Ibeb 2
2
1Ikeyi ke Awaji osa irom inyọn̄ mè ijọn̄ mè urum inu geelek òkup me emen kiban̄ isan̄a.
Òso usen jaaba: Awaji îsiki efuuk
2Me òso usen jaaba, Awaji îwuuk lek isi ikwaan̄ kan̄ otutuuk isan̄a kpai. Awaji osisiki efuuk me òso usen jaaba ya, ìkasi ikwaan̄ geege usen ya. 3Awaji ogbagbana òso usen jaaba, mè isun̄ usen ya me mbuban, mije, îre me usen ya ke îsiki efuuk mgbọ îrombe otutuuk inu isan̄a.
Adasi enerieen̄ mè adasi enenwaan̄
4Mfufuk ubọk Awaji osabe irom inyọn̄ mè ijọn̄ ìje ikeyi:
Mgbọ Okumugwem Awaji orombe inyọn̄ mè ijọn̄, 5mbubet mè uti òkup me oron geege ìkatibi ìsibi-nu me inyọn̄ ijọn̄, mije, Okumugwem Awaji ìkaria-nu ibot mè mbat ìgwook me linyọn̄. Mgbọ ya si, kpunu ene geege òkirọkọ ijọn̄ iwop mfut. 6Àbaan̄ ibot okekinan̄a me irak ijọn̄ isibi, mè inikireke otutuuk inyọn̄ ijọn̄. 7Okumugwem Awaji onenisa mfuun̄ ijọn̄ irom enerieen̄,#2:7 Me usem Iburu, ekigwen ene ‘adam’, eyi òkitaan̄ si kubọk erieen̄ ebi Iburu ekigwen ijọn̄, òrere ‘adama.’ Eyi si ore erieen̄ kè Adam. mè ifuuk efuuk ugwem itap me udọn̄ inwọm iba kan̄, ogwu enerieen̄ ya okakana ogwu òkiluluk ugwem.
8Okumugwem Awaji îwop uko ge me agan̄ mbum-ura me ere ekigwen Iden. Emen uko ya ke îtap ogwu enerieen̄ ya îrombe. 9Okumugwem Awaji orọrọ mè owuwa ujuja uti òkup esese esese mè ikito esese chieen̄ mfut ònwọnwọn irerie, itibi isibi me ijọn̄ me emen uko ya. Me eden̄ uko ya si, uti òkinyi ene ugwem melek uti òkirọ inyi ene iriọọn̄ ata inu mè ijo inu òwa okekebe.
10Îkaan̄ okwaan̄ ge òkup me Iden, eyi mun̄ kan̄ okilibi inireke uko ya. Okwaan̄ yi isisibi me Iden, ibubum ikana okwaan̄ ini. 11Adasi me lek okwaan̄ ini cha, eyi ekigwen Pisọn, ìje kọnọkọnọkọnọ itibi otutuuk inyọn̄ ijọn̄ ekigwen Abila, ere alata araran̄ okupbe. 12Alata araran̄ òkup me inyọn̄ ijọn̄ ya ìre eyi atata kan̄. Mgbe utop olu ekigwen bideliọm, mè ewuuk unye otu ewe ekigwen onikisi òwa si me irak ijọn̄ ya. 13Okwaan̄ eyi òso iba eyi ekigwen Giyọn ìkukọnọ itibi otutuuk inyọn̄ ijọn̄ ekigwen Kus.#2:13 Kus ore ido Etiopia. 14Okwaan̄ eyi òso ita eyi ekigwen Tigiris#2:14 Tigiris me usem Iburu ìre Idekeli. ìje itibi me agan̄ mbum-ura eyi ama Asuru.#2:14 Asuru ìre ama ibot me ido Asiria. Okwaan̄ eyi òso ini ke ekigwen Yuferetis.
15Okumugwem Awaji osasa enerieen̄ ya isi itap me emen uko Iden ibe ikisi ikwaan̄ me emen, mè ikikpọ chieen̄ me lek. 16Okumugwem Awaji onyinyi ogwu enerieen̄ ya ikan ibe, “Owu môkọt irie mfut uti geelek òkup me emen uko yi. 17Ire, mfut ònan̄a me lek uti eyi òkirọ inyi ene iriọọn̄ ata inu mè ijo inu, karie. Mije, mgbọ geelek owu môriebe mfut uti ya, owu òkpolọlọ ikwukwu.”
18Mgbọ eya orakabe, Okumugwem Awaji onenitumu ibe, “Ìkanwọn ibe ogwu enerieen̄ yi ikup ọmọ gaalek. Mârom ogwu ntap-ubọk ògbegbe inyi.”
19Okumugwem Awaji ìsa ntitaak ijọn̄ irom esese chieen̄ anam geelek mè unọn geelek. Inenisa ema otutuuk inu me lek ogwu enerieen̄ ya òrere Adam ibe inyi erieen̄. Erieen̄ geelek Adam onyibe anam geelek mè ofut geelek, eya ore erieen̄ keya. 20Ikeya ke enerieen̄ ya osa inyi otutuuk anam uwu geelek, mè otutuuk anam oron geelek, mè otutuuk unọn geelek erieen̄ iso.
Ire, me etete anam chi mè unọn chi, kpunu geege ògbegbe irere ogwu ntap-ubọk inyi ogwu enerieen̄ ya. 21Mije keya, Okumugwem Awaji orọrọ inyi uga ilaak ikeme ogwu enerieen̄ ya. Me mgbọ îkilaak, Okumugwem Awaji osasan̄a mgbaramgbasi kan̄ ge, mè isa ufuk ichit agba nkan̄ kan̄ ere îsan̄abe mgbaramgbasi ya. 22Inenisa mgbaramgbasi ya îsan̄abe me lek ogwu enerieen̄ ya irom enenwaan̄, mè inisa ogwu enenwaan̄ ya ijet ogwu enerieen̄ ya. 23Ogwu enerieen̄ ya obebe,
“Chei, me mgbọ keyi,
ogwugwu ìre ukwuuk ònan̄a me lek ukwuuk n̄a,
mè ufuk ònan̄a me lek ufuk n̄a.
Mêkigwen ọmọ enenwaan̄,
mije, esan̄a ọmọ me lek enerieen̄ isibi.”
24Mije keyi, enerieen̄ geelek môtele ogwu ute mè ogwu uga, mè isa lek kan̄ ichim iriaak me lek ogwu nwa. Ema ene iba mênenikana ire akpalek ge.
25Ogwu enerieen̄ ya mè ogwu nwa ekup njak. Ire, esip geege ìkatet ema.
Valið núna:
Ibeb 2: ANNa
Áherslumerki
Deildu
Afrita
Want to have your highlights saved across all your devices? Sign up or sign in
© The Nigeria Bible Translation Trust, 2013