မ︀တ︀်တ︀ႄး 14
14
လ︀ွင︀်ႈꩬ︀ြႃယ︀ေႃးꩭၢꩫ︀်မ︀ႆ︀ႛဢ︀ဝ်ႈတ︀ႆ︀ၢႈ
(မ︀ႃက︀ု 6.14-29; လ︀ုက︀ႃ 9.7-9)
1မ︀ိူဝ်ႈဢ︀မ︀ႂ်း ꩡ︀ဝ်ႛၸ︀ႃႇတ︀ိူင︀်းက︀ႃလ︀ိလ︀ႄး ꩭေရ︀ုတ︀် လ︀ွင︀်ႈꩡ︀ဝ်ႛယ︀ေꩬ︀ုꩫ︀ႆ︀ႛꩥ︀ိꩫ︀်းက︀ႃဢ︀ူ။ 2မ︀ꩫ︀်းယ︀ႃႇ မ︀ူမ︀တ︀်ႉမ︀ꩫ︀်းၵ︀ဝ်မ︀ႆ︀ႛ “ယ︀ေꩬ︀ုꩫ︀ႆ︀ႇ ဢ︀ꩫ︀်ႈꩭိုဝ်လ︀ိုဝ်က︀ေႃႇ ꩬ︀ြႃယ︀ေႃးꩭၢꩫ︀် ꩫ︀ိပ︀်ပ︀ွက︀်ႉမ︀ႃးꩫ︀မ︀်။ င︀ႆ︀းꩬ︀ီꩫ︀မ︀် မ︀ꩫ︀်းဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်ꩭီတ︀်ပ︀ီꩫ︀်ႈꩫ︀ႆ︀ႇ” ꩫ︀ဝꩫ︀်ႇ။ 3ꩭေရ︀ုတ︀်ယ︀ႃႇ ꩬ︀ြႃယ︀ေႃးꩭၢꩫ︀်မ︀ႆ︀ႛ ꩭႂ်ႛꩬ︀ႅဝ်ႛꩬ︀ီ ꩬ︀ႂ်ထွင︀်မ︀ႃးꩫ︀မ︀်။ မ︀ꩫ︀်းꩭီတ︀်င︀ႆ︀းꩫ︀ႆ︀ႇ လ︀ႆ︀ၢးပ︀ိူဝ်ႈꩭေရ︀ေႃတ︀ိ ၸ︀ူႛပ︀ီꩫ︀်ႈၸ︀ူႛမ︀ေးၸ︀ိလ︀ိပ︀်ꩬ︀ီꩫ︀မ︀်။ ၸ︀ိလ︀ိပ︀်ယ︀ႃႇ ၸ︀ူႛꩫ︀ွင︀်ႇꩡ︀ႆ︀ၢးꩭေရ︀ုတ︀်ꩫ︀မ︀်။ 4မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛ ꩬ︀ြႃယ︀ေႃးꩭၢꩫ︀်ယ︀ႃႇ ꩭေရ︀ုတ︀်မ︀ႆ︀ႛ “မ︀ႂ်း ꩭေရ︀ေႃတ︀ိမ︀ႆ︀ႛ ဢ︀ဝ်ႈꩫ︀ႆ︀ႇဢ︀ꩫ︀်ႈၸ︀ိတ︀်ꩬ︀ိꩫ︀်တ︀ူႈꩫ︀မ︀်” ꩫ︀ꩬ︀ီတ︀ၢင︀်ဢ︀ပ︀ႅတ︀်ႉမ︀ႃးဢ︀ူ။ 5င︀ႆ︀းꩬ︀ီ ꩭေရ︀ုတ︀်ꩫ︀ႆ︀ႇ ꩬ︀ြႃယ︀ေႃးꩭၢꩫ︀်မ︀ႆ︀ႛ ၵ︀ႂ်ႈဢ︀ဝ်ႈတ︀ႆ︀ၢႈꩫ︀မ︀်။ ꩫ︀ႆ︀ႇꩫ︀က︀ေႃႇ က︀ျူးꩫ︀ႆ︀ႇၵ︀ဝ်ယ︀ႃႇ ꩬ︀ြႃယ︀ေႃးꩭၢꩫ︀်မ︀ႆ︀ႛ မ︀တ︀်ႉပ︀ရ︀ေႃးၸ︀ႅတ︀်ႉꩫ︀ႆ︀ႇꩬ︀ီ မ︀ꩫ︀်းမ︀ႆ︀ႛဢ︀ဝ်ႈတ︀ႆ︀ၢႈက︀ီး က︀ူဝ်ႈက︀ူꩫ︀်းꩫ︀ႆ︀ႇၵ︀ဝ်ဢ︀ုက︀်ꩰဢ︀ဝ်ꩰမ︀ႃးꩬ︀ီ ဢ︀ဝ်ႈတ︀ႆ︀ၢႈမ︀ဝ်ပ︀ီꩫ︀်ႈမ︀ႃးꩫ︀မ︀်။ 6မ︀ိူဝ်ႈပ︀ွႆ︀းဝꩫ︀်းၸ︀ႃးꩭေရ︀ုတ︀်ꩫ︀ႆ︀ႇ ၸ︀ူႛလ︀ုက︀်ႉꩬ︀ၢဝ်ꩭေရ︀ေႃတ︀ိ ပ︀ၢင︀်ႈပ︀ွႆ︀းဢ︀မ︀ႂ်းမ︀ႆ︀ႛက︀ႃႛဢ︀ူ။ ꩫ︀ႆ︀ႇမ︀ႆ︀ႛ ꩭေရ︀ုတ︀်ꩡ︀ူမ︀်းꩡ︀ႂ်ႈလ︀ူင︀်က︀ႃꩬ︀ီ 7ꩫ︀ၢင︀်းဢ︀ွꩫ︀်ဢ︀မ︀ႂ်းမ︀ႆ︀ႛ “မ︀ႂ်းက︀ꩬ︀င︀်ယ︀ွꩫ︀်းꩫ︀က︀ေႃႇ ꩭႂ်ႛက︀ွတ︀်” ꩫ︀ꩬ︀ီ က︀ိꩫ︀်ꩬ︀ီ က︀တ︀ိꩭႂ်ႛဢ︀ူ။ 8ꩫ︀ၢင︀်းဢ︀ွꩫ︀်ဢ︀မ︀ႂ်းယ︀ႃႇ ꩫ︀င︀်မ︀ေမ︀ꩫ︀်းꩫ︀ေꩭႂ်ႛꩫ︀က︀ꩫ︀်ႈ “က︀ုမ︀်ꩭူဝ် ꩬ︀ြႃယ︀ေႃးꩭၢꩫ︀် လ︀ၢင︀်ပ︀ၢꩫ︀်းမ︀ႆ︀ႛ ꩬ︀ႂ်ꩭႂ်ႛမ︀ႃးတ︀ႃႉ” ꩫ︀ဢ︀ူ။ 9ꩫ︀ႆ︀ႇမ︀ႆ︀ႛ ꩡ︀ဝ်ႛၸ︀ႃႇꩫ︀ႆ︀ႇ ꩡ︀ႂ်ႈꩬ︀ဝ်ႛလ︀ူင︀်က︀ႃꩫ︀မ︀်။ ꩫ︀ႆ︀ႇꩫ︀က︀ေႃႇ ပ︀ၢင︀်ႈꩫ︀ႃႛပ︀ီႈꩫ︀ွင︀်ႇပ︀ၢင︀်ႈပ︀ွႆ︀းꩫ︀ႆ︀ႇၵ︀ဝ်မ︀ႆ︀ႛ က︀တ︀ိꩫ︀ႆ︀ႛꩭႂ်ႛယ︀ဝ်ႇꩰꩫ︀ႆ︀ႇꩬ︀ီ ဢ︀ꩫ︀်ႈꩫ︀င︀်မ︀ꩫ︀်းယ︀ွꩫ︀်းꩫ︀ႆ︀ႇ ဢ︀မ︀ိင︀်းပ︀ူင︀်ႈꩭႂ်ႛဢ︀ူ။ 10င︀ႆ︀းꩬ︀ီ လ︀ႃႉမ︀လ︀ွမ︀်ꩫ︀ႆ︀ႇၵ︀ဝ် က︀ꩫ︀်ႛꩫ︀ႂ်းထွင︀်မ︀ႆ︀ႛက︀ႃꩬ︀ီ က︀ုမ︀်ꩭူဝ်ꩬ︀ြႃယ︀ေႃးꩭၢꩫ︀် က︀ႃတ︀ႅပ︀်င︀ႆ︀း 11က︀ုမ︀်ꩭူဝ်ဢ︀မ︀ႂ်း လ︀ၢင︀်ပ︀ၢꩫ︀်းမ︀ႆ︀ႛꩬ︀ႂ်ꩬ︀ီ ꩫ︀ၢင︀်းဢ︀ွꩫ︀်ဢ︀မ︀ႂ်းမ︀ႆ︀ႛ က︀ႃꩭႂ်ႛဢ︀ူ။ ꩫ︀ၢင︀်းဢ︀ွꩫ︀်ဢ︀မ︀ႂ်းက︀ေႃႇ က︀ုမ︀်ꩭူဝ်ဢ︀မ︀ႂ်း ၸ︀ူႛမ︀ေႈမ︀ႆ︀ႛဢ︀ၢပ︀်ႉꩭႂ်ႛဢ︀ူ။ 12ၸ︀ူႛတ︀ပ︀ေးꩬ︀ြႃယ︀ေႃးꩭၢꩫ︀်ၵ︀ဝ်ယ︀ႃႇ တ︀ူဝ်ႈꩭၢင︀်ႈတ︀ႆ︀ၢႈမ︀ꩫ︀်းမ︀ႃးဢ︀ဝ်ႈꩬ︀ီ က︀ႃၸ︀င︀်ဢ︀ူ။ ယ︀ဝ်ႇက︀ီး လ︀ွင︀်ႈဢ︀မ︀ႂ်း ꩡ︀ဝ်ႛယ︀ေꩬ︀ုမ︀ႆ︀ႛက︀ႃၵ︀ႆ︀ႈဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ု လ︀ီင︀်ႇက︀ူꩫ︀်းꩭႃႛꩭီင︀်
(မ︀ႃက︀ု 6.30-44; လ︀ုက︀ႃ 9.10-17; ယ︀ေႃးꩭၢꩫ︀် 6.1-14)
13လ︀ွင︀်ႈꩬ︀ြႃယ︀ေႃးꩭၢꩫ︀်တ︀ႆ︀ၢႈꩫ︀ႆ︀ႇꩫ︀ႆ︀ႛꩥ︀ိꩫ︀်းက︀ီး ꩡ︀ဝ်ႛယ︀ေꩬ︀ုတ︀င︀်းတ︀ပ︀ေးမ︀ꩫ︀်းꩡ︀ဝ်ႛၵ︀ဝ် လ︀ုက︀်ႉဢ︀မ︀ႂ်းမ︀ႆ︀ႛ ၵ︀ီꩭိူဝ်းꩬ︀ီ တ︀ီႈဢ︀ꩫ︀်ႈက︀ူꩫ︀်းယ︀ီꩫ︀်ႈမ︀ႆ︀ႛက︀ႃဢ︀ူဢ︀ူ။ ꩡ︀ဝ်ႛယ︀ေꩬ︀ုဢ︀ွက︀်က︀ႃꩫ︀ႆ︀ႇ က︀ူꩫ︀်းꩫ︀ႆ︀ႇၵ︀ဝ်တ︀ွင︀်းက︀ီး လ︀ုက︀်ႉဝီင︀်းꩫ︀ႆ︀ႇၵ︀ဝ်မ︀ႆ︀ႛဢ︀ွက︀်ꩬ︀ီ က︀ꩫ︀်ႛလ︀င︀်မ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈတ︀ၢင︀်းတ︀ိꩫ︀်ႈ ꩡ︀ွမ︀်းက︀ႃက︀ꩫ︀်ႈဢ︀ူ။ 14မ︀ꩫ︀်းꩡ︀ဝ်ႛလ︀ုက︀်ႉꩭိူဝ်းမ︀ႆ︀ႛလ︀ူင︀်းက︀ီး ၸ︀ုင︀်က︀ူꩫ︀်းလ︀ူင︀်မ︀ႆ︀ႛꩭꩫ︀်ဢ︀ူ။ မ︀ꩫ︀်းꩡ︀ဝ်ႛၵ︀ဝ်မ︀ႆ︀ႛ ဢ︀ီꩫ︀ူႈလ︀ူင︀်ꩬ︀ီ ဢ︀ꩫ︀်ႈၵ︀ႆ︀ႛဢ︀ꩫ︀်ႈꩡ︀ီပ︀်ၵ︀ဝ်မ︀ႆ︀ႛ ဢ︀ဝ်ႈꩫ︀ီႈꩭႂ်ႛဢ︀ူ။ 15ၸ︀ႆ︀ၢၵ︀မ︀်ႈဢ︀မ︀ႂ်း တ︀ပ︀ေးꩡ︀ဝ်ႛၵ︀ဝ်မ︀ႃးꩬ︀ီၵ︀ဝ်ယ︀ႃႇ “ꩡ︀ဝ်ႛꩴ︀း ၸ︀ႃႇၵ︀မ︀်ႈယ︀ဝ်ႇ။ တ︀ီႈꩫ︀ႆ︀ႇယ︀ႃႇ ပ︀ီꩫ︀်ႈꩡ︀ွက︀်ႉꩫ︀ႆ︀ႇꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛမ︀ိူဝ်းတ︀ီၵ︀ႃႛတ︀ႃႉ။ မ︀ၢꩫ︀်ႛမ︀ႆ︀ႛ ၵ︀ဝ်ၸ︀ူႛꩡ︀ဝ်ႛ ꩭႂ်ႛက︀ႃꩬ︀ိုဝ်ႇဢ︀ꩫ︀်ႈက︀ိꩫ︀်ႈတ︀ီၵ︀ႃႛက︀ွတ︀်” ꩫ︀ꩬ︀ီမ︀ꩫ︀်းꩡ︀ဝ်ႛမ︀ႆ︀ႛ ꩬ︀ွက︀်ႉဢ︀ူ။ 16ꩡ︀ဝ်ႛယ︀ေꩬ︀ုယ︀ႃႇ “ၵ︀ဝ်ꩵ︀ႈဝႃႈက︀ႃ။ ꩬ︀ူၸ︀ူႛꩡ︀ဝ်ႛꩬ︀ိုင︀်ၵ︀ဝ်မ︀ႆ︀ႛလ︀ီင︀်ႇတ︀ႃႉ” ꩫ︀ဝꩫ︀်ႇ။ 17င︀ႆ︀းက︀ီး တ︀ပ︀ေးꩡ︀ဝ်ႛၵ︀ဝ်ယ︀ႃႇ “တ︀ူႈၵ︀ႃႛမ︀ႆ︀ႛ ၵ︀ဝ်ႛမ︀ုꩫ︀်းꩭႃႛၵ︀ႅပ︀်င︀ႆ︀း ပ︀ႃႈꩬ︀ွင︀်တ︀ူဝ်ႈꩫ︀ႆ︀ၢႈꩫ︀မ︀်ယ︀င︀်းတ︀ီၵ︀ႃႛꩫ︀ႆ︀ႇ” ꩫ︀ꩬ︀ီꩬ︀ွက︀်ႉပ︀ွက︀်ႉဢ︀ူ။ 18ꩫ︀ႆ︀ႇမ︀ႆ︀ႛꩡ︀ဝ်ႛယ︀ေꩬ︀ုယ︀ႃႇ “ဢ︀မ︀ႂ်းၵ︀ဝ် မ︀ႆ︀ႛဢ︀ဝ်ႈမ︀ႃးလ︀ႃး” ꩫ︀ဢ︀ူ။ 19မ︀ꩫ︀်းꩡ︀ဝ်ႛ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ပ︀ၢင︀်မ︀ႆ︀ႛꩭႂ်ႛꩫ︀င︀်ႈယ︀ဝ်ႇက︀ီး ၵ︀ဝ်ႛမ︀ုꩫ︀်းꩭႃႛၵ︀ႅပ︀်ꩫ︀ၵ︀ႃ ပ︀ႃႈꩬ︀ွင︀်တ︀ူဝ်ႈဢ︀မ︀ႂ်းဢ︀ဝ်ႈꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛဢ︀ူ။ ယ︀ဝ်ႇက︀ီး ၵ︀ဝ်ႛမ︀ုꩫ︀်းဢ︀မ︀ႂ်းၵ︀ဝ် မ︀ိꩫ︀်ႛꩬ︀ီ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛꩭႂ်ႛဢ︀ူ။ တ︀ပ︀ေးꩡ︀ဝ်ႛၵ︀ဝ်က︀ေႃႇ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ပ︀ꩫ︀်ႈꩭႂ်ႛဢ︀ူ။ 20က︀ူꩫ︀်းတ︀င︀်းမ︀ိူင︀်းက︀ိꩫ︀်ႈဢ︀ိမ︀်ꩰတ︀ီမ︀်ႈꩰယ︀ဝ်ႇꩬ︀ီ ဢ︀ꩫ︀်ႈက︀ိꩫ︀်ႈလ︀ိူဝ်ꩫ︀ႆ︀ႇ တ︀ပ︀ေးꩡ︀ဝ်ႛၵ︀ဝ် က︀ီပ︀်ꩭွမ︀်က︀ီး ꩬ︀ိပ︀်ꩬ︀ွင︀်ꩬ︀ွင︀်းတ︀ီမ︀်ႈꩰꩫ︀ႆ︀ႛဢ︀ူ။ 21က︀ူꩫ︀်းဢ︀ꩫ︀်ႈဢ︀မ︀ႂ်းမ︀ႆ︀ႛ က︀ိꩫ︀်ႈꩫ︀ႆ︀ႇၵ︀ဝ်ယ︀ႃႇ ၸ︀ူႛယ︀ိင︀်းꩫ︀ၵ︀ႃလ︀ၵ︀ႃꩫ︀ႆ︀ႇၵ︀ဝ်မ︀ႆ︀ႛ မ︀ဝ်ၵ︀ၢꩫ︀်းꩫ︀ႆ︀ၢႈက︀ေႃႇ ၵ︀ꩫ︀်ꩭႃႛꩭီင︀်က︀ူဝ်ႇယ︀င︀်းဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ု တ︀ႆ︀ၸ︀ိဝ်ꩫ︀မ︀်ႇ
(မ︀ႃက︀ု 6.45-52; ယ︀ေႃးꩭၢꩫ︀် 6.15-21)
22ꩡ︀ဝ်ႛယ︀ေꩬ︀ု က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛမ︀ိူဝ်းယ︀ဝ်ႇက︀ီး တ︀ပ︀ေးꩡ︀ဝ်ႛၵ︀ဝ်မ︀ႆ︀ႛ ဢ︀ဝ်ႈꩭိူဝ်းꩭႂ်ႛဢ︀ေႈက︀ႃၸ︀ၢက︀်ႉꩫ︀ွင︀်ဢ︀ူ။ 23ၵ︀ဝ်ဢ︀ွက︀်က︀ႃက︀ီး မ︀ꩫ︀်းꩡ︀ဝ်ႛꩫ︀ႆ︀ၢႈ ၵ︀ိုꩫ︀်ႛက︀ႃက︀ꩫ︀်ႛꩫ︀ိူဝ်ꩫ︀ွႆ︀ႈꩬ︀ီ ဢ︀ဝ်ႈထိုင︀်ပ︀ၢင︀်ႛၵ︀မ︀်ႈ ဢ︀မ︀ႂ်းမ︀ႆ︀ႛ ယ︀ွꩫ︀်းꩬ︀ူးဢ︀ူ။ 24ꩭိူဝ်းတ︀ပ︀ေးꩡ︀ဝ်ႛၵ︀ဝ် လ︀ုက︀်ႉၸ︀င︀်မ︀ႆ︀ႛ တ︀ိူက︀်ႉက︀ႃႈလ︀ိူင︀်ႈက︀ႆ︀ႈက︀ႃက︀ီး လ︀ူမ︀်းလ︀ူင︀်တ︀ိက︀်ꩬ︀ီ ၸ︀ွင︀်းထိပ︀်မ︀ႃးဢ︀ူ။ 25ယ︀ၢꩫ︀်ႈက︀ၢင︀်ႈလ︀ႂ် ꩬ︀ၢမ︀်မ︀ွင︀်းမ︀ႆ︀ႛ ꩡ︀ဝ်ႛယ︀ေꩬ︀ုက︀ꩫ︀်ႛꩫ︀ိူဝ်ၸ︀ိဝ်ꩫ︀မ︀်ႇမ︀ႆ︀ႛၸ︀ႆ︀ၢႛꩬ︀ီ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛမ︀ႃးဢ︀ူ။ 26မ︀ꩫ︀်းꩡ︀ဝ်ႛ က︀ꩫ︀်ႛꩫ︀ိူဝ်ၸ︀ိဝ်ꩫ︀မ︀်ႇမ︀ႆ︀ႛၸ︀ႆ︀ၢႛမ︀ႃးꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛၵ︀ဝ်ꩭꩫ︀်က︀ီး က︀ူဝ်ႈတ︀ႆ︀ၢႈꩰꩬ︀ီ “ꩭုꩥ︀်း ၸ︀ိုဝ်ႇꩬ︀ိုဝ်ꩬ︀ႃး” ꩫ︀ꩬ︀ီ ဢ︀ိဝ်ꩬ︀ႅꩫ︀်က︀ꩫ︀်ႈဢ︀ူ။ 27ꩫ︀ႆ︀ႇမ︀ႆ︀ႛ မ︀ꩫ︀်းꩡ︀ဝ်ႛယ︀ႃႇ “ပ︀ီက︀ူဝ်ႈ၊ က︀ဝ်ႈꩫ︀မ︀်၊ ပ︀ီက︀ပ︀်ႉꩡ︀ႂ်ႈ” ꩫ︀ဢ︀ူ။ 28ပ︀ေတ︀ရ︀ုယ︀ႃႇ “ꩡ︀ဝ်ႛꩴ︀း တ︀ေႇတ︀ေႇမ︀ႂ်းꩡ︀ဝ်ႛꩫ︀မ︀်ꩫ︀က︀ီး က︀ဝ်ႈၵ︀ႃႛမ︀ႆ︀ႛ ꩫ︀င︀်မ︀ႂ်းꩡ︀ဝ်ႛꩫ︀က︀ꩫ︀်ႈ က︀ꩫ︀်ႛꩫ︀ိူဝ်ၸ︀ိဝ်ꩫ︀မ︀်ႇမ︀ႆ︀ႛ ꩭႂ်ႛꩫ︀ႆ︀ႛၸ︀ႆ︀ၢႛမ︀ႃးတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီꩬ︀ွက︀်ႉဢ︀ူ။ 29မ︀ꩫ︀်းꩡ︀ဝ်ႛက︀ေႃႇ “ၸ︀ႆ︀ၢႛမ︀ႃးလ︀ႃး” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛ ပ︀ေတ︀ရ︀ုက︀ေႃႇ လ︀ုက︀်ႉꩭိူဝ်းမ︀ႆ︀ႛ ဢ︀ွက︀်င︀ႆ︀း က︀ꩫ︀်ႛꩫ︀ိူဝ်ၸ︀ိဝ်ꩫ︀မ︀်ႇမ︀ႆ︀ႛၸ︀ႆ︀ၢႛꩬ︀ီ က︀ႃꩡ︀ဝ်ႛယ︀ေꩬ︀ုဢ︀ူ။ 30ꩫ︀ႆ︀ႇꩫ︀က︀ေႃႇ လ︀ူမ︀်းꩭႅင︀်းꩫ︀ႆ︀ႇမ︀ႆ︀ႛ မ︀ꩫ︀်းꩭꩫ︀်က︀ီးက︀ူဝ်ႈꩬ︀ီ ꩫ︀င︀်တ︀ီꩡ︀ူမ︀်ႈလ︀ေႚလ︀ေႚꩫ︀က︀ꩫ︀်ႈပ︀ီꩫ︀်ႈက︀ႃဢ︀ူ။ ꩫ︀ႆ︀ႇမ︀ႆ︀ႛ ပ︀ေတ︀ရ︀ုက︀ေႃႇ က︀ူဝ်ႈꩰꩬ︀ွင︀်ꩰꩬ︀ီ “ꩡ︀ဝ်ႛꩴ︀း ၵ︀ေꩬ︀ေꩭႂ်ႛတ︀ီၵ︀ႃႛမ︀ႃးလ︀ႃး” ꩫ︀ꩬ︀ီဢ︀ိဝ်ဢ︀ူ။ 31ꩡ︀ဝ်ႛယ︀ေꩬ︀ုယ︀ႃႇ ၵ︀တ︀်ႉၵ︀ႅင︀်းမ︀ꩫ︀်းမ︀ႆ︀ႛဝၢမ︀်ႇၵ︀ွတ︀်ꩬ︀ီ “မ︀ႂ်းက︀ဝ်ႈမ︀ႆ︀ႛ မ︀ဝ်ယ︀ုမ︀်ယ︀မ︀်ႈꩫ︀ီႈꩫ︀ီႈꩥ︀ႃ။ ꩭီတ︀်က︀ꩬ︀င︀်ꩫ︀ႆ︀ က︀ဝ်ႈမ︀ႆ︀ႛမ︀ဝ်တ︀မ︀်းꩡ︀ႂ်ႈꩫ︀ႆ︀ႇ” ꩫ︀ဢ︀ူ။ 32ꩬ︀ွင︀်ၵ︀ႃꩡ︀ဝ်ႛတ︀င︀်းꩬ︀ွင︀် ၵ︀ိုꩫ︀်ႛက︀ꩫ︀်ႛꩫ︀ိူဝ်ꩭိူဝ်းက︀ီး လ︀ူမ︀်းꩫ︀ႆ︀ႇက︀ꩡ︀ူးယ︀ီꩫ︀်ႈက︀ႃဢ︀ူ။ 33ꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛဢ︀ꩫ︀်ႈက︀ꩫ︀်ႛꩫ︀ိူဝ်ꩭိူဝ်းꩫ︀ႆ︀ႇၵ︀ဝ်ယ︀ႃႇ “ၵ︀ိင︀်းတ︀ူဝ်ꩡ︀ဝ်ႛယ︀ႃႇ လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛတ︀ေႇတ︀ေႇတ︀ီၵ︀ႃႛꩫ︀မ︀်” ꩫ︀ꩬ︀ီမ︀ꩫ︀်းꩡ︀ဝ်ႛမ︀ႆ︀ႛ ပ︀ႆ︀ၢႛဝႆ︀ႈက︀ꩫ︀်ႈဢ︀ူ။
လ︀ွင︀်ႈၸ︀ူႛၵ︀ႆ︀ႛၸ︀ူႛꩡ︀ီပ︀် ဝီင︀်းက︀ရ︀တ︀ေꩫ︀ꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩫ︀ီႈꩭႂ်ႛ
(မ︀ႃက︀ု 6.53-56)
34ဝႆ︀ၢးဢ︀မ︀ႂ်းꩡ︀ဝ်ႛယ︀ေꩬ︀ု တ︀င︀်းတ︀ပ︀ေးꩡ︀ဝ်ႛၵ︀ဝ် က︀ၢပ︀်ꩬ︀ီက︀ႃက︀ီး ဝီင︀်းက︀ေꩫ︀ေတ︀ရ︀ႅတ︀် ဢ︀ꩫ︀်ႈၸ︀ၢက︀်ႉꩫ︀ွင︀်ပ︀ႃႛလ︀ိူင︀်ႈမ︀ႆ︀ႛ ထိုင︀်က︀ႃဢ︀ူ။ 35က︀ူꩫ︀်းဝီင︀်းဢ︀မ︀ႂ်းၵ︀ဝ် ꩡ︀ဝ်ႛယ︀ေꩬ︀ုမ︀ႆ︀ႛမ︀တ︀်ႉꩫ︀ႆ︀ႇꩬ︀ီ ၵ︀ဝ်ယ︀ႃႇ ၸ︀ူႛၵ︀ႆ︀ႛၸ︀ူႛꩡ︀ီပ︀် ဢ︀ꩫ︀်ႈတ︀ူင︀်ႈတ︀ၢင︀်ႇဢ︀မ︀ႂ်းမ︀ႆ︀ႛ ယ︀င︀်းꩫ︀ႆ︀ႇၵ︀ဝ်တ︀င︀်းမ︀ိူင︀်း တ︀ီႈမ︀ꩫ︀်းꩡ︀ဝ်ႛမ︀ႆ︀ႛ ꩭႂ်ႛဢ︀ဝ်ႈမ︀ႃးက︀ꩫ︀်ႈဢ︀ူ။ 36ၵ︀ဝ်ယ︀ႃႇ ꩭႂ်ႛပ︀ူဝ်းၸ︀ူႛၵ︀ႆ︀ႛꩫ︀ႆ︀ႇၵ︀ဝ် ꩬ︀ိူဝ်ႛလ︀ူင︀်မ︀ꩫ︀်းꩡ︀ဝ်ႛမ︀ႆ︀ႛꩫ︀ႆ︀ၢႈꩫ︀က︀ေႃႇ ꩫ︀ႆ︀ႛတ︀ႅတ︀်ႉꩫ︀ႆ︀ႇ မ︀ꩫ︀်းꩡ︀ဝ်ႛမ︀ႆ︀ႛ ဝွꩫ︀်းၵ︀ႅꩫ︀်းက︀ꩫ︀်ႈဢ︀ူ။ ၸ︀ူႛတ︀ႅတ︀်ႉꩬ︀ိူဝ်ႛလ︀ူင︀်မ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ် တ︀င︀်းမ︀ိူင︀်းက︀ေႃႇ ဢ︀ူꩫ︀ီႈက︀ႃဢ︀ူ။
Valið núna:
မ︀တ︀်တ︀ႄး 14: kht
Áherslumerki
Deildu
Afrita
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.