Luglaa 15
15
Kɔraawiizi ni Abram nuukpaŋ ɛɛi wia
1Annii tuna, Kɔraawiizi faa ba Abram be lugɔ deeza biini, di wa ŋɔ,
“Gilɛɛ ra ɔm.
Minuu i guuri
lugɔ laal pɛrɛtuzeŋ.
N daŋ tɛi kinturgaa
werge maa.”
2Ka Abram ŋɔ, “Oo, Kɔraawiizi La N Kaali Kummaa, ɛrɛɛ wessi ni tɔnaa i hiinaa naa maa dɔɔ tɛŋ, miŋ waa bie dɔɔwɛi? Di n wa siuwɔ, n balii Ɛliɛza n lii Damaskusii niŋ di n kapɛttɛ naa maa.#Room 4:18-22 3Hiŋ wan tɛɛwɛ bie maa naa, n balaa naa bɛllɛ niŋ di n kapɛttɛ.”
4Denii Kɔraawiizi ŋɔ u be, “Akai, i balii naa wàá birgi i kapɛttɛ diiri. N daŋ tɛi i himmaa biibaal, u di i kapɛttɛ maa.” 5Denii Kɔraawiizi gil Abram lii hamuŋa ni, u ŋɔ u be, “Binni chiŋ di kur chinchiŋwilaa naa maa n du de. Gunnɛ í naanna wa du kpil, ba wàá dɔɔ maga la.”#Gbɔg 1:10
6Aŋ wa ɛɛ guŋ, Abram jaa yardi Kɔraawiizi. Awia, Kɔraawiizi kuu guŋ wia di gil u wia deŋli u be.#Room 4:3
7Denii Kɔraawiizi kaa ŋɔ u be, “Minuu Kɔraawiizi la n lizii lii Ur la n du Babilɔn hɛri la, ń wa kpa hɛri naa tɛi.”#Lug 11:31
8Ka Abram bir ŋɔ, “Kɔraawiizi la N Kaali Kummaa, ɛrɛɛ ń wer zum lugɔ i daŋ ɛɛ guŋ tɛnnɛi?”
9Kɔraawiizi ŋɔ u be, “Nyiŋŋi nalor, bulor ani pebalee, n di binni ahorgaa, komma ani erimpɔl wa tɛŋ.”
10Abram nyiŋŋi a sela naa di kpua tɛɛ Kɔraawiizi, ka jaa lawaa chaahzi dauri. Ama, u faa waa zumbizi lawaa chaahzɛɛ. 11Duuni faa tuu á dia, ka Abram duŋŋaa.
12Bɔr n wa duanɛɛ wiizi ra zuu, Abram chɔɔ dɔbɛrii. Bɔbiri limpiriŋ wia n dɔɔ ɔnsii wa tɔ u ni, ɔnsii werge lawuu. 13Denii Kɔraawiizi ŋɔ u be, “I naanna daŋ ɛɛ hɔɔhra du nɛra baŋhina hɛri, a nɛra kpa baa birgi yoma, di ɛɛ baa wichɔgaa binni kalfaanaazu.#Lii 1:1-14 14Ama, n daŋ tɛr hɛri la hina n niŋ ɛɛ gunla digna werge maa. Ka guŋ n niŋ wa ɛɛ tuŋ, i nɛra daŋ jaa kpa daama werge maa lii de.#Lii 12:37-40 15Hiŋwaa daŋ zɛŋ nɛnnɛ ka siu, bá hugii i la i mɛɛwaa be ani bampirsɔna. 16Jiminizi anaazu biinii i naanna bir ba a hɛri naa, dikuubɛɛwiai, Amɔri hina wichɔgaa haa waa a maga suwee.”
17Wiizi n wa zuuwɛ bɔr jaa biri, Abram na vii bɛl n wa chigɛ, nyɔɔzi ra lii u nua, ka kacheel ra lau niŋ, di ga sela la uŋ chaahzɛɛ dau la baambaaŋ di wa kaali. 18A hɔllɛ Kɔraawiizi faa gil u ni Abram ɛɛ nuukpaŋ, u ŋɔ u be, “N kpa hɛri naa maanii guŋŋ di ga chug Ijip hɛri magbɔɔ, di kaa ga lii Muu Yufretis,#Lii 3:8 19bɔr la Kɛn, Kɛniz, Kadmɔn, 20Hitti,#15:20 Hitti hina naabaal sɔnnɛ Hɛf. Pɛriz, Rɛfa, 21Amɔri, Keenan, Girgas ani Jɛbus hina maa n soge naa, di tɛɛ i ni i dee maa.”
Valið núna:
Luglaa 15: vag
Áherslumerki
Deildu
Afrita
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.