Mat 4
4
Ozimizi ye efeke Yesu edi
1Lɛ Aya yɛ Ɔfuɛfuɛ nɔ ɛgbani Yesu i tsinɔ ní ɔyaya klɔ tɔ Ozimizi ye ofeke ye odi i. 2Agi Yesu aza kuʋɛ ewe avitene elesi ni kemize pɔ́ ɛ, kuʋɛ kwiku ye. 3Lɛ Ozimizi ye aba yɛ klɔ ɔ; lɛ asi yɛ si, “Xe Aya Yebi wonu i, kɔlɔ ki tɔ akla la ya edzì bidɔŋaŋa aki wɔ.”
4Pɔ̀ Yesu ebu lɛ onu si, “Aya Liboe le lipani si, aní lìklãtata tete aʋa ɔnɔ aaze ligbã́. Pɔ̀ ɔnɔ aaze ligbã ní liboe kakaaɛ lɛ gi Aya aapani onu u.”
5Lɛ Ozimizi ye atsini Yesu ní Yerusalem, ɔma dradra lɔ mɛ ɛ; lɛ atrɔ yɛ ní lisɔligba lɛ lɛ ɔpiɔpiɔ klɔ kee e. 6Niklɔ asi Yesu si, “Xe Aya Yebi wonu i, pí atɔ dɔ kesea; lɛ ese linu si Aya Liboe le lipani i plɛ si,
‘Aya aaki yɛ baxwɛdzɛ ba ɔsã ní wɔ su
gi biasɔli wɔ ní ba kuwlaa mɛ ɛ,
nite si wɔ́trakɔ ɔkli isa likla a.’ ”
7Yesu ebu le onu si, “Pɔ̀ Aya Liboe le lipani dzɛ si, ‘Ɔkaɛ gi onu wɔ Aya ɛ, wukífeke ye edi i.’ ”
8Lɛ dzɛ ɛ, Ozimizi ye atsini Yesu ní lito gyɔgyɔ ɛtɔ aʋa a. Lɛ ebu kelea mɛ bèkusi ʋa pɔ́ ani ba kuʋidi yo abasi yɛ. 9Lɛ Ozimizi ye asi yɛ si, “Xegi wodu aklamasi kese xe wɔkpɔ̀ mɛ ɛ, maakɔ bekusi ʋa ya petee ɔki wɔ ɔ.”
10Lɛ Yesu ebu lɛ onu si, “Sɛ ní mɛ su, Wɔ Satana, Liboe le lipani si, ‘Ɔkaɛ gi onu wɔ Aya ɛ, yɛ ko wɔasumu; lɛ yɛ lixwɛ ko wɔawa a!’ ”
11Nite si Ozimizi ye asɛ ní Yesu su; lɛ Aya yɛ baxwɛdzɛ ba bɛba ɛki yɛ kupɔnɔ ɛ.
Yesu ekpese yɛ axwɛ na ní Galilea
12Agi Yesu enu si bɛkpɛ Yohanes ni ligba lɛ ɛ, atrɛ ní Galilea. 13Asɛ ní Nazaret lɛ adzɛ eze ní Kapernaum, gi onu ɔma ɔtɔ ní Galilea limu ne kutu ní Zebulon ni Naftali kuseo me e. 14Nite yɛ kigaglaɛ kize, atɔ Yesaya Aya yɛ oboedoplɛɛ yɛ liboe le liba lɛ mɛ si,
15“Zebulon kesea ni Naftali kesea,
kuse gi kuli axu la kudeo aʋa ɛ ní Yordan kewetu ya,
Galilea, banama gi bénu Yudanɛ ma ba kese!
16Banama gi balɛ ní litumu ne me e,
biamɔ kuklekle ʋidi.
Lɛ banama gi bali ní kutseo litumu ne kesea aʋa a,
kuklekle kwiaba ba aʋa a.”
17Dɔnɔ ní lipoe lɛ klɔ aʋa ɛ, Yesu ekpese kusɔli si, “Mlekyi kede akpɛ mlɔ eboe zimizi na, lɛ ese linu si lifunu ne kaʋaŋaa ketii pɔnɔ!”
Yesu axwa yɛ badɔkpasi tɔpu ba
18Agi Yesu azɛɛga aza ní Galilea limu ne kutu yɔ ɛ, amɔ beneminyime tiaʋa gi benu bakpábu i. Simon gi bɛzɛxwa fɛ si Petro e, ni yenemi ye Andrea. Bezee bu akpa la nì dzikle. 19Lɛ Yesu asi ba si, “Mlekuni mɛ kude tɔ mabasɛ mlɔ banima kubúbú yo.” 20Kyɔŋ lɛ bɛyurɔ ba dzikle lɛ bekuni yɛ kude e.
21Yesu atrɛ ní ɔtɔ nɔ lɛ azɛɛmɔ beneminyime tiaʋa dzedze e. Ba beze Yakobo ni Yohanes, gi benu Zebedeo yɛ bebi ba. Beze ní ba katapokpa me ni ba ɔkaɛ gi bɛzɛlulɔ ba dzikle ye e. Niteme si Yesu axwa ba kyɛ. 22Kyɔŋ klɔ ko e, bɛsɛ ní katapokpa ni ba ɔkaɛ su lɛ bekuni ni Yesu kude e.
Yesu abasɛ bidɔ, apani Liboe Gbã nɛ, lɛ ayɔni banyanya ʋa kyɛ ɛ
23Yesu aklanɔ ní Galilea petee. Abasi bidɔ ní Yudanɛ ma itsa klɔ. Apani Kaʋaŋaa su Liboe Gbã nɛ, lɛ ayɔni banama su gi bànya ede ede na eze e. 24Benu Yesu unu ní Siria kesea petee me nite si banima bɛmani banyanya ba petee ní yɛ klɔ dɔni ikɔ ikɔ lɛ. Bɛzɛnyà bànya ede ede: kusutà, ifuɛfuɛ zimizi, kukpakpanya ani ɔnɔse kapɛ tiele kutsetse. Lɛ Yesu ayɔni ba petee e. 25Anɔkpi la ɛdɔ Galilea, Dekapolis, Yerusalem, Yudea ani kuseo liɔ klɔ gi kuli ní Yɔdan kewetu ya ɛ, ekuni yɛ kude.
Valið núna:
Mat 4: avn
Áherslumerki
Deildu
Afrita
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc