Matìyò Ayiə yə a də nəniy fə anə ŋwàʼà kə̀
Ayiə yə a də nəniy fə anə ŋwàʼà kə̀
Ntwùm ìdzòŋə̀ yə̀ Matìyò kə twâ nəniy ì dzìy bə̀ ntwùm ìdzòŋə̀ yìy nə̀ Yesù də̌ wù wə̀ Zə̀kìy kə tɛb na nə̀ ù bù bii fyi aghû, toŋə wù wə Zə̀kìy zəŋə nəniy nə̀ utɛb wə ù kə tɛb na nəniy anə ŋkà mə̀ wîy mìy nə̀ u bû fyi ùsòŋə̀ wìy abidzəmə̀ we. Ntwùm ìdzòŋə̀ yə̀ kə kaʼi wày təŋ dzə awò aghě Dzû, ì kwuni də̀ sòʼò awò aghě mbyi yə àdzə̀m.
Ŋwàʼà kə Matìyò kə̀ tòʼò byay dòʼò dzwàb ŋwò. Kə kaʼ tsə ani tyi dè bə̀ yəə ghu kə byi Yesù ate, tyi dè bə̀ yəə ù kə nîy nəniy mwi m-à-zə̀ mìy ate, nə̀ ìmwàmkòʼ yə̀ ù kə kəli nəniy, bù kaʼ tsə fàʼ kə we ani nàʼà ntwum, tyi dè sòʼò ayiə, zəŋə taw sòʼò àghù anə inaʼ i Galìlî. Abù ì yîy mày tsə, u twà tswi bə̀ ìbwìy i Yesù ani ŋwò tsə a Galìlî zù a Yèlusalèm nə̀ àyiə yə ù kə zəŋi anə ivən yə ù kə doʼò gwùŋì fə anə mbyi, nə̀ ìfii yə ù kə fii nəniy, nə̀ yəə ghu kə baa nəniy we anə kàʼ fə təzəd, nə̀ yəə ù kə zɛmə̀ dzwoŋi bə̂ nəniy ani ipfə.
Ntwùm ìdzòŋə̀ yə̀ dè bə̀ nə̀ Yesù də̌ Àtyidè ùsoŋə̀ wìy, ù kwu nəniy daʼa kiy ani tòʼò kyèmì dzày bə̀ ùlàŋ u Kəzə̀, ù tyi dê soʼò nəniy ayiə yiy kwùmə̀ yə̀ nə̀ yəə Zə̀kìy saʼa nəniy aghe we yiy ate. Ayiə yə ù kə tyi dê nəniy a doʼò nyi yə̀ anə utuw ayiə u tà. Tuw kə iyiə kə səsə kiy dê bə̀ ùmwamə wə aghê kwu ani kəli ani zù a lòʼo kə Zə̀kìy saʼa nəniy ate nə̀ àyiə yə a nî fyiə nə̀ ghu. (Ubə̂d ù 5-7) 2 Tuw kə iyiə kə̀ liy kə kə dzwumə̀ bə̂, kə kwumə̀ yə̀ nə̀ fàʼ kə tsə̀təndii tə Yesù tə̀ ìvəm nə̀ ghe tiy ibè. (Ubə̂d u 10). 3 Tuw kə iyiə kə̀ liy kə kə dzwumə̀ bə̂ kə kwumə̀ yə̀ nə̀ nzə̀zə̌ mə ìn dê bə̂ yəə Zə̀kìy saʼa nəniy ate an-a-vələ (Ubə̂d u 13) 4. Ityidè yə̀ ù kə nyiə̀ kùmə̀ yə̀ nə̀ fyiə kə kə myiŋə̀ ani zəŋi tsə aghù nə̀ ghu doʼò tsə̀təndii (ubə̂d u 18) nə̀ 5. Ityidè yə̀ ù kə nyiə̀, i kwumə̀ yə̂ nə̀ yəə Kə̀litò nì bè dzwəŋə nəniy ate nə̀ yəə mbyi nî mìy nəniy ate, nə̀ yəə Zə̀kìy nî kaʼa yə̂ ani saʼ ate (ubə̂d u 24-25).
Ŋwàʼà kə̀ byay dòʼò aghii
Nə̀ tě Yesù nə̀ yəə ghu kə byi Yesù ate 1.1–2.23
Fàʼ kə Dzwan wə ù kə nyiə̀ mwi m-à-zə̀ mìy 3.1-12
Yəə Yesù kə nîy nəniy mwi m-à-zə̀ mìy ate, nə̀ yəə Satàn kə mwâmkòʼ nəniy we ate 3.13–4.11
Fàʼ kə Yesù a Galìlî 4.12–18.35
Fàʼ kə Yesù a Galìlî nə̀ anə inaʼ i Yèlusalèm 19.1–20.34
Ntsukə mə̀ ìm bàm mə̀ Yesù kə doʼò gwùŋì tsə nəniy ate akə̀lə̀ Yèlusalèm nə̀ anə inaʼ i Yèlusalèm 21.1–27.66
Izɛmə̀ dzwoŋi nə̀ ayiə yə Mwe ə̀ mbyi bû dê bə̂ nəniy uwee wiy ate 28.1-20.
Áherslumerki
Deildu
Afrita
Want to have your highlights saved across all your devices? Sign up or sign in
© CABTAL 2023