योहान 1
1
जीवणान सोबदो
1सुरवात माय सोबदो एतो; एने सोबदो बोगवाना हेऱ्यो एतो, एने सोबदो बोगवान ईतो। 2ज्योस सोबदो सुरवात माय रेन बोगवाना हेऱ्यो एतो। 3एने आखो तास ने उगे रेन बोणनो, एने जो काय बुणेल हे ताम रेन काल्ली बी चिज तान बिगेर नाह बुणेल सोती। 4#1:4 ता माय सोबदो जीवायीन मुल एतो; नाहते सोबदान समंद ने कारेण जो काय बाणायेल एतो ता माय जीवाय एतो।सोबदा माय जीवाय एतो, एने तो जीवाय माणहान केरता उजालो लावो। 5उजालो आंदारलाम चोमकीह, एने आंदारो ताह केदी बी जिक नाह सिकेत।
6 #
मत्ती 3:1; मरकुस 1:4; लुका 3:1,2 बोगवान एक खोबर्याह मुकल्यो, एने तान नाव योहान एतो, 7तो उजालान गोवाय केणेन केरता आवो, एने आखा माणहे तान खुबेर होमलीन बोगवाना पोर बुरहो मेलती। 8तो सोता ते उजालो नाह ईतो; पुण ता उजालान गोवाय केणेन केरता आयेल ईतो। 9खेरलो उजालो ज्योस हे जो दुनियाम आवण्यो ईतो एने आखा माणहा पोर उजेड़ किरेह।
10तो सोबदो दुनियाम एतो, एने बोगवान तान द्वारा दुनियाह बाणायेल, तीबी दुनियान माणहे ताह नाह ओलख्या। 11तो तान माणहा फाय आवो, पुण तान माणहे ताह नाह मान्या। 12पुण जोलाक ताह मान लेदा, मतलब जोला बी माणहे तान नावा पोर बुरहो केरतेह; तो ताह बोगवानान सोरा बोणनेन आदिकार आप्यो। 13ता नाहते लुय केरीन नाहते सेरीरान आसा माय ता माणहान आसा माय, पुण बोगवानान उगे रेन पायदा ईयेल हेते।
14एने सोबदो माणहान सेरीर बोणीन आवो, एने गीण एने खेराय माय पाको एन आमरी विचीम रिनो। एने आमु तान ओहली बोड़ाय देख्या, जिहकेरीन आबाख ने एकुस बेटाख ने बोड़ाय।
15योहान यीशुन बाराम गोवाय दिनो एने आयड़ीन केयो, “ज्यो तोस हे जान बाराम मी कियेल, ‘जो मार पासाण आवणे बाजरिनोह,’ तो माहु रेन मुठो हे, काहाकाय तो माहु रेन पेल ईतो।”
16काहाकाय तान गीणान बोरपुरी माय रेन आमु आखाह बोरकेत पोर बोरकेत आपीन बोगवान होवटो केर दिनो। 17तानकेरता कायदो ते मुसान उगे रेन आपेल हे, पुण गीण एने खेराय यीशु मसीन उगे रेन आवी। 18बोगवानाह कुण केदी नाह देख्यो। एकुस बिटोख जो आबाख ने बाराबोर हे, एने बोगवाना हेऱ्यो बोह रिनोह, ताच ने उगे रेन बोगवान सोताह देखाड़ेल हे।
बपतीस्मा केरनार योहानान खुबेर
(मत्ती 3:1-12; मरकुस 1:1-8; लुका 3:1-18)
19बपतीस्मा केरनार योहानान गोवाय ज्यी हे काय जेवी यहुदि आदिकारी यरूशलेम हेयरा माय रेन चाकऱ्या एने लेवीह योहाना फाय ज्यो फुसणेन केरता मोकल्या, “तु कुण हे?”
20तेवी योहान जापाप आपणेन केरता नाह नाकाऱ्यो, पुण तो हुतरो मान लिदो: “मी मसी नाह सुतो।”
21तेवी ता योहानाह फुशा, “उवतो तु कुण हे? काय तु एलिया हे?” योहान केयो, “मी नाह सुतो,” एने ता पोशा केया, “ते काय तु जाणकार हे?”#1:21 जाणकार जो आवीन मसीन आवणेन बाराम गोसणा केरनेवालो ईतो। योहान जापाप आप्यो, “नाह।”
22तेवी ता पोशा योहानाह फुशा, “ते उवतो तु हे कुण? आमुह के काहाकाय जो आमुह मुकलेल हे। ताह आमु जापाप आप सेकहु काय तु सोतान बाराम काय किथे?”
23योहान केयो, जिहकेरीन यशाया जाणकार कियेल हे:
“मी उजाड़ी माय एक आयेड़नारान बोल हे:
काय तुमू बोगवानान वाट हुतरी किरो!”
24ता खोबऱ्या, जा फरिसीन उगे रेन मोकलायेल एता, 25#1:25 फरिसी मुकलेल खुबेर लेणारे; 25 ज्यान पासाण, नाहते जाह मुकलेल ता फरिसी एता।ता योहानाह ज्यो सावाल फुशा, “तु नाह मसी हे नाह एलिया एने नाह जाणकार हे, ते उवतो बपतीस्मा काहा किरेह?”
26योहान ताह जापाप आप्यो, “मी ते पाण्या केरीन बपतीस्मा केरथु, पुण तुमरी विच माय एक माणुह उबरिनोह ताह तुमू नाह ओलेखते। 27मतलब मार पासाण आवण्यो हे, मी तान खाहड़ान दोयड़ी सोड़नेन बी लायेक नाह सुतो।”
28ज्यु वातु यरदन नेदीन ती मीरे बेतनिया गावाम एन्यु, जाहरी योहान बपतीस्मा केरतालो।
बोगवानान मेंड्रो
29दिहरे दिह बपतीस्मा केरनार योहान यीशुह तान उगे आवतालो देखीन केयो, “दिखो, ज्य बोगवानान गीदल्यो हे, जो दुनियान पाप उखलीन ली जाथे। 30ज्यो तोस हे जान बाराम मी कियेल ईतो, ‘एक एदमी मार पासाण आवीह, तो माहु रेन मुठो हे, काहाकाय तो माहु रेन पेल ईतो।’ 31माहु मालुम नाह एतो काय तो कुण हे, पुण मी पाण्या केरीन बपतीस्मा ज्यानकेरता केरतीन आवोह काय इस्राएल ने माणहे ताह जाण लेती।”
32एने योहान इहकेरीन गोवाय दिनो: “मी चोखाला जीवाह पेरवान वेहा माय हेरगा माय रेन उतेरतालो दिखेल हे, एने तो यीशु पोर थोब गीयो। 33मी ते ताह उंजु वोर नाह उलखेल ईतो, पुण बोगवान जो माहु पाण्या केरीन बपतीस्मा केरनेन केरता मुकलेल हे, तोस माहु कियेल, ‘जा पोर तु चोखाला जीवाह उतेरतालो एने थोबतालो दिखहे; तोस चोखाला जीवा केरीन बपतीस्मा केरनार हे।’ 34एने मी दिख्यो,” एने ज्यो केथु काय “बोगवानान बिटोख ज्योस हे।”
यीशुन पेल्ला चेला
35दिहरे दिह पोशा योहान एने तान चेलाम रेन दुय जाणे उबरियेल एता, 36तेवी योहान यीशुह जातालो देखीन केयो, “दिखो, ज्यो बोगवानान गीदल्यो हे!”
37तेवी ता दुय चेला योहानान ज्यी वात होमलीन यीशुन पासाण चाल देना। 38यीशु पिलकीन ताह पासाण आवताला दिख्यो, एने ताह केयो, “तुमू कुणीह होदतेह?”
ता यीशुह केया, “एय रब्बी तु का रीथे?” मतलब एय, “गुरू।”
39यीशु योहानान चेलाह केयो, “आवहो, ते देख लिहो।” तेवी ता जाईन यीशु रेतालो तो जागो देख्या, एने ते दिह ता यीशु हेऱ्याच रेना। तो टेम हांज पोर ने कोम से कोम चार वाजतान एतो।
40ता दुया माय रेन जा योहानान वात होमलीन यीशुन पासाण आयेल एता, ताम रेन एक शमोन पतरसान बाहख अन्द्रियास ईतो। 41तो पेल तान खाज बायाख शमोनाह मिलीन केयो, “आमुह मसी, मतलब ख्रिस्त जुड़ जायेल हे।” 42एने तो ताह यीशु फाय लावो।
एने यीशु ताह देखीन केयो, “तु योहानान बिटोख शमोन हे, तु केफा केवाही तान मतलब पतरस एने सापोर हे।”
यीशु फिलीपुसाह एने नथनेलाह हाद्यो
43दिहरे दिह यीशु गेलील माय जाणेन केरता ठेरायो। तो फिलीपुसाह मिलनो एने ताह केयो, “मार पासाण आव लाग!” 44फिलीपुस, अन्द्रियास एने पतरसान हियोर बेतसेदा गावान रेणार ईतो। 45फिलीपुस नथनेलाह मिलनो एने ताह केयो, “जान बाराम मुसान कायदा माय एने जाणकारे लिखेल हेते, तो आमुह जुड़ जाईल हे; तो युसूफान बिटोख, यीशु नासरी हे।”
46नथनेल ताह केयो, “काय ईखेह हाजी चिज नासरत हेयरा माय रेन निकील सिकेह?” फिलीपुस ताह केयो, “आवीन देख ले।”
47यीशु नथनेलाह तान उगे आवातालो देखीन तान बाराम केयो, “दिखो, ज्यो खेरीच इस्राएली हे; ज्याम कोपेट नाह सोती!”
48नथनेल ताह केयो, “तु माहु किहीक काय उलखेह?”
यीशु ताह जापाप आप्यो, “फिलीपुस तुवाह हादणेन पेल जेवी तु अंजीरान जाड़ा बुंदे ईतो, तेवी मी तुवाह दिखेल ईतो।”
49नथनेल ताह जापाप आप्यो, “एय गुरू, तु बोगवानान बिटोख हे, तु इस्राएलान मुठलो राजा हे!”
50यीशु ताह जापाप आप्यो, “मी जो तुवाह केयो काय मी तुवाह अंजीरान जाड़ा बुंदे दिखेल, केथु केरीन बुरहो किरेह? तु ज्याह रेन बी मोठ मोठा कामे दिखहे!” 51उवतो यीशु ताह केयो, “मी तुमूह खेरीच केथु काय तुमू हेरोग उगड़ील एने बोगवानान हेरोगदुताह एने माणहान बेटाख उपेर उतेरताला एने उपेर जातालो दिखहो।”
Valið núna:
योहान 1: NTNii2020
Áherslumerki
Deildu
Afrita
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020