लूकाल 4
4
पेद्दा देय्यम येसुना परिक्सा येतंता
(मत्तयाल 4:1-11; मरकुस 1:12-13)
1पजा येसु योर्दन बेरेटाल बापतिस्मा एतसि पवित्र आत्माते निंडतस्के, पेनदा आत्मा ओन बय्लि जेगाते पीसि ओता. 2अगा नल्पै रोजकुनदाका पेद्दा देय्यम ओना पट्टु हूळता. अव रोजकुने येसु बतले तिना हिल्लोर. अदुनहाटीं अव रोजकु मारतस्के येसुंक इरगा कर्वेस्ता.
3अस्के पेद्दा देय्यम ओनगा वासि, “ओक्कला निमे पेनदा मर्रिन आते ई बंडां हारिं आयिं इंचि आदेस हीम,” इंचि ओन इत्ता. 4इत्तस्के,
“मनकल सिराप वट्टि हारिं तिंचे पिस्सोर,
गानि पेनदा तोळ्दाल पेय्सना, उंदि-उंदि पोल्लेताहेंदाल पिस्संतोर.
इल्हा दर्मसास्त्रमते रासि मंता,”#व्यवस्ताविवरन 8:3 इंचि येसु दान्क जवाब हीतोर.
5पजा पेद्दा देय्यम येसुन उंदि एत्तु जेगाते पीसि ओसि, उंदे मल्का दुनियाता अन्नि राज्येल्क हुपिस्ता. 6हुपिच्चि, “इव अन्नि राज्येल्कुनपोर्रो अदिकारम आनि अवुना पेद्दातनम नीकु हींतन. बारित्ते अव अन्नि राज्येल्क नाके हियमळ जर्गता. नना इद अदिकारम बोन्क इत्ते ओन्क हिया परांतन. 7अदुनहाटीं, निमे नावा काल्क मोळ्कानय्ते इव अन्नि नीवांगें आंतां,” इंचि पेद्दा देय्यम इत्ता. 8अस्के,
“निमे नीवा पेनदुने मोळ्कना, सिराप दानादे सेवा कियना,#व्यवस्ताविवरन 6:13
इल्हा दर्मसास्त्रमते रासि मंता,”
इंचि येसु दान इत्तोर.
9आयंका पेद्दा देय्यम येरुसलेमते मनना गुळितगा येसुन ओसि, गुळि पोर्रो कोस्सक निल्हाचि इल्हा इत्ता, ओक्कला निमे पेनदा मर्रिन आते हिळु दुनका. 10बारित्ते,
“नीकुन कापाळालय पेन दाना दूतांक आदेस हींता,
आनि आ दूतां वासि, नीवा काल्कुंक देब्बां दल्गामन्नि इंचि,
नीकुन पोर्रोटद पोर्रेन अंदकुंतां, 11इल्हा दर्मसास्त्रमते रासि मंता.”#बजन संहिता 91:11-12
12अस्के येसु दान्क इल्हा जवाब हीतोर.
“निमे सामि इनना नीवा पेनदा पट्टु हूळमा, इल्हागुडा वेहतद मंता.”#व्यवस्ताविवरन 6:16
13इल्हा पेद्दा देय्यम अन्नि तीरुकुने येसुना पट्टु हूळतारित्ते, दान्क इंकुंदि मोका दोर्कनदाका ओन होळसि होत्ता.
येसु सेवा कबळ सुरुव कींतोर
(मत्तयाल 4:12-17; मरकुस 1:14-15)
14पजा येसु पवित्र आत्माता ताकतते निंडसि गालिल एरियाते वापस वातोर, अस्के गालिल एरियाता अन्नि नाहकुनोर ओना बारेमतेन वळ्कुंदुर. 15येसु ओरा दर्मसास्त्रम कराहना लोह्कुने होंचि पेनदा पोल्लें करहुंदुर. अंटोर ओन बेस कराहंतोर इंचि कदर हिय्युंदुर.
येसुन ओना नाटेनोर हय्सा हिल्लुर
(मत्तयाल 13:53-58; मरकुस 6:1-6)
16पजा येसु सिन्नास्केटाल बेर्सता नार नासरेतते होत्तोर. वारमता नोमकेम रोजुने ओना अलवट परकारम दर्मसास्त्रम कराहना लोते होंचि, दर्मसास्त्रम हदवालय निततोर. 17अस्के यसायाह इनना पेनदा कबुरतोर रासता पुस्तकम ओन्क हीतुर. ओर आ पुस्तकमते उंदि पोल्ले दोर्किच्चि, इल्हा हदवालय सुरुव कीतोर:
18“पेनदा पवित्र सेवक इल्हा वेहचंतोर, पेनदा आत्मा नावापोर्रो वाता.
गरिबोर्कुंक बेसता कबुर वेहालय, पेन नाकुन अबिसेकम कीता.
दोहचि वाटसि ओतोर्कुन, पेन होळसीता इंचि वेहालय,
गुड्डोर्कुन, मिमेट हूळंतिर इंचि वेहालय,
तकलिपते मनानोर्कुन, तकलिपताल तेंडालय,
19पेन दया कियना वेला एव्ता, इंचि वेहालय नाकुन लोहता.”#यसायाह 61:1-2; 58:6
इल्हा रासि मत्तदुन हदुवतोर.
20हदुवमळ आतारित्ते, पुस्तकमतुन बंद कीसि वरोर चपरासिंक हीसि कराहलय येसु हिळु उदुतोर. आ दर्मसास्त्रम कराहना लोते मत्ता अंटोरा नदर ओनहेकेन मत्ता. 21अस्के, “इय्याला मिमेट केंजतव दर्मसास्त्रमता पोल्लें, मीवा मुन्ने नावा कयदाल पूरा आतां,” इंचि येसु ओर्कुन इत्तोर.
22“ओर बेस वेहतोर, बेस-बेसतां पोल्लें ओना तोळ्दाल पेय्सुंदुं,” इंचेके ओर अंटोर इचंत्रम आतुर. आसि ओर, “ईर अय्ते योसेपुना मर्रे गदा?” इंचि इत्तुर.
23अस्के येसु ओर्कुन इल्हा इत्तोर, “‘मत्तु हियानोना! नीवद निमेने बेस कीस हुप्सा,’ इंचि उंदि सात्रम मत्ताप, मिमेट इंका नाकुन तप्पाकोंटा इंतिर, इत्ते, ‘कपर्नाहुमते निमे कीता अद्बूताल्कुना बारेमते मोमोट केंजतोम, अव अद्बूताल्क नीवा संतम नाटेनेगुडा कीम,’ इंचि इंतिर. 24नना मीकु निजम वेहांतन, बोरे पेनदा कबुरतोंक आयि, ओना नाटेनेन ओन्क कदर मन्नो. 25अद बल्हा इत्ते, पेनदा कबुरतोर एलियाहना#4:25 एलियाह एलिया इनना पेनदा कबुरतोर येसुंकन्ना 850 वर्सां मुन्ने मत्तोर. कालमते बतल जर्गुता मीकु एर्केना? अस्के पूरा देसेमते मूड वर्सां हारुं नेल्कुनदाका पिर्रु वाया हिल्ले, अदुनहाटीं वेल्ले कर्वु अर्सि मत्ता. नना मीकु निजम वेहांतन, अद वेलाते इस्राएल देसेमते वेल्लेने मुंडामोस्ता मुर्ताह्क मत्तां. 26गानि बदे मुंडामोस्ता मुरतटगा सहायम कियनाहाटीं पेन एलियान लोहा हिल्ले. ओन सिराप सिदोन सहर दग्गेटा सारपत नाटेना वेरे जातिता मुंडामोस्ता मुरतटगा लोहता.#1 राजा 17 27अल्हेने पेनदा कबुरतोर एलिसाना#4:27 पेनदा कबुरतोर एलिसाना एलियाल होत्तंका ओना जेगाते एलिसा इनना पेनदा कबुरतोर पेनदा कबुर वेहना कबळ कियुंदुर. कालमते इंका कुस्टरोगम आतोर इस्राएल देसेमते वेल्लेटुरे मत्तुर. गानि ओराव्टेटाल वरोन इंका बेस कियालय पेन एलिसान लोहा हिल्ले. सिराप सिरिया देसेमता नामान इनानोने बेस कीतोर,#2 राजा 5:1-14 इल्हा बोरे पेनदा कबुरतोंक आयि, ओना नाटेनेन ओन्क कदर मन्नो,” इंचि वेहतोर.
28इस्राएल लोकुल्कुन होळसि, वेरे देसेमता लोकुल्कुन पेन सहायम कीता इंचि येसु वेहतस्के, दर्मसास्त्रम कराहना लोते उदिस मत्तोर अंटोर्क इरगा होंग वाता. 29होंग वातस्के ओर तेदसि, येसुन ओरा नाटेनाल पलाते गुंजिस ओतुर. ओरा नार उंदि गुट्टापोर्रो मत्ता. येसुन गुट्टा पोर्रोटाल दोब्बिसि हियालय एत्तु मत्तगा ओतुर. 30गानि येसु ओरा नड्डुमताल पेय्सि होत्तोर.
देय्यम पीतोन येसु बेस कींतोर
(मरकुस 1:21-28)
31अगटाल येसु ओना सिस्युल्कुनतोनि गालिल एरियाता कपर्नाहुम#4:31 कपर्नाहुम कपर्नाहुम नार नासरेत नाटुक मुप्पै किलोमिटर लक्कु मंता. अद गालिल सेरवुना ओड्डुनपोर्रो मंता. नाटे होत्तोर. अगा वारमता नोमकेम रोजुननाड पेनदा पोल्लें कराहमळ सुरुव कीतोर. 32ओर इच्चोन अदिकारमते करहुंदुर गदा, ओना कराहमळतुन केंजसि लोकुल्क इचंत्रम आतुर. 33अगा दर्मसास्त्रम कराहना लोते वरोर देय्यम पीता मनकल मत्तोर. ओर येसुन हूळसि जोरते वरगेयसि केयतोर, 34“ए नासरेत नाटेना येसु! मातोनि नीकु बाता कबळ? माकुन नासडेम कियालय वातिना? निमे बोन आंदिनो नाक एरपाटे, निमे नासरेत सहरता येसुन, पेनदा पवित्र मनकन आंदिन,” इत्तोर. 35अस्के येसु ओनालोप्पो मत्ता देय्यमतुन, “चुपचाप मन! ओनागटाल पलाते पेय्सा,” इंचि गदरिचतोर. अस्के, अद ओन हिळु अरहचि, ओन्क बतले नोप्पि कियाकोंटा, ओना लोप्पोटाल पेय्सि होत्ता.
36अगा मत्तोर लोकुल्क इचंत्रम आसि, वरोंक-वरोर वळकालय दल्गतुर, “इद बसोंटा पोल्ले आंदु? ओर अदिकारमते, ताकतते देय्याल्कुंक आदेस हींतोर, अव पेय्सि दांतां!” इंचि इत्तुर. 37इल्हा येसुना पोल्लें सुट्टु-मट्टु मत्ता अन्नि नाह्कुने तेळियसि होत्ता.
येसु उंदि बिमार मुरताटुन बेस कींतोर
(मत्तयाल 8:14-15; मरकुस 1:29-31)
38येसु दर्मसास्त्रम कराहना लोताल पेय्सि सिमोन इननोना लोन होत्तोर. अगा सिमोनुना पोरळकु बागा एळकि वासि मत्ता. दाना एडकितुन बेस कियालय ओर येसुन विनंति कीतुर. 39अस्के येसु दाना दग्गेरा नित्तिसि एडकितुन गदरिचतस्के दाना एळकि रेय्ता. पजा अद बिराना तेदसि, ओरा सेवा कियालय दल्गता.
येसुनाहेंदाल वेल्लेटुर बेस आतुर
(मत्तयाल 8:16-17; मरकुस 1:32-34)
40पजा पोळ्द होनना वेलाक तीरतीरकुना बिमार्क मत्तोर्कुन लोकुल्क ओनगा पीसि वातुर. अस्के येसु वरोन-वरोनपोर्रो कय इरसि, ओर्कुन बेस कीतोर.#4:40 नोमकेम रोजुने यहुदिल्कु बतले कबळ कियाकोंदुर, पय्नेम होनाकोंदुर. सनेरम पोळ्द होतस्के नोमकेम रोज मारुंदु. अदुनहाटीं पोळ्द होंचि बिमारकुनोर्कुन येसुनगा तत्तुर. 41वेल्लेटोर्कुन देय्याल्क पीसि मत्तां. अव देय्याल्कुन येसु गद्दरिच्चि पेचाहतोर. देय्याल्क ओरागटाल पेय्सनेंके, येसु किरिस्तु आंदुर इंचि एरपाट कीसि, “निमे पेनदा मर्रिन आंदिन” इंचेके जोरते वरगेयसेके पेय्सुंदुं. गानि येसे किरिस्तु आंदुर इंचि अव एरपाट कियुंदुं इंचि येसु अवुन वळ्का हिया हिल्लोर.
येसु वेरे-वेरे नाह्कुने दांतोर
(मरकुस 1:35-39)
42पंगातस्के येसु, नाटुन होळसि बोरे हिल्वगा ओंटिगा होत्तोर. गानि लोकुल्क ओन पह्किसि-पह्किसि दोर्किच्चि, निमे माकुन होळसि होनमा इंचि आपालय हूळतुर. 43गानि येसु ओर्कुन इल्हा इत्तोर. “पेन मनकालोरगा राज्येम कियना बेसता कबुरतुन नाकु वेरे नाह्कुने इंका वेहा पींता. इदे कबळताहाटीं पेन नाकुन लोहता,” इत्तोर. 44पजा येसु, यहुदिया एरियाते यहुदिल्कुना दर्मसास्त्रम कराहना लोहकुने होंचि पेनदा पोल्लें वेहुंदुर.
Valið núna:
लूकाल 4: esg-Deva
Áherslumerki
Deildu
Afrita
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
