Mateo 9
9
Jesús msekwen tub xaa mdeen
(Mr. 2:1-12; Lc. 5:17-26)
1Gwluzh lo re kwaane, Jesús nguxoob leen tub kano nu mded xaa stub ta roo nistoo, zee mzhin xaa pa nak mod lazh xaa. 2Baa mbidno re xaa tub mdeen nax lo tub yag lo Jesús. Nu lee Jesús nzhé lo mdeen:
—Gok nix lextoo lu nel lee re jwalt cheen lu ngulola mzhe.
3Lak maestr xaa nlu xtizh Dios nle xgab:
—Lee kwaan nii Jesús nak jwalt lo Dios, nel nzhekla xaa gak lal xaa kwaan Dios.
4Per nela Jesús cho xgab nle xaa, zee ngunabdizh Jesús lo xaa:
—¿Chozhiin tant nawent nle gu xgab? 5¿Cho kwaan nzak gu? ¿Cho kwaan mas nanagant yé na lo xaa ne nzak: “Ngulola mzhe re jwalt cheen lu”, o sekwen na xaa ne nzak nu yé na lo xaa: “Guxche, bzen xkyag lu nu zyaa”? 6Le na kwaane lo gu, zee wii gu lee na nkano yalnabeyy chee re jwalt, nel na nak Xaa Mzhin Ngok Myet.
Kwaanzee nzhé xaa lo mdeen:
—Guxche nu bzen xkyag lu, zyaa garli lu.
7Lee mdeen nguxche nu mzen xkyag nu nya garli. 8Gorna ngune re xaa kwaane, mzheb doo xaa nu mbill xaa lo Dios, nel Dios mzaa yalnabeyy lo tub myet zee sekwen xaa re myet.
Jesús mrezh Teo
(Mr. 2:13-17; Lc. 5:27-32)
9Gorna mroo Jesús baa ngune xaa lo tub xaa le Teo, xaa ne nak na. Katop na demi kwaan nya naz Roma, nu nzob na pa ntop xaa demi. Jesús né lo na:
—Reke tich na.
Zee nguxso na nu mreke na tich xaa. 10Gorna kayaw Jesús garli na, noka nzo stub naz xaa ntop demi kwaan nya naz Roma, nu stub naz re xaa nle re kwaan nawent, nu kayaw re nu kwaan Jesús, nu noka re xaa kwaan kaseed lo xaa. 11Gorna ngune re fariseo kwaane nzhé xaa lo re xaa kaseed lo Jesús:
—¿Chozhiin nzhaw xmaestr gu kwaan re xaa ntop demi kwaan nya naz Roma nu kwaan re xaa nle kwaan nawent?
12Jesús mbin kwaane zee nzhé xaa:
—Xaa nanet nzak, nankint xaa zee doktor, per re xaa ne nzak, xaa zee nkin doktor. 13Zyaa gu nu seed gu nen cho kwaan nak kwaan né Dios ne: “Kwaan nzhekla na nak blesla gu ne gu sa myet gu, nu nanzheklat na teed gu ma lo na”. [Hos. 6:6] Nel nanzhalt na kwezh na re xaa wen, lee na nzhal kwezh re xaa nzeb jwalt.
Yalnabdizh cheen nkwan xaa
(Mr. 2:18-22; Lc. 5:33-39)
14Lee re xaa nzhake tich Juan Xaa Nchubnis, mbii lo Jesús nu nzhé:
—Re nu, nu re fariseo nkwan gorna nanzhawt nu nik tik kwaan. ¿Chozhiin lee re xaa kaseed lo lu nankwant?
15Jesús mkeb nzhé:
—Ble gu xgab kwaane. Nyent mod le gu zee kwan re xaa nzho tub jondang zee nagawt xaa, gorna lee xaa kachelya nzoka lo re xaa. Per zhin tub mbizh wee xaa xaa kwaan kachelya, nu gorna zhin mbizh ba, zeesi lee re xaa nzhaal kwan.
16’Nik tub xaa nakobdet tub lee ler kub cho tub lee ler gox, nel lee ler kub ndop zee chaza ler gox, zee nyentra mod le xchiina. 17Nu nixa nangot xaa xis ub kwaan kub leen mbud yed gox, nel lee xis ub kwaan kub gorna yixooba chaza mbud gox. Lee xis ub kwaan ngu leena xo lo yo, nu noka mbud lux. Kwaanzee nzhaal yo xis ub kwaan kub leen tub mbud yed kub.
Jesús msekwen tub ngwnaa nu mseban xchap Jairo
(Mr. 5:21-43; Lc. 8:40-56)
18Gorna lee Jesús kanii lee tub xaa mzhin lo xaa, xaa ne nak tub xaa nabeyy pa nkasa be nseed be xtizh Dios, nu mkichxub xaa lo Jesús nu nzhé xaa:
—Lee xchap na ngulola ngut. Per chelee lu yiid lu zhib lu yaa lu yek mad, zroban mad stub welt.
19Zee lee Jesús nu re nu, xaa mseed lo xaa, mzoli nu mreke nu tich xaa. 20Zee lee tub ngwnaa, me nzhala tub chiibchop liin nded ren lextoo mbii tich Jesús, nu mgal me cho xab Jesús. 21Nel mle me xgab: “Chelee na nebse gal na cho xab xaa gakwen na”. 22Per lee Jesús myek zee ngune xaa lo me, nu nzhé xaa:
—Xchap na. Gok nix lextoo lu, nel mwii lu lo Dios, zee ngokwen lu.
Nu leeka gorzee ngokwen me.
23Gorna lee Jesús mzhin garli xaa nabeyy pa nkasa be nseed be xtizh Dios, nu ngune xaa lee re musk kayoll paro nzhi re xaa kayonn doo nu mbazhe, pa nax mad ngut. 24Zee nzhé Jesús:
—Broo re gu nee, nel nanguta mad, nebse naxna mad.
Nu lee re myet mxizhno Jesús. 25Per gorna mloo xaa re myet leen yoo, zee mzeb xaa nu mzen xaa yaa mad, nu lee mad mroban nu mzoli mad. 26Nu dubse yizhyo ba mbin re xaa kwaan mle Jesús.
Jesús msekwen chop syeg
27Gorna mroo Jesús baa, chop syeg mreke tich xaa, nzhé lo xaa:
—¡Xaa dii cheen David, blesla lu ne lu nu!
28Gorna lee Jesús mzeeb leen yoo, lee rop syeg mbii gax lo xaa, zee lee Jesús mnabdizh nzhé lo xaa:
—¿Che nle gu xgab nzho mod le na kwaane?
—Xaa Nabeyy, nzho mod le luya —nzhé xaa.
29Zee lee Jesús mgal zaalo xaa, nu nzhé:
—Nel ngwii gu lo Dios, zee gakwen gu.
30Nu gorzee nguni zaalo xaa, zee nzhé Jesús lo xaa:
—Nik tub lo nayét guya.
31Nu pensa mroo rop xaa, mzelo xaa mzaa xaa kwent kwaan mle Jesús xaa, lo xaa dubse yizhyo ba.
Jesús msekwen tub xaa muud
32Gorna lee rop syeg mroo lo Jesús, zee nze re xaa nzeno tub xaa nzho mbi mal lextoo lo Jesús. Xaa ne nyent mod wdizh. 33Nu gorna mroo mbi mal lextoo xaa muud gorzee mzelo xaa mdizh xaa. Lee re myet mdedyall nu nzhé:
—¡Nik tub welt nanet be tub kwaan snee lo re xaa lazh be!
34Per lee re fariseo nzhé:
—Maxuu mzaa diizh zee ngoo xaa ne mbi mal, nel Maxuu nak xaa nabeyy lo rese mbi mal.
Jesús mlesla ne re myet
35Jesús mded rese yezh nu rese rench nu mseed xaa rese myet reta pa, nu mzaa xaa kwent cheen wdizh chul pa nabeyy Dios, nu msekwen xaa rese yalyizh nu rese yalne. 36Gorna ngune xaa lo re myet, mlesla xaa ne xaa re xaa, nel tant nales nzhak re myet, mod mbakxiil, ma nyent cho nkanap. 37Zee né xaa lo re nu, xaa mseed lo xaa:
—Wlipa na nii na lo gu, nzho doo xchiin Xaa Nabeyy per lee xaa nkee zhiin nazyent. 38Kwaanzee naab gu lo Xaa Nabeyy, zee xaal xaa masra xaa kee zhiin zee top xaa xkyalgon xaa.
Valið núna:
Mateo 9: zpo
Áherslumerki
Deildu
Afrita
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.