Tabekacane 12
12
Ku Twaumase wadawlu ki Aberame
1Ku Tamatama amia kai ki Aberame, “Lri katwasesu ki cekelesu, laretesanesu, si daane ki tamasu, mwa kwidra ki pelaelali muswane kwidra kadaengane. 2Lri patapangalaku ku lalalake si lagaganesu; lai lri kamani ku maadrau ka kuni. Lri subulrubulrwaku muswane, lai lri kitwadrau kwini naganesu; lu ngimia kikai, ku umawmase lri ngwalai muswane si kibaai ku akaesadhane.
3Ku swabulrubulru muswane, lri subulrubulrwaku iniane;
ku wapusu muswane, lri pusuaku iniane.
Lri pangukaiyaku muswane subulrubulru ki sanaka umawmase#12.3 “Lri pangukaiyaku muswane subulrubulru ki sanaka umawmase” ku wahunyake madu iya kai “Sanaka umawmase lri papia nakwane kitubi ku akaesadhane, mia ku tapatarumaraneli muswane ku akaesadhane”..”
4Ku Aberame satara 75 ku caili, pasusu ku tapelaelane ki Tamatama katwase Harange; ku Lute la tupapalra iniane. 5Ku Aberame wailuku ki taelrelreini ka Sarai, Lute ka lalake ki betakaneini si kwidra tacekecekelaneini ikai Harange si laduri makanaelre katwase papia Kanange.
Kwini lalasu sa darurunga ka Kanange, 6ku Aberame la pacungulu ku kadalranane lini, la kela Sekeme ka alrivilrivi ka taikaiyane, kwini adeethe kwidra ki tharialupu ka angatu Muri. (Sakamani kwidra ku swa Kanange yakaikaaiyana kwini.) 7Ku Tamatama la adrelane ki Aberame, la iya kai iniane, “Lri baadhaku kikai kadaengane ki mwabaibalrithi muswane.” Ku Aberame la ikai kwini ki taadrelanane iniane ki Twaumase raedre cegecege ku taluvale ka tapatarumaramarane. 8Sakabilrilane, la katwase papia tali lrawdru, mwa ka Bithele cekele tali talrawane lregelrege, kwini tali sapakalriwgu lregelrege mararaisi Bithele, ku tali talrawane adeethe Ai; kwi lasu yakai kwini tudaane ku tasuladhane, la raaedrenga ku taluvaale ku tapatarumaramarane, la sukubu ki Tamatama. 9Sa kawlainga, la katwase aru papia tali lrawdru ka Kanange.
Ku Aberame wadaruru Izipiti
10Kwini talikai Kanange la kipadradresenge ku silravane, ku tangimiane pakialringau turamuru. Ku Aberame la katwase papia tali lrawdru taluela, sa daruru ka Izipiti, lri padawdaalru ikai kwini. 11Kwi lalasu sa kela kwini ki pagiagisane, salri padaalrunga si kela ka Izipiti, ku Aberame la iya kai ki taelrelreini ka Sarai, “Kusu yai matharirisu kai tacebeanesu ka ababai, 12lu drele ku swa Izipiti muswane, taelrelre kikai ki lasu lri iya muswane, la lri ngwalai kai si papacai nakwane si paasuru muswane. 13Lri pelaelasu liniane, kunaku agiaku kikai ki lasu lri iyasu, kwi lalasu lri ngwalai muswane si pacepe ki niakeli, la lri musakene nakwane.” 14Sa lribate pagiagisane si mudaanenga Izipiti ku Aberame, ku swa Izipiti tengatengane drele kwini ki alisu ka mathariri turamuru ku tacebeane. 15Yakai ku kiacapili ki daane ki talialalai ku wadrele ki alisu, la icucubungu ki talialalai lrigu ku tharirane ki alisu; kwi alisu la kiiluku mwa ki daane ki talialalai. 16Ngwalai ki alisu, ku talialalai la pasudalru tubadhabadha ki Aberame, la baai iniane pakakaalra ku lwange, kiu, ruba, lrakeda si duri.
17Ai ku talialalai, ngwalai ku tamalrane iluku ki taelrelre ki Aberame ka Sarai, ku Tamatama la pulebe ku amatikurwane si pamatikuru ki talialalai si yakai ki daane ki talialalai ku umawmase; kwini lalasu la makitu kipucaemane ku matiukuludru ku caemane. 18Ku talialalai la dawlu ki Aberame, si kivaga iniane, “Asu pia kai nakwane? Asu kai pelaela nakwane ka taelrelresu kai ki alisu? 19Agili asu iya iniane, la kirimwaku malra iniane sitaelrelre? Kawvai taelrelresu yakai kai, iluka iniane si katwase!” 20Ku talialalai la drekase kwini ki maecebe iniane ka sasiakawlu, pakatwasa ki Aberame kai ki cekele; kwini lalasu la malra iniane si taelrelreini, si lamanemaneini pailuku pakatwase.
Valið núna:
Tabekacane 12: NDV
Áherslumerki
Deildu
Afrita
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017