Матай 4
4
Исадынъ сыналувы
1Оннан сонъ Алладынъ Рухы Исады ибилиске сынатпага шоьлликке аькетти. 2Онда кырк куьн эм кырк кеше ораза тутканнан сонъ Иса бек ашыкканын сезди. 3Сонда азгырувшы#4:3 Азгырувшы: шайтан. Ога ювыкласып: «Сен Алладынъ Улы болсанъ, сосы тасларга оьтпек болмага буйыр», – деди.
4Иса ога явапка: «„Аьдем тек бир оьтпек пен яшамаяк, ама Алладынъ авызыннан келген аьр соьз бен яшаяк“, – деп те язылган», – деди.
5Оннан сонъ ибилис Исады кие шахарга#4:5 кие шахар: Ерусалим. алып келди. Оны Алла уьйининъ бийиклевине салып, Ога: 6«Сен Алладынъ Улы болсанъ, туьбине атыл! Аьше: „Алла Сени Оьз маьлеклерине аманат этер“, эм „Олар, аягынъды таска да тийгистпей, Сени колларында аькетерлер“, – деп язылган», – деди.
7Иса ога явапка: «Сондай болып: „Раббий Алланъды сынама“, – деп те язылган», – деди.
8Сонъында ибилис Исады айлак бийик тавга алып келди, оннан Исага дуныядынъ баьри эллеринде болган ярасыклыкларды коьрсетти: 9«Эгер Сен аягыма йыгылып, мага бас ийсенъ, солардынъ баьрисин де Сага берермен», – деди.
10Иса ога явапка: «Меннен тай, шайтан! „Раббий Алланъа бас ий эм тек Ога кылын“, – деп язылган», – деди.
11Сонда ибилис Оны калдырды. Исага маьлеклер келип, Ога ярдам эттилер.
Иса Ийги Хабарды айтып баслайды
12Яхъядынъ тутнакка салынганын эситкенде, Иса Галилеяга кайтты. 13Ол Назаретти калдырды эм Завулон ман Напталийдинъ ерлериндеги коьлдинъ касында орынласкан Капарнаумда ерлести. 14Соьйтип, Ешая пайхамбардынъ билдирген йорувы толтырылды: 15«Денъизге баратаган йолдагы, Йордан сувынынъ аргы ягындагы Завулон ман Напталий ери, баска миллетлер турувшы Галилея! 16Каранъалыкта яшайтаган халк уллы ярык коьрди. Оьлим куьлеткисининъ кушагындагы кыралда яшайтаганларга саьвле яркырады».
17Сосы вакыттан алып Иса: «Тевбе этинъиз, Алладынъ Патшалыгы#4:17 Алладынъ Патшалыгы: грекше „Коьк Патшалыгы“. энди ювыкта», – деп, Алладынъ соьзин айтып баслады.
Исадынъ биринши сокталары
18Бир кере Галилея коьлининъ бойы ман бараятырганда, Иса эки кардашты коьрди: сонъында Петер деген ат берилген Шимонды эм онынъ кардашы Эндрейди. Олар балыкшы болып, тап сол вакытта коьлге йылымды атып туры эдилер. 19«Мени мен келинъиз, – деди оларга Иса, – Мен сизди, балык ыслагандай, аьдем коьнъилин авламага уьйретермен!» 20Кардашлар, сол саьатлей йылымларын калдырып, Исадынъ ызыннан кеттилер.
21Бираз барганнан сонъ, Ол Зебедей уллары Якуп пан Яхъяды коьрди. Кайыкта аталары Зебедей мен йылымларын ямай эдилер. Иса оларды да шакырды. 22Сол саьатлей олар, кайыгын да, аталарын да калдырып, Исадынъ артыннан иердилер.
Исадынъ халкка кылынувы
23Иса буьтин Галилеяды айланды, синагогларда#4:23 синагогларда: ювыт табынув уьйи. окытты, Алла Патшалыгынынъ акында Ийги Хабарды айтып юрди эм аьдемлерди туьрли авырувлардан эм сакатлыклардан сав этти. 24Онынъ хабары буьтин Сирияга яйылды. Исага кайдай туьрли маразлыларды да аькелетаган болдылар: куьшли авырувдан кыйналатаганларды, йинлилерди, талма маразлыларды, паралич сокканларды. Эм Ол баьрисин де савартатаган эди. 25Исадынъ ызыннан, топарласып, Галилеядан, Декаполистен, Ерусалимнен, Юдеядан эм Йорданнынъ артындагы ердинъ тоьгерегиннен коьп аьдемлер келе эдилер.
Valið núna:
Матай 4: NOG
Áherslumerki
Deildu
Afrita
Want to have your highlights saved across all your devices? Sign up or sign in
© Институт перевода Библии, Москва, 2011