Matáyɔ 16
16
Ɓaphaisáyɔ na Ɓasadukáyɔ ɓáɔmɛma ketangaɔ ka Yéso
(Ɔna phɔtɔ Mkɔ 8.11-13; Lók 12.54-56)
1Ɓaphaisáyɔ na Ɓasadukáyɔ ɗáɓámbîmisi Yéso, ka tombaga akɛ. Ɓáɔmɛma gea, áephangiɛ mphangiɔ á ketangaɔ ka ubisa aɓɔ ɗoni gea, Mokonga aámbé anteki. 2Yéso â gǎkɛ ǒsikisia te: «Ɔgɔgɔ, ɓoogea mama, esa akoɗokanande ánjá nga, koba atani. 3Kamɓimba, ɓoogea: ‹Kesande mbua aɔkande nga, koba anjɛnjɛmani na akpangi índa.› Cɔ, ɓooúba engekisa etéte á koba, ɓókó gǎkɛ oúba engekisa mphangiɔ á matú! 4Ɓato á ɛɓɔkɔti nde ɓánde ɓato á ɓojeɗe, ɓato á kanga ɓeekea á Mokonga! Ɓɔ, ɓáɔmɛma ɔna á mphangiɔ á ketangaɔ. Cɔ, ɓákáɔnɛku gǎkɛ mphangiɔ nɛngbo na nna tɔndɔ nndɔ á Yɔ́na.» Mpɔ Yéso áǒɗeketa, áoga nɛkɛ.
Cacu ndea Ɓaphaisáyɔ na Ɓasadukáyɔ
(Ɔna phɔtɔ Mkɔ 8.14-21)
5Mbenɔ nde ɓagoigi ɗáɓájabi kubi á etǔ, ɗáɓáɓosei bɛɗa á mokati. 6Yéso áǒngoɗea te: «Óengani na cacu ndea Ɓaphaisáyɔ na Ɓasadukáyɔ.» 7Ɓagoigi ɓáɔyɔngaga ngǔngu aɓɔ gea: «Ayɔngi ɓo, ka nyɔngɔ nde ɓékébɛɗi mokati ee?» 8Yéso áoúba kanisia aɓɔ, áǒgea: «Eke nde ɓooianaga sɔsɔɓɛ anu gea: Ayɔngi ɓo, ka nyɔngɔ nde ɓéké na mokati ee? Ɓenu ɓato á ɓeekea ábɔa nde ca! 9Ɓókóengekisimbɛ mɔnɔ? Ɓókóokanisia mokati ɓɔku ndɔ ɓakpa ɛlɛphu ɓɔku (5.000) ɗáɓáí na mɔɔmba á jɔ nde ɗóɓotúmisi na due í?
10Ɓókó phɔtɔ okanisia mokati ngianjaga iɓɛ (7) ndɔ ɓǒko ɛlɛphu gena (4.000) ɗáɓáí, na mɔɔmba á jɔ nde ɗóɓotúmisi na due í? 11Eke nde ɓókóengekisa gea, ɗékétúɔyɔnga na ɓenu nyɔngɔ á mokati, mbenɔ ndɔ ɗénógi: Óengani na cacu ndea Ɓaphaisáyɔ na Ɓasadukáyɔ?» 12Mpɔ, ɓagoigi ɓáoengekisa gea, Yéso ɗákéngoɗi gea, ɓéɛnjiɛ na cacu nde ɓáɔɓɛɗanaga ně na mokati, a ndiu nyɔngɔ á ɓɔphɛi ndea Ɓaphaisáyɔ na Ɓasadukáyɔ.
Pɛ́tɛɛ ayɔngi base gea, Yéso ande Kiísito
(Ɔna phɔtɔ Mkɔ 8.27-30; Lók 9.18-21)
13Cɔ, Yéso áoga ka ntanga-nji á Kaisaíya-Philípi. Kó, áǒɓúsia ɓagoigi nɛkɛ te: «Ɓakpa ɓáɔyɔnga gea, Muna-Nkpa ande ani?» 14Ɓáonsikisia gea: «Ɓakpa ɓuangbo ɓáɔyɔnga gea, onde Yoáni-Mɓatisi, ɓuangbo, onde Elía, ɓuangbo, Yɛɛmía, ɓuangbo, onde ka ɓaɔtu-nyɔngɔ ndea Mokonga.» 15Mpɔ, Yéso áǒɓúsia: «Cɔ, ɓenu gǎkɛ, ɓogi te nende ani?» 16Simɔ́ni-Pɛ́tɛɛ áonsikisia: «Oɓɛ, onde Kiísito, Muna-Mokonga mmbé aoenda.»
17Yéso áongoɗea: «Maseye k'oɓɛ Simɔ́ Muna-Yɔ́na ka nyɔngɔ nde, nna nkpa aámbé akophangi nyɔngɔ nde base, a ndiu tɔ Abɛ mmbé á na koba. 18Eme neongoɗi gǎkɛ ɓe: Onde Pɛ́tɛɛ, na gǔ á ɛtɛ ndee, aunge nɛphɛkande kanisa nɛmɔ, ɓukpɛkpɛ á kukuwa kágeɛku ú na ka kema. 19Nekophande phembekete á koɓoamɛ á na koba. Kema bui nde oyánde ka mokonda, ɓáyánde ú na koba. Kema bui nde ooɓeekea ka mokonda, ɓáɓeekeande phɔtɔ ú na koba#Yoá 20.23.» 20Mpɔ áǒimisia ɓagoigi nɛkɛ akpɛ gea, ɓákangoɗeɛmbɛ mɔnɔ nkpa gea te, ande Kiísito.
Yéso aúbisi nyɔngɔ á kukuwa na jujúka akɛ
(Ɔna phɔtɔ Mkɔ 8.31—9.1; Lók 9.22-27)
21Ka mbenɔ ndɔ, Yéso áokpanga úbisa á ɓagoigi nɛkɛ base gea: «Akeni négɛ na Yɛusalɛ́ma na tambaga ka njaga á ɓagbɛga, ɓagbɛga á ɓatoɓeigi-phɛ́a na ɓaɗundu-ɛɔphi. Ɓámokusisande, esa á ko isaɔ, nejujukande ka kukuwa.» 22Mpɔ, Pɛ́tɛɛ áonga na Yéso ka mpɛphɛ, áokpanga phekeaga akɛ te: «Mɔkɔta, ambe Mokonga ákoambɛ, nyɔngɔ ndɔ katɔtɔkɛanɛmbɛ k'oɓɛ!» 23Yéso áǒpháia ka Pɛ́tɛɛ, áongea: «Já nɛkɔ mbusa ani, Sɛtáni nde ca! Onde ephiphi ájeɗe k'éme nga, kanisia akɔ nna ɓea Mokonga, a ndiu tɔ á kokpa.»
24Mpɔ Yéso áǒngoɗea ɓagoigi nɛkɛ: «Aoɓá nkpa n'akondi ɓeá ani, ěyɛ sisakɛ, ákumbɛ moyangɔ nɛkɛ, ámoɓeɛ. 25Ka nyɔngɔ nde, mmbé akondi amisa á enda akɛ, aɓúngisande. Mmbé a gǎkɛ oɓeekea ɓúngisa á enda akɛ ka nyɔngɔ ani, atɔande goto ú. 26Cɔ, ana kantíti sina aoɓá nkpa n'atɔi kema bubui á ka mokonda n'aɓúngisi ndiu enda akɛ, ɛtɔi ndɔ anengande k'éke? Ekende ɓɛɔtɔka na ɓemphendi na Mokonga ka anganisa na enda? 27Cɔ, Muna-Nkpa, abikande ka ɓophombia ndea Abɛ, kimoci na ɓamalaéka nɛkɛ. Mpɔ, amphendande nkpa na nkpa ka ɓeana na tambea akɛ#Ɔna Jab 62.13; Ɓlm 2.6. 28Nenóngoɗi ɗoni gea, ka ɓunde ɓá wani, ɓákákuwɛku mosá á ɔna á Muna-Nkpa, n'aobika ɓea Moamɛ.»
Valið núna:
Matáyɔ 16: KMW
Áherslumerki
Deildu
Afrita
Want to have your highlights saved across all your devices? Sign up or sign in
© 2021, Wycliffe Bible Translators, Inc.