मरकुस 16
16
येसु मर्रा जीवाते तेदमळ
(मत्तयाल 28:1-8; लूकाल 24:1-12; योहान 20:1-10)
1नोमकेमता रोजु मारतारित्ते, मगदलेनि नाटेना मरियम, याकोबुना यावल मरियम आनि सलोमि इव येसुना पीनगुंक होकालय, गमागमा गब्बु वायानव वस्तुक अस्तां. 2वारमता मोदाटा रोज अय्तारम हक्केरेने पोळ्दु पेय्सता पेय्सुळे बोंदातगा होत्तां. 3अव होननेंके, “अद बोंदक अड्डम दोसता बंडातुन मनाहाटीं बोर गुळाहनुर?” इंचि अवुनद अवे वळ्कसेक होत्तां. 4अगा एवसि हूळते, अच्चोन पेद्दा बंडा गूळसि मत्तद अवुंक दिसता. 5अव बोंदाते होळियतस्के वरोर लेय्या मनकल तेल्लाटा कपडिं केर्सि तिना बाजुंक उदिद्स मत्तद हूळसि अव वेरियतां. 6ओर अवुन इल्हा इत्तोर. “वेरियमट, क्रुसुनपोर्रो वेलाड वाट्सि हव्कता, आ नासरेत नाटेना येसुन मिमेट पह्कसेक मंतिट, ओर इग्गे हिल्लोर, जीवाते तेदतोर. इद हुळाट, ओना पीनगु इरता जेगा. 7ओर मीक वेहता परकारम, मीकन्ना मुन्नेने गालिल एरियाते होंचेक मंतोर, अदुनहाटीं मिमेट होंचि ओना सिस्युल्कुंक आनि पत्रुंक वेहाट, अगा ओर मीकु दिस्सानुर,” इत्तोर. 8अव मुर्ताह्क इरगा वेरियसि वनकालय दल्गतां. अदुनहाटीं अव बोंदातगाटाल पलाते पेय्सि विच्चि, आ वेर्रेक बोर्क बतल वेहा हिल्लें.
मगदलेनि नाटेना मरियमुंक येसु दिसंतोर
9वारमता मोदाटा रोज इत्ते अय्तारम रोज, येसु हामुरताल जीवाते तेदतोर. तेदता पजा मोट्टा मोदाला मगदलेनि नाटेना मरियमुंक दिसतोर. इदे मरियमुनगटाल एडुं देय्याल्कुन येसु गेदमिस मत्तोर. 10अद अगटाल पेय्सि, येसुनतोनि मत्ता सिस्युल्कुनगा होत्ता. ओर वेल्लेने दुक्कमते अळसेके मत्तुर, ओर्क येसुना बारेमते वेहता. 11येसु जीवाते तेदतोर, अद येसुन हूळता इत्ता पोल्लेतुन ओर केंजतुर गानि विस्वासम किया हिल्लुर. 12अद आता पजा, ओरा लोप्पोटाल इव्वुर येरुसलेमताल उंदि नार होंचेके मननेंके, ओर्क वेरे रूपमते येसु दिसतोर. 13ओर पज्जो मल्सि होंचि, कळमतोर्कुंक इद पोल्ले वेहतुर, गानि ओर ईरा पोल्लेन विस्वासम किया हिल्लुर.
येसु ओना सिस्युल्कुनतोनि वळकंतोर
(मत्तयाल 28:16-20; लूकाल 24:36-49; योहान 20:19-23; प्रेरितुल्कुना कबाह्क 1:6-8)
14पजा पदाकोंडु मंदि सिस्युल्कु उद्दिसि गाटो तिंचेके मननेंके येसु ओर्क दिसतोर. “नना जीवाते तेदतन इंचि वेल्लेटुर मीक वेहिनागानि मिमेट बारि विस्वासम किया हिल्लिर? मीवा मनसुक बंडालेसीं मारियतां,” इंचि तेराहतोर. 15पजा ओर्कु इल्हा वेहतोर. “मिमेट होंचि दुनियाता अन्नि देसेल्कुना लोकुल्कुंक बेसता कबुर प्रचार कीम्टु. 16बोर अय्ते विस्वासम कीसि, बापतिस्मा एतंतोर ओनके मुक्ति दोर्कंता, गानि बोर अय्ते विस्वासम किय्योर, ओनकु पेन सिक्साता आदेस हिय्यार. 17नाकुन विस्वासम कियानोनगा इव चिन्हां मनंतां, ओर नावा पोरोलते देय्याल्कुन गेदमानुर, वेरे-वेरे बासाने वळ्कानुर, 18तरासकुन पियानुर, बदे विसम वस्तु उनिनागानि ओर्क बतल आयो, बिमार्क मत्तुरा पोर्रो ओरा कय्क इरते, ओर बेस आयानुर,” इंचि वेहतोर.
येसु स्वर्गमते होनमळ
(लूकाल 24:50-53; प्रेरितुल्कुना कबाह्क 1:9-11)
19येसु सामि ओना सिस्युल्कुनतोनि इव पोल्लें वेहता पजा, पेन ओन स्वर्गमते तेहकुत्ता. अस्के ओर दाना तिना बाजुंक उद्तोर. 20पजा येसुना सिस्युल्कु नालुं-मूलां होंचि अन्नि जेगाने ओना बारेमते प्रचार कीतुर. सामि ओरतोनि मंचेके कबळ कियुंदुर. कबळ कियनेंके जर्गना चिन्हाना हेंदाल सामि ओना पोल्ले निजम इंचि रुजुव कियुंदुर. आमेन.#16:20 इद वचनम कोन्नि पांडु लिपिने हिल्ले.
Valið núna:
मरकुस 16: esg-Deva
Áherslumerki
Deildu
Afrita
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.