MWANDUSO 12
12
Mulungu Komkema Ablam
1MNDEWA kamulongela Ablam, “Uhalawe kulawa muisi yako mwenyego, uwaleke ndugu zako na wanhu wa mng'anda ya tataako, uchole muisi yondanikulagusile. 2Nokutenda gweye uwe undewa mkulu. Nokumoteza na kuditenda twaga jako diwe kulu, avo kowa motelo ha wanhu wayagwe.
3Nowamoteza awo wokumoteza gweye,
Ila nowadukumiza awo wokudukumiza gweye.
Na kubitila gweye nowamoteza wanhu wa isi zose.”
4Avo Ablam kachola kamba MNDEWA viyamulongele, na Loti kachola hamoja na heyo. Ablam kakala na milao malongo saba na mitano kipigiti viyasegele kulawa Halani. 5Kamsola Salai mtwanzi wake, Loti mwana wa ndugu yake, na vinhu vose viyakalile navo na wanhu wose iyakalile nao ako Halani, wahalawa wachola Kanaani.
Kipigiti viwavikile Kanaani, 6Ablam kabita hagatigati ya isi mbaka Shekemu. Ako kuyekile ng'hambi yake hamgwazo wa biki kulu da mwaloni wa Mole. Kipigiti kija Wakanaani wakala wokala muisi ija. 7Viyakalile Shekemu, MNDEWA kamulawilila Ablam kamulongela, “Ino iyo isi yondanilugwelele lukolo lwako.” Avo hanhu haja Ablam kamzengela MNDEWA kilingo cha kulavila nhosa, MNDEWA ayo yamulawilile. 8Kulawa haja kagendelela na mwanza wake mbaka isi ya vigongovigongo ng'ambu ya ulawilo wa zua wa Beteli na kwika ng'hambi yake hagatigati ya Beteli na Ai. Beteli ikala ng'ambu ya uswelo wa zua, na Ai ikala ng'ambu ya ulawilo wa zua. Hanhu haja kamzengela MNDEWA kilingo cha kulavila nhosa na kumtambikila. 9Abaho Ablam kahalawa, kagendelela na mwanza wake, kachola Negebu.
Ablam Muisi ya Misili
10Kipigiti hicho kukala na nzala muisi, Ablam kachola Misili na kukala mkipigiti kiguhi kamba muhenza, kwavija nzala ikala mpamanho. 11Viwakalile behi kwingila Misili, Ablam kamulongela Salai mtwanzi wake, “Nivitanga kamba gweye kwa mtwanzi unogile ng'hani. 12Wamisili wahakona gweye, wolonga, ‘Ino mtwanzi wake.’ Abaho nie wong'homa, ila gweye wokuleka uwe mgima. 13Walongele kamba gweye kwa lumbu jangu, avo sama yako gweye wondeka niwe mgima na kunhendele ganogile.” 14Ablam viyavikile Misili, Wamisili wamona Salai kamba kakala mtwanzi yanogile ng'hani. 15Na salange wa Falao#12:15 Falao nhegulo yake mndewa wa Misili. viwamuwene, wamtogola haulongozi wake. Avo Falao kamsola kamgala kuding'anda jake da kindewa giladi yawe imwe wa watwanzi zake. 16Sama yake, Falao kamtendela Ablam ganogile, kamgwelela madale ga ng'hondolo, menhe, ng'ombe, mhunda, nyakadala, na ngamia.
17Ila MNDEWA kamtoa Falao na mitamu ihile ng'hani, heyo hamoja na wanhu wa ng'anda yake, sama ya Falao kumsola Salai mtwanzi wa Ablam. 18Avo Falao kamkema Ablam, kamulongela, “Choni kino chuunitendele? Habali hunilongele kamba heyo kakala mtwanzi wako? 19Habali ulongile kamba kakala lumbu jako, na kunileka nie nimsole yawe mtwanzi wangu? Mtwanzi wako ino hano, msole uchole!” 20Abaho Falao kawalagiza wanhu zake wamsegeze Ablam na kumulava hanze ya isi ija, heyo hamoja na mtwanzi wake na kila kinhu kiyakalilenacho.
Valið núna:
MWANDUSO 12: Kizalamo
Áherslumerki
Deildu
Afrita
Want to have your highlights saved across all your devices? Sign up or sign in
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators