မ︀တ︀်တ︀ႄး 3
3
လ︀ွင︀်ႈꩬ︀ြႃယ︀ေႃးꩭၢꩫ︀်ꩭူဝ်းတ︀ြႃး
(မ︀ႃက︀ု 1.1-8; လ︀ုက︀ႃ 3.1-18; ယ︀ေႃးꩭၢꩫ︀် 1.19-28)
1-2ဝူင︀်ႈမ︀ိူဝ်ႈဢ︀မ︀ႂ်း ꩬ︀ြႃယ︀ေႃးꩭၢꩫ︀်ယ︀ႃႇ ထိူꩫ︀်ꩭႅင︀်ႛတ︀ိူင︀်းယ︀ုတ︀မ︀ႆ︀ႛမ︀ႃးꩬ︀ီ “ပ︀ူဝ်မ︀ေပ︀ီꩫ︀ွင︀်ႇၵ︀ဝ်ꩴ︀း ꩬ︀ၢင︀်ဝွေက︀ꩫ︀်ႈတ︀ႃႉ။ မ︀ိူင︀်းက︀ၢင︀်ႈꩭၢဝ် တ︀ီတ︀င︀်ႛတ︀ေမ︀ႃးယ︀ဝ်ႇ” ꩫ︀ꩬ︀ီ ꩭူဝ်းꩬ︀ီဢ︀ူဢ︀ူ။ 3ꩬ︀ြႃယ︀ေႃးꩭၢꩫ︀်ယ︀ႃႇ က︀ူဝ်ႇဢ︀ꩫ︀်ႈ “တ︀ၢင︀်းꩡ︀ႃႇꩡ︀ဝ်ႛထႃဝရ︀ၸ︀ြႃး မ︀ေးꩭႅမ︀်းက︀ꩫ︀်ႈတ︀ႃႉ။ တ︀ၢင︀်းမ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈꩫ︀ꩫ︀်ႈဢ︀ဝ်ႈပ︀ီင︀်းက︀ꩫ︀်ႈတ︀ႃႉꩫ︀ꩬ︀ီ ထိူꩫ︀်ꩭႅင︀်ႛမ︀ႆ︀ႛ က︀ူꩫ︀်းက︀ူဝ်ႇလ︀ိူင︀်ႈဢ︀ိဝ်ꩬ︀ီဢ︀ူဢ︀ူ” ꩫ︀ꩬ︀ီ ပ︀ရ︀ေႃးၸ︀ႅတ︀်ႉꩭေꩬ︀ႃယ︀ꩡ︀ိုဝ်ꩬ︀ီဝႃႈဝႆ︀ႇꩫ︀ႆ︀ႇꩫ︀မ︀်။ 4ꩬ︀ြႃယ︀ေႃးꩭၢꩫ︀်ယ︀ႃႇ ၵ︀ိူင︀်ႈၵ︀ူꩫ︀်မ︀ႃႇဢ︀ုတ︀်ႉꩫ︀ုင︀်ႈ၊ ꩬ︀ႆ︀ၢက︀ႅတ︀်ꩫ︀င︀်ꩭတ︀်ႉင︀ႆ︀း ꩬ︀က︀ႃႚꩫ︀ၵ︀ႃ ꩫ︀မ︀်ႇၸ︀ိုင︀်ႛထိူꩫ︀်ꩫ︀ႆ︀ႇၵ︀ဝ် က︀ိꩫ︀်ႈꩬ︀ီဢ︀ူဢ︀ူ။ 5-6က︀ူꩫ︀်းꩫ︀ႆ︀ႇၵ︀ဝ်ယ︀ႃႇ လ︀ုက︀်ႉဝီင︀်းယ︀ေရ︀ုꩬ︀လ︀ိမ︀်၊ တ︀ိူင︀်းယ︀ုတ︀တ︀င︀်းတ︀ိူင︀်းင︀ႆ︀း လ︀ုက︀်ႉတ︀ိူင︀်ႈတ︀ၢင︀်ႇꩭိမ︀်းꩫ︀မ︀်ႇယ︀ေႃတ︀ၢꩫ︀်တ︀င︀်းမ︀ိူင︀်းမ︀ႆ︀ႛ ꩬ︀ြႃယ︀ေႃးꩭၢꩫ︀်မ︀ႆ︀ႛ မ︀ႃးက︀ꩫ︀်ႈꩬ︀ီ ဢ︀ပ︀ႅတ︀်ႉၵ︀ဝ်ပ︀ုတ︀်ၵ︀ႆ︀ႈက︀ꩫ︀်ႈဢ︀ူ။ မ︀ꩫ︀်းက︀ေႃႇ ၵ︀ဝ်မ︀ႆ︀ႛ ꩫ︀မ︀်ႇယ︀ေႃတ︀ၢꩫ︀်မ︀ႆ︀ႛ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭႂ်ႛဢ︀ူ။ 7ၸ︀ႃရ︀ိꩬ︀ႄꩫ︀ႆ︀ႇၵ︀ဝ်င︀ႆ︀း ꩡ︀တ︀်တ︀ုက︀ႄꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀် မ︀ႃးꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇက︀ꩫ︀်ႈꩫ︀ႆ︀ႇမ︀ႆ︀ႛ ꩭꩫ︀်က︀ီး ꩬ︀ြႃယ︀ေႃးꩭၢꩫ︀်ယ︀ႃႇ “ꩭေး င︀ူးꩭႆ︀ၢႇꩫ︀ႆ︀ႇၵ︀ဝ် ꩬ︀ူမ︀ႆ︀ႛမ︀ႃးꩬ︀ီ တ︀ၢမ︀်ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ူင︀်ႈꩭႂ်ႛမ︀ႆ︀ႛ ꩵ︀ႈလ︀ွတ︀်ႉပ︀ိူင︀်ႈလ︀ူင︀်။ 8ꩬ︀ူꩬ︀ၢင︀်ဝွေတ︀ေႇတ︀ေႇဢ︀ူꩫ︀က︀ီး ဢ︀ဝ်ႈတ︀ၢင︀်းက︀ႅင︀်းꩬ︀ူပ︀ျႃးက︀ꩫ︀်ႈတ︀ႃႉ။ 9ꩬ︀ူ လ︀ုက︀်ႉလ︀ၢင︀်းဢ︀ႃပ︀ြႃꩭၢမ︀်ꩫ︀မ︀်ꩫ︀ꩬ︀ီဝႃႈꩬ︀ီꩫ︀ႆ︀ၢႈယ︀ႃႇ လ︀ုက︀်ႉတ︀ၢမ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ꩫ︀်တ︀ႂ်းတ︀ီꩫ︀ႆ︀ႛလ︀ွတ︀်ႉက︀ျႃး။ ꩵ︀ႈလ︀ွတ︀်ႉ။ က︀ဝ်ႈဝႃႈက︀ွတ︀်။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ လ︀ုက︀်ႉꩭိꩫ︀်ဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈက︀ေႃႇ လ︀ုက︀်ႉလ︀ၢင︀်းဢ︀ႃပ︀ြႃꩭၢမ︀်ꩫ︀ႆ︀ႇၵ︀ဝ် ဢ︀ဝ်ႈဢ︀ွက︀်မ︀ႃးꩫ︀ႆ︀ႛဢ︀ူ။ 10င︀ဝ်ႛတ︀ူꩫ︀်ႛမ︀ႆ︀ႛ ၵ︀ၢꩫ︀်ꩡ︀ၢမ︀်ထုက︀်ꩰဝႆ︀ႇယ︀ဝ်ႇ။ တ︀ူꩫ︀်ႛမ︀ႆ︀ႇဢ︀ꩫ︀်ႈက︀ႃႈꩡ︀ိုဝ်ႈမ︀က︀်ဢ︀ꩫ︀်ႈꩫ︀ီႈမ︀ဝ်ပ︀ီꩫ︀်ႈꩫ︀ႆ︀ႇၵ︀ဝ်မ︀ႆ︀ႛ လ︀ုက︀်ႉင︀ဝ်ႛမ︀ႆ︀ႛ ပ︀မ︀်ႛမ︀ူတ︀်ꩰꩬ︀ီ တ︀ီꩬ︀ုမ︀်ၸ︀ႆ︀းၵ︀ွတ︀်ꩫ︀မ︀်။ 11က︀ဝ်ႈယ︀ႃႇ ꩬ︀ူꩬ︀ၢင︀်ဝွေယ︀ဝ်ႇꩫ︀က︀ီး ꩬ︀ူမ︀ႆ︀ႛမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭႂ်ႛဢ︀ူ။ ꩫ︀ႆ︀ႇꩫ︀က︀ေႃႇ ꩡ︀ဝ်ႛဢ︀ꩫ︀်ႈက︀ꩫ︀်ႛလ︀င︀်က︀ဝ်ႈမ︀ႆ︀ႛမ︀ႃးꩫ︀ႆ︀ႇယ︀ႃႇ ꩬ︀ူမ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃၸ︀ႆ︀းမ︀ႆ︀ႛꩡ︀ူမ︀်ႈꩬ︀ီ မ︀ၢင︀်က︀လ︀ႃတ︀ီꩭႂ်ႛꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ က︀ဝ်ႈမ︀ႆ︀ႛဢ︀ၢꩫ︀်တ︀ၢꩫ︀်ယ︀ႂ်မ︀ႅတ︀်ႉꩬ︀ႃဢ︀ူ။ က︀ဝ်ႈယ︀ႃႇ တ︀ိုဝ်းၵ︀ႅပ︀်တ︀ိꩫ︀်ႈမ︀ꩫ︀်းꩡ︀ဝ်ႛꩭႂ်ႛꩫ︀ႆ︀ၢႈက︀ေႃႇ ꩵ︀ႈထႅက︀်ႉ။ 12မ︀ꩫ︀်းꩡ︀ဝ်ႛယ︀ႃႇ ဝီးတ︀ိုဝ်းꩬ︀ီꩬ︀ၢင︀်ဝီးၵ︀ဝ်ႛဢ︀ူ။ တ︀လ︀ၢင︀်းၵ︀ဝ်ႛမ︀ႆ︀ႛဝီးꩬ︀ီ ၵ︀ဝ်ႛꩫ︀ႆ︀ႇၵ︀ဝ်ယ︀ေးမ︀ႆ︀ႛ တ︀ီꩬ︀ႂ်ဝႆ︀ႇꩫ︀မ︀်။ ၵ︀ဝ်ႛꩭႅပ︀်ꩫ︀ႆ︀ႇၵ︀ဝ်မ︀ႆ︀ႛယ︀ႃႇ ၸ︀ႆ︀းဢ︀ꩫ︀်ႈမ︀ဝ်မ︀ွတ︀်ꩡ︀ၢင︀်ႈမ︀ႆ︀ႛ တ︀ီꩬ︀ုမ︀်ၵ︀ွတ︀်ꩫ︀မ︀်” ꩫ︀ဝꩫ︀်ႇ။
လ︀ွင︀်ႈꩡ︀ဝ်ႛယ︀ေꩬ︀ု ꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇ
(မ︀ႃက︀ု 1.9-11; လ︀ုက︀ႃ 3.21-22)
13မ︀ိူဝ်ႈဢ︀မ︀ႂ်း ꩡ︀ဝ်ႛယ︀ေꩬ︀ုက︀ေႃႇ လ︀ုက︀်ႉꩬ︀ြႃယ︀ေႃးꩭၢꩫ︀်မ︀ႆ︀ႛ ꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇက︀ွတ︀်ꩫ︀ꩬ︀ီ လ︀ုက︀်ႉတ︀ိူင︀်းက︀ႃလ︀ိလ︀ႄးမ︀ႆ︀ႛ ထိုင︀်မ︀ႃးဢ︀ူ။ 14ꩫ︀ႆ︀ႇꩫ︀က︀ေႃႇ ꩬ︀ြႃယ︀ေႃးꩭၢꩫ︀်ယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ “ꩡ︀ဝ်ႛꩴ︀း မ︀ႂ်းꩡ︀ဝ်ႛꩬ︀ိုင︀် က︀ဝ်ႈၵ︀ႃႛမ︀ႆ︀ႛ ဝႃႈꩭႂ်ႛမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇက︀ေႃႇ။ က︀ဝ်ႈၵ︀ႃႛယ︀ႃႇ မ︀ႂ်းꩡ︀ဝ်ႛမ︀ႆ︀ႛတ︀ီꩭိုဝ်လ︀ိုဝ်ꩭႂ်ႛတ︀ီၵ︀ႃႛꩫ︀ႆ︀” ꩫ︀ꩬ︀ီꩬ︀ွက︀်ႉꩬ︀ီ ꩡ︀တ︀်ဢ︀ူ။ 15ꩡ︀ဝ်ႛယ︀ေꩬ︀ုယ︀ႃႇ “ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛꩭီတ︀်ꩫ︀ႆ︀ႇၵ︀ဝ်တ︀င︀်းမ︀ိူင︀်း ꩭႂ်ႛပ︀ူဝ်းက︀ုမ︀်ꩫ︀ႆ︀ႇ ထုက︀်ꩫ︀ီႈꩭီတ︀်ဢ︀ူ။ င︀ႆ︀းꩫ︀ႆ︀ႇꩬ︀ီ င︀ႆ︀ႚယ︀ႃႇ မ︀ႂ်းꩬ︀ိုင︀် က︀ဝ်ႈမ︀ႆ︀ႛမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭႂ်ႛမ︀ႃးတ︀ႃႉ” ꩫ︀ဝꩫ︀်ႇ။ င︀ႆ︀းꩬ︀ီ ꩬ︀ြႃယ︀ေႃးꩭၢꩫ︀်က︀ေႃႇ ꩡ︀ဝ်ႛယ︀ေꩬ︀ုမ︀ႆ︀ႛ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭႂ်ႛဢ︀ူ။ 16ꩡ︀ဝ်ႛယ︀ေꩬ︀ု ꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇယ︀ဝ်ႇꩬ︀ီ မ︀ွင︀်းလ︀ုက︀်ႉꩫ︀မ︀်ႇမ︀ႆ︀ႛ ဢ︀ွက︀်မ︀ႃးယ︀ႃႇ က︀ၢင︀်ႈꩭၢဝ်ပ︀ုတ︀်ꩬ︀ီ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛက︀ျွႃးလ︀ူင︀်းမ︀ႃးင︀ႆ︀း ꩫ︀င︀်ꩭၢင︀်ႈꩫ︀ူက︀်ႉတ︀ူႛꩫ︀က︀ꩫ︀်ႈ က︀ꩫ︀်ႛꩫ︀ိူဝ်မ︀ꩫ︀်းꩡ︀ဝ်ႛမ︀ႆ︀ႛ မ︀ႃးꩡ︀ပ︀်ꩫ︀ႆ︀ႇမ︀ႆ︀ႛ မ︀ꩫ︀်းꩡ︀ဝ်ႛꩭꩫ︀်ဢ︀ူ။ 17မ︀ိူဝ်ႈဢ︀မ︀ႂ်း လ︀ုက︀်ႉက︀ၢင︀်ႈꩭၢဝ်မ︀ႆ︀ႛ “က︀ူဝ်ႇꩫ︀ႆ︀ႇယ︀ႃႇ လ︀ုက︀်ႉꩭၢက︀်ႉက︀ဝ်ႈꩫ︀မ︀်။ မ︀ꩫ︀်းမ︀ႆ︀ႛက︀ဝ်ႈမ︀ႃးꩡ︀ႂ်ႈလ︀ူင︀်ꩫ︀မ︀်” ꩫ︀ꩬ︀ီ ꩬ︀ီင︀်တ︀ၢꩫ︀်ႛဢ︀ွက︀်မ︀ႃးဢ︀ူ။
Valið núna:
မ︀တ︀်တ︀ႄး 3: kht
Áherslumerki
Deildu
Afrita
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.