا زادس۔
28حضرت عیسیٰ مسیح تانگ کھونگی لوبٹوگسگون تشوے پھارکا، گراسا یولجونگسلا لیبّاچیگ، رومکھانگی ناسّانے بینگستے یونگین یودکھان ردود جوگسکھان نیس حضرت عیسیٰ سی تھوگ۔ کھونگون ما نودسکیال جیگسنانگچان یودچیسپوے سوجیکّانگ تے لامنے چھاتھوبّا میدپین۔
29کھونگونی کُوچو ثانٹے تانگین زیرس، ”خُدےبوژا نیرانگ نگاجے لاسّی نانّگا چیا ڈیسّاد؟ خُدے لدامّا زادکھانّی ٹھیمسچادّی توسپوے سانگ سنگونلا نگاجا ناگس ستانّالا سکیودپینّا؟“
30کھونگون یودسے سانگ ژاپیگ تھاگرینّگا پھاگی کھیو چھینموجیک سا زین یودپین۔ 31ردودگونّی حضرت عیسیٰ سی جوجو جوین زیرس، ”کالتیس نیرانگی نگاجا کھونگونی نانگنے پھینگنا، نگاجا پھاگّونّی نانّگا چھاچوگّا زاد۔“
32حضرت عیسیٰ سی کھونگونلا ”سونگشیگ“ مولپا، تیگون بینگتے پھاگّونّی نانّگا جوگساچیگ، پھاگی کھیو گانگپو رینے تُھورلا بانگتانگستے تشوے نانّگا سونگ یانگ چھوی نانّگا نوبتے شی۔
33پھاگتشوکھانگون ڈونگکھیرلا بانگتانگستے سونگ، یانگ ردود جوگسکھانّی میگونلا جونگکھان تشانگما شادس۔ 34تینے ڈونگکھیرپا تشانگما حضرت عیسیٰ سی جالّا یونگس، یانگ حضرت عیسیٰ سی جالّاچیگ، کھونگون ثانٹے جیگس پاسانگ کھونّگا، کھونگونی یولنے بینگتے سکیود جوجو زیرس۔
Valið núna:
مادتھا 8: LBJNT
Áherslumerki
Deildu
Afrita
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.