Matiyu 9
9
Yesu u potsokpoi ma̱kutsuma̱
(Mar. 2:1-12; Luk. 5:17-26)
1Yesu u uwai a kpantsu, ɗa u pasai mala ma o kubono a̱ likuci i ni. 2Ana u yawai ɗe, ɗa uma o yoku a̱ tuka̱i ni m ma̱kutsuma̱ a ivaꞋin a kajiba. Ana Yesu we enei uneki u ka̱ɗu u uma a nam pa, ɗa u danai ma̱kutsuma̱ ma, “Reme ka̱ɗu, kolobo. A cinukpaka wu ta̱ unushi u nu.”
3Ɗa nlum n Wila̱ n yoku n ka̱na̱i kusheshe uteku u le, “Vuma vu nam pa wi ta̱ o kubonoko ka̱ci ka̱ ni an Ka̱shile!”
4Yesu u yeve ta̱ ili i na i e kusheshe, ɗa we ecei le, “Yi ɗa̱i i zuwai ɗa yi e kusheshe ili i wuya nannai? 5Yi ɗa̱i i laꞋi n ɗevu, n dana baci, ‘A cinukpaka wu ta̱ unushi u nu,’ ko ‘Ɗenga̱ vu wala’? 6Mi ta̱ a kuyaꞋan nannai adama a na n yotsongu ɗa̱ a na mpa, Maku ma Vuma, mi ta̱ n utsura a aduniyan n cinukpa n unushi.” Ɗa Yesu u danai ma̱kutsuma̱ ma, “Ɗenga̱, ɗika kajiba ka̱ nu, ka̱ta̱ vu bono a kpaꞋa.” 7Ɗa ma̱kutsuma̱ ma̱ ɗenga̱i, ɗa u bonoi a kpaꞋa. 8Ana uma a enei nahannai, ɗa a yaꞋin mereve, ɗa a cikpai Ka̱shile a na u nekei vuma utsura tsu nam pa.
Yesu u zagbai Matiyu
(Mar. 2:13-17; Luk. 5:27-32)
9Ana Yesu u lyaꞋi kelime nu nwalu, ɗa we enei kishi ku utafu, kula ku ni ku ɗa Matiyu. A̱yi a̱ ida̱shi a̱ ubuta̱ u na u ci isa utafu. Yesu u danai ni, “Tono mu.” Ɗa ta na u ɗenga̱i ɗa u tonoi ni.
10M megeshe kenu, Yesu m mukumitoni n ni mi a kulyaꞋa ilikulyaꞋa a kpaꞋa ku Matiyu. A̱ ubuta̱ wa lo ishi a utafu n a̱bunda̱i i ta̱ lo n aza a̱ unushi o yoku. 11Ana Afarishi e enei nahannai, ɗa e ecei mukumitoni n Yesu, “Yi ɗa̱i i zuwai ɗa malum ma̱ ɗa̱ ma ci lyaꞋa ilikulyaꞋa n icuꞋu i uma i nan lo?”
12Yesu u panakai le ɗa u danai, “Aza a na i m ma̱ta̱na̱ a ikyamba i le a̱ tsu la̱nsa̱ vuza va̱ a̱guma̱ ba, amma aza a̱ mɓa̱la̱ a̱ tsu la̱nsa̱ ta̱. 13Bana i goɗumo ili i na Katagarda ka Ciɗa ki a kudansa ana ka danai, ‘A na ya yaꞋanka mu alyuka, n laꞋa ta̱ n kuciga i pana asuvayali a itoku i ɗa̱.’#Hos. 6:6. N ta̱wa̱ adama a na n ɗeke uma a singai o okpo aza o kutoni a̱ va̱ ba. N ta̱wa̱ ta̱ kuɗeke aza a̱ unushi.”
A yaꞋankai Yesu keci ku ka̱na̱ ku una̱
(Mar. 2:18-22; Luk. 5:33-39)
14Kanna ke te, mukumitoni n Yahaya Vuza vu Kusumbu ka Akucina a̱ ta̱wa̱i u Yesu, ɗa e ecei ni, “Yi ɗa̱i i zuwai ɗa a̱tsu n Afarishi tsu tsu ka̱na̱ una̱, amma mukumitoni n nu n ci yaꞋan ba?”
15Yesu wu ushuki, “A̱ja̱Ꞌa̱ a vuza vi yolo i savu a̱ tsu na̱mgba̱ ka̱tsuma̱ a̱yi lo n ele ba. Amma ayin i ta̱ lo a̱ kuta̱wa̱ ana vuza vi yolo i savu va a kuɗika yi, ka̱ta̱ e yeve a̱ ka̱na̱ una̱.
16“Babu vuza na u kupa̱ɗa̱ngu kuminya ku kuku n kakashi ka savu. Vuza u yaꞋan baci nannai, kakashi ka savu ka ki ta̱ o kusoꞋimkpo kuminya ku kuku ka. Wi ta̱ kpamu a kuzuwa kakashi ka ko doku ka karasaka lababa. 17Vuza kpamu u kutsungu ribinya e kedele ka̱ kuku ba. Vuza na baci u yaꞋin nannai, ribinya ya yi ta̱ o kuɓoso kedele ka, ka̱ta̱ u namba ribinya ya n kedele ka dem. Amma a̱ tsu tsungu ta̱ ribinya e kedele ka savu. Ka̱ta̱ dem vi le a lyaꞋa kelime n kokpo n ugaꞋin.”
Mekere ma na ma̱ kuwa̱i n vuka vu kulolo mpasa
(Mar. 5:21-43; Luk. 8:40-56)
18Yesu biꞋi a kadanshi, ɗa vuzagbayin vu kunu ka avasa u ta̱wa̱i wa̱ ni. U kuɗa̱ngi e kelime ke Yesu ɗa u danai, “Mekere ma̱ va̱ ma̱ kuwa̱ ta̱ gogo na. Amma vu ta̱wa̱ baci, ɗa vu zuwakai ni kukiye ku nu, wi ta̱ o kubono n wuma kpamu.” 19Ɗa Yesu m mukumitoni n ni a̱ ɗenga̱i, ɗa a lazai koɓolo n vuzagbayin va.
20Ɗa vuka vi yoku, vu na vi o kusoꞋo atakaci n kulolo ku mpasa ali a̱ya̱ kupa n e re, u tonoi Yesu n kucina̱, ɗa u saꞋwai kocombo ka kuminya ku ni. 21Kusheshe ku ni ku ɗaɗa, “Mi baci de an ma̱ ciya̱ ma saꞋwa kuminya ku ni ka buwa ba, mi ta̱ o kupotso.”
22Yesu u kpatalai ɗa we enei ni, ɗa u danai, “Mekere, reme ka̱ɗu! Uneki u ka̱ɗu u nu u zuwa wu ta̱ vu potso.” GogoꞋo va lo ɗa ta na vuka va vu potsoi.
23Ɗa Yesu u lyaꞋi kelime nu nwalu n vuzagbayin va ali ɗa u banai a kpaꞋa ku ni. Punu a kpaꞋa ɗa u cinai a̱liki a ishari n aza o yoku n a̱bunda̱i a̱ ma̱shi. 24Ɗa Yesu u danai, “Uta̱i pulai, ra̱ka̱ vu ɗa̱! Maku me mekere ma ukpa̱ u ɗa yi ba. Alavu a ɗa yi koci!” Amma ɗa a o zoꞋosoi ni. 25Amma ana o lokoi ka̱bunda̱i ka uma ka a̱ uta̱ka̱i pulai, ɗa Yesu u banai a̱ ubuta̱ u na mekere ma mi ivaꞋin. U ka̱na̱i kukiye ku ni, ɗa mekere ma ma̱ ɗenga̱i kashani. 26Ɗa arabali a kakuna ka nan lo a̱ ka̱ra̱Ꞌi ra̱ka̱ a ukambu wa.
Yesu u potsokpoi a̱yimba̱ e re
27Ana Yesu u lyaꞋi kelime nu nwalu n ni, ɗa a̱yimba̱ e re a̱ gita̱i kutono yi. Ɗa o orukpoi, “Maku ma Dawuda, pana asuvayali a̱ tsu!”
28Ana u uwai a kpaꞋa, ɗa a̱yimba̱ e re a a̱ ta̱wa̱i wa̱ ni. Ɗa we ecei le, “I neke ta̱ a̱ɗu a na mi a kufuɗa ma zuwa ɗa̱ ye ene?”
Ɗa a̱ ushuki, “E, Vuzagbayin.”
29Ɗa u saꞋwai a̱shi e le, ɗa u danai, “Adama uneki wa̱ a̱ɗu u ɗa̱, ki ta̱ o kokpo nannai.” 30Ɗa uma a a fuɗai e enei ubuta̱ gogo va lo. Amma ɗa Yesu u kushei le n utsura, u danai, “Ka̱ta̱ i dana vuza ukuna u nam pa wa ba.” 31Amma ɗa a lazai ɗa a yaꞋin kadanshi ka̱ ni u yaba dem vu na wi a ukambu u nan lo.
Yesu u potsokpoi vuma vu na u fuɗai u dansai ba
32Ana Yesu m mukumitoni n ni i a kulaza, ɗa a gasai n uma a na a̱ tuka̱i ni n vuma vi yoku. Wunla̱i u gbani-gbani u na wi o kutono yi u zuwai vuma va u kpa̱ɗa̱i kufuɗa kudansa. 33Ana Yesu u lokoi wunla̱i u gbani-gbani wa, ɗa vuma va u fuɗai u yaꞋin kadanshi. Ɗa ka̱bunda̱i ka uma ka ka yaꞋin mereve, ɗa a danai, “Ka̱ta̱ ce ene ili i nahannai a Israila ba.”
34Amma ɗa Afarishi a danai, “Mogono ma̱ wunla̱i u gbani-gbani maꞋa me nekei ni utsura u loko wunla̱i u gbani-gbani.”
Yesu u panai asuvayali a uma
(Mar. 1:39; Luk. 4:44)
35Yesu u lyaꞋi kelime n ka̱ka̱ra̱sa̱ n we enei likuci n akamba a na uma i dem. U yaꞋin kuyotsongusu a̱ unu a avasa, ɗa u yaꞋin kadanshi ka Arabali a Singai o tsugono tsu Ka̱shile, ɗa u potsokpoi uma a na i n iɓa̱lishi nu mɓa̱la̱ kakau. 36Ana we enei ka̱bunda̱i ka uma ka, ɗa ka̱ɗu ka̱ ni ka shanai n asuvayali adama e le, adama a na i ta̱ utambalukpi babu kufuɗa kuɓa̱nka̱ ka̱ci ke le, an nlala n na mi babu maguɓi. 37Ɗa u danai mukumitoni n ni, “VikyaꞋa va vi yimkpa ta̱, amma aza a ulinga a̱ gusa̱ ta̱. 38YaꞋin kavasa i folono Vuzagbayin vi vikyaꞋa va, u suku aza a ulinga a kashina ka̱ ni.”
Valið núna:
Matiyu 9: asgNT
Áherslumerki
Deildu
Afrita
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved