Noo Ean 7
7
CAB. VII
1Ny lurg shoh duirree Yeesey ayns Galilee: son cha row eh booiagh cummal ayns Judea, er-yn-oyr dy row ny Hewnyn shirrey eh y varroo. 2Nish va feailley cabbaneyn ny Hewnyn er-gerrey. 3Dooyrt e vraaraghyn er-y-fa shen rish, Faag y voayl shoh, as immee gys Judea, dy vod ny eiyrtee t’ayd ayns shen myrgeddin fakin ny obbraghyn t’ou dy yannoo. 4Son cha vel dooinney erbee freayll e obbraghyn follit, as eh-hene shirrey dy ve cronnal: My t’ou jannoo ny reddyn shoh soilshee oo hene da’n theihll. 5Son chamoo ren e vraaraghyn hene credjal ayn. 6Eisht dooyrt Yeesey roo, Cha vel my hraa’s foast er jeet: agh ta’n traa euish dy kinjagh jesh diu. 7Cha vod y seihll dwoaie y chur diuish, agh dooys te cur dwoaie; er-yn-oyr dy vel mee gymmyrkey feanish jeh, dy vel ny obbraghyn echey olk. 8Immee-jee shiuish seose gys y feailley shoh: cha vel mish son goll seose foast gys y feailley shoh, er-yn-oyr nagh vel my hraa foast er jeet. 9Tra v’eh er ghra ny goan shoh roo, duirree eh myr v’eh ayns Galilee.
10Agh tra va e vraaraghyn er gholl seose, eisht hie eshyn myrgeddin seose gys y feailley, cha nee dy foshlit, agh myr dy beagh eh dy follit. 11Eisht va ny Hewnyn briaght er e hon ec y feailley, as dooyrt ad, Cre vel eh? 12As va lane argane mastey yn pobble mychione echey: son va paart gra, She dooinney mie eh: as feallagh elley gra, Cha nee; agh t’eh molley yn pobble. 13Ny-yeih, cha loayr dooinney erbee dy foshlit jeh, goaill aggle roish ny Hewnyn.
14Nish mysh mean y feailley, hie Yeesey seose gys y chiamble, as dynsee eh. 15As ghow ny Hewnyn yindys, gra, Kys ta lheid yn ynsagh ec y dooinney shoh, nagh row eh-hene rieau ynsit? 16Dreggyr Yeesey ad, as dooyrt eh, Cha vel my ynsagh lhiam pene, agh leshyn t’er my choyrt. 17My vees dooinney erbee aggindagh yn aigney echeysyn y yannoo, yiow eh toiggal jeh’n ynsagh, nee veih Jee te, ny vel mee loayrt jee’m pene. 18Eshyn ta loayrt jeh hene, t’eh shirrey e ooashley hene: agh eshyn ta shirrey yn ooashley echeysyn t’er choyrt eh, t’eh shen firrinagh, as cha vel neu-chairys erbee ayn. 19Nagh dug Moses yn leigh diu, as cha vel fer j’iu freayll yn leigh? Cre’n-fa ta shiu shirrey my vioys y ghoaill? 20Dreggyr y pobble eh, as dooyrt ad, Ta drogh-spyrryd breagagh aynyd: Quoi ta shirrey dty vioys y ghoaill? 21Dreggyr Yeesey as dooyrt eh roo, Ta mish er n’yannoo yn un obbyr shoh, as ta shiu ooilley goaill yindys. 22Hug Moses er-y-fa shen yn giarey-chymmylt diu, (cha nee son dy vel eh jeh Moses, agh jeh ny ayraghyn) as ta shiu er laa yn doonaght giarey-chymmylt dooinney. 23My ta dooinney er y doonaght goaill giarey-chymmylt, son nagh bee leigh Voses er ny vrishey; vel shiuish jymmoosagh rhym’s, son dy vel mee er n’yannoo dooinney ooilley magh slane er y doonaght? 24Ny jean-jee briwnys rere yn caslys, agh jean-jee briwnys cairagh. 25Eisht dooyrt paart jeusyn va veih Jerusalem, Nagh nee shoh eh t’ad shirrey dy varroo? 26Agh cur-my-ner, t’eh loayrt dy foshlit, as cha vel ad gra veg n’oï: vel dy jarroo fys ec ny fir-reill dy nee shoh yn Creest firrinagh? 27Ny-yeih ta enney ain er y dooinney shoh cre-voish t’eh: agh tra hig Creest, cha bee fys ec dooinney erbee cre-voish t’eh. 28Eisht deïe Yeesey ayns y chiamble myr v’eh gynsaghey, gra, Ta chammah enney eu orrym’s, as ta fys eu cre-voish ta mee: as cha vel mish er jeet jee’m pene, agh t’eshyn t’er ny choyrt firrinagh, eshyn cha nione diu. 29Agh shione dooys eh, son ta mee veih, as t’eh er my choyrt. 30Eisht v’ad shirrey y ghoaill eh: agh cha dug dooinney erbee laue er, son nagh row yn oor echey foast er jeet. 31As ren ymmodee jeh’n pobble credjal ayn, as dooyrt ad, Tra hig Creest, jean eh ny shlee mirril na ad shoh ta’n dooinney shoh er n’yannoo?
32Cheayll ny Phariseeyn dy row yn pobble tallagh myr shoh my-e-chione: as hug ny Phariseeyn as ny ard-saggyrtyn magh sidooryn dy ghoaill eh. 33Eisht dooyrt Yeesey roo, Foast tammylt beg ta mish mêriu, as eisht ta mee goll huggeysyn t’er my choyrt. 34Shirree shiu mee agh cha vow shiu mee: as y raad ta mish, cha vod shiuish cheet. 35Eisht dooyrt ny Hewnyn nyn mast’ oc hene, C’raad hed eh, nagh vow mayd eh? jed eh gys ny Hewnyn t’er nyn skeayley mastey ny Ashoonee, as adsyn y ynsaghey? 36Cre’n monney dy raa shoh t’eh er loayrt, Shirree shiu mee, agh cha vow shiu mee: as y raad ta mish cha vod shiuish cheet? 37Er y laa s’jerree, laa mooar ny feailley, hass Yeesey, as deïe eh, gra, My ta dooinney erbee paagh, lhig da cheet hym’s as giu. 38Eshyn ta credjal aynym’s, myr ta’n scriptyr er ghra, Ass y chree echeysyn roieys strooanyn dy ushtey bio. 39(Agh shoh loayr eh jeh’n Spyrryd, v’adsyn va credjal ayn ry-hoi gheddyn: son cha row yn Spyrryd Noo foast er ny choyrt, er-yn-oyr nagh row Yeesey foast er ny ghloyraghey.)
40Dooyrt ymmodee jeh’n pobble er-y-fa shen, tra cheayll ad y raa shoh, Ayns firrinys shoh yn phadeyr. 41Dooyrt feallagh elley, She shoh yn Creest. Agh dooyrt paart, Jig Creest ass Galilee? 42Nagh vel y scriptyr er ghra, Dy#7.42 for Dy read dy vel Creest dy heet jeh sluight Ghavid, as ass y balley Bethlehem, raad ruggyr David? 43Myr shen va streeu mastey’n pobble mychione echey. 44As va paart jeu son goaill eh; agh cha dug dooinney jeu laue er.
45Eisht haink ny sidooryn gys ny ard-saggyrtyn as ny Phariseeyn, dooyrt roo, Cre’n-fa nagh dug shiu lhieu eh? 46Dreggyr ny sidooryn, Cha ren rieau dooinney loayrt myr y dooinney shoh. 47Eisht dreggyr ny Phariseeyn ad, Vel shiuish myrgeddin er nyn molley? 48Vel veg jeh ny fir-reill, as jeh ny Phariseeyn er chredjal ayn? 49Agh ta’n pobble shoh, nagh vel toiggal yn leigh, fo mollaght. 50Dooyrt Nicodemus roo (eh haink gys Yeesey ayns yn oie, v’eh fer jeusyn), 51Vel y leigh ainyn deyrey dooinney erbee roish clashtyn y choyrt da, as prowal oc n’oï cre t’eh er n’yannoo? 52Dreggyr adsyn, as dooyrt ad rish, Nee ass Galilee t’ou uss myrgeddin? jean-jee ronsaghey as jeeaghyn: son cha vel phadeyr erbee er droggal ayns Galilee. 53As jimmee dy chooilley ghooinney roish gys e hie hene.
Valið núna:
Noo Ean 7: NEan
Áherslumerki
Deildu
Afrita
Want to have your highlights saved across all your devices? Sign up or sign in
© Sheshaght y Vible 1936, 2017
© British and Foreign Bible Society 1936, 2017