लूका 20
20
ईसु का अधिकार को सुवाल
(मत्ती 21:23–27; मरकुस 11:27–33)
1एक दिन ईसु मनदर म मिनखानै सीख देर्यो हो। अर चोखो समचार सुणार्यो हो जणा परधान याजक अर सास्तरानै सीखाबाळा यहूदि नेता क सागै भेळा होर बिकन आया। 2अर बे बिऊँ खेबा लाग्या, “म्हानै बता तू अ सगळा काम कूणसा अधिकारऊँ करै ह? बो कूण ह जखो तनै अंय्यां करबा को अधिकार दिओ?” 3जणा ईसु बानै बोल्यो, “म बी थानै एक सुवाल बुजूँ हूँ। 4थे आ बताओ यहून्नानै पाणी को बतिस्मो देबा को हक ईस्बरऊँ मिल्यो नहिस मिनखाऊँ?” 5इपै बे आपसरी म बतळाबा लागगा, “ज आपा खेवां की ईस्बर नगरीऊँ जणा ओ खेसी पाछै थे बिको बिस्वास क्युं कोनी कर्या? 6अर ज आपा अंय्यां खेस्यां की बिनै ओ काम मिनख दिओ जणा आ सगळी भीड़ आपणा प भाठा बगासी, क्युं क अ सगळा यहून्नानै परमेसर की खेबाळो मानै ह।” 7जणा बे कह्या, “म्हें तो कोनी जाणा की बिनै ओ हक कूण दिओ।” 8बाको जुबाब सुणर ईसु बानै बोल्यो, “जणा म बी थानै कोनी बताऊँ की म ओ काम की हकऊँ करूं हूँ।”
बुरा ठेकेदारा की निती-कथा
(मत्ती 21:33–46; मरकुस 12:1–12)
9जणा बो मिनखानै एक मिसाल दिनी, “एक आदमी अँगूरा को बाग लगार बिनै किसानानै ठेका प देर बोळी दूर चलेगो। 10जद अँगूर लागबा की रुत आई। जणा बो अँगूरा मऊँ आपको हिस्सो लेबा ताँई एक नोकरनै अँगूरा का बाग म भेज्यो। पण बे ठेकेदार बिनै मार कुटर रितो-फाकोई पाछो काड दिओ। 11जणा बो एक दुसरा दासनै ओज्यु बाकन भेज्यो। पण बे बिनै बी मारकूटर बिकी दुरगती कर रितो-फाकोई पाछो काड दिओ। 12अंय्यांई बो तीसरानै भेज्यो पण बे बिनै बी अदमर्यो कर बारनै फेक दिओ। 13जणा अँगूरा का बाग को मालिक बोल्यो, ‘म काँई करूं? म इब मेरा लाडला छोरानै भेजस्युं। कमऊँ कम बिको तो बे लिहाज राखसी!’ 14पण जद बे बिनै देख्या जणा आपसरी म खेबा लाग्या, ‘इब क तो मालिक को छोरोई आर्यो ह, आओ आपा मिलर इनै मार देवां। अर इ बाड़ी प कब्जो करल्याँ।’ 15अर बे बिनै अँगूरा का बागऊँ बारनै का'डर मार गेर्या।” जणा ईसु बाऊँ बुज्यो, “इब बाग को मालिक बाकै सागै काँई करसी? 16बो आर बा ठेकेदारानै मार अँगूरा को बाग दुसरानै समाळबा ताँई दे देसी।”
आ बात सुण बे बोल्या, “अंय्यां कदैई नइ हो।”
17जणा ईसु बाकै कानि देखर बोल्यो, “जणा सास्तर म मंडेड़ा इ आंक को काँई मतबल ह,
“‘जि भाठानै चेजारा क्युंई जोगो कोनी जाण्या,
बोई कूणानै समाळबाळो होगो।’
18“जखा बी, इ भाठा प पड़सी बे टुकड़ा-टुकड़ा होज्यासी। अर ओ भाठो जिपै पड़सी बिनै ओ पिस गेरसी।”
यहूदि नेता की जाळसाजी
(मत्ती 22:15–22; मरकुस 12:13–17)
19बि घड़ीई सास्तरनै सीखाबाळा अर परधान याजक बिनै पकड़बो चावा हा। क्युं क बे समजगा हा की बो आ बात म्हारै प बोली ह, पण बे मिनखाऊँ डरता। 20अर बे सगळा इ ताक म रेह्बा लागगा की बो कोई गळती करै। बे जासुसानै हक देर बिकै गेल छोड्या। जखा ईमानदारी ताँई जाण्या जाता हा। अर इ आस म की बे ईसुनै बाता म फसार बिऊँ क्युं गळत खुवा देसी। जिऊँ बे बिनै रोमी सरकार क हाता म सूप दिं। 21जणा बे जासुस बिनै फसाबा ताँई सुवाल बुज्यो, “गरूजी म्हें जाणा, तू जखी बी बोलै अर सीखावै बे साची ह अर तू कोईनै छोटो बडो देखर कोईको पक्सपात कोनी करै पण परमेसर को गेलो ईमानदारीऊँ बतावै ह , 22जणा थे म्हानै बताओ आपणा नेम-कायदा गेल रोमी समराटनै लगान देबो ठिक ह क कोनी?” 23ईसु बाकी बात पकड़ लिओ अर बाऊँ बोल्यो, 24“मनै एक रोमी सरकार को सीक्को दिखाओ। अर इनै देखर बताओ इपै किको नाम अर सकल ह?” बे कह्या, “रोमी समराट की।” 25जणा बो बोल्यो, “जखो रोमी समराट को ह बो समराटनै अर जखो परमेसर को ह बो परमेसरनै द्यो।” 26बिको जुबाब सुणर बे सूना होगा अर मिनखा क सामै इ बात म बिनै कोनी पकड़ सक्या।
ईसुनै फसाबा ताँई सदुकीया की जाळसाजी
(मत्ती 22:23–33; मरकुस 12:18–27)
27 #
काम 23:8
इब क्युंक सदुकी ईसु कनै आया, सदुकी बे हा जखा मर्या पाछै जी उठबानै कोनी मान्या करता हा। 28बे बिऊँ बुज्या, “गरूजी मूसा को म्हारै ताँई ओ नियम मांडेड़ो ह, क कोईको भाईड़ो आपकी लूगाई क होतासोता बिना ओलाद क मर जावै। जणा बिको भाई बिकी लूगाईनै ब्याले अर आपका भाईड़ा ताँई टाबर पैदा करै। 29इब देखो कोई सात भाईड़ा हा। पेलो हो जखो एक लूगाईऊँ ब्या कर बिना आस ओलादई मरगो। 30अर बिकै मर्या पाछै दुसरो भाई बिनै ब्याली। पण बो बी बिना ओलादई मरगो। 31इब तीसरो बी अंय्यांई मरगो, अंय्यां करता-करता बे सात्यु का सात्यु भाईड़ा हा जखा बिना ओलादई मरगा। 32अर आखरी म बा लूगाई बी मरगी। 33इब तू म्हानै आ बता बि दिन जद मरेड़ा ओज्यु जिसी जणा बा बामैऊँ कूणसा की लूगाई होसी? क्युं क बिका तो सात्यु का सात्युई धणी हा।”
34जणा ईसु जुबाब म बोल्यो, “इ जुग म तो ब्या सादि होवीं हीं, 35पण बे मिनख जखा मरेड़ा मऊँ ओज्यु जी उठबा क जोगा हीं आबाळा जुग म बाकी ब्या सादि कोनी होसी। 36अर बे मरेड़ा मऊँ ओज्यु जी उठबा की बजेऊँ परमेसर की ओलाद होसी। बिकै पाछै बे कदैई कोनी मरसी जिकी बजेऊँ बे ईस्बर नगरी दुता क जंय्यां होसी। 37अर मरेड़ा क जी उठबा की बातनै मूसा बी बळती झाड़ी हाळा आंक म परगट करी ह। क्युं क बो परमेसरनै अब्राहम, इसाक अर याकूब को परमेसर बतायो ह। 38परमेसर मरेड़ा को कोनी पण जीवता को परमेसर ह। क्युं क सगळा बि ताँई जीवता रेह्वै।”
39आ सुणर सास्तरनै सीखाबाळा मऊँ क्युंक बोल्या, “आ बात तो थे चोखी बोली गरूजी।” 40अर इकै पाछै बाकी ओर कोई सुवाल बुजबा की हिमत कोनी बगी।
मसी किको बेटो
(मत्ती 22:41–46; मरकुस 12:35–37)
41ईसु बाऊँ बोल्यो, “बे बोलीं हीं, आ कंय्यां हो सकै ह की मसी दाऊद की ओलाद होसी? 42क्युं क भजना हाळी पोथी म खुद दाऊद अंय्यां बोलै ह:
‘परबु मेरा परबुऊँ बोल्यो, मेरा दाया हात बेठ, 43जद ताँई म तेरा बेरीयानै तेरै पगा तळै को पाटो नइ कर द्युँ।’
44“दाऊद खुद बिनै परबु बोलै, जणा बो बिकी ओलाद कंय्यां हो सकै ह?”
सास्तरनै सीखाबाळाऊँ बचर रेह्ओ
(मत्ती 23:1–36; मरकुस 12:38–40)
45सगळा सुणर्या हा जणा बो आपका चेलाऊँ बोल्यो, 46“सास्तरनै सीखाबाळाऊँ बचज्यो जानै लामा-लामा चोळा पेरबो, बजारा म आदरमान, अरदास करबाळी झघा म उची अर ब्या-सावा म मानहाळी झघा भावै ह। 47बे खाली होईड़ी लूगाया का घरानै खाज्यावीं अर देख-दिखावा ताँई लामी-लामी अरदास करीं हीं, आकी बोळी बुरी दसा होसी।”
Valið núna:
लूका 20: एस डब्लु वी
Áherslumerki
Deildu
Afrita
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved