Mateyo 3
3
Ukubilisha kwakwa Yohane Mubatishi
(Mk. 1.1-8; Luk. 3.1-18; Yoh. 1.19-28)
1Muli nshilya nshiku kwayishile Yohane Mubatishi, uwali kubilikisha muchiswebebe cha Yudeya ati, 2“Lapileni pantu ubufumu bwakumulu bwapalamina!” 3Yohane ngu ewo Esaya umusoseshi asoselepo ati,
“Umuntu akobilikisha muchiswebebe,
‘Wamyeni umusebo waku Bashikulu!
Lungamikeni bwino inshila yabo,
ukuti bese bendemo!’”#Esa. 40.3
4Yohane alikufwala ilaya ilyabililwe namasako angamila, nakambi nomushipi wampampa mumusana wakwe. Ichakulya chakwe chali ninshe nobuchi. 5Abantu abenji abamu Yelusalemu, nabamuchalo cha Yudeya, elo nabamumishi iyali mupepi na Yodani balishile kuli Yohane. 6Epo balikuyisosela amabifyo abo nokubatishiwa kuli Yohane mumulonga wa Yodani.
7Ulo Yohane abwene Abafalisi na Basaduki abenji bakoyisa mukubatishiwa, alisosele kuli bo ati, “Mwe bana bansoka mwe! Ninani wamuchenjeshe ukubutuka kubukali bwaku Lesa ubukoyisa? 8Chiteni ifintu ifyakulanga ukupilibuka kwamitima yenu. 9Elo mwilokuyibepapo mumitima yenu mwati, ‘Twaliba nashifwe Abulahamu. Nachine nkomweba ati, Lesa kuti aalula nga mabwe ukuti abe abana bakwa Abulahamu.’ 10Isembe lilibikilwe kale pamushu uukulu uuli onse uwachiti. Pakuti ichiti chonse ichitatwalapo ifitwalo ifiweme bakuchitema nokuchiposa mumulilo. 11Nebo nkomubatisha namenshi ichishibilo chakulanga ukuti mwalapila, kuntu uyo uwakwisa panuma yanji, akumubatisha ku Mupashi Wabuta nakumulilo. Alinchililepo ifiso. Nebo tanshilingilepo nokupinta inkwanda shakwe. 12Alikwete nolupe muminwe yakwe ulwakwelelako tiligu. Elo akututila tiligu mubutala bwakwe, kuntu imisungu mumulilo uutashimapo.”
Ukubatishiwa kwaku Yesu
(Mk. 1.9-11; Luk. 3.21-22)
13Pali njilya nshita Yesu afumine kuchalo cha Galili nokwisa kumulonga wa Yodani kuli Yohane mukubatishiwa. 14Elo Yohane afwayile ukumukanina ati, “Nine ningile ukubatishiwa kuli webo, mba wayisa shani kuli ne?”
15Nomba Yesu alimwasukile ati, “Leka chibele mwenkomo pali njino nshita, pakuti tufikilishe fyonse ifyo Lesa afwaya.” Elo Yohane asumine.
16Ulo Yesu ashilile ukubatishiwa, bwangu-bwangu alisubukile mumenshi. Mumulu mwalisukile, abwene Mupashi waku Lesa ukoyisa kubati ninkunda pali Ye. 17Elo ishiwi lyasosele ukufuma kumulu ati, “Ngu Emwana wanji uwatemwekwa, muli ye emo nkosekelela.”
Valið núna:
Mateyo 3: LalaNT
Áherslumerki
Deildu
Afrita
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.