KADADDIYAN 16
16
Hagar ban Isma'il
1Sarai, rajina Abram, ta' kaagungan pottra, tape kaagungan dunor babine' dhari Messer, Hagar nyamana. 2Sarai mator ka Abram, “Sampeyan oneng, bi' PANGERAN kaula ta' eparenge ana'. Daddi langkong sae sampeyan asaren sareng dunor kaula saos. Pasera oneng pola dunor kaula ganeka pas gadhuwan ana' dhari sampeyan.” Abram cocok ka panemmona Sarai jareya. 3Daddi bi' Sarai Hagar jareya eatorragi ka Abram, epadaddi sellerra. E bakto jareya Abram la sapolo taon se alenggi e Kana'an. 4Abram asaren ban Hagar, Hagar laju ngandhung. Tape e bakto tao ja' aba'na ngandhung, Hagar laju sombong, ta' parduli ka lora bine'na jareya.
5Sarai mator ka Abram, “Kaula se ngatorragi Hagar, dunor kaula, ka sampeyan. Tape molae Hagar oneng ja' aba'na ngandhung, kaula laju ekababa'agi. Ganeka salana sampeyan. Moga-moga PANGERAN se motosana, pasera se lerres, sampeyan otaba kaula.”
6Dhabuna Abram, “Hagar jareya dunorra ba'na, ba'na kobasa; daddi epabaramma'a bai bi' ba'na, soka'na ba'na.” Sarai pas ce' kejjemma ka Hagar, sampe' Hagar buru.
7Malaekadda PANGERAN manggi'i Hagar e seddi'na settong somber e sagara beddhi, e jalan ka ra-ara Syur. 8Dhabuna malaekat jareya, “Hagar, dunorra Sarai, ba'na dhari dhimma, ban entara dha' emma?”
Hagar nyaot, “Abdidalem buru dhari compo'epon lora abdidalem.”
9Dhabuna malaekat jareya, “Kassa' ba'na abali ka lorana, pas ladine pateppa', tarema maske eseksa.” 10Malaekat jareya adhabu pole, “Bi' Sengko' ba'na eberri'ana na' poto se talebat bannya'na, sampe' ta' ekenneng bitong. 11Ba'na bakal rembi'a lalake'; ana' jareya nyamae Isma'il,#16:11 Isma'il: Nyama reya e dhalem basa Ibrani artena “Allah meyarsa”. sabab PANGERAN la meyarsa tangessa ba'na.
12Ana'na ba'na jareya bakal odhi'a akantha hemar alasan; bakal alabana ka sakabbinna oreng, ban bakal elabana bi' sakabbinna oreng. Odhi'na bakal tapesa'a dhari la-balana.”
13PANGERAN se abu-dhabu ka aba'na jareya bi' Hagar laju esebbut “Junandalem ka'dhinto El-Roi,” sabab ca'na pekkerra, “Gu ta' e dhinna' sengko' la nangale'e Salerana se ngoladi sengko'?” 14Daddi somor jareya bi' oreng enyamae somor Lahai-Roi, artena, “Somorra Se Odhi' Se Ngoladi Sengko',” kennengnganna badha e antarana Kades ban Bered.
15 #
Gal. 4:22
Hagar pas rembi' lalake', bi' Abram, eppa'na, enyamae Isma'il. 16E bakto Hagar rembi' jareya yuswana Abram ballung polo ennem taon.
Valið núna:
KADADDIYAN 16: MAD
Áherslumerki
Deildu
Afrita
Want to have your highlights saved across all your devices? Sign up or sign in