Mateyo 8
8
Yesu aposha umwalalume uwafyona
(Mk. 1.40-45; Luk. 5.12-16)
1Ulo Yesu atentemukile ulupili, amabumba abantu alimukonkele. 2Elo kwayishile uwafyona umo nokumufukamina ati, “Bashikulu, kati mukofwaya kuti mwamposha.”
3Elo Yesu atambulwile ukuboko kwakwe nokumukumya nokusosa ati, “Ina, nkofwaya, pola!” Bwangu-bwangu nefyona fyakwe fyalipolele. 4Elo amwebele ati, “Umfwa, tekweshapo ukubusha umuntu nangu umo. Koya bwaka ukayilange kuli chipupila, utwale ichipupo icho Mosesi amwebele ukwebati chibe bumwanamboni kuli bonse ukuti ulipolele nachine.”#Ab.Lef. 14.1-32
Yesu aposha umubomfi wamukulu wabashilikali
(Luk. 7.1-10)
5Ulo Yesu ayinjile mu Kapenaumu, umukulu wabashilikali bachi Loma ayishile kuli Ye. Elo amupapatile ukuti amwafwe. 6Asosele ati, “Bashikulu, umubomfi wanji mulwele ukwinekantu kunanda.”
7Yesu amwebele ati, “Nkoyisa kumuposha.”
8Nomba umukulu wabashilikali ngulya ayasukile ati, “Iyowo, Bashikulu, nshilingilepo ukwebati mwise mwinjile munanda yanji. Soseni ishiwi bwaka, umubomfi wanji akopola. 9Pakuti nandibo ndikwete insambu ishafuma kubakulu banchito. Elo ndikwete abashilikali abo ntungulula. Nga naebapo umo ati, ‘Koya,’ naye kaya. Nakuli umbi ati, ‘Isa,’ naye kayisa. Nakumubomfi wanji nati, ‘Chita nchi,’ naye kachita.”
10Ulo Yesu aumfwile mfi, alishimbilwe nokusosa kuli bo abalikumukonka ati, “Nkomweba ichine nati, nshasangapo umuntu nangu umo mu Isilaeli uwachetekela nga ngu muntu. 11Abenji bakwisa ukufuma kumutule-suba nakumbonshi nokwikala pamo na Abulahamu, Isake elo na Yakobe pamutebeto mubufumu bwakumulu. 12Nomba abali nokuba Mubufumu bena bakuposwa panse, kumfishi. Nkulya kwakuba ukulila nokukwesanya ameno.” 13Ulo Yesu ashilile ukusosa mfi, aebele umukulu wabashilikali ati, “Koya, chichitike kubati nimo wachetekela.”
Penka panshita njilya, umubomfi wakwe alipolele.
Yesu aposha abantu abenji
(Mk. 1.29-34; Luk. 4.38-41)
14Ulo Yesu ayinjile munanda yakwa Petulo, abwene banafyala wakwa Petulo balilele pakuti balilwele, umubili walikukaba. 15Elo Yesu alibekete banafyala bakwa Petulo kuchisansa, penkapo balipolele. Bwangu-bwangu balimine batatikile ukumutebeta.
16Ulo kwali ichungulo, batwite abalwele abenji kuli Yesu pamo nambalya abali nemipashi iibi. Elo Yesu alibaposeshe bonse kwishiwi bwaka. Nabonse abali kulwala alibaposeshe. 17Achitile mfi pakuti chifikilishiwe ichasosele umusoseshi Esaya ati, “Ewatufumishe mukuchula nokuposha amalwele esu.”
Ukukonka Yesu
(Luk. 9.57-62)
18Pakubona amabumba ayenji alimushingulukile, Yesu asoseshe abakusambila bakwe ukwebati baabukile kwishilya lyaku bemba. 19Elo umusambishi umo uwa Mafunde akwa Mosesi ayile kuli Yesu nokumweba ati, “We musambishi, nalikukonka konse uko walikuya.”
20Elo Yesu amwasukile ati, “Bamumbwe balikwata imimba, nefyuni nafyo fyaliba nefinsa, kuntu Umwana wa Muntu takwatapo napakusamina umutwi.”
21Umo uwabakusambila bakwe asosele kuli Yesu ati, “Bashikulu, nsuminisheni mbale nje nkashike bata.”
22Nomba Yesu alimwasukile ati, “Iyowo, nkonka bwaka. Leka abafwa balokushika abafwa banabo.”
Yesu atalalika ichipupu namatamba-tamba
(Mk. 4.35-41; Luk. 8.22-25)
23Ulo Yesu ayinjile mubwato, abakusambila bakwe balimukonkele. 24Elo kwabukile ichipupu ichikulu muli bemba, ichakuti amatamba alikwinjila mubwato. Nomba Yesu ali mutulo. 25Abakusambila balimubushishe mutulo bati, “Bashikulu, tupulusheniko twafwa!”
26Elo Yesu aabasukile ati, “Mwe bakuchetekela kunini! Mba nindo mwabela nomwenso?” Elo ayimakene nokukalipila ichipupu namatamba, nafyo fyalitalele chelele!
27Abantu bonse balishimbilwe bati, “Ngoyu muntu aba shani uwakuti ichipupu namatamba fikomumfwila?”
Yesu aposha abalalume babili abayiketwe nemipashi iibi
(Mk. 5.1-20; Luk. 8.26-39)
28Ulo Yesu afikile kwishilya lyaku bemba, muchalo cha Gadala, akumenye abalalume babili abali nemipashi iibi, balikufuma kumanda. Bali abakali ichakuti takwalipo umuntu uwalikupita muli njilya nshila. 29Ulo babwene Yesu, balibilikishe bati, “We mwana waku Lesa, nindo ukofwaya kuli fwebo? Napo wayisa nkuno mukutuchusha nenshita ilingile tayilafika, bayi?”
30Nomba umukuni wankumba walikulya akatalamukila. 31Elo imipashi iibi yalimupapatile Yesu ati, “Kati mukofwaya ukutufumyamo, tusuminisheni tukenjile munkumba nshilya.”
32Yesu asosele kumipashi iibi nji ati, “Kamuya.” Epo yalifumine nokuya kwinjila munkumba. Elo umukuni wankumba walifulumukile pachinekami nokuya kuyipula muli bemba, nokunwena kawunwena.
33Bachembela balibutukile kumushi. Elo balilondolwele ifyachitikilwe kubalalume babili mbalya abali nemipashi iibi nakunkumba. 34Abantu bonse abamumushi balimine nokuya kukumanya Yesu. Ulo bamusangile, balimupapatile ukuti afumemo muchalo chabo.
Valið núna:
Mateyo 8: LalaNT
Áherslumerki
Deildu
Afrita
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.