Matthew 26
26
Sa Inondae Angongat Ḵan Jesus
(Mrk. 14:1-2; Luk. 22:1-2; Jhn. 11:45-53)
1Naabus ḵade intuttudun Jesus losan da sana, ḵanana'tta disipuluna, 2“Igammuyu we aḵ osan ḵabigatna Gayagayan da Judyu we ngannon taḵu Nallausan.#26:2 Sa anna Gayagayan ni Nallausan we gangganason da Judyu, iḵagasmoḵda nangiligsiyan Apudyus atta danaḵḵoḻdae nammusassu'd Egypt atte timpun Moses. Nanggaḵay ḵad anghel we nangongat atta losane panguḻu we abenge laḻaḵi'd Egypt, nilausana da boḻoy da Judyu we naḵuan da lewanganda si daḻan ni ubbu we karnero Exodus 12. Tinawone gangganasonda ḵad waḻun aḻgawe gangganasonda. Pun da Judyu, adu we ili naḻpuwanda ya nandadatongda'd Jerusalem we umoy maḵagayagaya si annae ngannonda Nallausan. Ḵad Saḵone Abeng Di Tagu, mipuḻangaḵ ta mipattoḻaḵ atte kros.”
3Sa sadi ye timpu, nandatdatong da papangat da papadi ya da pallakayon da Judyu si boḻoy Caiaphas we ḵangatuwane padi. 4Ḵad nantutuḻagda nu ngai inondae ampadoḵma ḵan Jesus we ippun angigammu ya impagongatda. 5Yaḵon ḵananda, “Adi taḵu iyaspuḻ si gayagaya ta adi magulu da tagu.”
Sa Nangisigan Ni Bubai Atte Bangbanglu
(Mrk. 14:3-9; Jhn. 12:1-8)
6Inninggaw da Jesus ad Bethany si boḻoy da Simon we naleprosy si awe. 7Sissiyada ḵade angan, ummadani ḵan Jesus bubai ye inggaw ampatoge bangbanglu ḵan siyae naigga si ban-oge angange alabaster. Pun inisigna'tte uḻun Jesus. 8Yaḵon innilan ḵad da disipulu, summangada woḵ ḵananda, “Ngaipana gay tangtanggaon? 9Ingnginana ḵad oḵyan te ampatopatog, iwwaḻasna'tta ḵapus pilaḵ!”
10Igammun Jesus uguugudonda woḵ ḵanana, “Ngaipayu dellawon ḵingwan ni sanate bubai? Sa ḵingwana ḵan saḵon ambaḻubaḻu. 11Te da ḵapus pasige awadda'tta dinumane inggawanyu. Yaḵon ḵan saḵon, daḵampun aḵ pasige annaaḵ ḵan diḵayu. 12Inisigna lana si long-agḵu ta isaganana milibonaḵ. 13Ibagaḵ ḵan diḵayu ḵatuttuwaan, dinumane miwaḻagawagan ni Ambaḻu we Damag atte losane lubung, maug-uggud ḵingwan ni annae bubai ta angiḵagasmoḵan ḵan siya.”
Sa Naḵatuḻagan Judas We Angituyuḵ Ḵan Jesus
(Mrk. 14:10-11; Luk. 22:3-6)
14Pun aḵ Judas Iscariot we osa'tta nasawaḻan aḵ duwae disipulun Jesus, ummoy atta papangat da papadi. 15Ḵanana, “Ngai ittonyu ḵan saḵon nu ipuḻangḵu'ḵ Jesus ḵan diḵayu?” Pun tinangdananda'ḵ tuḻumpuḻu we palata. 16Inggan ni sadi, singsingngit Judas gundawaynae angituyuḵ ḵan Jesus ḵan dida.
Sa Angisaganaanda Si Anungus Ni Maḵaḵananda Ḵan Jesus
(Mrk. 14:12-21; Luk. 22:7-13, 21-23; Jhn. 13:21-30)
17Sa umunae aḻgaw ni Gayagayan da Judyu we ngannonda Tinapaye Naippun Yeastna, ummoy da disipulu ḵan Jesus woḵ ḵanandae nan-imus, “Dinu piome inḵani angisaganaan atte ḵanon taḵu si Gayagayae ngannon taḵu Nallausan?”
18Ḵanan Jesus, “Inḵayu'tte siyudad ḵad awad de osae laḻaḵi sidi. Ḵananyu ḵan siya, ‘Imbagan mistulu we madam-an timpunae inḵoddong Apudyus ḵad sa boḻoyyu anḵaḵaḵananda'tta disipuluna'tte timpun ni Gayagayae ngannon taḵu Nallausan.’ ” 19Pun ummoy da disipulu ḵingwa da imbagan Jesus ḵan dida. Pun insaganada da ḵanonda si Gayagayae ngannonda Nallausan.
20Lummabi ḵad, naḵatuḵdu'ḵ Jesus atta nasawaḻan aḵ duwae disipuluna ta anganda. 21Sa sadi ye angananda, ḵanan Jesus, “Ibagaḵ ḵan diḵayu ḵatuttuwaan, awad ḵan diḵayu osae angituyuḵ ḵan saḵon.”
22Amo bummaduuḻ da disipulu woḵ nasin-ossadae nangibaga ḵan siya ḵanane, “Apu, daḵampun ḵan saḵon.”
23Ḵanan Jesus we summongbat, “Sa naḵasawsaw ḵan saḵon si tinapay atte maḻuḵung, siya angituyuḵ ḵan saḵon.#26:23 Psalm 41:9. 24Saḵone Abeng Di Tagu, ḵasapuḻane matoyaḵ te siya impaigilin Apudyus atte awe. Yaḵon ḵaddagu tagu we angituyuḵ ḵan saḵon. Unnoyna gay adi niyanaḵ.”
25Pune sadi, ḵanan Judas we angituyuḵ ḵan siya, “Mistulu, saḵon ḵamman?”
Ḵanan Jesus we summongbat, “On, siya imbagam.”
Sa Anungus Ni Naḵaḵanan Jesus Atta Disipuluna
(Mrk. 14:22-26; Luk. 22:14-20; 1Co. 11:23-25)
26Sissiyada ḵade angan, innaḻan Jesus tinapay woḵ nanggappiya ḵan Apudyus. Naabus ḵad, binisbisaḵna woḵ innatodna'tta disipuluna woḵ ḵanana, “Aḻanyu anna ta ḵanonyu. Annaya long-agḵu.” 27Pun innaḻana bos sintasae bayase grape woḵ nanggappiya ḵan Apudyus. Naabus ḵad, innatodna ḵan dida woḵ ḵanana, “Inumonyu anna losan, 28te sana daḻaḵe amanoḵnoḵ atte Baru we Tuḻag Apudyus atta tagu. Mibuḵbuḵ nu matoyaḵ ta adu da tagu we mapakawan da basuḻda.#26:28 Exodus 24:8; Jeremiah 31:31-34. 29Ibagaḵ ḵan diḵayu ḵatuttuwaan, adiyaḵpun ḵasin uminum atte bayase grape inggana'tte aḻgawe maḵainumaḵ ḵan diḵayu'tte baru we bayase grape atte ampangatan Amaḵ.”
30Naabus ḵad, ḵinantada ḵantae pammadayaw ḵan Apudyus woḵ asidaot umoyon atte Beleg Olives.
Sa Nangibag-an Jesus Si Amuḵlitan Peter Ḵan Siya
(Mrk. 14:27-31; Luk. 22:31-34; Jhn. 13:36-38)
31Pune sadi, ḵanan Jesus ḵan dida, “Sinsadi ye labi, losan ḵayu umawid ya ummabusaḵ gapu'tte maḵwa ḵan saḵon. Te awad de nigili'tte Ugud Apudyus we ḵanana, ‘Gongatoḵ anangḵon atta karneroḵ ya masinasinada.’#26:31 Zechariah 13:7. 32Yaḵon nu umuliyaḵ, umunaaḵ nu diḵayu umoy atte probinsiya'd Galilee.”
33Ḵanan Peter ḵan siya, “Taḵon ay nu tenan da buḻunḵu siḵa gapu'tte maḵwa ḵan siḵa, adiḵpun siḵa tenan.”
34Ḵanan Jesus ḵan siya, “Ibagaḵ ḵan siḵa ḵatuttuwaan, daampun anullaḵuḵ ḵawitan aḵ madam-an taḻun, amiḵluwom saḵon puḵlitan.”
35Pun ḵanan Peter ḵan siya, “Taḵon ay nu ḵasapuḻane maḵaḵatoyaḵ ḵan siḵa, adiḵpun paat puḵlitan siḵa.” Pun ḵaḵna bos imbagan da udume disipulu.
Sa Nalluwaḻuwan Jesus Ad Gethsemane
(Mrk. 14:32-42; Luk. 22:39-46)
36Pune sadi, ummoy da Jesus ya da disipuluna'tte lugar we ngannonda Gethsemane woḵ ḵanana ḵan dida, “Tumuḵdu ḵayu si anna ta iyyaḵ yan alluwaḻu si andi.” 37Inayagana'ḵ Peter ya da duwae abeng Zebedee woḵ nibuḻunda ḵan siya. Inggan ni sadi, bummaduuḻ ya nasaliduduwan somsomoḵna. 38Pun ḵanana ḵan dida, “Amod de sigab ni somsomoḵḵu we isun di siya iḵatoyḵu. Inggaw ḵayu'tte anna ta pasig ḵayu ansasaggana.”
39Pun bummattawa ḵan dida'ḵ aḵit woḵ nalluḵbube nalluwaḻu. Nalluwaḻu woḵ ḵanana, “Ama, nu maḵwa oḵyan, iligsim saḵon si annae ampaḵaḻamaḵe sasangnguwoḵ. Yaḵon daḵampun oḵyan si pinioḵ mituttuwa nu adi sa piniom.”
40Nipauli ḵad aḵ Jesus atta tuḻu we disipulu, indasana didae nilid-op woḵ ḵanana ḵan Peter, “Ngaipayu adi maattomane maḵapuyat ḵan saḵon aḵ sin-orasan? 41Adi ḵayu masusuyop yaḵon alluwaḻu ḵayu ta adi ḵayu masulisug. Te ampigsa somsomoḵyu yaḵon anḵuya long-agyu.”
42Pun ummoy os ḵasin aḵ Jesus nalluwaḻu woḵ ḵanana, “Ama, nu ḵasapuḻane maḵwa ḵan saḵon da sanae ampaḵaḻamaḵ, sa piniom maḵwa.”
43Nipauli ḵad ḵasin, indasana bos didae masusuyop te adidapun maḵadiyat atta atada. 44Pun ummoy os Jesus impiḵlu we nalluwaḻu. Illuwaḻuna bos da ginangputna imbaga.
45Nipauli ḵad, ḵanana ḵan dida, “Na! Ngaipa ḵayu gay sissiyae masusuyop ḵan umiillong! Dummatong timpu we inḵoddong Apudyus we saḵone Abeng Di Tagu, mipuḻangaḵ atta ḵabasbassuḻan. 46Lumibbat ḵayu ta intaḵun. Ilanyu, annate umali angituyuḵ ḵan saḵon.”
Sa Nanoḵmaanda Ḵan Jesus
(Mrk. 14:43-50; Luk. 22:47-53; Jhn. 18:3-12)
47Sissiya ḵade an-uguugud aḵ Jesus, nadanatong aḵ Judas we osa'tta nasawaḻan aḵ duwae disipuluna. Inninggaw da amode tagu we nibuḻun ḵan siyae nampaḵ-odon aḵ ispada ḵan pang-oḵ. Da papangat da papadi ya da pallakayon da Judyu nangibuun ḵan dida. 48Inggaw sinyale intuḻag Judas ḵan dida ta angimatunanda ḵan Jesus. Ḵanana, “Sa iyyaḵ ogoḵan, sanat doḵmaanyu.” 49Pun daguse ummoy aḵ Judas ḵan Jesus woḵ ḵanana, “Annaḵa pay Mistulu!” Pun inogoḵana.
50Ḵanan Jesus ḵan siya, “Buḻbuḻun, ḵoom nu ngai panggobnu ḵan saḵon.”#26:50 Awad de sabali ye piona ugudon atte Greek. Ngai panggob ni buḻbuḻunḵu we ummali sina? Pune sadi, ummadani da buḻun Judas woḵ dinoḵmaanda'ḵ Jesus. 51Baag-en, nangwa ḵad osa'tta buḻun Jesus, niluḵpusna ispadana woḵ binaḵagna ingan ni musassun ni ḵangatuwane padi. 52Ḵanan Jesus ḵan siya, “Ipaulim ispadam si boḻoyna. Te ngaimane angusar atte ispada, matoy os si ispada. 53Adimpun ḵamman igammu we maḵwa ampabadangaḵ ḵan Apudyus we amaḵ ḵad daguse nangibuun aḵ ḵalibulibu we anghel?#26:53 Sa piona ḵanan atte Greek, lummabos aḵ nasawaḻan aḵ duwae suḻdadun da anghel. Sa timpun Jesus, sa belang ḵad da suḻdadu onom libu. 54Yaḵon nu ḵooḵ ḵatti, ngai inon ni nigili'tte Ugud Apudyus we mituttuwae ḵanana ḵasapuḻane ḵaḵna maḵwa ḵan saḵon?”
55Pune sadi ḵanan Jesus atta adu we tagu, “Tulisanaḵ ḵamman ta ummali ḵayu we ampaḵ-odon ḵayu'ḵ ispada ḵan pang-oḵe umoy anoḵma ḵan saḵon? Inaḻgawe inninggawaḵ ḵan diḵayu'tte paway ni templo we antuttudu yaḵon adiyupun saḵon dinoḵmaan. 56Yaḵon maḵwa losan da anna sinsadi ta mituttuwa inggilin da profeta si ugudna si awe mipanggob ḵan saḵon.” Imbagan ḵad ay Jesus sadi, losan ummawid da disipuluna woḵ tinenanda'ḵ Jesus.
Sa Nanumaḻyaanda Ḵan Jesus
(Mrk. 14:53-65; Luk. 22:54-55, 63-71; Jhn. 18:13-14, 19-24)
57Naabus ḵade dinoḵmaanda'ḵ Jesus, inniyoyda si boḻoy Caiaphas we ḵangatuwane padi ye nandatdatongan da pallakayon da Judyu ya da mimistulun ni lintog. 58Yaḵon aḵ Peter ḵad, naktay ḵan dida'ḵ panose ummun-unud inggana'ḵ naḵtad si paway ni ḵangatuwane padi. Pun naḵatuḵdu'tta guwaḻda ta ilana nu ngai maḵwa ḵan Jesus.
59Da papangat ḵad da papadi ya da losane ḵuḵunsisaḻ, angngitda'ḵ ipabasuḻda ḵan Jesus we taḵon ay nu tuli ta awad lasundae ampagongat ḵan siya. 60Yaḵon ippun indasanda, taḵon ay nu adu da nan-ugud aḵ tuli si mipanggob ḵan siya.
Anungusna ḵad, ummadani da duwa 61woḵ ḵananda, “Ḵanan ni annae tagu we lamogḵu dadailon templon Apudyus ḵad lamogḵu taḵadon si unog di tuḻun aḻgaw.”
62Pune sadi summiḵad ḵangatuwane padi woḵ ḵanana ḵan Jesus, “Ngai isongbatnu'tta sanae ipabasuḻda ḵan siḵa?” 63Yaḵon gummiginnoḵ. Pun inḵasin os ni ḵangatuwane padi ḵanan, “Sa sinagung ni matattagu we Apudyus, ibagam ḵan diḵani nu siḵa Kristu we Abeng Apudyus.”
64Ḵanan Jesus we summongbat, “Siya imbagame sadi. Yaḵon ibagaḵ ḵan diḵayu, ilanyu saḵone Abeng Di Tagu we tumuḵdu si madawinan Apudyus we maḵabooḻ atta losan. Ḵad asiyu bos ilan umaliyaḵe mibuḻun atta libuu'd langit.”#26:64 Psalm 110:1; Daniel 7:13.
65Dingngoḻ ḵad ay ni ḵangatuwane padi imbagana, pinissayna silupna te summanga. Ḵanana, “Iyisuna long-agna ḵan Apudyus! Pun ngaipa taḵu ḵasapuḻan da udum aḵ anaḵdoḻ? Dingngoḻ taḵu da lawwenge imbagana. 66Ngai ḵasomsomḵanyu?”
Ḵanandae summongbat, “Naḵabasuḻ! Ḵasapuḻane matoy.”
67Pun tinuptuppaanda, sinansantuḵda ya nilipalipaḵda bosaḻna,#26:67 Isaiah 50:6. 68ḵananda, “Nu siḵa'ḵ Kristu ya lamognu pugtuwan, ibagam ḵan diḵani nu ngai nanantuḵ ḵan siḵa?”
Sa Namuḵlitan Peter Ḵan Jesus
(Mrk. 14:66-72; Luk. 22:56-62; Jhn. 18:15-18, 25-27)
69Aḵ Peter ḵad, sissiyae tutuḵdu si paway ni boḻoy. Pun ummoy ḵan siya bubai ye sammilun ni ḵangatuwane padi woḵ ḵanana, “Siḵa osa'tta buḻun Jesus we naḻpu'tte probinsiya'd Galilee.”
70Yaḵon pinuḵlitan Peter atte sinagung da losan woḵ ḵanana, “Ippun igammuḵ atte sanate ugudom.”
71Pun ummoy si lewangan ni paway yaḵon inninggaw osae sammilu we bubai ye nangila ḵan siya woḵ ḵanana'tta tagu we sisiḵad, “Annaya osa'tta buḻun Jesus we iNazareth.”
72Yaḵon pinuḵlitan os Peter woḵ ḵanana, “Sapat-aḵ ay nu igammuḵ sadi ye tagu.”
73Unipun, ḵummatam da tagu we sisiḵad ḵan siya woḵ ḵananda, “Tuttuwae siḵa osa ḵan dida te isum nin naḻpu'tte probinsiya'd Galilee ye an-ugud.”
74Yaḵon amo ḵanana, “Dusaonaḵ oḵyan ḵan Apudyus nu antultulliyaḵ! Isapataḵe ippun igammuḵ si sanae tagu.” Pun daguse nanullaḵuḵ ḵawitan. 75Pune sadi, inḵagasmoḵ Peter imbagan Jesus ḵan siyae ḵanana, “Daampun ḵawitan anullaḵuḵ ya namiḵluwom saḵon puḵlitan.” Pune sadi, ummoyon aḵ Peter woḵ ummibiibil.
Valið núna:
Matthew 26: kml
Áherslumerki
Deildu
Afrita
Want to have your highlights saved across all your devices? Sign up or sign in
© 2019 Translators Association of the Philippines (TAP), All rights reserved.