ማ̈ቶ̈ሳ 5
5
ዬሱ̈ሲ ኢንዳ̇ ጋልዳ ኬስካ̇ሪ ታማ̈ርሲኖ ቲሚርታ̇
ሉቃ̈ሳ 6፡20-23
1ዬሱ̈ሲ ዎይሊን ዎርዣ ሺ̈ቂኖ ቤቃ̇ሪ፥ ኢንዳ̇ ጋልዳ ኬስካ̇ር ዶኢዴ። ኢ ታማ̈ራንር ኢ̈ክ ዬይን፥ 2ኢ ኢንታ̇ ዪዝ ጌይ ታማ̈ርሲ ኤ̈̇ዴ።
3ፌ̈ብ ኮሺ̇ዝ ባዝ ዎይ̈ቦ ጾ̈ሳ̇̇̈ባር ኣማ̇ኒንቲ̇ዛን፥
ጾ̈ሳ̇̇ ካ̈ቲቲን ኢንቴይ ማ̈ቂኖኮታ̇ቦ ኢንቲ̇ ኣንጂንቲኖን። 4ኣዛ̇ኒዛን ጾ̈ሳ̇̇ ኢንታ̇ ሚን̈ዛኮታ̇ቦ፥
ኢንቲ̇ ኣንጂንቲኖን። 5ፌ̈ና ዪርክ ዪርክ ዎቲዛን፥
ሳ̈ዚ ዎይ ኢንቴ̇ይ ማ̈ቂ̇ዛኮታ̇̇̇ቦ ኣንጂንቲ̇ኖን።
6ኣሲ ፊ̈ሻብ ጋፍሲንታ̇ዚንዲፌ̈ንኬ ዋ̈ብ ባ̈ርሲንታ̇ዚንዲፌ̈ኒ ጾ̈ሳ̇̇ ቲ̈ን ጺላ̇ ባዝ ኦ̈ንዳ ኮዪዛን፥
ጾ̈ሲ̇ ኢንታ̇ ሚሺ̇ዛኮታ̇ቦ ኢንቲ̇ ኣንጂንቲ̇ኖን፥ 7ኣስ ማ̈ሪዛን፥
ጾ̈ሳ̇̇ ቲ̈ናፖ̇ ማ̈ሪቲ ዲጚዛኮታ̇ቦ ኢንቲ̇ ኣንጂንቲ̇ኖን።
8ቡ̈ዳ ጌ̈ሽ ማ̈ቂ̇ኖን፥
ኢንቲ̇ ጾ̈ሳ̇̇ ቤቂ̇ዛኮታ̇ቦ ኣንጂንቲኖን። 9ኣስ ኢጊንዛን፥
ኢንቲ̇ ጾ̈ሳ̇̇ ናኤ ጌዪ ጼይጊንቲ̇ዛኮታ̇ቦ ኣንጂንቲኖን፥
10ጺሊ̇ቲኮታ̇ቦ ጋ̈ሪ ዳኪንቲ̇ዛን፥
ጾ̈ሳ̇̇ ካ̈ቲቲን ኢንቴ̇ይ ማ̈ቂ̇ኖኮታ̇ቦ ኢንቲ̇ ኣንጂንቲኖን።
11“ቴ ጊሻ̇ቦ ጋ̈ሪ ኣሳን ዪንታ̇ ቆ̈ምባራ ዎይ ዪንታ̇ ዳካ̇ምባራ ኢ̈ታ ባዝ ዎይባራ ማቃባር ዪንታ̇ ሱም ኢ̈ሳ̇ምባራ ዪንቲ̇ ኡፋይቲ̇ብቴ̇። 12ኣፋ ጾ̈ሳ̇̇ ቲ̈ን ዪንቲ̇ ኤካ̇ዝ ጋቲን ጴች ማ̈ቂ̇ኖኮታ̇ቦ ጴች ኡፋይቲ̇ብቴ̇። ኣባ ጌይንዶ̇፥ ዪንታ̇ፖ ቲ̈ን ዎ ናባን ዪንታ̇ፌ̈ን ዳኪንቲ̇ ሜታ ኤኪ̇ኔ”
ማጺናኬ ፎኢንኬ ሚሳ̈̇ሊ
ማ̈ርቆ̈ሳ 9፡50፤ ሉቃ̈ሳ 14፡34-35
13“ዪንቲ̇ ኣሳቦ ማጺናፌ̈ኔ። ማጺኖ ፌ ቃ̈ን ኣሼጌይን ዎዛ̈ርታ̇ር ኢያ ማሂ ቃ̈ጺሳንዳ̇ ዳንዳኢ̈ራ? ዛ̈ና ቶጚን ኣሳ ቶህባራ ዬንቲ̈ርዶኬ ዎሃ ኣባካባር ማ̈ዲባ̈ሴ።
14“ዪንቲ̇ ኣሳቦ ፎኢንፌ̈ኔ። ኢንዳ ጋልዳ ዎ ካታሚን ጌ̈ሚታንዳብ ዳንዳኣባሴ። 15ኣሲ ፎኢን ፎ̈ኢሳሪ ኣ̈ል ዎ ኣሳ̈ብ ዎይ ፎ̈ኣምፔ̈ኒ ሾካ̇ ቤስ̇ ጋልዳ ጋዲ̇̈ርዶኬ ኦት ጋርታ̇ ጋዲባ̈ሴ። 16ዪና̇ ኢዝፌ̈ን ዪንታ̇ ኮሽ ኦ̈ሲን ኣሳን ቤቃ̇ሪ ኣፋ ዎ ዪንታ̇ ባ̈ባ̈ ቦንቻ̇ምፔ̈ኒ ዪንታ̇ ፎኢንንዳ̇ ኣሳ ቲ̈ን ፎ̈ኦጋ̈ቤ።
ዬሱ̈ሲ ሙ̈ሶ ሂጊ̇ን ጎይ ታማ̈ርሲ̇ዴ
17“ታ̈ኒ ሙ̈ሶ ሂጊ̇ንዲኬ ናባን ቲሚርቲ̇ን ጳይሳ̇ንዳብ ዬይኖ ዪንታ̇ብ ማይጻፖ̇። ቴ ዬይኖንዳ̇ ኢዞ ፎታንዳብዶኬ ይሳ̇ንዳብ ዬ̈ካ̇ዬ። 18ቴ ዪንታ̇ክ ኪን ጋ̈ሬ፥ ኣፎ ሳ̈ዚንዲኬ ሳ̈ዶ̇ ሳ̈ዚን ዪዝ ዲራ̈ስ ሂጋ̇ ዎይ ፎቲንቲ̇̈ርዶኬ ሂጊ̇ን ጋልዳፖ̇ ፔቲ̇ ቃ̈ላ ዎይ ፔቲ̇ ፊዳላር ዪባ̈ሴ። 19ዪ̈ኮታ̇ቦ ዪን ሂጋ̇ን ጋርታ̇ፖ̇ ሜላ ኣቲ̇ን ጊሊ̇ምቦ̇ ኪ̈ቲንታ̇ካ̇ይ ኣታ̇ሪ ማ ሜላንር ኪ̈ቲንታ̇ካ̇ይፌ̈ን ታማ̈ርሲዝ ኣሲ ኦ̈ናካር ጾ̈ሳ̇̇ ካ̈ቲቲን ጋርታ̇ ጊላ̇ ኣስ ማ̈ቂ̇̈ሬ። ዪን ሂጋ̇ን ፌ̈ባር ኪ̈ቲንቲ̇ ሜላንር ኪ̈ቲንታ̇ምፔ̈ን ዎቲዝ ኣሲ ኦ̈ናካር ጾ̈ሳ̇̇ ካ̈ቲቲን ጋርታ̇ ጴች ኣስ ጌይንቲ̈ሬ። 20ዪ̈ኮታ̇ቦ ዪንታ̇ ጺሊ̇ቲንዳ̇ ሙ̈ሶ ሂጋ̇ ታማ̈ርሲዛንፕኬ ፋራሳ̈ዋንፖ̇ ሺካ̇ይ ኣቴ̇ጌይንዶ̇ ዪንቲ̇ ጾ̈ሳ̇̇ ካ̈ቲቲን ጋርታ̇ ዉርሲ ጌሊባ̈ሶን ቴ ዪንታ̇ብ ሶ̈ላ̈ሬ።
21“ሚኖ ኣሳንቦ ‘ኣስ ዎፒ̇ቴ፥ ኣስ ዎኖ ኣሲ ፊርዲንቲ̇̈ሬ’ ጌይኖን ዪንቲ̇ ሲስኪ̇ኔ። 22ቴ ዪንታ̇ክ ጋ̈ዚንዳ̇፥ ፌ ኢሻ [ሜላ̇] ጎይሊዝ ኣሲ ዎይ ፊርዲንቲ̇̈ሬ፥ ማ ፌ ኢሻ̈ኮ “ዓ ፋባ̈ሶ̈ዲ” ጌዪ ቆ̈ዛ̈ዲ ኣሳ ቲ̈ን ፊርዳብ ሺ̈ቂ̇̈ሬ፥ ማ ፌ ኢሻኮ “ዓ ዱላ̇̇ዲ” ጌይዝ ኣሲ ሜናብ ቴይቂ̇ባ̈ሶ ታማ ጋርታ̇ ጌሊ̈ሬ። 23“ዪ̈ኮታ̇ቦ፥ ኔ̈ኒ ጾ̈ሳ̇̇̈ቦ ዣ̈ርሽ ኢማ̇ርዶራ ኣሲ ኔ ጋል ሺን̇ ጌይኖ ባዝ ኔ̈ክ ኤልቅ ጌዬጌይንዶ̇፥ 24ኔ ዣ̈ርሺን ዣ̈ርሻ ቤሲ̇ን ጋልዳ ኢና ታክ̇ ኣሻ̇ ሉካ̇ራ ቲ̈ን ና̈ሳባር ኢጊንታ̇ቤ፥ ኢናፖ̇ ማ̈ቃ̇ ዬ̈ራ ኔ ዣ̈ርሺ̇ን ኢማ̇ቤ።
25“ጻላ̈ታ ኔ̈ና ሞ̈ታር ፊርዳ ኣ̈ል ኤኪ̇ ሉካ̇ምባራ ኔ ጎይም ጋልዳ̇ዶ̈ራ ቲ̈ኒታር ኢባር ኢጊንታ̇ቤ። ኔ ዪኖ̇ ዎታ̇ካ̇ይ ኣቴ̇ጌይንዶ̇ ና̈ሳ ኔ̈ና ዳይናብ ኣ̈̈ሬ፥ ዳይና̈ዲ ኔ̈ና ፖ̈ሊሳብ ኣ̈ ኢሚ̇̈ሬ፥ ኢያር ኔ̈ና ቃሺ ኣ̈ል ጌሊሲ̈ሬ። 26ቴ ኔ̈ክ ኪን ጋ̈ሬ፥ ዳይና ኔ̈ና ጪጎ̇ ጌይ ፊርዲኖን ፔቲ̇ ባካ̇ናር ኣታ̇ካይ ዎይ ጪጋ̇ ዉርሲዝ ዲራ̈ስ ኔ ኢናፖ̇ ኬስካ̇ባሴ።
ኦሎላ ጋዳ̇ንዳብ ኮሺባ̈ሴ
27“ ‘ኦሎላ ጋዳፒ̇ቴ’ ጌይኖን ዪንቲ̇ ሲስኪ̇ኔ። 28ቴ ዪንታ̇ክ ጋ̈ዚንዳ፥ ማጫ̇ ቤቃ̇ሪ ኢኒ̇ቲኖ ኣሲ ዎይ ፌ ቡ̈ዳባራ ኢዝባራ ሱርቂ̇ኔ። 29ኔ ኣ̈ፍ ኡሻቺ̇ን ኔ̈ና ናጋራ ኦ̈ሳ̈ርኮ፥ ኔ ኢዞ ዎ̈ጫ ኬሳ̇ ፋይቤ። ኔ ኣሲቲን ዎይ ሜናብ ቴይቂ̇ባ̈ሶ ታማ ጋርታ̇ ጌላናፖ̇ ኔ ጋሊ̇ን ጋልዳፖ̇ ፔታ̇ኒንዳ̇ ያዚን ኔ̈ብ ኮሼ̇። 30ኔ ኩሽ ኡሻቺ̇ን ኔ̈ና ናጋራ ኦ̈ሳ̈ርኮ፥ ኔ ኢዞ ቃጻ̇ር ቶጛቤ። ኔ ኣሲቲን ዎይ ሜናብ ቴይቂ̇ባ̈ሶ ታማ ጋርታ̇ ጌላናፖ̇ ኔ ጋሊ̇ን ጋልዳፖ̇ ፔታ̇ኒንዳ̇ ያዚን ኔ̈ብ ኮሼ̇።
31“ ‘ፌ ማጪ̇ን ኬሲ̇ዝ ኣሲ ዎይ ኢ ኢዞ ኣሺ̇ኖን ኤርሲዝ ፊርማ ኢዝቦ ኢሞ̇ጋ̈ቤ’ ጌይኖን ዪንቲ̇ ሲስኪ̇ኔ። 32ቴ ዪንታ̇ክ ጋ̈ዚንዳ ፌ ማጪ̇ን ኢዛ ኣሳባር ሱርቃ̈ካ̇ይዶ̈ን ሜላ̇ ዓሪ ኢዞ ኬሲ̇ዝ ኣሲ ዎይ ኣሲንዶ̇ ኦሎላ ጋዲ̇ዝ ኣስ ማሂ̈ሬ፥ ማ ኢዞ ኤኪ̇ዝ ኣሲ ዎይ ኦሎላ ጋዲ̇ኖ ማ̈ቂ̇̈ሬ።
33“ማ ሚኖ ኣሳንኮ ‘ዎርዳ ጫ̈ቃፔ፥ ማ ጾ̈ሳ̇̇̈ቦ ጫ̈ቂ̇ኖ ጫ̈ቂን ፎታካ̇ይ ኣሻፔ̇’ ጌይኖን ሲስኪ̇ኔ። 34ቴ ዪንታ̇ክ ጋ̈ዚንዳ፥ ዪንቲ̇ ዉርሲ ጫ̈ቃፒ̇ቴ፤ ኣፎ ጪሊንዳ̇ ጾ̈ሳ̇̇ ዶኢዝ ዙፋና ማቂኖኮታ̇ቦ ጭሊ̇ምባር ጫ̈ቃፒ̇ቴ፥ 35ሳ̈ዶ ሳ̈ዚንባራር ማ̈ቂ̇ን ጫ̈ቃፒ̇ቴ፥ ሳ̈ዶ̇ ሳ̈ዚንዳ̇ ጾ̈ሳ̇̇ ቶሂን ሼምፒ̇ዝ ቤሴ̇። ዬሩሳ̈ላም ካታሚንባራር ማ̈ቂ̇ን ጫ̈ቃፒ̇ቴ፥ ዬሩሳ̈ላም ካታሚንዳ̇ ጴቻ̇ ካ̈ታ ካታማ። 36ዪንቲ̇ ዪንታ̇ ቆሚ̇ን ኢሲንን ጋርታ̇ፖ̇ ፔታ̇ኒን ቦ̈ርሲን ካር፥ ካርን ቦ̈ርስ ዎታንዳብ ዳንዳኢባ̈ሶኮታ̇ቦ ዪንታ̇ ቆሚ̇ንባራር ማ̈ቂ̇ን ጫ̈ቃፒ̇ቴ። 37ዪ̈ኮታ̇ቦ ዪንታ ሶ̈ሊንዳ̇፥ ኣዓ ጌይርኮ̇ ‘ኣዓ’ ዎይ ኣቴ̇ጌይን ‘ዋኣኬ’ ጌይርኮ̇ ‘ዋኣኬ’ ጌብቴ። ዪኒ̇ፖ ኣቲ̇ኖ ሶ̈ሊን ዎይ ሴ̈ጣናፖ ዬይዝ ሶ̈ላ።
ኢ̈ት ኦ̈ኖ̈ቦ ኢ̈ት ኦ̈ ማሃፒ̇ቴ
38“ ‘ኣሳ ኣ̈ፍ ኬ̈ሲኖ ና̈ሳቦ ኢ ኣ̈ፊን ኬሶ̇፥ ና̈ሳ ኣች ኬ̈ርሲኖ̈ቦ ኢ ኣቺ̇ን ኬ̈ርሶ’ ጌይኖን ዪንቲ̇ ሲስኪ̇ኔ። 39ዎቲናካር ቴ ዪንታ̇ክ ጋ̈ዚንዳ፥ ዪንታ̇ብ ኢ̈ት ኦ̈ኖ ኣሳቦ ኢ̈ት ኦ̈ ማሃፒ̇ቴ̇፥ ኔ ቢዢን ኡሻቺ̇ን ባቂ̇ኖቦ ጉጃር ዓዲ̇ርሲን ቢሪንር ቤይሳቤ። 40ፔቲ̇ ኣሲ ኔ ሻሚዢን ኤካ̇ንዳብ ኮያሪ ኔ̈ና ሞ̈ቴጌዪን ኔ ኮ̈ቲን ጉጃር ኢ̈ብ ኢማ̇ቤ። 41ፔቲ̇ ኣሲ ኔ̈ኮ ‘ታባር ኡክ ጎይ ዬ̇ሼ’ ጋ̈ር ኔ̈ና ዋይጌዪን ኔ̈ኒ ኢ ጌይኖምፖ̇ ናምኢ ኩሽ ኣ̈ር ኢባር ሉካ̇ቤ። 42ኔ ጋልዳፖ̇ ጌሺዛቦ ኢማ̇ቤ፥ ኔ ጋልዳፖ̇ ታልቃ̇ንዳብ ኮይዛዳ ካያፔ̇” ጌይዴ።
43ኢናፖ̇ ዬሱ̈ሲ ኢንታ̇ኮ “ ‘ኔ ላ̈ጋ̇ ካቤ፥ ኔ ጻላ̈ታ ኢጻ̇ቤ’ ጌይኖን ዪንቲ̇ ሲስኪኔ። 44ቴ ዪንታ̇ኮ፥ ዪንታ̇ ጻ̈ላታን ካብቴ ዪንታ̇ ባ̈ዲ̇ዛን ኣንጂብቴ̇፤ ዪንታ̇ ኢጺ̇ዛንቦ ኮሽ ባዝ ኦ̈ብቴ̇፤ ዪንታ̇ብ ኢ̈ት ኦዛንብኬ ዪንታ̇ ዳኪ̇ዛንቦ ዎ̈ሲ̇ብቴ ጋ̈ሬ። 45ዪኖ̇ ዪንቲ̇ ዎቴጌይንዶ ኣፋ ዎ ዪንታ̇ ባ̈ባ̈ቦ ዪንቲ̇ ናኢ ማ̈ቂ̇̈ሬ። ኢ ኢ̈ታንብኬ ኮሻ̇ንቦ ፌ ኣዋ ኬሲ̇̈ሬ፥ ማ ጺላ̇ንብኬ ናጋራንቻ̇ንቦ ፌ ኢሪን ኬርሲ̈ሬ። 46ዪንታ̇ ካዝ ኣሳን ሙታ̇ ዪንቲ̇ ካጌዪን ዪንታ̇ ኣ ማ̈ዳ̇̈ራ? ናጋራንቻ̇ንር ዪኖ̇ ዎቲ̈ርባያ? 47ዪንታ̇ ኢሺንታ̇ን ሙታ̇ ዪንቲ̇ ሳሮ ጌይዝ ባዝ ማ̈ቄ̇ጌይን ዪንቲ̇ ሜላንፖ̇ ኣብዝ ሺዝ ባዝ ኦ̈ቴ? ጾ̈ሳ ኤሪባ̈ሶ ኣሳንር ዪኖ̇ ዎቲ̈ርባያ? 48ዪ̈ኮታ̇ቦ ኣፎ ዪንታ̇ ባ̈ባ̈ዲ ዉርሲ ማዛ ኢ ጋልዳ ባዮ̇ንዲፌ̈ኒ፥ ዪንታ̇ሬ ዉርሲ ዪንታ ̇ጋልዳ ማዛ ባዮ̇ ኣስ ማ̈ቂ̇ብቴ።
Valið núna:
ማ̈ቶ̈ሳ 5: ኦጫ̈ቃማ
Áherslumerki
Deildu
Afrita
Want to have your highlights saved across all your devices? Sign up or sign in